رسولؤن اعمال 13
13
بَرنابا و شائول سفر، انجیل پیغومِ به
1اَنطاكیه كلیسا دیرون، پیغمبرؤن و معلمؤن ایسابوئن: بَرنابا، شمعون معروف به نیجِر، لوكیوسِ قیرَوانی، مَنائِن که هیرودیس حاکیم ناتنی برأر بو و شائول. 2وختی که اوشون روزه داشتَن و خداوند پرستش کأدبؤن، روح‌القدس بوته: «بَرنابا و شائولِ او كار واسه که مو ایشؤنِ اونه بِه دوخُندم مِه بِه سیوا بکونین.» 3بازین اوشؤن، بعد روزه و دعا، خوشونِ دستِ او دوته سر بنئن و ایشؤنِ سرادائن سفر.
بَرنابا و پولس، قبرس میئن
4ایطوری او دونفری که روح‌القدس طرفای سرادا بوبؤبوئن، سِلوكیه بندر بوشؤئن و اورای، دریا راهَ جی قبرسِ برسئن. 5وختی سَلامیس شهر دیرون بوشوئن، یهود عبادتگاأنِ میئن خدا كلامِ اعلوم بودن، ایشون، یوحنا معروف به مرقُس هم خوشونِ أمره ببورده بوئن تا ایشؤنِ کمک بکونی.
6اوشؤن سرتاسرِ جزیره بگرسن تا پافوسِ شهرِ برسِئن. اوره یکته یهودی مرداک که باریشوع ایسم داشتِ بدِئن. او مردکای جادوگر و دروغی پیغمبر بو. 7او رومی فرماندار ’سِرگیوس پولُس‘ ریفق بو. فرماندار که یکته عاقل مرداک بو، بَرنابا و شائولِ خو ورجه دوخُنده، چون خوأس خدا كلامِ بشتوئی. 8اما او جادوگر که اینه ایسمِ معنی عالِم بو اوشونِ أمره مخالفت بوده و حقسعی بوده تا فرماندارِ نوگزاری که ایمؤن بأری. 9ولی شائول، که اونه پولُس هم گوتن، روح‌القدسای پُورا بو، او مردکه چیشمِ چال بزه و بوته: 10«تو ای ابلیس زأک، ای که همته خوبی أنِ دشمنی، ای که حیله و نیرنگَ جی پُورا گوده ایسّی! چرِء خداوند راستِ راهون كجَ كوئنی و ایی کارَ جی دست وینگینی؟ 11اینه بودؤئن که خداوندِ دست تی ضید ایسّه. الؤن كورَ بنی و چنوخت منِئی آفتاؤ بَینی.»
هو دم، همه جا اونه به تیره و تارَ بؤ، خو دور چرخَس و ینفر دومبال گرس که اونه دست بگیری و راه‌ِ اونه نیشون بدای. 12بازین بعد اونکه فرماندار ایی اتفاقِ بدِه، ایمؤن بأرده، چون او تعلیمَ جی که خداوند باره دَئن، ماتَ بؤبو.
پولُس و بَرنابا انطاكیه دیرون
13پولُس و اوشونی که اینه أمره بوئن دریا راه میئنای پافوس شهرَ جی، پِرجه بوشؤئن که پامفیلیه منطقه درون هنه بو. اما اوره یوحنا معروف به مرقُس ایشؤنای سیوا بوبؤ و اورشلیم شهر وگرسه. 14ولی اوشؤن پِرجه شهرَ جی ردَّ بوئن و اَنطاكیه شهر که پیسیدیه ولایت میئن هنه بو، برسئن. مقدس شنبه روز ، عبادتگاه دیرون بوشون و بنیشتن. 15بعدِ اونکه تورات و پیغمبرؤن بنویشته أنِ بوخوندَن، عبادتگاه پیلترون ایشؤنه به پیغوم سرادائن و بوتَن: «برأرؤن، اگه گبی دئنین که مردم تشویقِ کوئنه، بوگوین.»
16پولُس بیسَه و خو دستِ أمره اشاره بودِه، بوته: «ای یهود مرداکؤن و شمه ای خدا ترسون، گوش بدین! 17ایی یهودِ قومِ خدا، اَمه پئرؤنِ انتخاب بودِه و اَمه قومِ، زمونی که مصر میئن غریب بوئن، اوشونِ سربلندَ گوده و پیله قوت أمره اوشونه او مملکتَ جی بیرون بأرده، 18و دوروبرِ چهل سال ایشؤنِ رفتارِ بیابؤن میئن تحمل بوده. 19او بعدِ اینکه هفتِ ملتِ که كنعان میئن ایسابون نابودَ گوده، اوشونه مملکتِ خوش مردومِ، به ارث بنه. 20ایشون همه دوروبرِ چهارصد و پنجاه سال طول بكشه.
«بعدِ او، خدا، تا سموئیل پیغمبر زمؤن، داورؤن، ایشؤنِ هدأ. 21بازین اوشؤن یکته پادشاه بخواستَن و خدا شائول، قیس ریکه، بنیامین قبیله جی، ایشؤنِ هدأ، که چهل سال حكومت بوده. 22بعد ایکه شائول حکومتَ جی ویته بوبؤ، داوودِ انتخاب بوده که ایشؤنِ پادشاه ببی، و اونه باره ایطو گوایی بده بوته: ”مو، داوود، یِسا ریکه یکته مرداک بدِئم که خیلی می دیلِ میئن بنیشته؛ او تموم می خوأسته أنِ انجوم دِئنه.“
23«خدا طبق خو وعده، هی مرداکِ نسلای، یهودِ مردم به یکته نجات دهنده یعنی عیسی، سرادا. 24قبل اینکه عیسی بای، یحیی تمومِ یهودِ مردم به، غسلِ تعمید گیتنِ توبه وسه، اعلوم گود. 25وختی یحیی خو خدمتِ تمنه کاده بو، بوته: ”فیکر کوئنین مو کی ایسّم؟مو او نیَم؛ بلكه او بعدِ مو هنه و مو حتی قابیل نی‌یم كه اونه چاروغِ بندِ بازَ کونم.“
26«ای برأرؤن، ای ابراهیم نسلِ زأکؤن، و ای خدا ترسونی که شیمه میئن دئنین! ایی نجات پیغؤم ، اَمه بِه سرادا بوبو. 27چونکه اورشلیم مردم و ایشؤنِ پیله ترؤن عیسی نشنأختن و پیغمبرؤن گبؤن که هرته مقدس شنبه روزونِ میئن بوخونده بنه نفهمسن، و اوشؤن، عیسی محکومَ گودنِ أمره پیغمبرونِ گبونِ به حقیقت برسونِئن. 28با اونکه هیچ تقصیری اونه كوشتن بِه نیاتّن، پیلاتُسای بخواستَن اونه بکوشی. 29وختی تموم اوچیزی که اونه باره بنویشته بوبؤ بو انجام بدَئن، اونه صلیبای جیر بأردَن، مقبره میئن بنائن. 30اما خدا عیسی، مُرده‌أنه اجی زنده بوده. 31خیلی روزؤن عیسی خوشِ اوشؤنی به که اونه أمره جلیل طرف، اورشلیم سو بومه بوئن، ظاهیرَ گود. الونم، اوشون أمه مردومِ به، اونه شاهیدون ایسّن.
32«الؤن أمه، ایی خوروم خبر شمره دِئنیم که خدا اوچیِ که اَمه پئرؤنِ وعده بده‌بو، 33عیسی زنده گودنِ أمره، اَمه به که ایشؤنِ زأكؤنیم وفا بوده. هوطو که دومی مزمور میئن بنویشته بوبؤ:
«”تو می ریکاکی؛
امروز، مو تَه مولود بودَم.“
34«خدا اونه مُرده‌أن جی زنده بوده تا هرگی نپیسی هوطوكه خدا بوته:
«”مو او مقدس و مطمئنِ برکاتِ
که داوود وعده بده بوبؤ،
شمره هَدِئنم.“
35و هیطو یکته مزمور دیگه میئن بنویشته بوبُؤ که:
«”تو نوگزائنی اون که تی مقدس ایسه،
بپیسی.“
36«داوود بعدِ اونکه طبق اراده خدا خو دوره مردمونِ خدمت بوده، بمورده و خو پئرؤنِ ورجه بوشو و بپیسه. 37ولی او كسی که خدا اونه زنده بوده،نپیسه.
38«پس، ای برأرؤن، بودؤنین که بواسطه ای عیسی، گوناهؤنِ آمرزش شیمه به اعلوم بنه. 39هرکس عیسی ایمان بائره به واسطه ی اون، آزادَ بنه، هر اونچی دیرون که نتونستید بواسطه ی موسی شریعت، آزاد ببین. 40پس بپایین که پیغمبرؤن كتاب بنویشته شیمه سر نأی که گونه:
41«” بَینین، ای شمه که روخشنهَ گینین
حیرونَ بین و هلاك بین،
چون شمه دورؤنِ دیرون كاری کوئنم،
که هرچی اونه شمه به بوگوئن
هرگی باور نوکؤنین.“»
42وختی پولُس و بَرنابا عبادتگاهَ جی بیرون شوئدبون، مردم اوشونای خواهش بودن که ایی مقدس شنبه هم اَمئدره، ایی جور چیزونِ باره ایشؤنِ أمره گب بزنن. 43بعدِ اونکه جماعت، عبادتگاهَ جی بوشوئن، خیلی از یهودی أن و او خداپرست آدمؤن که یهودی بوبؤبوئن، پولُس و بَرنابا دومبال راه دكتن. پولس و بَرنابا ایشونِ أمره گب بزِئن و اوشونه تشویق بودن که خدا فیضِ دیرون ادامه بدِئن. 44او یکته مقدس شنبه که بما، تقریباً، تمؤم شهر مردم جومَه بوئن تا خداوند كلامِ بشتوئَن. 45وختی یهودی أن مردم شلوغیِ بدِئن، حسودی جی پُورا بؤئن و بی حرمتی همره پولُس گبؤنِ أمره مخالفت بودن.
46پولُس و بَرنابا شجاعت أمره بوتَن: «لازم بو خدا گبؤن پیشتر، شیمه به بوته ببی. اما چون اونه ردَّ گودین و شمره اَبدی زندگی قابیل نودؤنسین، پس الؤن أمه غیریهودی أنِ سو وگردنیم. 47چون خداوند اَمره ایطوری فرمون بده که:
«” مو تَه غیر یهودی أنِ به نور چأگودم،
تا نجاتِ چارگوشه دونیا، برسؤنی.“»
48وختی غیریهودی أن اینه بشتؤسَن، خوشحالَ بوئن و خداوند کلام احترؤم بوگذاشتن؛ و اوشؤنی که ابدی زندگی بِه معین بوبؤبوئن، ایمؤن بأردَن. 49ایطوری خداوند كلام سرتاسر او منطقه میئن پخش بوبو. 50ولی یهودی أن، متعصبُ سرشناس زنأكؤنی و مردَكؤنی که شهر دیرون رهبر بوئن کوکَ گودَن. اوشونم بَرنابا و پولُسِ اذیت و آزار بودَن و او منطقه جی بیرونَ گودَن. 51پولس و بَرنابا هم، اوشهر خاکَ، خوشؤنِ پاأنِ جی ایشؤن ضید، فلاکنِئن و بوشؤن شهر قونیه. 52شاگردؤن شادی و روح‌القدس جی پُر بوئن.
ទើបបានជ្រើសរើសហើយ៖
رسولؤن اعمال 13: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
