يوحنای انجیل 12
12
مریم عیسی پائنه سر روغنی عطر فوکوئنه
1شیش روز پیشتر از عید پِسَخ، عیسی بیت عنیا دهات، هوجا که ایلعازَر زندگی گود بومَه، هونی که عیسی اونه مُرده‌أن جَی زنده بوده بو. 2اوره اونه واسه شؤم بدَئن. مارتا پذیرایی گود و ایلعازَر هم یکته از اوشؤنی بو که عیسی أمره سفره سر نیشته بو. 3هو وخت، مریم یکته عطر، که خیلی گرؤنقیمت بو سنبل خالصِ جی که تقریبا نیم لیتر بو، ویته و او عطرِ عیسی پأئنه سر فوده و خوشِ مو أمره خشکَ گوده، جوری که اونه عطر، خونه میئن فیبیته. 4امّا یهودایِ اَسْخَریوطی، یکته عیسی شاگردؤن که دومبالتر اونه دشمنِ دست هَدَه، بوته: 5«چرِء ایی عطرِ سیصد دینار نفورتین تا اونه پولِ ندارؤنِ هَدَین؟» 6او ایی گبِ ندارؤنِ دلسوجي بِه نؤته بو، بلکه اینه وسه بوُته که دوز بو؛ شاگردونِ دخل و خرج کیسه اونه دست دبو و پولی که اونه ورجه نَئن خوشِ ویت! 7پس عیسی بوته: «اونه کار ندارین، چونکه مریم، ایی عطرِ می دفنِ روزِ به بداشته بو. 8شیمه أمره همیشه ندارونِ دَئنین، امّا مَه همیشه ندئنین.
9خیلی از یهودی أن وختی بشتؤسَن عیسی اوره ایسأ، بومَئن تا نه فقط عیسی بلکه ایلعازَرم که زنده بُودهبو، بینَن. 10پس، کاهینؤن سرؤن توطئه بودَن که ایلعازَرم بکوشَن، 11چون باعث بوبؤ بو که خیلی از یهودی أن بوشوئن و عیسی ایمؤن بأرَن.
عیسی یکته پادشاه مورسون اورشلیم میئن شنه
12صُوباین جیمعتِ زیادی که عیده بِه بومئبون، وختی بشتؤسَن عیسی اورشلیم میئن أَمَئدَره، 13نخلِ خالؤن خوشؤنِ دست میئن بَداشتن و عیسی پیشواز بوشؤئن. اوشؤن دادِ أمره گوتَن:
«نجات بدی!
موبارکِ اسراییلِ پادشاه
موبارکِ اونکه،
خداوندِ ایسمِ أمره هنه!»
14هووخت عیسی یکته خرکرّهَ بیاتّه و اونه سر سواره بوُ هیطو که مقدس نیویشته أنِ میئن بومَه که:
15«واهیمه ندار! اورشلیم، ای صهیونِ لاکو،
بودوئن تی پادشاه،
خرِ سر سوار هنه، خرکرّه سر سوار هَنه!»
16اونه شاگردؤن اوّل ایی چیزؤنِ نفهمسَن، امّا وختی عیسی بعدِ موردن، زنده بوبؤ، یاد بأردَن که ایشون همه مقدس کیتابونِ میئن بنویشته بوبُو بو، و هوطورم اتفاق دکته.
17او جماعتی که ایلعازرِ دوخوندنِ موقع مقبرای و اونه زنده گودن موردَه أنَ جی، عیسی أمره بوئن، هیطو ایی اتفاقبه گوایی دَئن. 18خیلی از جماعتم هینه وسه اونه پیشواز بوشؤئن، چونکه بشتؤسه بُوئن، ایی معجزه انجوم بده بو. 19پس فریسی فرقه عالمؤن همدیگرِ بوُتن: «بینین که ده کاری گوده منین؛ نیگاه بکونین تمومِ دونیا اونه دومبال بوشوئن.»
بعضی از یونانی أن عیسی دومبال گشتَن
20اوشؤنِ میئن که عید موقع عبادت بِه اورشلیم بومَئبون، یسری یونانی ایسابُوئن. 21اوشؤن فیلیپس ورجه که بیت صِیْدا جلیل شی بو بومَئن. اونه بوُتن: «آقا، خوائنیم عیسی بَینیم.» 22فیلیپس بومَه و ایی گبِ آندریاس بوته و فیلیپُس و آندریاس هر دوته بوشؤئن و عیسی بوُتن. 23عیسی اوشونه بوته: «انسون ریکه موردن و زنده بوئنِ وخت رسِدره. 24راست راستِ، شمره گونم، اگه گندم دنه خاکه میئن نکّأی و نمیری، تنها مؤنه؛ امّا اگه بمیری، خیلی بار أبِنه. 25کسی که خوشِ جونِ دوست بدأری، اونه از دست دِئَنه، امّا کسی که ایی دونیا میئن خوش جونَ جی نفرت دَئنه، اونه تا اَبدی زندگی حفظ کوئنه. 26اونی که خوائنه مهخدمت بکونی، بأیستی مَه دومبالَ کونی؛ و جایی که مو ایسَئم، می خدمتکارم ایسَه. کسی که مه خدمت بکونی، می پئر اونه عزت دِئنه.
27الؤن می جؤن پریشونِ، چی بوگوئم؟ یعنی بوگوم: ”پئر! مه او چیَ جی که خوائنه می سر بای نجات بدی “؟ ولی مو هی کارِ وسه ایی دونیا میئن بومَئم. 28پئر، تی ایسم جلال بدی!» بازین صدایی آسمؤنای برسه که: «جلال بَدئم و هنده جلال دِئنَم!» 29پس مردمی که اوره ایسأ بُن، اینه بشتؤسَن و بوتَن: «آسمون گردَک بو!» بعضی أن گوتَن: «یکته فرشته اونه أمره گب بزه.» 30عیسی بوته: «ایی صدا شیمه بِه بو، نه مهبِه. 31الؤن ایی دونیا داوری وخت ایسّه؛ الؤن ایی دونیا رئیس، شیطون، بیرون باگده بنه. 32و مو، وختی صلیب سر هکشه بوبؤم و زمین جَی ویجیته بوبؤم، هَمَته مردومِ می سو هَکشنَم.» 33عیسی ایی گبِ أمره، خو چوطو موردنِ اشاره گود. 34پس مردم بوُتن: «بنا به اوچیزی که تورات جی بشتؤسیم، مسیح موعود تا ابد زنده مؤنه، پس چوطوری ایسّه که گونی انسون ریکه بأء صلیب سر هکشه ببی؟ ایی انسون ریکه کیایسه؟» 35عیسی ایشؤنِ بوته: «نور اَنی دِه شیمه أمره ایسّه. پس تا وختی که حلِه نور دَئنین، راه بشین، نبی که ظلمات شمره فَوَری. اونی که ظلمات میئن راه شنه، نودؤنه کوره شوئدره. 36تا وختی که نور دَئنین، نور ایمؤن بأرین، تا نور زاکؤن ببین.»
عیسی وختی ایی گبونِ بزه، اورای بوشو و خوشِ اوشؤنَ جی جا بدا.
مردم بی ایمؤنی
37با اونکه عیسی خیلی نیشونه و معجزه أن اوشونه چیشمونِ ورجه انجوم بَده بو، اوشون حله اونه ایمؤن نأردَن. 38ایطوبوکه اِشَعْیاي پیغمبر گبؤن حقیقت پیدا گوده که بوته بو:
«ای خداوند، کی امه پیغؤم باور بُوده،
و خداوندِ قوت کی بِه آشکارهَ بوُ؟»
39«پس اوشؤن نتؤنستَن ایمؤن بأرَن چونکه: اِشَعْیاي پیغمبر هنده یه جای دیگه بوته:
40«خدا، اوشونه چیشمونِ کوره گوده،
و اوشونِ دیلؤنِ سنگَ گوده،
تا خوشؤنِ چیشمونِ اَمره نَینَن،
و خوشؤنِ دیلونِ اَمره نفهمَن،
و وأنگردَن تا ایشؤنه شفا بَدِم.»
41اِشَعْیا اونه وَسه اینه بوته که عیسی جلال بدِه و اونه باره گب بزه.
42با ایی همه حتی خیلی از قوم پیله ترؤنم عیسی ایمؤن بأردن، امّا فریسی أن ترسَ جی خوشؤن ایمؤنِ اقرار نودَن، نبی که اوشونه یهودی أن عبادتگاه جی بیرونَ کؤنن. 43چون اوشؤن، مردومِ تعریف و تمجیدِ بیشتر از خدا تعریف و تمجید دوست داشتن.
44هووخت عیسی داد بزه و بوته: «هر کس مه ایمؤن بأری، نه مه، بلکه می سرا داکِه ایمؤن بارده. 45هر کس مَه بَدِه، می سرا داکَسِ بَدِه. 46مو نور مورسؤن دونیا میئن بومَئم تا هر کس مه ایمؤن بأری، ظلمات میئن نَیسی. 47اگه ینفر می گبؤنِ بشتؤئی ولی اونای اطاعت نکوُنی، مو اونه داوری نوکؤنَم؛ چونکه نومَئم تا دونیا مردومِ داوری بکونَم، بلکه بومئم تا اوشونه نجات بدِئم. 48او کس وسه که مه ردّه کؤنی و می گبؤنِ قبول نکونی، یکته دیگه داور ایسَه؛ هو گبؤنی که بوُتم، آخر الزمؤن، اونه محکومَ کوئنه. 49چونکه مو خودم می جَی گب نزِئم، بلکه آسمونی پئری که مه سرا دا، مه دستور بَدا که چی بوگؤم و چی جَی گب بزنم. 50و مو دؤنم که اونه دستور، اَبدی زندگی ایسّه. پس اوچیزی که مو گونم، درست، هو چیزی ایسّه که آسمونی پئر بوته بوگؤم.»
ទើបបានជ្រើសរើសហើយ៖
يوحنای انجیل 12: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
