Mariko 12

Emuanyi we'bainzi babi

(Mat 21:33-46; Luk 20:9-19)

1Era nyuma se'bi, Yesu era kutangirisa áhambalira ebandu mwa mianyi. Era kuteta mbu: «Kwábaa mulume muuma ola wáingaa ehwa lyai lya misabibu*. Eri hwa, era kulisungusa elusito, era kuchima ne'fumbi era bangénde bákanjira mwe'tufuma twe'misabibu*. Era kuimbira ne'balanzi be'ri hwa, chitala cha chìtowamire. Chasinda, era kulibwesa bainzi bauma, na ábalama.

2«Ábere esuku se'kushebula saíka, era kutuma mukosi wai muuma era abu bainzi bàli, bamwêrese ewai mwango kwa myaka. 3Si oyu mukosi, abu bainzi bera kumusimba, bera kumupunda, na bámufulusa mino buha.

4«Oyu ene'hwa, era kuhuba kubatumira unji mukosi. Oyola nai bera kumusimba, bera kumuhuchiranga kwe'twe na kumukena.

5«Chasinda, ene'hwa era kutuma unji mukosi. Oyola yeke, bera kumwita. Era kunaendekera ábatumira banji bakosi banene. Bauma mubo, abu bainzi bera kubapunda, ne'banji bera kubeta.»

6«Ena ehwa era kunashiba na muala wai musiirwa oshâo. Era kwire ábatumira oyu muala wai mwa kuteta mbu: ‹Nyìshi kwa ono muala wanyi yeke, bangámutunda.›

7«Si abu bainzi, bámulolire'ko, bera kutangirisa báburana mbu: ‹Onola i'ukálya emwandu we'she. Muíraa tumwîte, chasiya tuchíshibanyire'o!› 8Bushi no'ku, bera kusimba oyu muala na bámwita. Chasinda, bera kúuma echirunda chai kwa musike se'hwa.»

9Yesu kukwera kubusa abu bandu mbu: «Rero oyu ene'hwa, kute akáira abu bainzi? Akáika kwita'bo, chasinda anêresa'li banji bainzi.»

10Kanji era kubabura mbu: «Mùtafuraa kusoma kwa Maanjiko Mabuya-buya matúla màtechire mbu:

«‹Ekoi lya baimbi bálangulaa,

li'lyáhubire koi linene lye'kuimbira'ko.

11Enawetu iwánaíraa bacha.

Ne'chi, chìri chisomerano ku tubano.›»#12:10-11 Somaa Saburi 118:22-23.

12Abu bakulu-kulu mango bámenyereraa kwa Yesu àishire oyu muanyi bushi nabo, bera kuhonda enjira ye'kumusimba. Si bushi bábaa bôbaa eluamba lwe'bandu, bera kumureka na báchiendera.

Ekufuta embarata ya mwami Kaisari

(Mat 22:15-22; Luk 20:20-26)

13Era nyuma se'bi, abu bakulu-kulu bera kutumira Yesu Bafarisayo* bauma na banji bandu bo'mwa chikembe cha Heroti, chasiya bamúteye mwasi, bàmusimbire kwa chinwa cha angáteta.

14Abu bandu, bera kuika kubusa Yesu mbu: «Mukangirisi, twìshi kwa wénde wáteta myasi ya kanangana, kanji wénde wákangirisa ebandu emyasi ya Ongo era běmire kunde bákulikira kwa binêmire. Kanji ùtobaa na mundu asibya, bushi ùtalaa ku bukulu-kulu bwa mundu. Rero, utúburaa kute uséne kwo'no mwasi: Emwaso wetu atúla emérere nesi àtemerere kunde twáfuta embarata era mwa mwami Kaisari*? Esi mbarata, twěmire kunde twáfuta'si nesi nânga?»

15Si Yesu bushi ábaa eshi kwa abu bandu batúla batebanyi, era kubabura mbu: «Chi chátuma mwányiteya emyasi bacha? Munyíreteraa chikoroto chiuma cha buteya bwa tinari, nyilóle ku'chi.» 16Bera kumuretera chiuma. Era kubabusa mbu: «Chine chihuhanyi ne'line sina bìri kwe'chine chikoroto, bìri byande?» Nabo mbu: «Bìri bya mwami Kaisari*.»

17Yesu kukwera kubabura mbu: «Rero, mundaa mwêresa Kaisari* bya bìri byai, mwánêresa na Ongo bya bìri byai.» Oyu mwakure wa Yesu, era kubashishasa busese.

Ebandu bábusa era luulu se'kwômoka

(Mat 22:23-33; Luk 20:27-40)

18Era nyuma se'bi, Basandukayo* bauma bera kuikira Yesu. Abu Basandukayo*, bu bénde báteta mbu ebafu bàtakômwoke. Bera kumubusa mbu: 19«Mukangirisi, Musa átetaa mwa Mwaso wetu mbu akaba emundu àngafa busira kubuta mwana asibya na mukai, byěmire mulumuna wai ěngire emuhumba-kasi wèshibire, chasiya abúchire mukulu wai ebana.

20«Rero, kwábaa batabana balinda ba bula buuma. Efula yera kuhwera mukasi. Ei fula, yera kufa busira kubuta mwana asibya. 21Mulumuna ola wábaa umúhuba'ko, era kwêngira oyu muhumba-kasi. Nai era kufa busira kumubuta'ko. Byera kunaba bacha kwa wa kahatu, 22na ku boshi kwa bábaa bánali balinda. Abu balume balinda boshi kwa bánatolaa oyu mukasi, kutábaa chiro na muuma ola wámubutaa'ku mwana asibya. Chasinjire, ola mukasi nai, era kufa. 23Rero, elusuku ebafu bàkwômoka, oyu mukasi akére ába wande? Bushi abu balume balinda boshi, bánamuhweraa.»

24Yesu nai mbu: «Mwàuwirwe busese, bushi mùteshi emyasi era yǎnjikirwe mwa Maanjiko Mabuya-buya, kanji mùteshi ne'buashi bwa Ongo. 25Bushi mango ebafu bàkômwoka, bakába nga bamalaika* bo'kwa nguba. Batákachihwere nesi kuhweribwa. 26Kanji, bushi ne'myasi yèrekere ekwômoka kwe'bafu, mùtafura kusoma mwa Mwaso wa Musa, emyasi era ìtechire era luulu se'haka lya lyábaa lyákorera? Ongo áburaa Musa mbu: ‹Nyono nyi Ongo wa Aburahamu, na wa Isaka, na wa Yakobo.›»#12:26 Somaa Kutenga 3:2-6. 27Yesu era kunaendekera áteta mbu: «Ongo àtatula Ongo wa bafu, si atúla Ongo we'bandu ba bàsene! Rero, mwabo mwàuwirwe busese!»

Emuomba munene kureza irikabo

(Mat 22:34-40; Luk 10:25-28)

28Mukangirisi muuma we'Mwaso*, ábaa ômvire kwa Yesu áenda ebwaka, no'kwa áakula kubuya abu Basandukayo*. Bushi no'ku, era kuchifunda ofu nai, na ámubusa mbu: «eWaliya! Mwa miomba* yoshi, muomba* muchiye i'utúla ùrenzise einji yoshi?» 29Yesu nai mbu: «Emuomba* mubere-bere i'yono: ‹Mu benyi Isiraeli mǔmvaa! Enawetu Ongo, yeine i'na Enawetu. 30Oyu Enawenyu Ongo, úndaa wámusima mwa muchima wao woshi, no'mwa mianyisa yao yoshi, no'mwa bwenge bwao boshi, no'kwa misi yao yoshi.›#12:29-30 Somaa Bukengere 6:4-5. 31Ne'muomba* wakabiri, i'yono: ‹Úndaa wásima na mulikenyu ngo'kwa utúla ùchisimire weine.› Ei miomba* ebiri, kutáli inji era i'renzise'i.»#12:31 Somaa Balawi 19:18.

32Oyu mukangirisi we'Mwaso, era kwire ábura Yesu mbu: «Nechi, Mukangirisi wàtechire kubuya kwa kùli Ongo muuma oshâo, kutachiri na unji. 33Kubinali, emundu ěmire kunde ásima Ongo mwa muchima wai woshi, no'mwa bwenge bwai boshi, no'kwa misi yai yoshi. Kanji ěmire kunde ásima mulikabo ngo'kwa atúla àchisimire yeine. Ekuíra bacha ku kukulu kwa kwâna emitulo* era ìsiresibwe, nesi einji mitulo* yoshi.»

34Mango Yesu álolaa kwa oyu mukangirisi ǎkwire na bwenge, era kwire ámubura mbu: «Woyo utáli bure ne'Bwami bwa Ongo*.» Era nyuma se'bi, chiro kukachiba mundu asibya ola wáereresaa áhuba kubusa Yesu mwasi.

Kirisito i'Enawabo Tauti

(Mat 22:41-46; Luk 20:41-44)

35Mango Yesu ábaa ákangirisa ebandu mwa chibuwa che'luhu lwa Ongo*, era kubabusa mbu: «Chi chénjire chátuma ebakangirisi be'Mwaso* báteta mbu Kirisito* àli Mwenyi mwami Tauti? 36Si Tauti yeine bushi ábaa ákoresibwa ne'Muchima Mubuya-buya, átetaa mbu:

«‹Enawetu Ongo áburaa Enawetu mbu:

"Wíkalaa kwa lunda lwanyi lwe'malyo,

kuikira nyibíke ebarenda bao

kuba chisimachiro chao."›#12:36 Somaa Saburi 110:1.

37«Tauti yeine átetaa mbu Kirisito* àli Enawabo. Rero, kute kwo'yu Kirisito* àngahuba kuba mwana wai?»

Yesu ákangirisa era luulu se'bubi bwe'bakangirisi be'Mwaso

(Mat 23:1-36; Luk 20:45-47)

Bandu banene busese bábaa bénjire bômvirisa emyasi ya Yesu na lumoo lunene. 38Mango ábaa énjire ábakangirisa, era kunde ábabura mbu: «Mundaa mwáchilanga kwa bakangirisi be'Mwaso*, bushi batúla bàsimire kutamba běmbese maropo marerere, kanji batúla bàsime kunde bákesibwa ne'tunda mwa bisiki bye'nyibuanano. 39Kanji mwa mashenge mabo, batúla bàsimire kwíkala mwa bifumbi bye'ra muhondo. No'mwa bisiki bye'linye, batúla bàsimire kwíkala kwa bifumbi bye'tunda. 40Bénde bányaa ebikulo bye'bahumbakasi, na kunde báíra memo marerere chasiya balórekane'ko era muhondo se'bandu. Bushi no'ku, Ongo akábachinjibusa busese!»

Emitulo ye'muhumba-kasi

(Luk 21:1-4)

41Chasinda, Yesu era kwékala álangusa kwa sanduku era bénde bátulira mwe'mitulo*. Era kulola kwa bandu bénjire bábika ebuteya mwe'i sanduku. Baare banene bera kubika'mu buteya bunene.

42Muhumba-kasi muuma wa mukene nai era kuika. Oyu muhumba-kasi nai, era kubika bikoroto bibiri bya buteya mwe'i sanduku. Ebi bikoroto, byábaa bikúnganyisibwe mwa miringa, kanji byábaa byéte mufa mueke busese.

43Yesu kukwera kwâmaala ebanafunzi* bai, era kubabura mbu: «Kubinali, nábabura kwa ono muhumba-kasi we'mukene iwàtulire Ongo binene kurenza ebanji bandu boshi. 44Bushi ebanji boshi bàtulaa Ongo emwango ola wàtalaa kwa bikulo byabo. Si ono muhumba-kasi mwa bukene bwai yeke, àtulire Ongo byoshi bya bìngamuasise kulama.»

ទើបបានជ្រើសរើសហើយ៖

Mariko 12: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya