رسولؤن اعمال 1
1
عيسی شوئن آسمؤنِ سو
1ای تِئوفیلوس، مو می اولی کیتابِ، همه او کارؤنِ بنویشتم که عیسی اوشؤنِ انجؤم دَئن و تعلیم دَئنِ بینا بوده 2تا او روز که بواسطه روح‌القدس خو رسولؤنِ که انتخاب بوده بو دستورؤنی هدأ و بازین آسمون سو جؤر ببورده بوبؤ. 3عیسی بعد اونکه عذاب بکشِه، خوشِ رسولؤن بِه آشكارَ گوده و خیلی چیزؤن أمره ثابت بودِه که زنده بوبؤ. عیسی چهل روز اوشونِ بِه آشکارَ بوء و خدا پادشاهی باره رسولؤنِ أمره گب زی. 4یه بار که عیسی رسولؤن أمره ایسابو اوشونِ دستور بدا که: «اورشلیم شهرای نشن، بلكه او وعده ریفا که آسمونی پئر بدابو بیسن، و بوته: هوطو که می جی بشتؤسین؛ 5تعمید دهنده یحیی آؤ أمره غسل تعمید داء، ولی چند روز بعد شمه روح‌القدسِ أمره تعمید گینین.»
6وختی که رسولؤن جومَه بؤبوئن، عیسی جی بپورسِئن: «خداوندا، ایی زمؤنِ میئنِ که خوأنی پادشاهیِ به اسرائیل وگاردونی؟»
7عیسی اوشونِ جواب بده: «شیمه بِه نومَه که آسمونی پِئر او وختونی و فصلون که خوشِ قدرت أمره تعیین بودَه، بودونین؛ 8ولی وختی که روح‌القدس شیمه به نازل ببی، قوت گینین، اورشلیم شهرمیئن و همه یهودیه ولایت و سامره و دونیا دور دکته ترین جاأن میئن می گواهون بنین.»
9عیسی ایی گبؤنِ بزه پس، هوطو که رسولؤن، نگاه کادبؤن، آسمون سو جؤر ببورده بوبؤ و یکته ابر عیسی ویته، اوشونه چیشمونِ جلو غیبه گوده. 10هوتو که عیسی شوئدبو و رسولؤن آسمونِ چال بزه بون، یدفاری دوته مرداک که سفید عبا دوده بوئن ایشؤنِ ورجه بیسَئن 11و بوتَن: «ای جلیلی مرداکؤن، چرِء أره ایساین و آسمؤن چال بزین؟ هی عیسی که شیمه میئنای آسمؤن جور ببورده بوبؤ، هیطوری که بدِیئن آسمؤن بوشو، هنده وگردنه.»
مَتّیاس عوض یهودا انتخاب بنه
12بازین رسولؤن زیتونِ كوه جی، شهر اورشلیم وگرسن. او كوه یکته مقدس شنبه روز قد، یعنی حدود یک کیلومتر اورشلیمَ جی فاصله داشت که مقدس شنبه روز دیرون فقط هی قد ایجازه داشتن. 13وختی اورشلیم شهر برسِئن، او تَلارخونه جور بوشؤئن که اوره ایشونِ اقامتگاه بو. اوشؤنی که اوره ایسا بوئن: پطرس و یوحنا، یعقوب و آندریاس، فیلپُس و توما، بَرتولْما و مَتّی، یعقوب حَلْفا ریکه و شمعون وطن پرست و یهودا یعقوب ریکه بوئن. 14ایشون همته، زنأكؤن أمره و مریم عیسی مَئرَ و اونه برأرؤن أمره، یكدل تمؤم خوشؤنِ وختِ دعا به نَئن.
15یکته از او روزؤن پطرس، برارونِ میئن که همته حدود صد و بیست نفر بوئن، سرپا بِیسه 16و بوته: «ای برأرؤن، مقدس بنویشته أن پیشگویی باء حقیقت پیدا گوده بی. او بنویشته أنِ میئن خیلی وخت پیش روح‌القدس، داوود زبون أمره یهودا باره پیشگویی بودِه بو. او کسی باره که عیسی دستگیر کننده أن راهنما بو. 17او یکته از امه به حساب اَمئه و ایی خدمت میئن سهم داشت.»
18یهودا او مزدِ، که خو شرارتِ واسه هیته بو یه تیکه زمین بیه و اؤره خو دیمِ أمره گلِ سر بکته و واترکسه و اونه رک و روده بیرون بکالسه. 19تموم اوشونی که اورشلیم میئن ایسابوئن، همته ایی ایتفاقَ جی واخوبَ بوئن و خوشؤنِ زبؤن میئن او محل ’حَقِلْ دَما‘، یعنی زمین خون ایسم بنَئن.
20« چونکه مزامیر كیتاب میئن بنویشته بوبُو:
«”اونِ خونه هوطو ویلَه گوده بنه
و دِه هیشكس اونه دیرون نیسَنه،“
و:
«”اونِ مقامِ و منصبِ یه نفر ده هگینه.“
21پس بأ ینفر از او مرداکونی که تموم او زمونی که عیسای خداوند، امه میئن شوئن و اَمَئنِ گود، أمه جمع میئن ایسابو 22یعنی از وقتی که یحیی تعمید بده تا او روز که عیسی از اَمه میئن به آسمون، جؤر ببورده بوبؤ، یکنفر از ای مرداکون، باء أمه أمره عیسی زنده بوئنِ شاهید ببی.»
23اوشون دونفرِ جلو بئردن: یوسفِ که بَرسابا گوتن و اونه یوسوتوسَم دوخوندَن، و مَتّیاس. 24بازین اوشؤن ایطوری دعا بودَن که: «خداوندا، تو همکسِ دیلونَ جی خبر دَئنی. تو خودت، أمره نیشون بدی که کویکته از ایی دو نفر انتخاب بودی 25تا ایی خدمت رسالتِ هگیری، خدمتی که یهودا اونه پس بزه و او جایی بوشو که هوره شی بو.» 26بازین قورعه تؤدَئن و مَتّیاس ایسم بیرون بومَه. هیطو بوبو که او یازده‌ته رسول گروهِ میئن اضافه بوبؤ.
ទើបបានជ្រើសរើសហើយ៖
رسولؤن اعمال 1: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
