Bakalatiya 3

eMwaso nesi ebwemeresi

1Emu Bakalatiya, mwàrorobanyire! Kute mwalóirwe? Mwàrorobanyire bacha no'ku mwákangirisibwaa kubuya-buya kwa Yesu Kirisito àmanyikibwaa kwa musalaba! 2Náhonda munyákule kwo'no mwasi muuma oshâo: mwàbonaa eMuchima Mubuya-buya bushi mwénde mwáira kwa Mwaso* atúla àtechire, nesi bushi mwòmvaa eMwasi Mubuya-buya na mwêmerera'o? 3Chi chìngatuma mwárorobana bacha? Mwàtangirisaa kwa buashi bwe'Muchima Mubuya-buya, rero mwera mwáhonda kumalirisa kwa buashi bwenyu mubeine? 4Byoshi bya mwàrengire'mo, mwáhonda bífe buha? Chìtangaalikana mbu bìfaa buha! 5Ongo énde áberesa eMuchima wai, na kuira bisomerano mwa kachi-kachi kenyu. Mwìshi mbu énde áira bacha bushi mwénde mwáira kwa Mwaso* atúla àtechire, nesi bushi mwòmvaa eMwasi Mubuya-buya, na mwêmerera'o?

6Anabe na Aburahamu ábaa atúla emérere Ongo, bushi no'ku Ongo era kumutola ngo'la ùtungenene era muhondo sai.#3:6 Somaa Ndangiriso 15:6. 7Rero, chechine chi muményereraa: ebandu ba bèmerere Ongo, bu bana ba Aburahamu. 8eMaanjiko Mabuya-buya mábaa málolire mira era muhondo kwa ba bàtatula Bayuta, Ongo angáira'bo kuba bandu ba bàtungenene era muhondo sai, kurengera ebwemeresi bwabo. Bushi oyu Mwasi Mubuya-buya, Ongo ábaa ábwirire'o Aburahamu mira mbu: «Ongo akáahanyira embaa soshi so'mwa butala kukurengera'ko.»#3:8 Somaa Ndangiriso 12:3; 18:18; 22:18. 9Rero kukulikana ne'bi, Ongo énde áahanyira ebandu ba bàmwêmerere, ngo'kwa áahanyiraa Aburahamu iwábaa utúla umwêmerere.

10Kubinali, ba bénde bálangalira ekuíra ngo'kwa Mwaso* atúla àtechire, báfire shambyo. Bushi eMaanjiko Mabuya-buya matúla màtechire mbu: «Chira mundu ola utákende wáendekera kutunda byoshi bya byǎnjikirwe mwa bitabo bye'Mwaso*, àfire shambyo!»#3:10 Somaa Bukengere 27:26. 11Kanangana, kutáli mundu ola ùngatunganana era muhondo sa Ongo kurengera eMwaso*. Bushi eMaanjiko Mabuya-buya matúla màtechire mbu: «Emundu ola ùtungenene era muhondo sa Ongo, emibere yai ingénde yêmangira kwa bwemeresi.»#3:11 Somaa Habakuki 2:4; Baroma 1:17. 12Kanji, eMwaso* ne'bwemeresi bitá biuma. Bushi bitúla byǎnjikirwe mwa Maanjiko Mabuya-buya mbu: «Emundu ola wénde wáira kwa Mwaso* atúla àtechire, ekalamo kai ka kénde kêmangira kwo'yu Mwaso*.»#3:12 Somaa Balawi 18:5.

13Kirisito* átununwire kutenga mwa buchinjibusi bwe'Mwaso*, era kukomibwa eshambyo bushi netu. Bushi bitúla byǎnjikirwe mwa Maanjiko Mabuya-buya mbu: «Chira mundu woshi ola wamányikirwe kwa muchi eri àkomirwe shambyo!»#3:13 Somaa Bukengere 21:23. 14Mwa bacha, engahanyi sa Ongo álaanyaa Aburahamu, ba bàtatula Bayuta nabo bàbonyire'si kurengera Yesu Kirisito. Rero, kurengera ebwemeresi ku twábonyire eMuchima Mubuya-buya ola Ongo álaanyaa.

Echiraane cha Ongo ne'Mwaso

15Banyaketu, tuíshiraa emuanyi kwa bya bandu bénde báira: mango mundu murebe énde ába àirire chilaano* kwa njira era ìtungenene, kutachiri ola ùngaisha mwe'chi chilaano*, nesi kutalika ku unji mwasi. 16Rero, echiraane cha Ongo êresaa Aburahamu, êresaa'chi ne'lubuto lwai. eMaanjiko Mabuya-buya màtatechire mbu echi chiraane, Ongo êresaa'chi «enyibuto sai» ngo'kwa àngeresise'chi bandu banene. Si matúla màtechire mbu: «elubuto lwao»#3:16 Somaa Ndangiriso 12:7. , kwa kulosa kwa mundu muuma oshâo yêresaa echi chiraane. No'yu mundu i'Kirisito*.

17Emyasi era náhonda kuteta iye'ne: Ongo ábaa áirire mira echilaano*, kanji ábaa álaanyise kulanga'chi. Na mango kwábaa kwàrenga myaka maana mane na mahatu, eMwaso* wa Musa, era kuika. Si oyu Mwaso* àtangaisha mwe'chi chilaano* cha Ongo nesi kuhandula echiraane chai. 18Bushi akaba Ongo angénjire êresa ebandu emwandu bushi bénde báira kwa Mwaso* atúla àtechire, aola oyu mwandu àtachitenganyire ne'chiraane cha áiraa. Si kurengera echi chiraane, ku Ongo álosaa ebubuya bwai ku Aburahamu.

19Rero, chi chátumaa Ongo áreta eMwaso*? Átalikaa'o kwa chiraane, chasiya énde áasa ebandu kumenyerera bya bìtakulikene ne'kuhonda kwai. Oyu Mwaso* ákolaa kuikira mango emundu ola wábaa wěmire kubuchibwa mwa lubuto lwa Aburahamu áikaa. No'yu mundu, ye'chi chiraane chábaa chèrekere. Oyu Mwaso* ebamalaika* bu báreteraa'o ebandu kurengera mundu muuma ola wénde wábika ebandu mwa buuma.#3:19 Oyu mundu àli Musa. Somaa Balawi 26:46. 20Si oyu mundu we'kubika ebandu mwa buuma atéte mufa, mango emwasi erekere mundu yeine. Na Ongo anátula yeine.

Emufa we'Mwaso

21Rero, eri ei myasi ìtechire mbu eMwaso* énde álwisa ebiraane bya Ongo? Nânga! Bushi akaba eMwaso* àngaalire kunde êresa ebandu ekalamo, aola ebandu bangénjire bátunganana era muhondo sa Ongo kurèngera ekuíra kwa Mwaso* atúla àtechire. 22Si eMaanjiko Mabuya-buya matúla màtechire mbu ebandu boshi bàli mwa bucha bwe'bibi, chasiya echiraane cha Ongo chiíkire ebemeresi kurengera ebweresi bwabo mwa ndanda sa Yesu Kirisito.

23Mango enjira ye'kwêmerera Kirisito* yábaa ìtasa kuika, eMwaso* ábaa achíri atúminyire nga bandu ba buroko, kwa kulinjira obu bwemeresi bubíhulibwe. 24Mwa bacha, eMwaso* ábaa àli nga murembesi wetu, kuikira mango Kirisito* áikaa, chasiya túbe bandu ba bàtungenene era muhondo sa Ongo kurengera ebwemeresi. 25Si kutengera mango ei njira ye'kwêmerera Kirisito* yáikaa, tubano tùtachiri era bufuli so'yu murembesi.

Tuboshi tùli bana ba Ongo

26Bushi kurengera ebwemeresi bwenyu mwa ndanda sa Yesu Kirisito, muboshi munáli bana ba Ongo. 27Rero muboshi mu mwábatisibwe kurengera ebuuma bwenyu na Kirisito*, mwérire mwámuhuha. 28Bushi no'ku, kutachiri Muyuta nesi Mukiriki. Kutachiri kaungu* nesi mundu ola ulí mwa buhuru. Kutachiri mulume nesi mukasi. Bushi muboshi, mwera mùli mundu muuma kurengera ebuuma bwenyu na Yesu Kirisito. 29Akaba mùli bandu ba Kirisito*, kukuteta mbu mùli lubuto lwa Aburahamu, mukábona no'kwa mwandu ola Ongo ámuláanyaa.

ទើបបានជ្រើសរើសហើយ៖

Bakalatiya 3: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya