رسولؤن اعمال 8
8
سولُس، کلیسا اذیت کوئنه
1سولُس استیفان كوشتَنِ أمره موافق بو.
بعد او روز، یکته پیله آزار و اذیت، اورشلیم كلیسا ضید شروع بوبؤ، اوجور که بغیر رسولؤن، تمومِ ایماندارؤن، یهودیه ولایت و سامره سامون، پخش و پلا بوبوئن. 2چندته خداشناس مردکه، استیفانِ جنازه، دفنَ گودَن و اونه به یکته پیله عزا داری بیتن. 3اما سولُس بدجور کلیسا سر فترکَس و خونه به خونه گشت زنأكؤن و مردَاكؤنِ بیرون هکشی و زندؤنِ میئن تؤدَه.
فیلیپُس سامره دیرون عیسی باره تعلیم دَ
4او ایماندارونی که اذیت آزارِ وسه پخشَ بوبؤئن، هرجا که شوئن، خدا كلام خوروم خبرِ اعلوم گودَن. 5فیلپُسم بوشو یکته از سامره شهرؤن و اوره، مردومِ مسیحِ باره تعلیم دَ. 6وختی که جماعت زیادی، فیلیپُسِ گبؤنِ بشتؤسَن و نشونه أنی که او انجوم دَ بدئن، همته با دقت اوچیزی که گوت گوش بدَئن؛ 7چون پلید روحؤن نعره‌كونؤن خیلی‌أنَ جی که اوشؤنِ گرفتار بوئن، بیرون اَمَئن و خیلی فلجؤن و شلؤنم شفا هَیتن. 8هینه وَسه او شهر، شادی جی پورا بو.
شمعون جادوگر ایمون اَبِئنه
9و اما او شهر میئن یکته مردکای زندگی گود که اونه ایسم شمعون بو که سامره مردمِ پیشتر، خو جادوگری أمره ماتَ گوده بو و ادعا گود که خوشِ یکته پیله کسی ایسّه. 10همه كوشتاکون و پیلّه أن ، اونه گبونِ گوش دَئن و گوتن: «ایی مردکای او خدا قدرت ایسه که اونه ’پیلّه قدرت‘ گونن.» 11مردوم اونه گبونِ گوش دَئن، چون خیلی زمت بو که خو جادوگری أمره، اوشونه ماتِ گوده بو. 12ولی وختی مردوم، فیلیپُسِ خوروم خبرِ أمره که خدا پادشاهی و عیسی مسیح ایسمِ باره بو ایمون بأردَه بوئن، همته‌َ، چی مرداک و چی زناک، غسلِ تعمید هیتَن. 13حتی شمعونم ایمون بأرده و بعد تعمید هیتَن همیشه فیلیپُس أمره بو وشمعون او پیله نیشونه أن و معجزه أنَ دئن أمره که فیلیپس انجام دَء، خیلی حیرونَ بو.
14وختی رسولؤن اورشلیم شهر دیرون باخبر بوبون که سامری أن، خدا كلامِ قبول بودن، پطرس و یوحنا اوشونه ورجه سرادائن. 15او دونفر سامره بومَئن، سامره مردومِ بِه دعا بودن تا روح‌القدس هگیرَن، 16چون حلِه روح القدس هیتّه ایشون به نازیل نوبؤ بو، بلكه فقط به ایسم عیسای خداوند تعمید بیته بون و بس. 17بزون پطرس و یوحنا خوشؤنِ دستؤنِ اوشونه سر بنئن و اوشون، روح‌القدس هیتَن.
18هووخت شمعون بدِه که رسولؤن، خوشونِ دست مردومِ سر نَئنن و مردوم خدا روحِ هگینن، اَنی پول بارده و 19رسولؤنِ بوته: «ایی قدرتِ مَنم هدین تا هركس سر دست بَنئم، روح القدس هگیری.»
20ولی پطرس اونه بوته: «تی نقره تی أمره نابود بی! چون فكر بودی شئنه پول أمره خدا هدیه هِئن! 21تو ایی خدمت میئن هیچ سهم و قسمتی ندَئنی، چون تی دیل خدا أمره روراست نیه. 22پس تی ایی شرارت جی توبه بكون و خداوندَ جی بخوأ تا شاید، ایی فیكری که تی دیلِ میئن دَئنیِ ببخشی؛ 23چونكه دِئدرم تلخی و گناه تَه اسیرَ گوده.»
24شمعون بوته: «شمه مِه به خدا ورجه دعا بکونین تا اوچی که بوتین می سَر نأی.»
25بعد ایکه پطرس و یوحنا گوایی بدَئن و خداوند كلام اعلوم بودن، اورشلیم شهر وگَرسَن و خیلی از سامره دهاتون میئن انجیل خوروم خبرِ برسونِئن.
فیلیپُس و درباری خواجه
26یکته از خداوند فرشته فیلیپُس بوته: «ویریس و جنوب سو بشو، او راه که اورشلیم اجی غزه سو شنه.» ایی راه بیابونی ایسه. 27فیلیپُس ویریسَه و راه دکته. راه میئن یکته خواجه مرداک بدِه که حبشه شی بو. او یکته از’کَنداکِه‘ حبشه ملکه دربار پیله ترون بو و حبشه ملکه خزانه اونه دس هنه بو. او خواجه مرداک ،خدا پرستش به اورشلیم شهر بومه بو. 28الون وگرسده بو و خوشه ارابه سر نیشته بو و اِشَعْیای پیغمبر کیتابِ خونده دبو. 29هووخت خداروح، فیلیپُس بوته: «نزدیك بشو و او ارابهَ برس.»
30پس فیلیپُس ارابه طرف بُدوؤسه و بشتؤسه که درباری خواجه اِشَعْیای پیغمبر كتاب خوندره. اونه بوته: «اوچیِ که خوندری، فهمنی؟»
31او خواجه بوته: «چوطو تینم بفهمم؟ اگه ینفر مَه راهنمایی نكونی.» پس فیلیپُسای منت بوده ارابه سوارَ بی و اونه ورجه بنیشی. 32او قسمتی که خواجه مقدس نیویشته أن جی خونده بو، ایی بو که:
«درست، یکته گوسفند مورسون که اونه بوردرن سیرَ بینَن،
و یکته برّه مورسون که خوشِ پشم چینؤن ورجه تام بزه،
هوطو خو دهنِ وازَه نوکوئنه.
33اونه حقارت وقت، عیدالت اونای هیته بوبو؛
كی تینه اون نسلِ باره گب بزنی؟
چونکه اونه زندگی زمینِ سرای ببئه بوبؤ.»
34خواجه فیلیپُس بوته: «مینت کوئنم مَه بگو که پیغمبر اِره کی جی گب زِئنه، خوشای یا ینفر دیگرای؟» 35بازین فیلیپُس بینا بودِه گب زِئن و هو قسمت مقدس كتاب جی شروع بودِه و خب خبر که عیسی باره بو خواجه بوته.
36هوطؤ که راه میئن شوئدبون، یکته جا که آؤ داشتِ برسئن. خواجه بوته: «بَین، اینم آؤ! الون چی تینه می جلوئه بگیره که غسل تعمید هنگیرم؟» 37[فیلیپُس بوته: «اگر تمؤم تی دیلِ أمره ایمؤن بأردی، ده هیچی تی جلوئه گیته منئه.» خواجه بوته: «ایمؤن دَئنم که عیسی مسیح، خدا ریکه ایسّه.»]
38خواجه دستور بده ارابه بدأرن، و فیلیپُس و خواجه، هر دوته آؤ میئن بوشؤئن و فیلیپُس، خواجه غسل تعمید بده. 39هیطو که آؤَ جی بیرون بومَئن، ناخبر خداوند روح ، فیلیپُس بیته و ببورده و خواجه دِه اونه ندِه، ذوق أمره خو راه دومباله بدَه. 40ولی فیلیپُس، خوشِ اَشدود منطقه میئن بدِه. او همته او شهرؤن منطقه میئن گرس و انجیل خوروم خبرِ رسونی تا قیصریه شهرِ برسِه.
ទើបបានជ្រើសរើសហើយ៖
رسولؤن اعمال 8: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
