Bakalatiya 2

Paulo ne'sinji ndumwa bômvikana

1Mango kwábaa kwàrenga myaka ekumi ne'ne, nera kuhuba kwérukira eYerusalemu ala'uma na Baranaba. Nera kuenda na Tito nai. 2Nérukiraa'yi, bushi Ongo ábaa ànyilosise mira mu byabunya biroto mbu nyiyáa'yi. Náikire'yi, nera kubuanana ne'bemangisi be'luhu lwa Ongo mu chisiki chetu tubeine. Nera kubalikisisa'bo era luulu se'Mwasi Mubuya-buya ola nénjire náhubanganyisa ebandu ba bàtatula Bayuta, chasiya emulimo nàkolaa no'la nyichíri nákola àtafaa buha. 3Na Tito i'twabáa tùli nai, chiro mbu abáa àli Mukiriki, si bàtamuchichikaa mbu àmonyisibwaa. 4Bàtamuchichikaa no'ku mwa kachi-kachi ketu mwabáa mwàchifurerekire bandu bauma ba babáa bénjire báchitonga mbu bàli banyaketu bemeresi no'ku batá bemeresi. Abu bandu bengíriraa mwa kachi-kachi ketu kwa bubisho-bisho, chasiya babúsirise myasi era luulu se'buhuru bwa tutúsa mwa buuma bwetu na Yesu Kirisito. Babáa báhonda batúhubye kanji mwa bucha bwe'Mwaso. 5Si chiro túkêmerera emyasi yabo chiro na hicha, chasiya ekanangana ke'Mwasi Mubuya-buya kaéndekere kulangibwa bushi nenyu.

6Na'bu bábaa bèshibwe kwa bu bemangisi, ebukulu-kulu bwabo bùtanyibwirire kandu, bushi Ongo àtaira kalondo mwa bandu. Kanji kutáli chiro na mwasi asibya ola abu bemangisi bànyiburaa mbu nyindaa nákulikira. 7Si bera kwire bámenyerera kwa Ongo iwànyêresise emulimo we'kuhubanganyisa ebandu ba bàtatula Bayuta eMwasi Mubuya-buya, ngo'kwa êresise Petero emulimo we'kuhubanganyisa'o eBayuta. 8Bushi Ongo ola wáiraa Petero kuba ndumwa* kwa Bayuta, ino'yu iwànyiirire kuba ndumwa* kwa ba bàtatula Bayuta.

9Yakobo, na Petero, na Yowani, bu bábaa bèshibwe kwa bi bikondo bye'luhu lwa Ongo, mango balólaa kwa Ongo ányifirire bonjo, bera kwire bátweresa emino, nyono na Baranaba kwa kulosa kwa tùli mwa buuma. Aola, twera kwire twômvikana kwa tubano tungénde twáya kuhubanganya eMwasi Mubuya-buya kwa ba bàtatula Bayuta, nabo bánaya kuhubanganya'o kwa Bayuta. 10Mwasi muuma oshâo ibátwěmaa mbu túndaa twákengera kuasa ebakene. No'yu mwasi, nanáiraa'o na bushiru bunene.

Paulo ákaliira Petero

11Mango Petero áikaa mwa musi we'Andiyokiya, nera kunde nánana emyasi yai changanama, bushi ábaa énjire áuwa. 12Bushi lyebere ábaa àkomere kunde álya ne'ba bàtatula Bayuta.

Si mango bandu bauma ba bábaa bátengera era mwa Yakobo báikaa, Petero era kwire áchikula kwa ba bàtatula Bayuta, na kureka kunde álya nabo. Áiraa bacha, bushi ábaa ôbaa abu bénde bêmangira kwa myasi ye'kumonyisibwa. 13Na banji Bayuta bauma nabo bera kutangirisa kunde báya mwo'bu butebanyi bwa Petero. Anabe na Baranaba, nai era kunaya mwo'bu butebanyi bwabo. 14Mango nalólaa kwa'bu bandu baténjire báchikulikira ekanangana ke'Mwasi Mubuya-buya, nera kwire nábura Petero era muhondo se'bandu boshi mbu: «Woyo ùli Muyuta, si wénjire wákulikira emyanya ye'ba bàtatula Bayuta, si uténjire wákulikira emyanya ye'Bayuta. Rero, chi chìngatuma wáteta mbu ba bàtatula Bayuta běmire kunde bákulikira emyanya ye'Bayuta?»

15Tubano, tùli Bayuta ba kabutwa, tutá bandu ba sinji mbaa, abu bakosi be'mabi. 16Si twìshi kwa kutáli mundu ola ùngatunganana era muhondo sa Ongo, bushi énde áira kwa Mwaso* atúla àtechire. Si emundu énde átunganana era muhondo sa Ongo kurengera ekwêmerera Yesu Kirisito. Rero, netu twemérere Yesu Kirisito, chasiya túbe bandu ba bàtungenene kurengera ebwemeresi bwa tutúsa mwa ndanda sai. Si tùtatungenene bushi twénde twáira kwa Mwaso* atúla àtechire. Bushi kutáli mundu ola ùngatunganana era muhondo sa Ongo bushi énde áira kwa Mwaso* atúla àtechire.

17Si akaba tùngahonda kuba bandu ba bàtungenene kurengera ebuuma bwetu na Kirisito*, echera chilósise kwa netu tunáli bakosi ba bibi kuuma na ba bàtatula Bayuta. Eri echera chilósise mbu Kirisito* énde ákorera ebibi? Nânga! 18Akaba nyìngahuba kuimba bya nabáa nàhandure mira, ekuíra bacha kulósise kanangana kwa ndénjire náira kwa Mwaso* atúla àtechire. 19Bushi kukulikana no'yu Mwaso*, nyono nyìri nga mufu. Byàbere bacha, chasiya nyíbe muuma-uma, bushi ne'kunde násimisa Ongo. Nyono náfire ala'uma na Kirisito* kwa musalaba. 20Rero atá nyínyichiri muuma-uma, si Kirisito* i'ùli muuma-uma mwa ndanda sanyi. Ne'kalamo ka nyéte mwo'no mubiri, kàtenganyire ne'kwêmerera eMwana wa Ongo, ola wányisimaa, na kwâna ekalamo kai bushi nanyi. 21Nyono ndànganana ebonjo bwa Ongo, bushi akaba ebandu bangénjire bátunganana era muhondo sai mwa kuira kwa Mwaso* atúla àtechire, kukuteta mbu ekufa kwa Kirisito* kwabáa kwa buha!

ទើបបានជ្រើសរើសហើយ៖

Bakalatiya 2: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya