رسولؤن اعمال 20
20
پولُس مقدونیه و یونان سفر کوئنه
1وختی بلوا تمام بوبو ، پولُس شاگردؤن خوشه ورجه دوخُنده و بعد اینکه ایشؤن تشویق بوئده، اوشونه أمره خداحافظی بوُده و مقدونیه سو رادکته. 2پولوس، او مناطقَ جی بوگذشته، ایمان دارون خو گبؤن أمره خیلی دیلگرمی بده، تا اینکه یونان برسه 3پولوس سُه ماه اوره بِیسه. هوموقع که خواستی کشتی أمره سوریه بشی، یهودی أن اونه ضید توطئه بودن. پس تصمیم بیته تا مقدونیه راهَ جی وگردی. 4پولوس همراه أن ایشون بوئن: سوپاتِر، پیرروس ریکه که بیریه شی بو، آریستارخوس و سِکونُدوس که تسالونیکی شی بوئن، گایوس وتیموتائوس که دِربِه شی بوئن، تیخیکوس و تروفیموس که آسیا شی بوئن. 5اوشؤن اَمه جی پیشتر بوشؤئن و تروآس میئن اَمه ریفاه بَیسئن. 6ولی اَمه بعد از عید فَطیر ، کشتی أمره فیلیپی شهر جی راه دکتیم و پنج روز بعد، تروآس دیرون اوشونه ورجه بوشویم و هفت روز اوره بِیسَئم.
یوتیخوسِ زنده بوئن
7اوّلی روز هفته، نون پارَه گودنِ به جومَه بویم. پولُس مردم بِه گب زی، و چون تصمیم داشت فردأیی اورای بشی، اونه گب زئن تا نصف شؤ طول بکشه. 8او تلارخونه میئن که جومَه بوبیم، گرد سوز چراغ زیاد هنه بو. 9یکته جوان که اون اسم یوتیخوس بو پنجره کنار نیشته بو. هوطو که پولُس خوشه گب زئنه ادامه دادبو، او جوان کم کم یکته سنگین خؤ میئن بوشو و یدفاری طبقه سوّمای جیر بَکته و وقتی که اونه بیاتن بدئن که بمورده. 10پولُس جیر بوشو، خوشِ او جوؤن مرداکِ سر تؤدَه و اونه کیشَیته و بوته: «واهیمه ندارین، او نَمَرده!» 11بازین پولس جؤر بوشو و نون پارَه بوده و بوخورده. او تا سحر گب زئنه اوشونه أمره دومباله بده، و بعد اورای بوشو. 12مردم او جوؤنِ زنده خونه ببوردن و خیلی تسلی هیتن.
13ولی أمه سفر دیرون پیش از پولُس یکته کشتی سوارَ بویم، آسوس شهر سو راه دکتیم تا اوره طبق پولُس قرار، اونه کشتی میئن بأریم، چون پولُس خوأست تا اوره، خُشکی راهَ جی بشی. 14وقتی پولُسِ آسوس شهر دیرون بدِیئم، اونه کشتی دیرون بأردیم و میتیلینی شهر سو بوشوییم. 15اورای کشتی أمره راه دکتیم و فردأیی خیوس جزیره جلو برسیم. پس فردأیی ساموس جزیره بوشویم و روز بعد، میلیتوس شهر برسیم. 16پولُس تصمیم داشت دریا راهَ جی اَفسُسِ کنارای بوگذری تا خوشه وخته آسیا ولایت میئن هدر ندی، چون عجله داشت که اگه ببی، پَنتیکاست روز میئن اورشلیم دیرون بِیسی.
پولُس اِفِسُس شیخونِ أمره خدافظی کوئنه
17پولُس، میلیتوس جی یکته پیغوم افِسُس به سرا دا و کلیسا شیخونِ خو ورجه دوخُنده. 18وختی اوشون بومَئن، پولُس ایشؤنِ بوته: «شمه خودتون، خبر دئنین هو اوّلی روزَ جی که آسیا میئن پا بَنَم، چوطو تمام می وخت شیمه به بنام. 19چوطو اَرسو فودم و تمام فروتنی أمره خداوندِ خدمت گودم و او سختی أنی که یهودی أن توطئه واسه می سر بومَه، تحمل بُودم. 20هنده دؤنین که هرچی که ممکن بو شیمه به سود بدأره، هیچیِ دریغ نودَم، بلکه پیغؤمِ شمه بِه اعلوم بودَم، چی جمعِ دیرون و چی خونه به خونه شمه به تعلیم بدَئم. 21هم یهودی أن و هم یونانی أنم شهادت بدم که باء توبه بکونن و خدا سو وگردن و اَمه خداوند عیسی مسیح ایمؤن بأرن.
22«الؤن، خدا روحِ هدایت أمره اورشلیم شوئدرم و نودونم اوره چی می سر هنه؛ 23جُز اونکه هر ته شهر میئن روح القدس هشدار دئنه که زندؤن و سختی می ریفاه ایسا. 24ولی مو، هم می جؤنِ هم می زندگی بی ارزش دوئنم. فقط اگه بتؤنم می دوره تمنه کونم و خدمتیِ که خداوند عیسی جی هیتَم، تا به آخر برسونَم، و خدا فیض و خدا خورم خبر به شهادت بدم.
25«الؤن دؤنم هیشکس از شمه که مو شیمه میئن بگرسم و خدا پادشاهیِ اعلام بُودم، دِه می روئه نَینین. 26پس امروز شمه شهادت دئنم که هیشکس خون می گردن نیه، 27چونکه مو در حق کسی کوتاهی نودم بلکه خدا پیغومه همته ذره، شمه به اعلام بودم. 28شمه حواس جمع ببی. مواظب تمام گله ای ببین که روح القدس شمه به انتخاب بوئده تا اوشونه بپاین. خدا کلیسا که اونه خوشه خون أمره بهه، شبانی بکونین. 29دؤنم بعدِ اینکه مو بوشوم، درّنده ورگؤن شیمه میئن هنن که گلّه به رحم نوکئنن. 30حتی شیمه میئنای کسؤنی ویریسنن و حقیقت عوضَ کوئنن تا شاگردؤن خوشونِ دومبال هکشن و از راه بدرَ کونن. 31پس واخوب ببین و بخاطر بأرین که مو سه سال تمام، شبنده روز، می اَرسونِ أمره، یه لحظه هم شمه هشدار دئن اجی دست وینتم.
32«الؤن شمره به خدا و اونه فیض بخشه کلام دست سپارنم که توئنه شمره بنا بکونی و همه کس میئن که تقدیس بوبوئن، ارث هدی. 33می چیشم هیشکسِ طلا و نقره و رخت میئن دنبو. 34شمه خودتون دؤنین که خودم می دست أمره، می احتیاجؤن و می همراه أن احتیاجؤنِ فراهم بُودم. 35مو از هر نظر شمره نیشون بدم که باء ایطو سخت کار بکونیم تا بتؤنیم ضعیفؤن دستِ بگیریم، و عیسی خداوند گبؤنِ به یاد بدأریم که چطو خودش بوته: ”هَدَئن، هیتَن جی بهتره.“» “ 36پولوس وختی خو گبؤن تمنه گوده، زانو بزه و تمام اوشان أمره دوعا بوُده. 37همه خیلی ونگ بزِئن و اونه کیشَیتن، اونه موچی زئن. 38اوچی که بیشتر از همه اوشونه ناراحت گود، پولُس ایی گب بو که بوته:« دِه می روئه نینین.» بازین تا کشتی سو اونه بدرقه بودن.
ទើបបានជ្រើសរើសហើយ៖
رسولؤن اعمال 20: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
