Baroma 8
8
Ekukoresibwa ne'Muchima Mubuya-buya
1Bushi no'ku, rero kutachiri buchinjibusi busibya kwa bandu ba bàli mwa buuma na Yesu Kirisito. 2Bushi emwaso we'Muchima Mubuya-buya iwénde wâna ekalamo kwa bandu ba bàli mwa buuma na Yesu Kirisito. Oyu mwaso, ákukulire mwa bucha bwe'mwaso we'bibi ne'lufu. 3eMwaso* wa Musa atáalaa kuira echera bushi ne'kuina emisi kwe'mundu. Si Ongo yeke áiraa'chi: átumaa eMwana wai ahúbe mundu nga tubano tu bandu be'bibi, chasiya àtununule mwa bibi. Mwe'i njira mu Ongo áchinjibusaa ebibi bya byénde byákola mwa bandu. 4Mwa bacha, chira mwasi woshi ola oyu Mwaso* ábaa áhonda, era kwire áberera mwa ndanda setu. Kanji tùtachikoresibwa ne'myasi ye'mubiri, si twera twénde twákoresibwa ne'Muchima Mubuya-buya.
5Bushi ba bénde bákoresibwa ne'myasi ye'mubiri, emianyisa yabo ináchitulira kwa myasi ye'mubiri. Si ba bénde bákoresibwa ne'Muchima Mubuya-buya, beke emianyisa yabo itúla kwa myasi ye'Muchima Mubuya-buya. 6Ekubika emianyisa kwa myasi ye'mubiri, kwénde kwáreta elufu. Si ekubika emianyisa kwa myasi ye'Muchima Mubuya-buya, kweke kwénde kwáreta ekalamo ne'bôlo. 7Bushi ba bénde bábika emianyisa kwa myasi ye'mubiri, batúla barenda ba Ongo. Bàtaira kwa Mwaso* wa Ongo atúla àtechire, bàtanganaala kuira'ko chiro na hicha. 8Ebandu ba bénde bákulikira emyasi ye'mubiri, bàtangaala kusimisa Ongo.
9Si mwabo, mùtachikukira emyasi ye'mubiri, si mwera mwénde mwákulikira emyasi ye'Muchima wa Ongo, akaba oyu Muchima wai àli mwa ndanda senyu. Na akaba mundu atéte eMuchima wa Kirisito* mwa ndanda sai, oyola atá mundu wa Kirisito*. 10Si akaba Kirisito* àli mwa ndanda senyu, chiro angaba mbu emubiri wenyu ákafa bushi ne'bibi, si eMuchima Mubuya-buya akáberesa ekalamo, bushi Ongo ábairire kuba bandu ba bàtungenene. 11Kanji akaba eMuchima wa Ongo iwômolaa Yesu mwa bafu àli mwa ndanda senyu, kukuteta mbu oyu wômolaa Kirisito* àkêresa emubiri wenyu we'kufa ekalamo. Akáira bacha, kurengera eMuchima wai ola utúla mwa ndanda senyu.
12Rero banyaketu, tùli mu mwinda. Si tutáli mu mwinda we'mubiri, kuikira echihangi ekalamo ketu kénde kákoresibwa ne'kuhonda kwe'mubiri. 13Bushi akaba mwa kalamo kenyu, mungénde mwákoresibwa ne'myasi ye'mubiri, mungáfa. Si akaba mùngeta emyanya ye'mubiri kurengera ebuashi bwe'Muchima Mubuya-buya, mungába bauma-uma. 14Boshi ba bénde bákoresibwa ne'Muchima wa Ongo, bu bana ba Ongo. 15Bushi mutêresibwaa Muchima wa kubaíra tuungu*, nesi wa kubobairisa, si àli wa kubaíra bana ba Ongo. Na kurengera oyu Muchima ku twénde twâmaala Ongo mbu «Aba, Tata!»#8:15 Aba: mwa Chiarameya, kukuteta mbu tata. 16Kanji oyu Muchima Mubuya-buya yeine énde áteta kanangana mwa michima yetu kwa tubano tunáli bana ba Ongo. 17Rero, akaba tunáli bana bai, kukuteta mbu tukábona mwango kwa mwandu ola álaanyaa ebandu bai. Kanji oyu mwandu, tukáhangira'o na Kirisito*. Bushi akaba tùngalibusibwa ala'uma nai, kuno'ku ku tukánêresibwa ne'tunda ala'uma nai.
Ebandu ba Ongo álondolaa kutengera mira
18Nyono nyiséne kwe'malibuko ma twárenga'mo mwe'sine suku, màli maeke kurenza etunda lya Ongo akátulosa. 19Ebutala boshi kulinjira ku bwánalinjirira busese echihangi cha Ongo akálosa changanama ba bàli bana bai kanangana. 20Bushi buno butala bwábikirwe era bufuli se'buashi bwa butéte mufa. Atá kwa kuhonda kwe'butala bweine, si bushi na Ongo iwábikaa'bo era bufuli so'bu buashi. Si chiro bacha, ono munyiiro anáchiri'o: 21lusuku luuma, buno butala nabo bukáboolibwa. Bukátenga mwa bucha bwe'buashi bwa bwénde bwákumbya'bo, na bwêngira mwa buhuru no'mwe'tunda lye'bana ba Ongo. 22Twìshi kwa kuikira lwarero, ebutala boshi kulakanga ku bwánalakanga na kulibuka ne'mukero. 23Kanji atá ebutala bweine oshâo bu bwálakanga bacha, si netu tu twera twéte eMuchima Mubuya-buya nga mwango mubere-bere kwa bindu bya Ongo akátweresa. Twénjire twáchilakangira mwa michima yetu, mwa kulinjira Ongo àtuire kuba bana bai, na kutununula loshi. 24Bushi emunyiiro ítunete oshâo kwa twánunulibwe. Mango mundu aséne kwa kandu ka abáa àchinyiire, oyola àtachiri munyiiro. Nde i'ùngaendekera áchinyiira ekandu ka aséne'ko? 25Si akaba tùngachinyiira ekandu ka tùtasene'ko, twénde twálinjira'ko na bushibirisi bunene.
26Kanji kuno'ku, ku eMuchima Mubuya-buya énde átuasa mwa kuina emisi kwetu, bushi tùtatula twìshi kwéma ngo'kwa byěmire. Si eMuchima Mubuya-buya yeine énde átwěmera busese era mwa Ongo, nga mundu ola wáneka kwa kutangamaanyisibwa. 27Na Ongo iwénde wálola kwa myasi era ìri mwa michima yetu, atúla èshi emianyisa ye'Muchima Mubuya-buya. Oyu Muchima Mubuya-buya énde émera ebandu ba Ongo, kukulikana ne'kuhonda kwa Ongo.
28Twìshi kwa mwa myasi yoshi, Ongo énde ákola kwa mufa we'bandu ba batúla bamúsimire. Abola, bu âmaere kukulikana ne'bya áanyisa kuira. 29Bushi abu bandu, Ongo álondolaa'bo kutengera mira. Kanji átolaa elwango kutengera mira kwa akáira'bo kuba bandu ba bahúhene ne'Mwana wai. Áiraa bacha, chasiya oyu Mwana wai ábe fula ya banyakabo banene. 30Abu bandu ba Ongo átolaa elwango era luulu sabo kutengera mira, ábamaalaa. Na'bu âmaalaa, era kubaíra kuba ba bàtungenene era muhondo sai. Na'bu áiraa kuba bàtungenene, era kwêresa'bo etunda lyai.
Enzii ya Ongo
31Rero chi twíraa twáhuba kuteta? Akaba Ongo àli kwa lunda lwetu, nde i'ùngaala kutulwisa? 32Bushi Ongo atásichiraa kwa Mwana wai we'chihwa, si ámwanaa bushi netu tuboshi. Rero ngo'kwa átweresaa oyu Mwana wai, ku akánatweresa ne'bindu byoshi. 33Ebandu ba Ongo álondwere, nde i'ùngasitaka'bo? Bushi Ongo yeine iwénde wáira'bo kuba ba bàtungenene era muhondo sai. 34Nde i'ùngachinjibusa'bo? Kutali! Bushi Yesu Kirisito áfaa, era kunômwomoka, na lwarero àli kwa malyo ma Ongo, átwěmera. 35Chiye chi chìngatulikanya ne'nzii era Kirisito* àtutusa'ko? Eri ebuanya? Nesi ebusinane? Nesi ekulibusibwa? Nesi ebulio? Nesi ekuina enjimba? Nesi ekasibu? Nesi elufu? 36Bìri ngo'kwo bitúla byǎnjikirwe mwa Maanjiko Mabuya-buya mbu:
«Chira lusuku, bénjire báhonda kutwita bushi nao.
Bénjire bátutola nga mbuli sa sáya kukeribwa.»#8:36 Somaa Saburi 44:23.
37Si mwe'i myasi yoshi, twénjire twáima loshi kurengera oyu wátusimaa. 38Kubinali, nyìshi kanangana kwa kutáli kandu kasibya ka kàngatulikanya ne'nzii era Ongo àtutusa'ko: ábe elufu, nesi ekalamo, nesi ebamalaika*, nesi ba bèmire, nesi emyasi ye'sine suku, nesi emyasi era ikáika, nesi ba béte buashi, 39nesi bya byète buashi mwa chanya, nesi bya byète ebuashi era bufuli se'butala, nesi chira kandu koshi ka kábumbwaa, kàtangaala kutulikanya ne'nzii ya Ongo, era átulosaa kurengera Enawetu Yesu Kirisito.
ទើបបានជ្រើសរើសហើយ៖
Baroma 8: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.
