يوحنای انجیل 13
13
عیسی خو شاگردؤن پَائنه شوئنه
1قبل از عید پِسَخ، عیسی دؤنس که اونه وخت برسه که ایی دونیا جَی، آسمونی پئر ورجه بشی، شاگردونیم که ایی دونیا میئن دوست داشت، تا آخر محبّت بُوده.
2شؤم وخت بو. ابلیس قبلترَی یهودا اَسْخَریوطی، شمعون ریکه، دیل میئن بَنه بو که عیسی دشمن دست هدای. 3عیسی که دؤنس پئر همه چیِ اونه دست بسپورده و خدا ورجای بومه و اونه ورجه شؤدره، 4شؤم سرای ویریسا و خوشِ ردا بکنده و یکته حوله ویته و خوشِ کمرِ دوَسّه. 5بازین یکته لگنِ میئن آؤ دؤوده و شروع بُوده شاگردؤنِ پَا شستن و او حوله أمره که خو کمره دور دوسّبو، اوشونِ پائنه خوشکَ گوده. 6وختی شمعون پطرسِ برسه، عیسی بوته: «آقا، تو می پَا شوئنی؟» 7عیسی جواب بدا: «الؤن منی بفهمی چی کأدرم، امّا دیرتر فَهمنی. 8پطرس، عیسی بوته: «هرگی نوگزانم می پائنه بوشوری!» عیسی جواب بدا: «تا تَه نوشورم، می أمره سهمی ندَئنی.» 9شمعون پطرس بوته: «آقا، نه فقط می پئنِه، بلکه می دستون و می سرم بوشُؤر!» 10عیسی جواب بدا: «اونی که حمّؤم بُوده، سرتاپا تمیزِ، ده شستن احتیاج ندَئنه، بجز اونه پَئأن. شمه پاک ایسّین، ولی نه همته.» 11چونکه دؤنس کیسه که اونه تسلیمَ کوئنِه، هینه وسه بوته: «شمه همته پاک نیئین.»
12بعد اونکه عیسی اوشونه پأئنه بوشوسته، خوشِ ردا دؤوده و دومَرته شؤم سفرهسر بنیشته. بازین اوشؤنای بپورسه: «بفهمسین چی شیمه بودَم؟» 13شمه مه اوستاد و شیمه آقا دوخُوبِنین، و درستم گونین، چونکه مو ایسّم. 14پس اگه مو که شیمه اوستاد و آقام، شیمه پأئنه بوشوستم، شَمَرَم بأء همدیگره پأئنه بوشورین. 15مو ایی کار أمره شمره نیشون بدَئم تا شَمَرَم هیطو رفتار بکونین که مو شیمه أمره بودَم. 16راست راستِ، شمره گونم، نه نوکر خوش اربابای پیلتره، نه سرا دأ، خوش سرادئن کسای. 17الؤن که ایشؤنِ دؤنین، خوش بحال شمه اگه ایشؤنِ انجؤم بدین.
18اوچیزی که گونَم شیمه همتهباره نیه. مو اوشؤنی که انتخاب بُودم، شنأسنم. امّا مقدس کیتابونِ ایی گب، بأء به انجوم برسی که «اونی که می نؤنِ خؤئنه می أمره دشمنی کوئنه.» 19الؤن قبل اینکه اتّفاقی دکای، شمره گونم تا زمؤنی که اتفاق دکای، ایمؤن بأرین که مو هو ایسّم. 20راست راستِ، شمره گونم، هر کس می سرا دا کسِ قبول بکونی، مه قبول بُوده، و هر کس مه قبول بکونی، می سرا دا کس قبول بُوده.»
یکته از شمه مَه دشمن دست هدِئنه
21عیسی بعد اینکه اینه بوته، روح میئن پریشونَ بوُ و آشکارا بوته: «راست راستِ، شمره گونم، یکته از شمه مه دشمن دست هدِئنه.» 22شاگردؤن همدیگرِ نیگاه گودَن و مطمئن نوبوئن که اینه، کی باره گوتدره. 23یکته از شاگردؤن که عیسی اونه دوست داشت، سفره سر اونه ورجه لم بدابو. 24شمعون پطرس اِشاره أمره اونای بخواسّه تا عیسی جَی بپورسی اونه منظور کیایسّه؟ 25او شاگرد هوطو که لم بدابو، خوشِ بیشتر عیسی نزدیکَ گوده و بپورسه: «آقا، او کیایسّه؟» 26عیسی جواب بدا: «او هونی ایسّه که ایی لقمه نون بعدِ اونکه کاسه میئن زِئنَم اونه هَدِنَم.» و هو موقع، یه لقمه نون کاسه میئن بزه و اونه یهودا، شمعون اَسْخَریوطی ریکه هَدأ. 27یهودا وختی لقمه هَیته، هو لحظه شیطؤن اونه میئن بوشؤ. بازین عیسی اونه بوته: «او کاری که خؤائنی انجؤم بدیِ، زودتر انجوم بدی.» 28امّا هیته از اوشونی که سفرهسر نیشت بوئن نفمسَن که عیسی چره ایی گبِ یهودا بزه. 29یسری أن فکر گودن چونکه یهودا دخل و خرج کیسه دَئنه، عیسی اونه گونه که، اوچیزی که عیدِ بِه لازم ایسّه بَین، یا اینکه ندارونِ یچی هدی. 30بعد اونکه یهودا لقمَه هَیته، تاتأدی بیرون بوشو. و شؤ بو.
یکته تازه حکم
31بعد اونکه یهودا بیرون بوشو، عیسی بوته: «الؤن انسون ریکه جلال بیاتّه، و خدا اونه میئن جلال بیاته. 32اگه خدا اونه میئن جلال بیاته، پس خداهم اونه میئن خوشِ جلال دِئنه و اونه هودَم جلال دِئنه. 33عزیز زأکؤن، اَنی ده شیمه اَمره ایسَئم. می دومبال گردنین، هوطو که یهودی أنِ بوُتم، الؤنم شمره گونم که اوجایی که مو شوئدرم، شمه منیئن باین. 34یکته تازه حکم شمره هَدِنَم، و او اینه که همدیگره دوست بدارین، هیطو که مو شمره دوست داشتم، شَمَرَم بأء همدیگر دوست بدارین. 35اگه همدیگرِ دوست بدارین، همته مردوم فَهمنن که شمه می شاگردونین.
36شمعون پطرس بوته: «آقا، کوره شوئدری؟» عیسی جواب بدا: «تو الؤن او جایی که مو شوئودرم منِئی مي دومبال بأی. امّا بعداً می دومبال هَنی». 37پطرس بوته: «آقا، چرِء الؤن منِّم تی دومبال بأم؟ مو می جونِ تی راهِ میئن نِئنَم.» 38عیسی بوته: «می راه میئن تي جونه هَدِئنی؟ راست راستِ، تَه گونم، پیشتر از اونکه تله اوئی بکونی، تو مه سه بار حشا کوئنی.»
ទើបបានជ្រើសរើសហើយ៖
يوحنای انجیل 13: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
