Bakalatiya 4

1Chechine chi náhonda kuteta: emwana ola ukálya emwandu we'she, mango achíri mwana mutoto énde ába àli nga kaungu*, chiro angaba mbu i'ukába ena byoshi. 2Rero mango achíri mwana, énde ába àli era chibanda se'buashi bwe'barembesi bai, ne'ra chibanda se'buashi bwa ba bèmangirire ebikulo byai, kuikira echihangi che'she ákunganyise mira chiíke.

3Anabe netu, mango twábaa tuchíri nga bana batoto, twábaa tùli tuungu* twe'bindu bya byèmire muno butala. 4Si mango ebihangi bya byábaa byákunganyisibwe mira byáikaa, Ongo era kutuma eMwana wai. Era kubuchibwa na mukasi, ne'Mwaso* ábaa éte ebuashi era luulu sai, 5chasiya anúnule ebandu ba bábaa bàli era chibanda se'buashi bo'yu Mwaso*. Áiraa bacha, chasiya àtuire kuba bana ba Ongo.

6Kubinali, mwabo mùli bana ba Ongo. Echera chi chátumaa átuma eMuchima we'Mwana wai mwa michima yetu. No'yu Muchima, iwénde wátuma twáteta mbu: «Aba,#4:6 Aba: chìri chinwa cha Chieburaniya cha chìtechire mbu «Tata». Tâta!» 7Aola, ùtachiri kaungu*, si ùli mwana wa Ongo! Rero bushi ùli mwana wai, akákweresa kwa mwandu ola atúla àbikirire ebana bai.

Paulo áchǎanya bushi ne'Bakalatiya

8Kwa mira, mango mwábaa mùtasa kumenya Ongo, mwábaa mùli tuungu* twe'baongo ba bàtatula Ongo we'kanangana. 9Mwera mwìshi Ongo, si kanangana Ongo i'ubêshi. Kute mùngahubirira ebindu bye'buha-buha, bitéte na mufa, bya byèmire muno butala? Mwáhonda muhúbe kanji mwa bucha bwe'i myasi? 10Mwabo, muchiri mwátunda esuku sikulu, ne'myesi, ne'bianyiro, ne'miaka! 11Náchǎnya bushi nenyu, emulimo nàkolaa mwa kachi-kachi kenyu angesha kufa buha!

12Banyaketu, náběma busese mundaa mwáchitola nga nyono, bushi nanyi nénjire náchitola nga mwabo. Kutáli chibi chisibya cha mwanyíkoreraa. 13Mubeine mwìshi kubuya, kwa nàbonaa enjira ye'kubahubanganyisa eMwasi Mubuya-buya ebubere-bere, bushi nabáa nyìri mulwala. 14No'bu bulwala bwanyi, chiro mbu bwàbatamyaa busese, si mùtanyifiraa bute, nesi mùtanyikenaa. Si mwànyihuukasaa nga malaika* wa Ongo, ngo'kwa mùnganahûkasise Yesu Kirisito! 15Mwabáa bandu ba lumoo lunene, rero kute byàbere? Bushi nyeine nyìnganateta kanangana bya nyìshi era luulu senyu, kwa mwabáa mùnganômola ne'meho menyu, chasiya munyêrese'mo! 16Rero nabére murenda wenyu bushi nábabura ekanangana?

17Abu bandu bénjire bálosa kwa babéte ku chamba busese, si emianyisa yabo ìtakomire. Báhonda babáhombanye nanyi, chasiya emichima yenyu yěrekere busese era bàli. 18Cha chìkomire, kuli kuata emuchima we'kuira emabuya busese esuku soshi. Si kùtabaa mango nyìri ala'uma nenyu oshâo. 19Bana banyi basiirwa! Nálibuka kanji busese bushi nenyu, ngo'kwa mukasi énde álibuka ne'mukero. Nyingánaendekera kulibuka bacha, kuikira Kirisito* alórekane'ko mwa ndanda senyu. 20Nyìngasimire nyíbe nenyu mwe'sine suku, chasiya nyiményerere murenge muchiye nyìngahambala nenyu, bushi nàbôbairire busese!

Emuanyi wa Hakari na Sara

21Mu mwénde mwáhonda kuba era chibanda se'Mwaso*, munyiburaa: mùtomvire kute kwo'yu Mwaso* atúla àtechire? 22Bacha ku byǎnjikirwe: Aburahamu ábutaa bana babiri ba busana. Ábutaa muuma kwa kaungukasi* Hakari, ne'unji era kumubuta ku mukai Sara, ola wábaa utáli kaungu*.#4:22 Somaa Ndangiriso 16:15; 21:2. 23Oyu mwana we'kaungukasi* ábutwaa ngo'kwa ebanji boshi bénde bánabutwa, si emwana ola wábutwaa ne'mukasi ola wábaa utáli kaungu*, yeke ábutwaa kukulikana ne'chirane cha Ongo. 24Ei myasi, àli muanyi ola ulósise kwa abu bakasi babiri, báhuhanyisibwe na bilaano* bibiri. Oyu Hakari, ebana bai bu bábutwaa mwa bucha, kanji álosa echilaano* cha Ongo áiraa ne'bandu bai kwa ndulungu ye'Sinai. 25Kanji oyu Hakari ahúhanyisibwe ne'ndulungu ye'Sinai, era itúla mwa chio che'Arabiya. Ei ndulungu ihúhanyisibwe ne'musi we'Yerusalemu wa lwarero, ola uchíri mwa bucha ala'uma na besha'mo. 26Si emusi we'Yerusalemu wo'kwa nguba, weke àli mwa buhuru. Rero oyola i'mali! 27Bushi bitúla byǎnjikirwe mwa Maanjiko Mabuya-buya mbu:

«Woyo u ùli ngumba u'ùtafuraa kubuta, úndaa wámowa!

Woyo u'ùtafuraa kûmva kwa mukero énde áluma, ubándaa mu twabwabwe twa lumoo!

Bushi emuhombekasi,

i'ukáata bana banene,

kurenza enganzi.»#4:27 Somaa Isaya 54:1.

28Si mwabo banyaketu, mùli bana ba bábuchirwe kukulikana ne'chiraane cha Ongo, nga'kuno Isaka. 29Kwa mira, oyu mwana wábutwaa ngo'kwa ebanji boshi bénde bánabutwa, iwéndee wálibusa ola wábutwaa kukulikana ne'buashi bwe'Muchima wa Ongo. Ei myasi, ináchiri yáiribwa kuikira lwarero. 30Kute eMaanjiko Mabuya-buya matúla màtechire kasi? Màtechire mbu: «Ùlusaa kano kaungu* ke'mukasi ala'uma ne'mwana wai, bushi emwana we'kaungukasi* atémire kuhangira emwandu ala'uma ne'mwana we'mukasi ola utáli kaungu*.»#4:30 Somaa Ndangiriso 21:10.

31Mwa bacha banyaketu, tubano tutá bana be'kaungukasi*, si tùli bana be'mukasi ola utáli kaungu*.

ទើបបានជ្រើសរើសហើយ៖

Bakalatiya 4: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya