Baroma 9
9
Ebana ba Ongo kanangana
1Ene myasi náhonda kuteta mwe'sina lya Yesu Kirisito iri ya kanangana, ndáfula bisha. Kurengera eMuchima Mubuya-buya, emianyisa era yátenga mwa muchima wanyi yénjire yányilosa kwa ndáfula bisha. 2Nyéte businane bunene na malibuko manene mwa muchima. 3Kungabere kukulu nyichífire shambyo, kanji nyiríkane na Kirisito* kwa mutoloke wa banyaketu ba tubútwa nabo mu lubaa luuma. 4Abu banyaketu, bàli be'lubaa lwe'Baisiraeli. Ongo áiraa'bo kuba bana bai, era kubalosa ne'bulangare bwai. Kanji era kuira ebilaano nabo, na kwêresa'bo eMwaso*. Era kulosa'bo enjira era bangénde bámwera'mo, na kwêresa'bo ebiraane byai. 5Abu banyaketu bàli bo'mwa lubuto lwa bahokulu betu ba báire ngulu.#9:5 Bahokulu betu ba báire ngulu bàli: Aburahamu, na Isaka, na Yakobo. Na mwo'lu lubuto mu Kirisito* ábutwaa kwa njira ye'mubiri. Oyu Kirisito*, i'Ongo utúla era luulu sa byoshi, kanji iwénde wátongibwa esuku ne'mango. Bibe bacha!
6Ndàtechire mbu echiraane cha Ongo cháfire buha. Bushi atá ebandu boshi bo'mwa lubuto lwa Isiraeli, buna Baisiraeli kanangana. 7Kanji atá ebandu boshi bo'mwa lubuto lwa Aburahamu buna bana ba Aburahamu kanangana. Bushi Ongo áburaa Aburahamu mbu: «Elubuto lwa nákulanyaa, ukábona'lo kurengera Isaka.»#9:7 Somaa Ndangiriso 21:12. 8Kukuteta mbu atá ba bábutwaa kwa njira ye'mubiri bu bénde bátolibwa nga bu bana ba Ongo. Si ba bénde bátolibwa nga bu bana bai kanangana, bàli ba bábutwaa kukulikana ne'chiraane chai. 9Chechine chi chiraane Ongo êresaa Aburahamu: «Nyìshi kwa nyingáhuba kuika kuno wao mwa chianyiro cha chìri nge'chine, eri Sara era éte mwana wa busana.»#9:9 Somaa Ndangiriso 18:10.
10Kanji atá echera cheine, tulólaa no'kwa myasi ya Rebeka nai. Ábutaa maaha. Amu maaha, eshe wabo ánabaa muuma, hokulu wetu Isaka. 11-12Amu maaha, mango mábaa màtasa kubutwa, màtasa na kuira chiro na chibuya nesi chibi chisibya, Ongo era kubura Rebeka mbu: «Chikuru akaba mukosi wa chitoto.» Átetaa bacha chasiya alóse kwa yeke énde álondola ebandu ngo'kwa anásimire. Àtalondola'bo kukulikana ne'bya bénde báira, si kukulikana no'kwa yeine ánâmaalaa'bo. 13Bushi bitúla byǎnjikirwe mwa Maanjiko Mabuya-buya mbu: «Násimaa Yakobo i'mweresi, na náhomba Esau i'fula.»#9:13 Somaa Malaki 1:2-3.
14Rero chi tutétaa? Ongo atúla wa kalondo? Nânga, chiro na hicha!
15Bushi bacha ku áburaa Musa:
«Ola nyisímire kufira ebonjo, i'nyìnganafira'bo.
No'la nyisímire kuachira echamba, i'nyìnganaachira'chi.»#9:15 Somaa Kutenga 33:19.
16Mwa bacha, ebubuya bwa Ongo, bùtatenganyire ne'kuhonda kwe'bandu nesi ne'kuchisesa kwabo, si bùtenganyire ne'bonjo bwai.
17Bushi mwa Maanjiko Mabuya-buya, bacha ku Ongo áburaa mwami Farao: «Nàkwêmikaa chasiya bushi nao, nyilóse ebuashi bwanyi ne'sina lyanyi línde lyáhubanganyisibwa mwa butala boshi.»#9:17 Somaa Kutenga 9:17. 18Rero, echera chálosa kwa akaba Ongo asímire kufira emundu ebonjo, énde anámufira'bo. Na akaba asímire mbu mundu aátaa matwi masibu, énde ánaata'mo.
Ongo énde álondola ebandu kwa anásimire
19Kuli mango ungányibusa mbu: «Akaba ku bìri bacha, chi chera chénde chátuma Ongo ákaliira ebandu? Bushi kutáli ola ùngaala kulwisa ekuhonda kwai.» 20Rero u'mundu, ùli nde kwa kunana bya Ongo àtechire? Echindu cha chàbumbwaa mwe'bumba chitàngaala kubusa ola wábumbaa'chi mbu: «Chi chátumaa wányibumba bacha?» 21Emubumbi, kwa asímire ku énde ánaira ebumba. Mu chitosa chiuma che'bumba, àngabumba mu chindu cha chète etunda na chinji cha kukoresibwa chira chihangi.
22Rero, Ongo ábaa áhonda kulosa ebute bwai na kukanga ebandu ebuashi bwai. Si era kuata muchima wa kulinjirira ebandu ba ábaa ěmire kufira ebute na kulosa'bo kwa kasibu. 23Kanji ábaa áhonda alóse ebandu ba áfiraa ebonjo, kwa ngulu yai inátula inene. Abu bandu, bu ábaa ákunganyise mira chasiya nabo bàbone kwe'i ngulu yai. 24Na'bu bandu, bàli tubano. Atátulondolaa mwa Bayuta beine oshâo, si no'mwa banji bandu. 25Ei myasi ikulikene no'kwa Ongo àtechire mwa chitabo cha murebi* Oseya mbu:
«Elubaa lwa lutábaa lwanyi,
nyikálwěrika mbu: ‹Lubaa lwanyi.›
Ne'lubaa lwa nábaa ndatúla nyisímire,
nyikére nérika'lo mbu: ‹Lubaa lwanyi lusiirwa.›#9:25 Somaa Oseya 2:25.
26Na'la bérikibwaa mbu: ‹Mùtatula bandu banyi!›
Aola bakére bérikibwa mbu: ‹Bana ba Ongo ola ulí Muuma-uma.›»
27Murebi* Isaya nai bacha ku átetaa na murenge munene era luulu se'lubaa lwe'Baisiraeli: «Chiro àngaba mbu eBaisiraeli bàngaba banene nga mishee yo'mwa nyanja, si baeke mubo oshâo bu bakánunulibwa. 28Bushi cha Enawetu átetaa era luulu se'bandu be'butala, àtêmange kuira chi.»#9:28 Somaa Isaya 10:22. 29Ebyera bikulikene no'kwa murebi* Isaya áhubaa kuteta mbu:
«Akaba Enawetu Ongo íwabumbaa byoshi àtangaturekere bana bauma,
bìngatuberere ngo'kwa byáberaa besha mwa musi we'Sotomo ne'we'Komora.»
Ekutunganana kurengera ebwemeresi
30Rero chi tutétaa kasi? Ebandu be'sinji mbaa bábaa bàtahonda kutunganana era muhondo sa Ongo. Si rero kurengera ebwemeresi, bérire bátunganana era muhondo sai. 31Si eBaisiraeli beke, bábaa báhonda kutunganana era muhondo sa Ongo mwa kunde báira ngo'kwa Mwaso* atúla àtechire, si bitáalikanaa. 32Chi chátumaa bítaalikana kasi? Bitáalikanaa bushi bábaa baténjire báhonda kutunganana era muhondo sa Ongo kurengera ebwemeresi, si báhondaa kutunganana kurengera emyanya yabo oshâo. Mwa bacha, bera kwire básitala kwe' «ekoi#9:32 Ekoi lya báhambala'ko anola, àli Yesu Kirisito. lya lyénde lyákumbaasa ebandu»,#9:32 Somaa Isaya 8:14. 33ngo'kwa bitúla byǎnjikirwe mwa Maanjiko Mabuya-buya mbu:
«Mulólaa, mwa musi we'Sayuni, mu nabíkire ekoi lye'kusitasa ebandu.
Ne'ri koi, lìri lya kukumbaasa.
Si ola ukáchiachirisa kuli, yeke atákafunyike emuchima.»#9:33 Somaa Isaya 28:16.
ទើបបានជ្រើសរើសហើយ៖
Baroma 9: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.
