Psalms 81
81
1ကျွန်ုပ်တို့၏အစွမ်းသတ္တိဖြစ်တော်မူသော ဘုရားရှင်ထံ ရွှင်လန်းစွာသီချင်းဆိုကြလော့။ ယာကုပ်၏ဘုရားရှင်ထံသို့ ကျယ်လောင်စွာ ကြွေးကြော်ကြလော့။ 2တေးသီချင်းကိုသီဆို၍ ပတ်သာ၊ အသံသာယာသောစောင်းကောက်နှင့် စောင်းပြားတို့ကို တီးခတ်ကြလော့။ 3ငါတို့၏ပွဲနေ့တည်းဟူသော လဆန်းနေ့၊ လပြည့်နေ့၌ တံပိုးကိုမှုတ်ကြလော့။ 4အကြောင်းမူကား ဤအရာသည် အစ္စရေးအတွက် ပြဋ္ဌာန်းချက်၊ ယာကုပ်၏ဘုရားရှင်၏စီရင်ထုံးဖွဲ့ချက်ဖြစ်၏။ 5ဘုရားရှင်သည် အီဂျစ်ပြည်ကိုဆန့်ကျင်ရန် ကြွတော်မူသောအခါ ထိုအရာကို ယောသပ်အမျိုးအတွက် သက်သေခံချက်အဖြစ် တည်စေတော်မူ၏။ ငါမသိမကျွမ်းသောဘာသာစကားကို ငါကြားရ၏။ 6“ငါသည် ဝန်ထုပ်ကို သူတို့၏ပခုံးပေါ်မှဖယ်ရှားပြီ။ သူတို့၏လက်သည် ခြင်းတောင်းသယ်ရခြင်းမှ လွတ်မြောက်ပြီ။ 7သင်သည် ဆင်းရဲဒုက္ခထဲမှခေါ်သောအခါ သင်တို့ကိုငါကယ်မခဲ့၏။ မမြင်နိုင်သောမိုးချုန်းသံကြားမှ သင်တို့ကိုငါထူးခဲ့၏။ မေရိဘစမ်းရေအနားတွင် သင်တို့ကို ငါစစ်ဆေးခဲ့၏။ 8အို ငါ၏လူမျိုးတော်တို့၊ ကြားနာလော့။ ငါသည် သင်တို့ကိုသတိပေးမည်။ အို အစ္စရေးလူမျိုး၊ သင်တို့အား ငါ့စကားကိုနားထောင်စေလို၏။ 9သင်တို့၌ အခြားသောဘုရားမရှိရ။ တိုင်းတစ်ပါးသား၏ဘုရားကိုလည်း ဝတ်ပြုကိုးကွယ်ခြင်းမပြုရ။ 10ငါသည် သင်တို့ကိုအီဂျစ်ပြည်မှထုတ်ဆောင်ခဲ့သော သင်တို့၏အရှင်ဖြစ်တော်မူသည့် ဘုရားရှင်ဖြစ်၏။ သင်တို့၏ပါးစပ်ကိုကျယ်စွာဖွင့်လော့။ သင်တို့ကို ဝပြောစွာ ငါကျွေးမည်။ 11သို့သော် ငါ့လူမျိုးတော်တို့သည် ငါ့အသံကိုနားမထောင်ခဲ့ပေ။ အစ္စရေးလူမျိုးတို့သည် ငါ့ကိုမနာခံခဲ့ပေ။ 12သို့ဖြစ်၍ သူတို့သည် မိမိတို့၏အကျင့်အကြံအတိုင်း လျှောက်လှမ်းကြစေရန် သူတို့နှလုံးသား၏မာကျောမှု၌ ငါအပ်လိုက်၏။ 13ငါ၏လူမျိုးတော်တို့သည် ငါ့စကားကိုနားထောင်၍ အစ္စရေးလူမျိုးတို့သည် ငါ၏လမ်းအတိုင်းလျှောက်လှမ်းခဲ့လျှင် 14ငါသည် သူတို့၏ရန်သူများကို လျင်မြန်စွာရှုံးနိမ့်စေ၍ ငါ၏လက်ကို သူတို့၏ရန်သူများဘက်သို့ ပြန်လှည့်စေခဲ့ပေလိမ့်မည်။ 15ဘုရားရှင်ကို မုန်းသောသူတို့သည် ရှေ့တော်၌ ခယဝပ်တွားကြသော်လည်း သူတို့၏အပြစ်ဒဏ်ခံရသောကာလသည် အစဉ်ထာဝရဖြစ်လိမ့်မည်။ 16သို့သော် ငါသည် သင်တို့ကို အကောင်းဆုံးသောဂျုံဆန်ဖြင့် ကျွေးမွေးတော်မူ၍ ငါသည် ကျောက်ဆောင်မှထွက်သောပျားရည်ဖြင့် သင်တို့ကိုဝလင်စွာစားသုံးစေမည်” ဟုမိန့်လေ၏။
ទើបបានជ្រើសរើសហើយ៖
Psalms 81: TPV-RV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.