2 Bakorindo 11

Paulo ne'ndumwa sa sitá se'kanangana

1E betu! Náběma busese munyêmerere nyihámbale nenyu nga musire. Munyêmereraa betu! 2Nénjire nábafira lui lunene. No'lu lui, era mwa Ongo yi lùtengire. Bushi mwabo, mùli nga munyere ola ùtafuraa kumenya balume, ola ùkomisibwe*, ola nálaanyise kuabira mulume muuma oshâo. No'yu mulume i'Kirisito*. 3Si mukéngeraa kute wanjoka êngeeraa Efa kurengera ebukalange bwai. Rero nôbaa nenyu mungesha kwêngeerwa, kuikira echihangi mwáesa ekuchinyiirwa ne'kukomisibwa* kwa mutúsa mwa buuma bwenyu na Kirisito*. 4Ebyera bitènganyire no'kwa mwénjire mwêmerera mbu unji mundu aíkaa kubahubanganyisa era luulu sa unji-unji Yesu, kureka ola twabáhubanganyisaa. Kanji mwénjire mwába bangu kwángirira unji-unji muchima ola utáli ngo'la mwángiriraa, na kwángirira unji-unji Mwasi Mubuya-buya ola utáli ngo'la mwángiriraa kutenga era tùli.

5Náanyisa kwa abu mwénjire mwátola nga bu bakulu-kulu busese mwa ndumwa*, bàtanyirenzise mu chiro na mwasi asibya. 6Kubinali, chiro angaba mbu ndatúla nyìshi kuteta, si kwa bya byerékere emyasi ye'bwenge, nyibîshi kubuya. Ebyera twanábalosaa'bi kubuya-buya chira mango no'mwa myasi yoshi.

7Nyono nabáhubanganyisaa eMwasi Mubuya-buya wa Ongo busira kuběma kandu. Nàchândaasaa chasiya mwabo mwérusibwe. Rero mwa kuchandaasa bacha, naíraa chibi? 8Mango nabáa nákola mwa kachi-kachi kenyu, nabáa nénjire nálipibwa ne'binji bikembe bye'bemeresi. Mwa kuira bacha, nabáa ngo'la wányaa ebikulo bya'bu bemeresi na kukoresa'bi bushi nenyu. 9Mango nabáa nyìri mwa kachi-kachi kenyu, ndasítoweraa chiro na mundu asibya mwa malae manyi. Bushi banyaketu ba bàtengaa eMaketoniya, banyíreteraa byoshi bya nabáa nyìlaire'ko. Mwa myasi yoshi, nachilángaa busese nyingesha kubasitoera. Kanji nyingánaendekera kunde náchilánga. 10Kukulikana ne'kanangana ka Kirisito* ka kàli mwa ndanda sanyi, nálaisa kwa kutáli chiro na mundu asibya ola ungányanga mbu ndàchitongaa bushi no'yu mwasi mwa chio choshi che'Akaya. 11Chi chatúmire náteta bacha? Eri bushi ndàbasimire? Ongo yeine anêshi.

12Bya náira lwarero, bi nyingánaendekera kuira, chasiya nyǎngike ebandu boshi ba bénjire báhonda kuchitonga kwa nabo bákola kuuma netu. 13Abu bandu sitá ndumwa* kanangana, kanji bàli bakosi ba bàtateta ekanangana. Bénjire báchiíra nga siri ndumwa* sa Kirisito*. 14Oyu mwasi atá wakúshishasa bushi anabe Wamusimu* yeine nai énde áchiíra kuba malaika* wa bulangare. 15Rero atá mwasi wa kushishasa akaba ebakosi bai nabo bàngachiíra kuba bakosi be'myasi era ìtungenene. Kwa businda, bakêmbibwa kukulikana ne'bya béndee báira.

Emalibuko ma Paulo árengaa'mo

16Náteta kanji: kùtabaa mundu ola wáchichinga mbu nyìri musire! Akaba bitáli bacha, munyêmereraa nga musire, chasiya nanyi nyichítonge hicha. 17Bine náteta kwa kuchitonga, bìtatenganyire ne'kuhonda kwa Enawetu, si náteta'bi nga musire. 18Rero bushi bandu banene bénjire báchitonga kwa njira ye'mubiri, nanyi nyìnganachitonga. 19Mwabo mu mwìshi myasi, mwénjire mwámowera kwêmerera ebasire! 20Bushi mwénjire mwêmerera emundu ola wábatola nga tuungu*, ola wábatola mwe'mutoloke mwa bukalange, ola wábanyaa ebikulo byenyu, ola wábakengula, ola wábamaasa era buso. 21Náfa honyi sa kuteta ene myasi: tubano tutéte misi ya kuira bacha.

Si akaba mundu murebe àngaéreresa kuchitonga bushi na kandu karebe, nanyi nyingànaereresa. Rero nera nánateta nga musire. 22Abu bandu bàli Baeburaniya? Nanyi nyináli Mueburania. Bàli Baisiraeli? Nanyi nyináli Muisiraeli! Bàli bo'mwa lubuto lwa Aburahamu? Nanyi nyináli wo'mwa lubuto lwai! 23Bàli baanda ba Kirisito*? Nyono nyìri muanda wai kubarenza. Aola, nanátechire kanji nga mbuta.

Nàkolaa mirimo inene kurenza'bo, nàminwaa mbiso sinene kurenza'bo, napúndwaa mbiso sinene busese kurenza'bo, na bihangi binene elufu lwabáa lunyíri era muongo. 24Ku mbiso etano, eBayuta banyíhutaa biboko mahatu na mwenda.#11:24 Mwa Chikiriki byǎnjikirwe mbu: «biboko mane kukula ku chiuma.» Rero, emwaso we'Bayuta ábaa àtemerere mbu bachínjibusaa emundu kuikira kwa chihangi bámuhuta biboko mane. Béndee bêshira ku biboko mahatu na mwenda bangesha kutaluka amu mane. Somaa Bukengere bwe'Mwaso 25:3. 25Napúndwaa kahatu mwa tuchi, nàhutwaa emakoi euma, nasíkaa kahatu mwa nyanja, naíraa butufu buuma na lusuku lwa mutenga mwa nyanja. 26Naíraa nyibalamo mbiso sinene. Mwe'si nyibalamo, nàrengaa mwa bisibu bye'mwihuso we'nyishi sinenene, mwa bisibu bye'kutabalirwa ne'bihumusi, mwa bisibu bye'kutabalirwa na banyaketu Bayuta, mwa bisibu bye'kutabalirwa ne'ba bàtatula Bayuta. Nàrengaa mwa bisibu mwa misi, no'mwa buyeye*, no'kwa nyanja inene, no'mwa kachi-kachi ke'bandu ba bénjire báchěrika mbu bàli banyaketu no'ku batá banyaketu. 27Nàtamaa ne'mirimo isito. Bihangi binene naínaa etulo, bihangi binene nafáa ne'businya ala'uma ne'châmi, bihangi binene nàchîmaa ebiryo. Nàlibukaa ne'mbeo na kuina enjimba. 28Kanji busira kutondosa einji myasi yoshi era iri nge'i, chira lusuku emuchima wanyi énjire áanyisa busese era luulu se'bikembe byoshi bye'bemeresi. 29Mango mundu murebe áina emisi, nanyi ndàchumva naínyire'i? Mango mundu murebe àya mwa mabi, echera chìtanyocha kwa muchima?

30Akaba byěmire nyichítonge, nyingénde náchitonga bushi ne'kuina emisi kwanyi. 31Ongo, Eshe wa Enawetu Yesu, iwénde wátongibwa esuku ne'mango anêshi kwa ndàfula bisha. 32Mango nabáa nyìri mwa musi we'Tamasiki, emukulu-kulu ola mwami Areta ábaa emíkire'mo era kubika ebalanzi mwo'yu musi chasiya bànyisimbe.#11:32 Somaa Mikolo ye'ndumwa 9:23-25. 33Si ebandu bera kunyibika mwa chitonga, bera kunyirenzesa mwa tirisha na bányandaasisa kwa lusimbo lwe'musi. Rero, kunáfufumukaa bacha kutenga mwa mino yo'yu mukulu-kulu.

ទើបបានជ្រើសរើសហើយ៖

2 Bakorindo 11: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya

2 Bakorindo 11

ខគម្ពីរពេញនិយមពី
2 Bakorindo 11

ស្ដាប់នូវ 2 Bakorindo 11

ព្រះគម្ពីរ:

Tembo

ជំនាន់បកប្រែ: Echilaano Chiyayaya - tbt

2 Bakorindo 11

2 Bakorindo 11

ខគម្ពីរពេញនិយមពី 2 Bakorindo 11

ស្ដាប់នូវ 2 Bakorindo 11

ព្រះគម្ពីរ:

Tembo

ជំនាន់បកប្រែ: Echilaano Chiyayaya - tbt

2 Bakorindo 11

ខគម្ពីរពេញនិយមពី
2 Bakorindo 11