1 Bakorindo 9

Emulimo ne'buhuru bwe'ndumwa sa Kirisito

1Nyono nyìri mwa buhuru. Kanji nyìri ndumwa*. Nyeine nàchiloreraa ku Enawetu Yesu Kirisito. Ne'mulimo wa Enawetu ola nàkolaa mwa kachi-kachi kenyu, iwatúmire mwámwemerera. 2Chiro àngaba mbu ebanji bandu bàtemerere kwa nyìri ndumwa*, si mwabo munêshi kwa nyìri ndumwa*. Kubinali! Ekuba kwenyu mwa buuma na Enawetu, ku kulósise kanangana kwa nyináli ndumwa*.

3Mango ebandu bénde bányisitaka, nénde nábǎkula mbu: 4netu, kasi tutéte eloso lwe'kunde twêresibwa ebiryo, ne'bye'kumwa bushi ne'mulimo ola twákola? 5Nesi tutéte loso lwa kunde twábalama na mukasi mwemeresi, ngo'kwa esinji ndumwa* sénde sáira, na banyakabo Enawetu, anabe na Petero? 6Nesi nyono na Baranaba oshâo, tu tunemire kunde twáchikorera chasiya tubóne bya tùlaire'ko? 7Kutali ola wénde wákoresa ebikulo byai yeine mwa mulimo we'chisula. Kutali no'la wénde wáinga ehwa lyai lye'misabibu* mbu àtalyaa no'kwa bifuma bya'li. Kutali na mungere ola ùtamwa kwa mata me'bifuana bya álanga.

8Mùtachichingaa mbu nàtechire ei myasi kukulikana no'kwa bitúla mwa kachi-kachi ke'bandu, si eMwaso* wa Musa nao ku anátula àtechire bacha. 9Bushi mwo'yu Mwaso*, bitúla byǎnjikirwe mbu: «Mango embanzi yákola mwa kushebula, ùtaiminaa ebunu mbu ìtalyaa kwa bulo.»#9:9 Somaa Bukengere 25:4. Mwìshi mbu Ongo átetaa ei myasi bushi ne'kulaa kwa ngaafu? 10Átetaa bacha bushi netu. Kubinali, oyu mwasi áanjikibwaa bushi netu. Byěmire emundu ola wáinga ehwa, no'la wáumba, boshi bakóle béte ne'munyiiro we'kubona ewabo mwango kwa myaka. 11Tubano twàingaa echinwa cha Ongo mwa ndanda senyu. Rero echibi ngai u'chìri akaba netu tùngende twábona kwa bindu bya mwéte? 12Akaba ebanji bu bète eloso lwe'kubona kwa bya mwète, si tubano tu twète'lo kurenza'bo!

Si chiro bacha, tùtatetaa mbu mutwêresaa bya twéte kwe'loso. Si twénjire twáata ebushibirisi mwa myasi yoshi, chasiya eMwasi Mubuya-buya wa Yesu Kirisito àtabonaa chângiko.

13Mwìshi kwa ba bénde bákola mwa luhu lwa Ongo, mwo'lu luhu mu bénde bánalira. Na ba bénde bákola mwa kwâna emitulo* kwa kahaha*, kwa'ku kahaha* ku nabo bénde bánabonera ewabo mwango kwa mitulo* era yénde yátulwa'ko. 14Kuno'ku, ku Enawetu átetaa mbu ba bénde báhubanganya eMwasi Mubuya-buya běmire kunde bábona bya bàlaire'ko mwa kalamo kabo kurengera oyu Mwasi Mubuya-buya.#9:14 Somaa Matayo 10:10; Luka 10:7.

15Si nyono, mwe'bi byoshi bya nyéte kwe'loso, nděmire mu chiro na chiuma. Nesi ndàbaanjikirire bacha kwa kuhonda mùnyêresi'bi. Bushi nyono, ekufa ku kukulu, wa kunyanga mbu ndéndaa náchitonga bushi ne'bi! 16Si chiro bacha, nděmire kunde náchitonga bushi nénjire náhubanganya eMwasi Mubuya-buya. Oyola, àli musio ola nêsibwe. Rero bùli buanya ku nyono, akaba ndàngahubanganya eMwasi Mubuya-buya! 17Bìngabere mbu nyeine nyináchilondoreraa oyu mulimo, nyingénjire nêresibwa lwêmbo. Si bushi àli mulimo ola nêrésibwe, biněmire nyínde nákola'o. 18Rero, elwêmbo lwanyi chìri chiye? Elwêmbo lwanyi, kùli kunde náhubanganyisa ebandu eMwasi Mubuya-buya kwa buha, busira kwema'bo bya němire kubona mwa kubahubanganyisa'o.

19Nyono, nyìri mwa buhuru, ndáli kaungu* ka mundu asibya. Si náchiirire kaungu* ke'bandu boshi, chasiya nyibóne bandu banene. 20Mango nénde nába nyìri mwa Bayuta, nénde náchitola nga Muyuta, chasiya nabo nyibóne'bo. Na mango nyìri mwa ba bénde bátunda eMwaso* wa Musa, nanyi nánatunda'o chiro àngaba mbu ndáli era bufuli so'yu Mwaso*. Nénde náira bacha, chasiya nabo nyibóne'bo. 21Na mango nénde nába nyìri mwa ba bàteshi eMwaso wa Musa, nénde náchitola nga nanyi ndèshi'o, chasiya nyibóne'bo. Ekuíra bacha, kutakuteta mbu ndàtunjire eMwaso* wa Ongo, bushi nyitúla nyìtunjire eMwaso* wa Kirisito*. 22Na mango nénde nába nyìri mwa ba bàtasimikire mwa bwemeresi, nénde náchitola nga nanyi ndasímikire mubo, chasiya nabo nyibóne'bo. Mwa bandu boshi, nénde náchisesa kuba kuuma nabo, chasiya mwa njira soshi nyinúnule bauma mubo. 23Ebi byoshi nénde nábiira, bushi ne'Mwasi Mubuya-buya, chasiya nanyi nyibóne mwango kwa ngahanyi sa atúsa.

24Si mwìshi kwa mango ebandu bénde báira ekaimano ke'malibita, boshi bénde bánalibita, si muuma oshâo iwénde wêresibwa elwêmbo! Rero mundaa mwálibita, chasiya mubóne elwêmbo. 25Ebandu boshi ba bénde báira ekaimano mu mahata marebe, bénde báchilanga ku bindu binene. Bénde báira bacha chasiya babóne enzita era ìtemanga kukumba. Si tubano, twénde twáira bacha, chasiya tubóne enzita era itákakumbe chiro na hicha. 26Bushi no'ku, nénjire nálibita, bushi náhonda nyiímane. Nyono, ndáli ngo'la wáhuta emangumi mwa mbusi. 27Si nénjire nálibusa emubiri wanyi na kukoresa'o busese. Nénjire náira bacha, nyingesha kunanyibwa no'ku nyínabaa nénjire náhubanganyisa ebanji bandu eMwasi Mubuya-buya.

ទើបបានជ្រើសរើសហើយ៖

1 Bakorindo 9: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya