Markos 10
10
Ya palna-u ni Jisus sa mangugnanay
1Pagkatigkas ni Jisus palna-uwan ya manga utaw dun, nyanaw sakanan aw ya kanan manga umagakan. Tyumalipag silan sa tubig na Jordan aw migpasinan adti banwa na Judiya. Aw dun ni pagpanaw nilan, gayed migkatipun adti kan Jisus ya madég na utaw, aw pigpalna-uwan nan silan kay yan ya kanan kyanalaman pag-imo-un.
2Aw awun manga Parisiyo na dyumulud adti kan Jisus na un magtandaꞌ kanan, law nilan, “Unu, pigtumbay sa eseg ya pag-ayaw sa ka͡ubayan nan?” 3Tyumubag si Jisus kanilan, “Unu ya piglong ni Moysis sa pag-ayaw?” 4Aw miglong silan, “Yan saba ya piglong ni Moysis na mabatug ayawan na eseg ya ka͡ubayan nan kun una nan atagan na sulat na magmatinaw na mag-ayaw silan, aw tigkas yan, papanawun da nan.”#10:4 Mabasa adti Déutéronomiyo 24:1-4. 5Aw tyumubag si Jisus kanilan, “Yan saba ya du-an na pigsulat ni Moysis ya pag-ayaw asini muna, asuntu sa kategelan mayu. 6Manang lekat na pag-imoꞌ na Tyumanem sa kadakulaꞌ na banwa, yan ya palpa nan na ‘duwa ya punganan na utaw na pig-imoꞌ nan: awun eseg aw awun bubay.’ #10:6 Mabasa adti Génésis 1:27. 7‘Yeiy ya du-an na indegan na eseg ya kanan ama aw ina, aw pa-egketen silan ya ka͡ubayan nan, 8aw ya duwa silan ma-imoꞌ da sambuk.’#10:7-8 Mabasa adti Génésis 2:24. Yanagaw bekeꞌ da silan na duwa manang sambuk da. 9Aw ya pig-isambuk da na Tyumanem, diliꞌ galu silan pagsuwayen na utaw!”
10Paglikuꞌ ni Jisus aw manga umagakan nan adti balay, nyusip silan uman kanan sa kakawasan na piglong nan. 11Aw miglong si Jisus kanilan, “Kun awun eseg na ayawan nan ya kanan ka͡ubayan, aw kun mangugnan sakanan sa eped na ka͡ubayan, piglakadan da nan ya muna ka͡ubayan nan. 12Aw ya ka͡ubayan uman, kun ayawan nan ya kanan eseg aw mangugnan sa eped na eseg, piglakadan nan ya muna eseg nan.”
Si Jisus aw ya manga mangayseꞌ
13Sambuk na allaw, awun manga utaw na nyandala adti kan Jisus sa mangkayantek na mangayseꞌ nilan na un nan awidan pada atagan silan na kadyawan. Manang pigsagda baling na umagakan nan ya manga utaw na nyandala sa mangayseꞌ nilan. 14Pagkitaꞌ ni Jisus na pigsagda nilan, nyadaman sakanan aw piglongan nan silan, “Pakadiya kanak ya manga mangayseꞌ. Ya-i mayu silan pagtageni! Kay ya manga utaw na dyumawat kanak kasiling na manga mangayseꞌ ini, silan saba ya maka-akup adti Kasakupan na Pighari-an na Tyumanem. 15Matinaw saba ya un ku paglongun kamayu: Pangkay singalan ya diliꞌ malim dumawat kanak kasiling na pagdawat kanak na manga mangayseꞌ ini, diliꞌ saba silan makaseled adti Kasakupan na Pighari-an na Tyumanem.” 16Pagkatigkas yan, pigsipit nan ya manga mangayseꞌ aw pandungi nan na kanan palad aw pig-atagan nan silan na manga kadyawan magi dun ni kanan pagpanawagtawag.
Ya eseg na mayaman
17Sa un da galu si Jisus manaw, awun eseg na dyumalagan adti kanan aw lyumuhud dun ni asdangan nan, aw nyusip kan Jisus, “Kay Magpalna-uway na to-o madyaw, unu ya ka-ilangan ku imo-un pada matagtun ku ya ginawa na walaꞌ ya katigkasan?” 18Aw tyumubag si Jisus kanan, “Anangaꞌ aku mu tawagen na madyaw? Walaꞌ saba ya utaw na madyaw. Sambuk da oloꞌ ya tengteng na madyaw, yan ya Tyumanem. 19Na, kya-ede-an mu ya manga suguꞌ dun ni Uldin: ‘Diliꞌ kaw magpatay sa utaw, diliꞌ kaw maglakadenen, diliꞌ kaw magpanakaw, diliꞌ mu pagmatinawun ya galuꞌ adti asdangan na mag-usayay, diliꞌ kaw maglimbung sa eped na utaw, aw basa͡an mu ya kanmu ama aw ina.’ ”#10:19 Mabasa adti Éxudo 20:12-16 aw Déutéronomiyo 5:16-20. 20Aw tyumubag ya eseg, “Kay Magpalna-uway, pigdalug da ku alag ya kadég yeiy lekat pa na pagkatagbiꞌ ku.” 21Aw pigtengtengan sakanan ni Jisus aw dakulaꞌ ya ginawa nan sa utaw yan, yanagaw piglongan nan, “Dakman sambuk ya walaꞌ mu ka-imoꞌ: Uliꞌ kaw aw galina ya kadég na nyatagtun mu. Tigkas yan, atagan ya kuwalta adti manga utaw na walaꞌ ya pagkamangan. Kun imo-un mu yeiy, dun da kaw pagluduk sa ka-unan adti tas na langit. Aw pagkatigkas yan, likuꞌ kaw adi aw dalug kaw kanak.” 22Pagdengeg na utaw yan sa piglong ni Jisus, nyanaw sakanan aw to-o migkalat ya ginawa nan kay to-o madég ya ka-unan nan.
23Pag-indeg da na utaw yan, pig-inunu ni Jisus ya kanan manga umagakan, aw law nan, “Malug saba sa utaw na mayaman ya maka-akup adti Kasakupan na Pighari-an na Tyumanem.” 24Aw nyabelengbeleng ya kanan manga umagakan sa piglong nan kay walaꞌ nilan kalabeti. Yanagaw miglong pa si Jisus kanilan, “Kamu na pigsiling ku na kanak mangayseꞌ, paglongun ta kamu: Malug saba sa utaw ya pagpaka-akup adti Kasakupan na Pighari-an na Tyumanem. 25Aw paglongun ta kamu na molas pa ya pag-agi na ayep na kamilyo adti gawang na dagem kay sa pagpaka-akup na utaw na mayaman dun ni Kasakupan na Pighari-an na Tyumanem.” 26Aw to-o pa silan nyabelengbeleng aw mig-usip-usipay silan, “Na, kun maynan, singalan kaꞌ ya paluwa-en na Tyumanem?” 27Aw pig-inunu silan ni Jisus aw law nan, “Diliꞌ na utaw mabatug yeiy manang mabatug saba na Tyumanem. Kay walaꞌ ya diliꞌ mabatug na Tyumanem.”
28Aw miglong si Pédro kanan, “Inunuwa ya kanami ini! Nyabus da nami pig-ayawan ya kadég na nyatagtun nami pada magad kanmu.” 29Aw tyumubag si Jisus kanan, “Matinaw saba ya un ku paglongun kanmu: Pangkay singalan ya mag-ayaw sa kadég asuntu kanak aw asuntu sa Madyaw na Ubat-ubat, pangkay ayawan nan ya balay nan, aw ya kanan manga mangkaylug, aw mangkatikadeng nan aw ya manga mangayseꞌ nan, aw ya lupaꞌ nan, 30na, ya utaw yan, un likuꞌ adti kanan asini tas na lupaꞌ ya sanggatus (100) ka piluꞌ sa idtu na pig-ayawan nan. Dumawat pa sakanan sa manga balay, aw manga mangkaylug, aw manga ina, aw manga mangayseꞌ, aw lupaꞌ, aw maka-agad dun uman ya manga pamulayam. Aw dawaten nan uman ya ginawa na walaꞌ ya katigkasan adti kamoliyan na allaw. 31Manang awun madég na utaw na nyaka-una adun aw makamoli silan kagaya. Aw madég uman ya utaw na nyakamoli adun manang maka-una kagaya.”
Ya katlu na pagpa-edeꞌ ni Jisus sa pagkamatay aw sa pagkataw nan
32Na, sa pagpadeleg nilan nyanaw adti Jérusalim, si Jisus ya nyuna sa manga umagakan nan. Aw nyasagunut ya anenganeng nilan, aw nyangkallek ya eped na manga utaw na dyumalug kanilan. Aw pigtani ni Jisus ya sampuluꞌ tag duwa (12) ya umagakan nan aw pig-ubat-ubat nan kanilan ya un dumateng kanan, 33law nan, “Pada ka-ede-an mayu, migpasinan da kitadun adti Jérusalim, aw aku na Iseꞌ na Utaw un da tumbay adti manga mangkatas na magdadugsu-ay aw manga magpalna-uway sa Uldin, aw ukuman aku nilan na patayen. Aw tigkas yan, tumbay aku uman nilan adti manga utaw na Héntil, 34aw odoy-odoyun aku nilan, aw eleb-eleban aw badasan nilan panlabeten, aw tigkas yan, patayen aku nilan. Manang pagdateng na katlu na allaw, mataw aku lekat adti pagkamatay.”
Ya pigsekat ni Santiago aw ni Juan
35Na, migpalapit adti kan Jisus si Santiago aw si Juan na alag iseꞌ ni Zibidiyo, aw miglong silan kanan, “Kay Magpalna-uway, awun galu sekaten nami kanmu.” 36Aw tyumubag si Jisus kanilan, “Unu ya un mayu sekaten adi kanak?” 37Aw tyumubag silan, “Pag-ingkud da mu kagaya dun ni paghariꞌ mu, tumbayan kanami ya mingkud adti sayid mu, ya sambuk apit adti kalintu aw ya sambuk apit adti kawala.” 38Manang miglong si Jisus kanilan, “Walaꞌ mayu ka-ede-i kun unu ya pigsekat mayu. Unu, mabatug mayu ya manga kalugan na un ku ka-agiyan? Aw unu, mati-is mayu uman ya manga un ku ti-isen?” 39Tyumubag silan, “E-e, mabatug nami.” Aw miglong si Jisus kanilan, “Un mayu saba agiyan ya un ku ka-agiyan, aw un mayu uman ti-isen ya un ku ti-isan. 40Manang ya pag-ingkud adti kalintu ku aw adti kawala ku, bekeꞌ ku ya mamalliꞌ. Ya mingkud dun, yan ya manga pigpamalliꞌ da na Ama ku.”
41Na, ya sampuluꞌ uman na umagakan ni Jisus, dyengeg nilan ya pigsekat ni Santiago aw ni Juan, aw to-o silan nyadaman. 42Yanagaw pigpatawag ni Jisus ya kadég nilan aw piglongan nan silan, “Kya-ede-an da mayu ya bet na manga magdadumala͡ay sa manga utaw na walaꞌ ya pagpangintu-u sa Tyumanem. Silan ya gayed magbayaꞌ sa manga sakup nilan. Aw maynan uman ya manga mangkalangkaw, gayed silan magpanuguꞌ sa manga utaw asuntu na dakulaꞌ ya katundanan nilan. 43Manang diliꞌ mayu silan pagsilingan. Kun awun sambuk kamayu na kaliman nan ma-imoꞌ dakulaꞌ na utaw, ka-ilangan una sakanan ma-imoꞌ sugu-anen dun ni kamayu. 44Aw kun awun sambuk kamayu na malim na yan ya gayed pag-una͡en, ka-ilangan silingan nan ya bet na sugu-anen na magpadanaꞌ adti kadég na utaw. 45Pangkay aku na Iseꞌ na Utaw, walaꞌ aku kadi asini tas na lupaꞌ pada sanggila-en, manang yan baling ya pigkadi ku ya ma-imoꞌ sugu-anen adti manga utaw, aw ma-imoꞌ kalyu kanilan adti pagkamatay pada maglekat kanilan adti manga salaꞌ nilan.”
Ya pagpaguliꞌ ni Jisus sa mata ni Bartimyo
46Na, dyumateng si Jisus aw manga umagakan nan adti syudad na Jériko. Aw sa pag-indeg nilan lekat dun ni syudad yan, madég ya manga utaw na nyagad kanilan. Aw adti kilid na dalan awun eseg na buta na nyingkud aw nyangilalat sa manga utaw na lyumabay. Ya ngalan nan si Bartimyo na iseꞌ ni Timyo. 47Pagdengeg nan na si Jisus na taga Nazarit ya un lumabay, migtatawag sakanan, “We… Jisus na buwadbuwad ni Dabid! Kallati beg aku!” 48Manang pigsagda sakanan na madég na utaw, law nilan, “Katinep kaw!” Manang to-o pa nan baling pigpakadakulaꞌ ya kanan tingeg, “We… Buwadbuwad ni Dabid, kallati beg aku!” 49Yanagaw tyumeneng si Jisus aw law nan, “Tawaga mayu sakanan aw pa-agadan mayu adi.” Aw pigtawag nilan ya buta aw law nilan, “Pakabagsega ya ginawa mu! Indeg kaw kay pigtawag kaw ni Jisus!” 50Aw maksay nan pigsalabel ya kayab nan aw nyindeg aw migpalapit kan Jisus. 51Aw nyusip si Jisus kanan, “Unu ya kaliman mu na imo-un ku kanmu?” Aw tyumubag ya eseg yan, “Kay Magpalna-uway, kaliman ku beg kumitaꞌ salut.” 52Aw piglongan sakanan ni Jisus, “Panaw da kaw. Asuntu sa pagpangintu-u mu kanak, kyaguli-an da kaw.” Aw dayaw sakanan kyumitaꞌ aw dyumalug da kan Jisus sa panaw nan.
ទើបបានជ្រើសរើសហើយ៖
Markos 10: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.