Markos 3
3
Ya pagpaguliꞌ ni Jisus sa utaw na kimay dun ni Allaw na Paglagdeng
1Na, lyumikuꞌ si Jisus syumeled adti sinagoga, aw dun ya sambuk na eseg na kimay ya sangkilid na bekten nan. 2Aw awun manga Parisiyo na gayed nyakatanaw sa un imo-un ni Jisus, kun guli-en nan ya bekten na utaw dun ni Allaw na Paglagdeng, pada awun puliba nilan maglimanda kanan. 3Aw pigtawag ni Jisus ya eseg na kimay, law nan, “Adi kaw aw indeg kaw asini asdangan na kadég na utaw.” 4Tigkas yan, pig-usip nan ya manga Parisiyo, “Adti Uldin tadun na pig-atag na Tyumanem, unu ya pigtumbay na imo-un dun ni Allaw na Paglagdeng, ya pag-imoꞌ sa madyaw aw ya pag-imoꞌ sa malatay? Aw ya pagpaluwaꞌ sa utaw lekat adti pagti-is, aw kun kalaten baling sakanan?” Manang walaꞌ silan tubag kanan. 5Pig-inunu ni Jisus ya kadég nilan aw nyadaman sakanan. Aw migkalat uman ya ginawa nan asuntu sa kategelan nilan. Tigkas yan, piglongan nan ya eseg na kimay, “Ulada ya bekten mu.” Aw sa pag-ulad nan sa kanan bekten, dayaw migkadyaw. 6Pagkatigkas yan, lyumuwaꞌ ya manga Parisiyo aw maksay silan migpalpa eped ya partido ni Hérodés, kun unun nilan ya pagpapatay kan Jisus.
Ya pagkadtu na madég na utaw adti kan Jisus dun ni baklayan na danaw
7Si Jisus aw ya kanan manga umagakan, nyadtu silan adti baklayan na danaw. Aw dyumalug kanilan ya to-o madég na utaw na lekat dun ni Galiliya aw adti Judiya. 8Aw awun uman lekat adti syudad na Jérusalim, aw banwa na Iduméya. Aw ya manga eped lekat adti dipag na tubig na Jordan, aw adti nyakapalibed sa manga syudad na Tiro aw Sidon. Kay dyengeg nilan ya kadég na pigpan-imoꞌ ni Jisus. 9Asuntu na madég to-o ya utaw, piglongan nan ya kanan manga umagakan na magtagilan sa balangay na un nan ka-ingkudan pagaw ma-insek sakanan na madég na manga utaw. 10Kay madég ya pigpangguliꞌ ni Jisus na pyangkedelan, yanagaw ya eped na awun magkedel, gayed silan mig-insekay kay kaliman nilan na maka-awid kanan. 11Aw kun kita-en sakanan na utaw na pigseledan na busaw, lumebleb silan dun ni asdangan nan, aw miglong sa mabagseg na tingeg, “Ikaw ya Iseꞌ na Tyumanem!” 12Manang piglongan ni Jisus ya manga busaw, “Diliꞌ kamu mag-ubat-ubat adti manga eped kun singalan aku!”
Ya pagpamalliꞌ ni Jisus sa sampuluꞌ tag duwa (12) ya apostolés
13Pagkatigkas yan, tyumukud si Jisus adti buntud aw pigtawag nan ya kaliman nan pa-agad, aw migpalapit silan kanan. 14Aw pigpamalliꞌ ni Jisus ya sampuluꞌ tag duwa (12) na un magad kanan aw pigtawag nan silan na apostolés, kay un silan padala pada mag-ubat-ubat, 15aw pig-atagan nan silan na katulus mag-alilin sa manga busaw. 16Na, ini ya sampuluꞌ tag duwa (12) na pigpamalliꞌ ni Jisus: Si Simon na pigngalanan nan na Pédro, 17aw si Santiago aw ya inulug nan na si Juan na alag iseꞌ ni Zibidiyo, aw pagtawagen silan duwa ni Jisus na Bo-anérgés, na ya kakawasan: mangayseꞌ na dadaneg. 18Pigpamalliꞌ nan uman si Andrés, si Pilipi, si Bartolomi, si Matiyo, si Tomas, si Santiago na iseꞌ ni Alpiyo, si Tadiyo, si Simon na Kananiyo, 19aw si Judas Iskariyoti. Si Judas yeiy, yan ya miglubid kan Jisus.
Si Jisus aw si Satanas
20Pagkatigkas yan, lyumikuꞌ si Jisus aw manga eped nan adti balay. Walaꞌ kadugay, migkatipun da uman dun ya madég na utaw, yanagaw walaꞌ pakaselat si Jisus aw manga eped nan pakakan. 21Aw sa pagdengeg na pamilya ni Jisus sa manga pigpan-imoꞌ nan, nyadtu silan kay un nilan sakanan angayen, kay miglong ya manga utaw na migkameneng sakanan.
22Awun uman manga magpalna-uway sa Uldin na dyumateng lekat adti Jérusalim. Miglong silan adti manga utaw, “Ya utaw yeiy pigseledan ni Bilsibul!#3:22 Si Bilsibul, yan ya sambuk na ngalan ni Satanas. Ya eped na ngalan nan, yan si Bilsibub. Pig-alilinan nan saba ya manga busaw magi sa katulus na pangulu na manga busaw.” 23Yanagaw pigtawag silan ni Jisus aw piglongan nan magi sa pundinganan, “Diliꞌ mabatug ni Satanas ya pag-alilin sa manga kasakupan nan. 24Ya kasakupan na nyatenga-tengaꞌ, diliꞌ yan makapadeleg na madugay. 25Maynan uman ya ka-epedanan dun ni balay na awun pagkatenga-tengaꞌ. 26Aw kun si Satanas tanamen nan ya kanan manga kasakupan, diliꞌ saba magpadeleg ya pagdumala nan aw magkalat baling ya kasakupan nan. 27Si Satanas kasiling na utaw na to-o mabagseg na tagtun sa balay. Walaꞌ ya pangkay sambuk na makaseled adti balay nan pada takawun ya kanan ka-unan kun diliꞌ una gapusun ya tagtun. Manang kun magapus da ya tagtun, mabatug da kamangen ya manga ka-unan nan.
28“Matinaw ya un ku paglongun kamayu: Pangkay unu ya salaꞌ mayu adti Tyumanem aw pangkay unu ya paglongun mayu na malatay adti kanan, mabatug lanasen ya manga salaꞌ mayu. 29Manang ya utaw na maglong sa malatay adti Ispiritu Santo, yan ya salaꞌ na diliꞌ mabatug lanasen. Aw ya sampetan na salaꞌ yeiy, pa-emel-emelen na Tyumanem na walaꞌ ya tyamanan.” 30Piglong yeiy ni Jisus adti manga magpalna-uway sa Uldin kay miglong silan, “Pigseledan sakanan saba na busaw.”
Ya ina ni Jisus aw manga inulug nan
31Na, dyumateng ya ina ni Jisus aw manga inulug nan, aw nyan-indeg silan adti luwaꞌ aw pigpatawag nilan si Jisus. 32Adti seled na balay, madég ya utaw na nyingkud na nyakapalibed kan Jisus, aw miglong silan kanan, “Awun ni luwaꞌ ya ina mu aw manga inulug mu. Pyaninaw kaw nilan.” 33Aw tyumubag si Jisus kanilan, “Awun pa saba uman pigsiling ku na kanak ina aw kanak manga inulug.” 34Aw pig-inunu nan ya manga utaw na nyingkud na nyakapalibed kanan, aw law nan, “Inunuwa mayu! Ya manga utaw ini, silan uman ya kanak ina aw kanak manga inulug! 35Pangkay singalan ya mag-imoꞌ sa pagkaliman na Tyumanem, silan ya kanak manga inulug aw manga bubay aw ina ku.”
ទើបបានជ្រើសរើសហើយ៖
Markos 3: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
Markos 3
3
Ya pagpaguliꞌ ni Jisus sa utaw na kimay dun ni Allaw na Paglagdeng
1Na, lyumikuꞌ si Jisus syumeled adti sinagoga, aw dun ya sambuk na eseg na kimay ya sangkilid na bekten nan. 2Aw awun manga Parisiyo na gayed nyakatanaw sa un imo-un ni Jisus, kun guli-en nan ya bekten na utaw dun ni Allaw na Paglagdeng, pada awun puliba nilan maglimanda kanan. 3Aw pigtawag ni Jisus ya eseg na kimay, law nan, “Adi kaw aw indeg kaw asini asdangan na kadég na utaw.” 4Tigkas yan, pig-usip nan ya manga Parisiyo, “Adti Uldin tadun na pig-atag na Tyumanem, unu ya pigtumbay na imo-un dun ni Allaw na Paglagdeng, ya pag-imoꞌ sa madyaw aw ya pag-imoꞌ sa malatay? Aw ya pagpaluwaꞌ sa utaw lekat adti pagti-is, aw kun kalaten baling sakanan?” Manang walaꞌ silan tubag kanan. 5Pig-inunu ni Jisus ya kadég nilan aw nyadaman sakanan. Aw migkalat uman ya ginawa nan asuntu sa kategelan nilan. Tigkas yan, piglongan nan ya eseg na kimay, “Ulada ya bekten mu.” Aw sa pag-ulad nan sa kanan bekten, dayaw migkadyaw. 6Pagkatigkas yan, lyumuwaꞌ ya manga Parisiyo aw maksay silan migpalpa eped ya partido ni Hérodés, kun unun nilan ya pagpapatay kan Jisus.
Ya pagkadtu na madég na utaw adti kan Jisus dun ni baklayan na danaw
7Si Jisus aw ya kanan manga umagakan, nyadtu silan adti baklayan na danaw. Aw dyumalug kanilan ya to-o madég na utaw na lekat dun ni Galiliya aw adti Judiya. 8Aw awun uman lekat adti syudad na Jérusalim, aw banwa na Iduméya. Aw ya manga eped lekat adti dipag na tubig na Jordan, aw adti nyakapalibed sa manga syudad na Tiro aw Sidon. Kay dyengeg nilan ya kadég na pigpan-imoꞌ ni Jisus. 9Asuntu na madég to-o ya utaw, piglongan nan ya kanan manga umagakan na magtagilan sa balangay na un nan ka-ingkudan pagaw ma-insek sakanan na madég na manga utaw. 10Kay madég ya pigpangguliꞌ ni Jisus na pyangkedelan, yanagaw ya eped na awun magkedel, gayed silan mig-insekay kay kaliman nilan na maka-awid kanan. 11Aw kun kita-en sakanan na utaw na pigseledan na busaw, lumebleb silan dun ni asdangan nan, aw miglong sa mabagseg na tingeg, “Ikaw ya Iseꞌ na Tyumanem!” 12Manang piglongan ni Jisus ya manga busaw, “Diliꞌ kamu mag-ubat-ubat adti manga eped kun singalan aku!”
Ya pagpamalliꞌ ni Jisus sa sampuluꞌ tag duwa (12) ya apostolés
13Pagkatigkas yan, tyumukud si Jisus adti buntud aw pigtawag nan ya kaliman nan pa-agad, aw migpalapit silan kanan. 14Aw pigpamalliꞌ ni Jisus ya sampuluꞌ tag duwa (12) na un magad kanan aw pigtawag nan silan na apostolés, kay un silan padala pada mag-ubat-ubat, 15aw pig-atagan nan silan na katulus mag-alilin sa manga busaw. 16Na, ini ya sampuluꞌ tag duwa (12) na pigpamalliꞌ ni Jisus: Si Simon na pigngalanan nan na Pédro, 17aw si Santiago aw ya inulug nan na si Juan na alag iseꞌ ni Zibidiyo, aw pagtawagen silan duwa ni Jisus na Bo-anérgés, na ya kakawasan: mangayseꞌ na dadaneg. 18Pigpamalliꞌ nan uman si Andrés, si Pilipi, si Bartolomi, si Matiyo, si Tomas, si Santiago na iseꞌ ni Alpiyo, si Tadiyo, si Simon na Kananiyo, 19aw si Judas Iskariyoti. Si Judas yeiy, yan ya miglubid kan Jisus.
Si Jisus aw si Satanas
20Pagkatigkas yan, lyumikuꞌ si Jisus aw manga eped nan adti balay. Walaꞌ kadugay, migkatipun da uman dun ya madég na utaw, yanagaw walaꞌ pakaselat si Jisus aw manga eped nan pakakan. 21Aw sa pagdengeg na pamilya ni Jisus sa manga pigpan-imoꞌ nan, nyadtu silan kay un nilan sakanan angayen, kay miglong ya manga utaw na migkameneng sakanan.
22Awun uman manga magpalna-uway sa Uldin na dyumateng lekat adti Jérusalim. Miglong silan adti manga utaw, “Ya utaw yeiy pigseledan ni Bilsibul!#3:22 Si Bilsibul, yan ya sambuk na ngalan ni Satanas. Ya eped na ngalan nan, yan si Bilsibub. Pig-alilinan nan saba ya manga busaw magi sa katulus na pangulu na manga busaw.” 23Yanagaw pigtawag silan ni Jisus aw piglongan nan magi sa pundinganan, “Diliꞌ mabatug ni Satanas ya pag-alilin sa manga kasakupan nan. 24Ya kasakupan na nyatenga-tengaꞌ, diliꞌ yan makapadeleg na madugay. 25Maynan uman ya ka-epedanan dun ni balay na awun pagkatenga-tengaꞌ. 26Aw kun si Satanas tanamen nan ya kanan manga kasakupan, diliꞌ saba magpadeleg ya pagdumala nan aw magkalat baling ya kasakupan nan. 27Si Satanas kasiling na utaw na to-o mabagseg na tagtun sa balay. Walaꞌ ya pangkay sambuk na makaseled adti balay nan pada takawun ya kanan ka-unan kun diliꞌ una gapusun ya tagtun. Manang kun magapus da ya tagtun, mabatug da kamangen ya manga ka-unan nan.
28“Matinaw ya un ku paglongun kamayu: Pangkay unu ya salaꞌ mayu adti Tyumanem aw pangkay unu ya paglongun mayu na malatay adti kanan, mabatug lanasen ya manga salaꞌ mayu. 29Manang ya utaw na maglong sa malatay adti Ispiritu Santo, yan ya salaꞌ na diliꞌ mabatug lanasen. Aw ya sampetan na salaꞌ yeiy, pa-emel-emelen na Tyumanem na walaꞌ ya tyamanan.” 30Piglong yeiy ni Jisus adti manga magpalna-uway sa Uldin kay miglong silan, “Pigseledan sakanan saba na busaw.”
Ya ina ni Jisus aw manga inulug nan
31Na, dyumateng ya ina ni Jisus aw manga inulug nan, aw nyan-indeg silan adti luwaꞌ aw pigpatawag nilan si Jisus. 32Adti seled na balay, madég ya utaw na nyingkud na nyakapalibed kan Jisus, aw miglong silan kanan, “Awun ni luwaꞌ ya ina mu aw manga inulug mu. Pyaninaw kaw nilan.” 33Aw tyumubag si Jisus kanilan, “Awun pa saba uman pigsiling ku na kanak ina aw kanak manga inulug.” 34Aw pig-inunu nan ya manga utaw na nyingkud na nyakapalibed kanan, aw law nan, “Inunuwa mayu! Ya manga utaw ini, silan uman ya kanak ina aw kanak manga inulug! 35Pangkay singalan ya mag-imoꞌ sa pagkaliman na Tyumanem, silan ya kanak manga inulug aw manga bubay aw ina ku.”
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.