يوحنای انجیل 9
9
عیسی یکته کورِ مادرزادِ شفا دِئنه
1عیسی راه میئن شؤدبو که یکته کورِ مادرزادِ بدِه. 2شاگردؤن اونای بپورسئن: «اوستاد، کی گوناه بوده که ایی مردکای کور بدونیا بومه؟ خودُش گوناه بوده یا اونه پئر و مئر؟» 3عیسی جواب بدا: «نه ایی مردکه گناه بوده و نه اونه پئر و مَئر؛ بلکه ایطوری بوبُو تا خدا کارؤن اونه میئن آشکار ببی. 4تا روز ایسّه، بأء می سرا داکه کارؤن انجوم بدیم؛ شؤ نزدیک بؤدره که هیشکس اونه میئن منئه کار بکونی. 5تا زمؤنی که دونیا میئن ایسَم، دونیا نور ایسّم.» 6عیسی ایی چیزؤنِ بوته و زمین سر فیلی فوده، گِل چاگوده و اونه او مردکه چیشمون سر بمألسه. 7و او مردکاکه بوته: «بشو سیْلوآم حوضِ میئن بوشُور.( سیْلوآم یعنی سرادا )» پس او کورِ مردکای بوشو و بوشوسته و اوراجی بینا وگرسه.
8همسایه أن و اوشؤنی که قبلاً اونِ گدايی موقع بدِه بُوئن، بپورسِئن: «مگه ایی هو مردکای نییه که نیشت و گدايی گود؟» 9بعضی أن گوتَن: «هونه.» بعضی دیگه أم گوتَن: «هونه مورسؤنِ.» ولی خودوش هیطو گوت: «مو هو مرداکم.» 10پس اونای بپورسِئن: «چوطو تی چیشمؤن بازَ بوُ؟» 11او جواب بدا: «یکه مرداک به ایسم عیسی، اَنی گِل چاگوده ومی چیشمون سر بمالسه و بوته: ”بشو سیْلوآم حوضِ میئن و بوشُور.“ پس بوشوم و بوشوستم و بینا بوبوم.» 12اوشؤن او مردکای بپورسئن: «او کورَه ایسَه؟» جواب بدا: «نودؤنم.»
13پس او مردکاکه که قبلاً کور بو، فریسی أن فرقه عالمونِ ورجه بأردَن. 14او روز که عیسی گِل چاگوده و اونه چیشمونِ وأگوده، مقدس شنبه بو. 15پس فریسی أن هنده اونای بپورسِئن که چوطو بینا بوبؤ. جواب بدا: «می چیشمونِ سر گِل بمالسه و بوشوستم و الؤن اینَم.» 16پس یسری از فریسی أن بوُتن: «ایی مردکای خدا طرف جَی نییه. چونکه مقدس شنبه قانونِ عمل نوکوئنه، ولی بقیه بوُتن: «چوطو یکته گوناهکار آدم، تینه ایجور نیشونه و معجزه أنِ انجوم بدای؟» و اوشونِ میئن اختلاف دکته. 17پس یبار ده او کورِ مرداکای بپورسئن: «تو خودت اونه باره چی گونی؟ چونکه او تی چیشمونِ واگوده.» او بوته: «او یکته پیغمبرِ.»
18یهودی أنِ پیله ترون باور نداشتن که او کور بو و بینا بوبُو. تا اونکه اونی که خو بیناییی بدست بارده بو پئر و مئرِ دوخُندن. 19و اوشونای بپورسِئن: «ایی شیمه ریکاکَه، هونی که گونین کور بزاسه بوبؤ؟ پس چوطو الؤن تینه بَینی؟» 20او مردکاکه پئر و مَئر جواب بدئن: «دؤنیم که اَمِه ریکَه و اینم دؤنیم که کور بزاسّه بوبؤ. 21اَما نودؤنیم که الؤن چوطؤ اینه و نودؤنیم کی اونه چیشمونِ وأگوده. خوشَ جی بپورسین. او دِه پیلّه بوبؤ و خودش تینه خوشِ باره گب بزنی.» 22او مردکاکه پئر و مَئر هینه وَسه ایطوری گوتَن که یهودیِ أنَ جی ترسه أین. چونکه یهودیِ أن پیشتر همدیگر أمره توافق بُوده بوئن هرکس اعتراف بکونی عیسی هو مسیح موعود ایسّه، اونه عبادتگاهَ جی بیرونَ کونن. 23هینه واسه بو که اونه پئر و مَئر بوُتن: «او دِه پیلّه بوبؤ؛ خوشاجی بپورسین.»
24پس یبار دِه او مردکاکه که قبلاً کور بو، دوخُندَن و اونه بوُتن: «جلالِ به خدا بدی! أمه دؤنیم که او یکته گوناهکارِ مردکۀ.» 25جواب بدا: «نودوؤنم که او گوناهکار ایسّه یا نه. فقط یه چیزه دؤنم و او اینه که کور بوم و الؤن اینَم.» 26فریسی أن او مردکاکای بپورسِئن: «تی أمره چی بوده؟ چوطو تی چیشمونِ واگوده؟» 27او مردکای جواب بدا: «مو که شمره بوُتم، ولی شمه گوش نکونین؛ چرِء خوائنین دومرته بشتؤئین؟ مگه شَمَرَم خوائنین اونه شاگرد ببین؟» 28اوشؤن اونه فُحش بدَئن و بوُتن: «تو اونه شاگردی! أمه موسای پیغمبر شاگردیم. 29اَمه دؤنیم خدا موسی اَمره گب بزه. ولی نودؤنیم ایی مرداک کورَ جی بومَه.» 30او مردکه اوشؤن جواب بده: «تعجّبیه! شمه نودؤنین کورَ جی بومَه، با ایی حال او می چیشمونِ وأگوده. 31اَمه دؤنیم که خدا گوناهکارون دعا نشتؤنه، ولی اگه ینفر خداپرست ببی و اونه خوأسته انجوم بدای، خدا اونه دعا أیشتؤنه. 32از اول دونیا تا الؤن بشتؤسه نوبوُ کسی یکته کورِ مادرزاد چیشمون وأ کونی. 33اگه ایی مردکای خدا طرفای نبو، کاری منیس بکونی.» 34ایشون اونه جواب بدئن: «تو سرتاپا گوناه میئن بدونیا بومای. الؤن اَمرهم درس دأدری؟» پس اونه بیرون تؤدَن.
35وختی عیسی بشتؤسه که او مردکه بیرون تؤدَن، اونه پیدا گوده و اونای بپورسه: انسون ریکه ایمؤن دَئنی؟ 36او جواب بدا: « آقا، بگو کی ایسّه تا اونه ایمؤن بأرم.» 37عیسی اونه بوته: «تو اونه بدِی! او هوني ایسّه که الؤن تی اَمره گب زِئدره.» 38بوته: «آقا، ایمؤن دَئنم!» و اونه پرستش بوده.
39عیسی بوته: «مو ایی دونیا میئن بومَئم تا داوری بکونم که کورؤن بینا بوبؤئن و بیناأن کورَ بؤئن.» 40بعضی از فریسی أن که اونه ورجه ایسابون هیطوکه اینه بشتؤسَن، بپورسئن: اَمَرَم کوریم؟» 41عیسی ایشؤنه بوته: «اگر کور بین، تقصیری نداشتین؛ ولی الؤن گونین که اینین، تقصیرکار باقی مؤنین.»
ទើបបានជ្រើសរើសហើយ៖
يوحنای انجیل 9: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
