Markos 4
4
Ya pundinganan sa utaw na migsabug sa manga biniꞌ
1Na, migpalna-u la uman si Jisus adti baklayan na danaw. Aw kyalimpungan sakanan na madég to-o na utaw na un magpakanyeg kanan. Yanagaw mig-alin si Jisus adti balangay na malapit dun ni baklayan aw nyingkud sakanan dun. Aw nyan-indeg ya manga utaw dun ni baklayan. 2Aw madég ya pigpalna-u nan kanilan magi sa manga pundinganan, law nan, 3“Pakanyegi mayu ya un ku paglongun! Awun sambuk na utaw na nyadtu ni pawaꞌ nan na un magsabug sa manga biniꞌ. 4Sa pagsabug nan sa manga biniꞌ, awun eped na nyakasabug adti kilid na dalan. Aw nyangkawun ya manga langgam aw pyanubug nilan ya manga biniꞌ. 5Aw awun manga eped na nyakasabug adti kabatuwan aw maksay gyumitiꞌ kay walaꞌ abay ya lupaꞌ. 6Manang pagsilat na sega, nyangkalanes baling ya manga tanem kay walaꞌ to-o pakadalid. 7Ya eped na manga biniꞌ nyakasabug adti magalet na suksukun. Gyumitiꞌ ya manga biniꞌ, manang asuntu na tyumulin uman ya magalet, nyalemes baling ya manga tanem aw walaꞌ pakabunga. 8Manang ya manga biniꞌ na nyakasabug adti matabaꞌ na lupaꞌ, tyumulin aw to-o nyamunga. Awun nyunga na tag katluwan (30), aw awun nyunga na tag ka͡eneman (60), aw awun nyunga na tag sanggatus (100).” 9Aw miglong pa si Jisus kanilan, “Kamu na migpakanyeg, ka-ilangan kalabetan mayu ya kamayu pigdengeg.”
Ya kakawasan na pundinganan sa manga biniꞌ
10Sa pag-uliꞌ da na madég na utaw, awun pa nyasamaꞌ kanilan eped na sampuluꞌ tag duwa (12) ya umagakan ni Jisus, aw nyusip silan kanan kun unu ya kakawasan na pundinganan nan. 11Aw miglong si Jisus kanilan, “Kamu ya pig-atagan na Tyumanem na maka-edeꞌ sa manga pigtaguꞌ idtu muna sa Kasakupan na Pighari-an nan. Manang adti manga eped, pig-ubat-ubat adti kanilan magi sa manga pundinganan 12pada matuman adti manga utaw yeiy ya dadan da na Tyumanem pigpasulat adti propita nan, law nan,
‘Pangkay gayed nilan inunuwun manang diliꞌ nilan kita-en.
Aw pangkay gayed nilan dengegen, manang diliꞌ nilan kalabetan ya kakawasan.
Kun kalabetan nilan, pagaw magselsel silan aw lanasen ya manga salaꞌ nilan.’ ”#4:12 Mabasa adti Isayas 6:9-10.
13Miglong si Jisus kanilan, “Unu, walaꞌ mayu kalabeti ya pundinganan yeiy? Na, kun maynan, unun mayu ya pagpakalabet sa eped na manga pundinganan ku? 14Ini ya kakawasan na pundinganan sa manga biniꞌ: Ya biniꞌ na pigsabug na utaw, yan ya tingeg na Tyumanem. 15Ya kilid na dalan na kyasabugan sa manga biniꞌ, yan ya manga utaw na dyumengeg da sa tingeg na Tyumanem manang maksay dyumateng si Satanas aw pigdampas nan ya pigdengeg nilan.
16“Aw ya kabatuwan na kyasabugan sa manga biniꞌ, yan ya manga utaw na dyumengeg sa tingeg na Tyumanem aw maksay nilan pigdawat na awun pagleya 17manang diliꞌ to-o makadalid ya pagpangintu-u nilan. Kun awun dumateng na manga kalugan aw manga pagpamulayam asuntu sa tingeg na Tyumanem na dyengeg nilan, maksay nilan ayawan ya kanilan pagpangintu-u.
18“Aw ya manga magalet na suksukun na kyasabugan sa manga biniꞌ, yan ya manga utaw na dyumengeg da sa tingeg na Tyumanem 19manang ya kanilan anenganeng nyatmuꞌ na kakaypengan sa pagpakabetang nilan, aw sa pag-anenganeng na ma-imoꞌ mayaman, aw sa manga pagkaliman nilan asini tas na lupaꞌ. Aw ya sampetan yan, diliꞌ makabunga ya pagpangintu-u nilan.
20“Manang ya matabaꞌ na lupaꞌ na kyasabugan sa manga biniꞌ, yan ya manga utaw na migpakanyeg sa tingeg na Tyumanem aw pigdawat nilan. Aw mamunga silan sa madég. Ya sambuk mamunga na katluwan (30), aw ya eped ka͡eneman (60), aw ya eped sanggatus (100).”
Ya pundinganan sa salengan
21Miglong pa si Jisus kanilan, “Unu kaꞌ, magsuluꞌ ya utaw sa salengan pada sangkuban nan na be-en? Diliꞌ saba! Aw diliꞌ nan uman betang adti dalem na katri. Manang betang nan saba adti bantawanan. 22Ya kakawasan na pundinganan yeiy: Walaꞌ saba ya nyataguꞌ na diliꞌ kabukasan, aw ya kadég na walaꞌ pa kalabeti idtu muna, diliꞌ madugay kalabetan da. 23Kamu na migpakanyeg, ka-ilangan kalabetan mayu ya kamayu pigdengeg.”
24Miglong pa uman si Jisus, “To-o pakanyegi ya un ku paglongun kamayu! Kay kun matibulluk kamu magpakanyeg, to-o pa dakulaꞌ ya kalabetan mayu, aw dugangan pa na Tyumanem ya kamayu kya-ede-an. 25Kay ya utaw na dyumalug sa pigpalna-u kanan sa kana Tyumanem, dugangan pa ya kyalabetan nan. Manang ya utaw na walaꞌ dalug sa palna-u yan, kamangen baling adti kanan anenganeng ya pangkay tagbiꞌ na kyalabetan da nan.”
Ya pundinganan sa pagtulin na manga biniꞌ
26Miglong pa si Jisus, “Ya Kasakupan na Pighari-an na Tyumanem, kasiling na maynini: Awun utaw na migsabug sa manga biniꞌ adti kanan pawaꞌ. 27Pagkagabi makatulug sakanan aw pagka-allaw magbangun uman. Aw ya manga biniꞌ na pigsabug nan, tyumulin aw walaꞌ nan ka-ede-i kun pig-unu na manga biniꞌ ya pagtulin. 28Ya lupaꞌ, yan ya magpatulin sa tanem. Una mandagem, aw tigkas yan lumawas, aw mameles, aw tigkas yan maniswak da. 29Aw pagka-inug da na bunga nan, galaben da na tagtun kay umbaꞌ da saba aniyen.”
Ya pundinganan sa biniꞌ na mustardo
30Migpadeleg si Jisus miglong, “Unu pa ya un tadun kapa-unawa͡an sa Kasakupan na Pighari-an na Tyumanem? Unu ya pundinganan na gamiten tadun? 31Ya Kasakupan nan kasiling na sambuk na biniꞌ na mustardo.#4:31 Ya biniꞌ na mustardo, yan ya to-o tagbiꞌ na biniꞌ dun ni banwa na Isra-él, manang kun magkatas da, magdateng na tulung ka mitro. Yan ya to-o tagbiꞌ na biniꞌ, 32manang kun matanem aw tumulin, matas pa yeiy sa eped na manga tanem. Mabaklaꞌ ya manga sanga nan aw umbaꞌ kapugadan na manga langgam.”
33Madég pa ya manga pundinganan na piggamit ni Jisus dun ni kanan pagpalna-u kanilan na umbaꞌ nilan kalabetan. 34Walaꞌ nan silan palna-uwi na bekeꞌ na magi sa pagpundinganan. Manang kun oloꞌ silan ya kanan manga umagakan, pigbangal nan ya kadakulaꞌ na kakawasan na manga pundinganan.
Ya pagpatangkeꞌ ni Jisus sa samet
35Na, pagsallep da na sega, miglong si Jisus adti manga umagakan nan, “Naten tumalipag sa danaw!” 36Pig-ayawan nilan ya madég na utaw adti baklayan, aw syumakay silan sa balangay na pigsakayan da ni Jisus. Aw awun manga eped na balangay na dyumengan kanilan. 37Talana nilan dun ni tenga-tengaꞌ na danaw, walaꞌ nilan imanmana biglaꞌ dyumateng ya to-o mabandes na samet, aw syalampawan na manga baled ya balangay nilan aw un da matmuꞌ na tubig. 38Manang nyakatulug si Jisus apit adti moli na balangay na dayaw migkama. Aw pigpukaw sakanan na manga umagakan nan, law nilan, “Kay Magpalna-uway! Walaꞌ kaw kaypeng na un da kitadun mangkamatay?” 39Yanagaw migbangun si Jisus, aw piglongan nan ya samet aw manga baled, “Tangkeꞌ kamu!” Aw tyumeneng ya samet aw migkalinaw da ya danaw. 40Aw piglongan silan ni Jisus, “Anangaꞌ kamu mangkallek? Tay, sa katagbiꞌ na pagsalig mayu kanak!” 41To-o silan nyangkallek aw mig-usip-usipay silan, “Singalan kaꞌ ya utaw yeiy? Pangkay ya samet aw ya manga baled magka͡agad sa suguꞌ nan!”
ទើបបានជ្រើសរើសហើយ៖
Markos 4: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
Markos 4
4
Ya pundinganan sa utaw na migsabug sa manga biniꞌ
1Na, migpalna-u la uman si Jisus adti baklayan na danaw. Aw kyalimpungan sakanan na madég to-o na utaw na un magpakanyeg kanan. Yanagaw mig-alin si Jisus adti balangay na malapit dun ni baklayan aw nyingkud sakanan dun. Aw nyan-indeg ya manga utaw dun ni baklayan. 2Aw madég ya pigpalna-u nan kanilan magi sa manga pundinganan, law nan, 3“Pakanyegi mayu ya un ku paglongun! Awun sambuk na utaw na nyadtu ni pawaꞌ nan na un magsabug sa manga biniꞌ. 4Sa pagsabug nan sa manga biniꞌ, awun eped na nyakasabug adti kilid na dalan. Aw nyangkawun ya manga langgam aw pyanubug nilan ya manga biniꞌ. 5Aw awun manga eped na nyakasabug adti kabatuwan aw maksay gyumitiꞌ kay walaꞌ abay ya lupaꞌ. 6Manang pagsilat na sega, nyangkalanes baling ya manga tanem kay walaꞌ to-o pakadalid. 7Ya eped na manga biniꞌ nyakasabug adti magalet na suksukun. Gyumitiꞌ ya manga biniꞌ, manang asuntu na tyumulin uman ya magalet, nyalemes baling ya manga tanem aw walaꞌ pakabunga. 8Manang ya manga biniꞌ na nyakasabug adti matabaꞌ na lupaꞌ, tyumulin aw to-o nyamunga. Awun nyunga na tag katluwan (30), aw awun nyunga na tag ka͡eneman (60), aw awun nyunga na tag sanggatus (100).” 9Aw miglong pa si Jisus kanilan, “Kamu na migpakanyeg, ka-ilangan kalabetan mayu ya kamayu pigdengeg.”
Ya kakawasan na pundinganan sa manga biniꞌ
10Sa pag-uliꞌ da na madég na utaw, awun pa nyasamaꞌ kanilan eped na sampuluꞌ tag duwa (12) ya umagakan ni Jisus, aw nyusip silan kanan kun unu ya kakawasan na pundinganan nan. 11Aw miglong si Jisus kanilan, “Kamu ya pig-atagan na Tyumanem na maka-edeꞌ sa manga pigtaguꞌ idtu muna sa Kasakupan na Pighari-an nan. Manang adti manga eped, pig-ubat-ubat adti kanilan magi sa manga pundinganan 12pada matuman adti manga utaw yeiy ya dadan da na Tyumanem pigpasulat adti propita nan, law nan,
‘Pangkay gayed nilan inunuwun manang diliꞌ nilan kita-en.
Aw pangkay gayed nilan dengegen, manang diliꞌ nilan kalabetan ya kakawasan.
Kun kalabetan nilan, pagaw magselsel silan aw lanasen ya manga salaꞌ nilan.’ ”#4:12 Mabasa adti Isayas 6:9-10.
13Miglong si Jisus kanilan, “Unu, walaꞌ mayu kalabeti ya pundinganan yeiy? Na, kun maynan, unun mayu ya pagpakalabet sa eped na manga pundinganan ku? 14Ini ya kakawasan na pundinganan sa manga biniꞌ: Ya biniꞌ na pigsabug na utaw, yan ya tingeg na Tyumanem. 15Ya kilid na dalan na kyasabugan sa manga biniꞌ, yan ya manga utaw na dyumengeg da sa tingeg na Tyumanem manang maksay dyumateng si Satanas aw pigdampas nan ya pigdengeg nilan.
16“Aw ya kabatuwan na kyasabugan sa manga biniꞌ, yan ya manga utaw na dyumengeg sa tingeg na Tyumanem aw maksay nilan pigdawat na awun pagleya 17manang diliꞌ to-o makadalid ya pagpangintu-u nilan. Kun awun dumateng na manga kalugan aw manga pagpamulayam asuntu sa tingeg na Tyumanem na dyengeg nilan, maksay nilan ayawan ya kanilan pagpangintu-u.
18“Aw ya manga magalet na suksukun na kyasabugan sa manga biniꞌ, yan ya manga utaw na dyumengeg da sa tingeg na Tyumanem 19manang ya kanilan anenganeng nyatmuꞌ na kakaypengan sa pagpakabetang nilan, aw sa pag-anenganeng na ma-imoꞌ mayaman, aw sa manga pagkaliman nilan asini tas na lupaꞌ. Aw ya sampetan yan, diliꞌ makabunga ya pagpangintu-u nilan.
20“Manang ya matabaꞌ na lupaꞌ na kyasabugan sa manga biniꞌ, yan ya manga utaw na migpakanyeg sa tingeg na Tyumanem aw pigdawat nilan. Aw mamunga silan sa madég. Ya sambuk mamunga na katluwan (30), aw ya eped ka͡eneman (60), aw ya eped sanggatus (100).”
Ya pundinganan sa salengan
21Miglong pa si Jisus kanilan, “Unu kaꞌ, magsuluꞌ ya utaw sa salengan pada sangkuban nan na be-en? Diliꞌ saba! Aw diliꞌ nan uman betang adti dalem na katri. Manang betang nan saba adti bantawanan. 22Ya kakawasan na pundinganan yeiy: Walaꞌ saba ya nyataguꞌ na diliꞌ kabukasan, aw ya kadég na walaꞌ pa kalabeti idtu muna, diliꞌ madugay kalabetan da. 23Kamu na migpakanyeg, ka-ilangan kalabetan mayu ya kamayu pigdengeg.”
24Miglong pa uman si Jisus, “To-o pakanyegi ya un ku paglongun kamayu! Kay kun matibulluk kamu magpakanyeg, to-o pa dakulaꞌ ya kalabetan mayu, aw dugangan pa na Tyumanem ya kamayu kya-ede-an. 25Kay ya utaw na dyumalug sa pigpalna-u kanan sa kana Tyumanem, dugangan pa ya kyalabetan nan. Manang ya utaw na walaꞌ dalug sa palna-u yan, kamangen baling adti kanan anenganeng ya pangkay tagbiꞌ na kyalabetan da nan.”
Ya pundinganan sa pagtulin na manga biniꞌ
26Miglong pa si Jisus, “Ya Kasakupan na Pighari-an na Tyumanem, kasiling na maynini: Awun utaw na migsabug sa manga biniꞌ adti kanan pawaꞌ. 27Pagkagabi makatulug sakanan aw pagka-allaw magbangun uman. Aw ya manga biniꞌ na pigsabug nan, tyumulin aw walaꞌ nan ka-ede-i kun pig-unu na manga biniꞌ ya pagtulin. 28Ya lupaꞌ, yan ya magpatulin sa tanem. Una mandagem, aw tigkas yan lumawas, aw mameles, aw tigkas yan maniswak da. 29Aw pagka-inug da na bunga nan, galaben da na tagtun kay umbaꞌ da saba aniyen.”
Ya pundinganan sa biniꞌ na mustardo
30Migpadeleg si Jisus miglong, “Unu pa ya un tadun kapa-unawa͡an sa Kasakupan na Pighari-an na Tyumanem? Unu ya pundinganan na gamiten tadun? 31Ya Kasakupan nan kasiling na sambuk na biniꞌ na mustardo.#4:31 Ya biniꞌ na mustardo, yan ya to-o tagbiꞌ na biniꞌ dun ni banwa na Isra-él, manang kun magkatas da, magdateng na tulung ka mitro. Yan ya to-o tagbiꞌ na biniꞌ, 32manang kun matanem aw tumulin, matas pa yeiy sa eped na manga tanem. Mabaklaꞌ ya manga sanga nan aw umbaꞌ kapugadan na manga langgam.”
33Madég pa ya manga pundinganan na piggamit ni Jisus dun ni kanan pagpalna-u kanilan na umbaꞌ nilan kalabetan. 34Walaꞌ nan silan palna-uwi na bekeꞌ na magi sa pagpundinganan. Manang kun oloꞌ silan ya kanan manga umagakan, pigbangal nan ya kadakulaꞌ na kakawasan na manga pundinganan.
Ya pagpatangkeꞌ ni Jisus sa samet
35Na, pagsallep da na sega, miglong si Jisus adti manga umagakan nan, “Naten tumalipag sa danaw!” 36Pig-ayawan nilan ya madég na utaw adti baklayan, aw syumakay silan sa balangay na pigsakayan da ni Jisus. Aw awun manga eped na balangay na dyumengan kanilan. 37Talana nilan dun ni tenga-tengaꞌ na danaw, walaꞌ nilan imanmana biglaꞌ dyumateng ya to-o mabandes na samet, aw syalampawan na manga baled ya balangay nilan aw un da matmuꞌ na tubig. 38Manang nyakatulug si Jisus apit adti moli na balangay na dayaw migkama. Aw pigpukaw sakanan na manga umagakan nan, law nilan, “Kay Magpalna-uway! Walaꞌ kaw kaypeng na un da kitadun mangkamatay?” 39Yanagaw migbangun si Jisus, aw piglongan nan ya samet aw manga baled, “Tangkeꞌ kamu!” Aw tyumeneng ya samet aw migkalinaw da ya danaw. 40Aw piglongan silan ni Jisus, “Anangaꞌ kamu mangkallek? Tay, sa katagbiꞌ na pagsalig mayu kanak!” 41To-o silan nyangkallek aw mig-usip-usipay silan, “Singalan kaꞌ ya utaw yeiy? Pangkay ya samet aw ya manga baled magka͡agad sa suguꞌ nan!”
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.