يوحنای انجیل 21
21
عیسی آشکارا بؤنِ خو هفت ته شاگردؤن به
1بعدِ ایی اتفاقون، عیسی یه بار ده تیبریه دریا کنار ورجه که هو دریای جلیل ایسّه، خوشِ، شاگردؤن بِه آشکارَ گوده. او خوشِ ایطوری آشکارَ گوده: 2شمعونِ پطرس، تومای نامدار به دوقلو، نتنائیل که قانای جلیل شی بو، زبدی ریکه أن، و دوته از شاگردؤن دیگه همدیگر أمره ایسابُوئن. 3شمعون پطرس اوشون بوته: «مو شوئدرم ماهی بگیرم.» اوشؤن بوُتن: «أمَرَم تی اَمره هنیم.» پس بیرون بوشؤئن و نو سواره بوئن. امّا او شؤ هیچی نیتَن. 4صوبه دم، عیسی دریا کنار ایسابو؛ امّا شاگردؤن نفهمسن که عیسی ایسّه. 5او اوشونه بوته: «زأکؤن، هیچی خوردنِ بِه ندئنین؟» جواب بدئن: «نه!» 6بوته: «سالیِ تؤداین نوِ راست طرف که گینین.» اوشؤن هی کارِ بودَن و فراوونیِ ماهی جَی منیسَن سالیِ نو میئن هکشن. 7شاگردی که عیسی اونه دوست داشت، پطرس بوته: «خداوند ایسّه!» شمعون پطرس هیطو که بشتوؤسه او خداوند ایسّه، خوشِ رختِ خوشِ دور فیبیته – چونکه ماهی گیتنِ وسه خو رختِ بکنده بو- و خوش دریا میئن تؤوده. 8امّا بقیه شاگردؤن نو اَمره بومئن، در حالی که سالیِ ای که ماهی جَی پور بو خوشؤنِ اَمره هکشه دبون. چونکه اوشون خشکی أمره دوروبرِ صدمتر فاصله داشتن.
9وختی دریاکنارِ برسئن، بدِئن که یکته آتش زغال اَمره بل بیته ایسّه و ماهیهم اونه سر هنّه، و نونَم هَنّه بو. 10عیسی ایشؤنه بوته: « چنته او ماهیأنی که الؤن بِیتین، بأرین.» 11شمعون پطرس، نو میئن بوشؤ و سالیِ خشکی میئن هکشه. سالی، پیله ماهی أنَ جی پورا گوده بو، صد و پنجاه و سه ته ماهی. با اونکه ماهی أن خیلی زیاد بوئن، سالی پارَه نوُبؤ بو. 12عیسی ایشؤنِ بوته: «بأین صوبونه بوخورین.» شاگردون هیتّه جرأت نؤدَن اونای بپورسن «تو کی ایسّی؟» چونکه دونَسَن او خداوند ایسّه. 13عیسی جلو بومَه و نون و ماهیِ ویته و اوشونِ هَده. 14ایی سومین بار بو که عیسی زنده بوبو پس مرده أنِ جَی، خودوشِ شاگردؤنِ بِه آشکارَ گود.
عیسی گب زِئن پطرس اَمره
15صُبونه بوخورده پس، عیسی شمعونِ پطرسای بپورسه: «شمعون، یونا ریکه، مه بیشتر از ایشون دوست دئنی؟ شمعون پطروس جواب بدا: «بله آقا؛ تو دؤنی که تَه دوست دَئنم!» عیسی اونه بوته: «می برّهأنِ غذا بدی.» 16دوّمین بار عیسی اونای بپورسه: «شمعون، یونا ریکه، مه دوست دئنی؟» جواب بده: «بله آقا؛ دؤئنی که تَه دوست دَئنم.» عیسی بوته: «می گوسندونِ چوپؤنی بکون.» 17سُومی بار اونه بوته: «شمعون، یونا ریکه، مه دوست دَئنی؟» پطرس اورهَ جی که عیسی سه بار اونای بپورسه که مه دوست دَئنی، ناراحتَ بوُ و جواب بدا: «آقا؛ تو همه چی خبرِ دئنی؛ تو دؤئنی که تَه دوست دَئنم.» عیسی بوته: «می گوسندونِ غذا هَدی. 18راست، راستِ، تَه گونم، زمؤنی که جوونتر بی، تی کمر دوَسّی و هر جا که خوأستی شوی؛ امّا وختی که پیرَ بی، تی دستؤنِ بازَ كوئنی و ینفر دیگه تی کمرِ دَودنه، اوره که نخؤانی، تَه بِئنه.» 19عیسی ایی گبِ بزه تا پطروس بودونی که چوطو مینه و خو موردنِ اَمره خدا جلال دِئنه. بازین عیسی اونه بوته: «می دومبال بیه.»
20هووخت پطرس وگرسه و بدِه که او شاگردی که عیسی اونه دوست داشت، اوشؤنِ دومبالسر أَمَئدَره. او هونی بو که شام موقع عیسی سینه سر تکیه بدا بو و بپورسه بو که: «آقا، کیایسه که تَه دشمن دست هدِئنه؟» 21وختی پطرس اونه بدِه، عیسی جَی بپورسه: «آقا، پس او چی بنه؟» 22عیسی اونه بوته: «اگه بخوأم او تا می وَگرسن موقع بَیسی، به تو چی؟ تو می دومبال بیه!» 23پس ایی گب برارون میئن دکته که او شاگرد نمینه. با ایی حال عیسی پطرس نوته که او شاگرد نمینه، بلکه بوته: «اگه بخوام او تا می وگرسن موقع بَیسی، به تو چی؟»
24ایی هو شاگرده که ایی چیزؤنِ بِه گوایی دِئنه، و ایشؤنِ بنویشته و اَمه دؤنیم که اونه گوایی راست ایسّه.
سرآخر
25عیسی خیلی کارؤن دیگرم بوُده، که اگه یکته - یکته بنویشته بوبُوبی، فکر نوکؤنَم حتّی تموم دونیا کتابونم اونه بنویشته أنِ جا بداشتبی.
ទើបបានជ្រើសរើសហើយ៖
يوحنای انجیل 21: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
