2 Bakorindo 12

Emyasi era Ongo ábihuliraa Paulo

1Mwa bacha, nyingáendekera kunde náchitonga chiro mbu ekuchitonga kutete mufa. Rero nera náhonda kuteta era luulu se'bya byénde byálorekana'ko nga byabunya biroto ne'myasi era Enawetu anyíbihuliraa. 2Nyìshi mundu muuma#12:2 Nyìshi mundu muuma: Anola Paulo áteta era luulu sai yeine. ola wábaa ùli mwa buuma na Kirisito*. Rero kwàrenga myaka ekumi ne'ne oyu mundu ěrusibwe kuikira kwa nguba ya kahatu.#12:2 Nguba ya kahatu: Kwa mira mwa mianyisa ye'Bayuta béndee báteta mbu enguba ya kahatu i'Paratiso. Na kwe'i Paratiso ku Ongo atúla. Ndèshi akaba oyu mundu ěrusibwaa àli mwa mubiri nesi abáa atáli mwa mubiri. Ongo yeine oshâo i'unêshi. 3Kanji nyìshi kwa oyu mundu ěrusibwaa. Si ndèshi akaba ěrusibwaa àli mwa mubiri nesi atáli mwa mubiri. Ongo yeine oshâo i'unêshi. 4Oyu mundu ěrusibwaa kuikira mwa Paratiso*. Era kûmva ku myasi ya kushishasa era emundu atéte loso lwa kubalikisa. 5Emundu ola ulí ngo'yu, i'nyingáchitongera. Si nyono ndáchitonge bushi nanyi nyeine, kureka ekuina emisi kwanyi. 6Akaba nyìngasimire kunde náchitonga, ndàngabere musire, bushi nyingénjire nánateta ekanangana. Si ndénjire násima kuchitonga, ebandu bangesha kunde bányerusa busese kurenza bya baséne nénjire náira nesi bya bénjire bômva náteta.

7Si kwa kuhonda ndàrengeresaa mwa kunde náchitonga bushi ne'myasi ye'kushishasa era Ongo anyíbihúliraa, nàbikibwaa kandu mwa mubiri ka kénjire kányibabasa nga muhoi-hoi. Aku kandu, kàli nga ndumwa ya Wamusimu* kwa kúnyihuta na kunyangika nyingesha kurengeresa mwa kunde náchitonga. 8Němaa Enawetu kahatu, chasiya akúle amu malibuko mwa ndanda sanyi. 9Si era kunyǎkula mbu: «Ebonjo bwanyi bùlumirire era ùli. Bushi ebuashi bwanyi bwénde bwálorekana'ko mango emundu aínyire emisi.» Rero, nyingénde náchitongera ekuina emisi kwanyi, chasiya ebuashi bwa Kirisito* búbe mwa ndanda sanyi. 10Bushi no'ku, nénjire námoera ekuina emisi, ne'kukambibwa, ne'kulibukira mwa muchima, ne'kulibusibwa, ne'kwôbairisibwa bushi na Kirisito*. Bushi mango naínyire emisi, mu mango nénde nába munyake.

Paulo ôbairira ebemeresi be'Korindo

11Rero, nérire nánaba nga musire! Si mumwanátumire nába bacha. Mwabo mu mwabáa mwěmire kunde mwálosa kwa nyìri nde. Bushi chiro angaba mbu nyìri mundu wa buha-buha, si esi ndumwa* senyu sa mwénjire mwátola nga bu bakulu-kulu busese, sìtanyirenzise kandu kasibya. 12Emyasi era yálosa kwa nyináli ndumwa* kanangana, yaíribwaa mwa kachi-kachi kenyu na bushibirisi bunene. Ne'i myasi iyêne: Ekuíra ebisomerano, ne'bishishalo, ne'bimenyeso. 13Chi mwàkeerwaa nachi kurenza ebinji bikembe bye'bemeresi, kureka nyono ekutabasitowera? Rero munyíbabaliraa kwo'yu mwasi ùtatungenene!

14Nàchikunganyise mira kwa kuika eyi mwenyu ebwakahatu, ndánabasitowere. Bushi atá ebikulo byenyu bi náhonda, si mwabo mu náhonda. Bushi atá ebana bu běmire kunde bábikira ebasere babo ebuare, si ebasere bu bêmire kunde bábikira'bo ebana babo. 15Si nyono nyingámowa kukoresa ebikulo byanyi na kwâna ekalamo kanyi nyeine bushi nenyu. Rero akaba nyibasimire busese bacha, mungányiata ku nzii yieke?

16Munêshi kubuya-buya kwa nyono ndàbasitoweraa. Si bandu bauma bénjire báanyisa mbu nyìri mukalange, kanji nasímbire'bo kurengera ebukalange. 17Munyíburaa: nabábonaa ku mutoloke mwa bukalange kurengera muuma mwa bandu ba nàbatumiraa? 18Němaa Tito busese mbu àyaa eyi mwenyu, nera kumutuma na unji munyaketu muuma. Munyíburaa, kuli mutoloke ola Tito àbabonaa'ko mwa bukalange? Nyono ala'uma nai, twabáa tutanéte mianyisa iuma na myanya iuma?

19Kutengera mira, mwabo mwénde mwáanyisa mbu tubano twénjire twáhonda kuchitetera era muhondo senyu. Twénjire twáteta era muhondo sa Ongo kukulikana ne'buuma bwetu na Kirisito*. Kanji banyaketu basiirwa, twénjire twáira ei myasi yoshi chasiya mukúle mwa bwemeresi. 20Bushi nôbaa kwa mango nyingáika eyi mwenyu, ndábabuane mùli ngo'kwa náhonda, nenyu mutányibuane nyìri ngo'kwa mwáhonda. Nôbaa nyingesha kubabuana mùli mwa mbangano, mwáfirana mufula, mùsibukirirane, mwětene ku muchima mubi wakaimano, mwákambana, mwâmaanana bulio, mwáchilola, mùli no'mwa kafango. 21Kanji nôbaa kwa mango nyingáhuba kuika eyi mwenyu, Ongo wanyi angányichisa honyi era muhondo senyu. Aola, nyingálira bushi na bandu banene mwa ba báiraa ebibi kwa mira, bàtanabindukaa bàtenge mwa myasi ye'kuchaka esinga, no'mwa buhungu, no'mwa lusingi.

ទើបបានជ្រើសរើសហើយ៖

2 Bakorindo 12: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya

2 Bakorindo 12

ខគម្ពីរពេញនិយមពី
2 Bakorindo 12

ស្ដាប់នូវ 2 Bakorindo 12

ព្រះគម្ពីរ:

Tembo

ជំនាន់បកប្រែ: Echilaano Chiyayaya - tbt

2 Bakorindo 12

2 Bakorindo 12

ខគម្ពីរពេញនិយមពី 2 Bakorindo 12

ស្ដាប់នូវ 2 Bakorindo 12

ព្រះគម្ពីរ:

Tembo

ជំនាន់បកប្រែ: Echilaano Chiyayaya - tbt

2 Bakorindo 12

ខគម្ពីរពេញនិយមពី
2 Bakorindo 12