Markos 9
9
1Aw miglong pa si Jisus kanilan, “Matinaw ya un ku paglongun kamayu: Awun eped kamayu asini na diliꞌ nilan apeten ya pagkamatay mendaꞌ na kita-en nilan ya paghariꞌ na Tyumanem na ka-agadan na kadakulaꞌ na katulus nan.”
Ya pagka-uman na kadakulaꞌ na lawas ni Jisus
2Pagkatigkas na enemengallaw, pigpa-agad ni Jisus si Pédro aw si Santiago aw si Juan aw tyumukud silan adti matas na buntud na oloꞌ silan. Aw sa talana nilan sakanan pigtandawan, nya-uman ya kadakulaꞌ na lawas ni Jisus. 3Ya kaputiꞌ na kadégkadég nan walaꞌ ya un maka-unawa asini tas na lupaꞌ, aw to-o masilang. 4Aw migpakitaꞌ uman dun si Éliyas aw si Moysis aw migbalawbalaw silan kan Jisus. 5Aw miglong si Pédro kan Jisus, “Kay Magpalna-uway, madyaw kay ini kami. Magtulluk kami sa tulu ya layag, sambuk ya kanmu, sambuk ya kan Moysis aw sambuk ya kan Éliyas.” 6Yan ya piglong ni Pédro kay walaꞌ nan ka-ede-i kun unu ya madyaw nan paglongun, kay to-o silan nyallek. 7Aw tigkas yan, awun labun na tyumakleb kanilan. Aw awun tingeg na lekat adti labun na miglong, “Yeiy ya kanak Iseꞌ na to-o ku pigginawa͡an. Pakanyegi mayu sakanan!” 8Aw sa pag-inunu nilan, walaꞌ ya eped na kyinitaꞌ nilan dun, dakman oloꞌ si Jisus.
9Sa pagtubang nilan lekat adti buntud, piglongan silan ni Jisus na diliꞌ nilan pagpa-edeꞌ adti pangkay singalan ya kyinitaꞌ nilan taman na mataw ya Iseꞌ na Utaw lekat adti pagkamatay. 10Yanagaw pigtuman nilan ya piglong ni Jisus, manang gayed silan mig-usip-usipay kun unu ya kakawasan na piglong nan sa pagkataw na utaw lekat adti pagkamatay. 11Aw pig-usip nilan si Jisus, “Anangaꞌ gayed miglong ya manga magpalna-uway sa Uldin na ka-ilangan maka-una si Éliyas dumateng aw makamoli ya Misiyas?”#9:11 Sa pagbasa na manga Judiyu sa Malakiyas 4:5, iman nilan aw lumikuꞌ una si Éliyas asini tas na lupaꞌ sa diliꞌ pa dumateng ya Misiyas. Manang si Juan na Magba͡utismuway, yan ya nyaka-una kan Jisus. Aw si Juan ya pigpalabet ni Jisus na Éliyas dun ni birsikulu 12-13. 12-13Aw tyumubag si Jisus kanilan, “Matinaw saba ya piglong nilan na si Éliyas ya maka-una aw magtagilan sa kadég. Manang paglongun ta kamu na dyumateng da si Éliyas, aw pigpamulayaman sakanan na manga utaw, kasiling na dadan da na Tyumanem pigpasulat. Aw maynan uman, pigpasulat nan na aku na Iseꞌ na Utaw ka-ilangan pati-isen aw odoy-odoyun na manga utaw.”
Ya pag-alilin ni Jisus sa busaw na syumeled adti iseꞌ
14Paglikuꞌ ni Jisus aw ya tulu ya eped nan lekat adti buntud, kyinitaꞌ nilan na kyalimpungan na madég na utaw ya kanilan eped. Aw pig-ayil silan na manga magpalna-uway sa Uldin na manga Judiyu. 15Aw ya madég na manga utaw, walaꞌ nilan imanmana na mawun si Jisus, yanagaw sa pagkitaꞌ nilan kanan, nya-enneng-enneng silan aw maksay silan lyumagbet kanan. 16Aw nyusip si Jisus kanilan, “Unu ya pig-ayilan mayu?” 17Aw miglong ya sambuk na eseg dun, “Kay Magpalna-uway, pigpa-agad ku adi kanmu ya iseꞌ ku na eseg kay syeledan sakanan na busaw aw walaꞌ da sakanan pakapaglong. 18Aw kun magseled ya busaw kanan, magkatuwad sakanan dun ni lupaꞌ, aw magsulaꞌ ya bakaꞌ nan aw magpanguliteb ya untu nan aw magkeseg ya kanan lawas. Yanagaw migsekat aku adti manga umagakan mu na alilinan nilan ya busaw yan, manang walaꞌ nilan kabatug.” 19Aw miglong si Jisus, “Tay sa manga utaw adun na manga allaw yeiy na walaꞌ ya pagpangintu-u! Sangunu kaꞌ ya kadugay na mati-is ku ya pag-iyagad kamayu?” Tigkas yan, miglong si Jisus, “Na, pa-agadan adi sayid ku ya iseꞌ.” 20Yanagaw pigpa-agad nilan ya iseꞌ adti kan Jisus. Manang pagkitaꞌ na busaw kan Jisus, to-o nan pigpatakig ya iseꞌ aw nyalukad adti lupaꞌ, aw gayed migtambulilid aw migsulaꞌ ya bakaꞌ nan. 21Aw pig-usip ni Jisus ya ama na iseꞌ, “Kanu pagpalekat ya bati-enen na iseꞌ mu?” Aw tyumubag ya ama nan, “Lekat pa na pagkatagbiꞌ nan. 22Malikit da na busaw paglukaden ya iseꞌ ku adti atulun aw adti tubig na un nan galu patayen. Manang kun mabatug mu, kallati aw tabangi beg kami!” 23Aw miglong si Jisus, “Anangaꞌ kaw maglong, ‘Kun mabatug mu’? Mabatug saba adti utaw ya kadakulaꞌ kun awun pagpangintu-u nan kanak.” 24Aw maksay tyumubag ya ama na iseꞌ yan, “Nyangintu-u aku kanmu, manang diliꞌ pa umbaꞌ! Tabangi beg aku na kadugangan ya kanak pagpangintu-u kanmu!”
25Pagkitaꞌ ni Jisus sa to-o madég na manga utaw na maksay migpasinan adti kanan, pigsuguꞌ nan ya busaw na migpabengel aw migpa-umu sa iseꞌ, law ni Jisus, “Paglongun ta kaw kay busaw: Luwaꞌ kaw asini iseꞌ ini, aw diliꞌ da mu pagliku-an!” 26Aw tigkan mig-ulangag ya busaw, aw to-o nan pigpatakig ya iseꞌ, aw tigkas yan, lyumuwaꞌ ya busaw. Iman mu aw walaꞌ da ya ginawa na iseꞌ, aw madég kanilan ya miglong, “Nyatay da ya iseꞌ iyan.” 27Manang pig-awidan ni Jisus ya tulluꞌ na iseꞌ aw banguna nan aw nyindeg ya iseꞌ dun ni asdangan nilan.
28Pagseled da ni Jisus aw kanan manga umagakan adti balay, pig-usip nilan sakanan, “Anangaꞌ walaꞌ nami kabatug alilini ya busaw yan?” 29Aw tyumubag si Jisus kanilan, “Ya maynan na punganan na busaw, ka-alilinan magi oloꞌ sa pagpanawagtawag adti Tyumanem.”
Ya kadwa na pagpa-edeꞌ ni Jisus sa pagkamatay aw pagkataw nan
30Pag-indeg ni Jisus aw kanan manga umagakan dun, nyagi silan adti Galiliya. Aw diliꞌ si Jisus malim na ka-ede-an na eped na utaw kun ayin silan, 31kay kaliman nan palna-uwan silan. Miglong si Jisus kanilan, “Aku na Iseꞌ na Utaw agpet da lubidan aw tumbay adti manga utaw na un magpatay kanak. Manang pagdateng na katlu na allaw, matawun aku lekat adti pagkamatay.” 32Manang walaꞌ nilan kalabeti ya kakawasan na piglong nan, aw nyallek silan nyusip kanan.
Ya usip kun singalan ya to-o matas
33Pagdateng nilan adti Kapirna-um, nyantuk si Jisus aw ya manga umagakan nan adti balay, aw nyusip si Jisus kanilan, “Unu ya pig-ayilan mayu dun ni dalan kakayna?” 34Manang nyatinep silan kay ya pig-ayilan nilan kun singalan kanilan ya to-o matas. 35Aw nyingkud si Jisus aw pigtawag nan ya sampuluꞌ tag duwa (12) ya umagakan nan, aw piglongan nan silan, “Kun awun sambuk kamayu na kaliman nan ma-imoꞌ to-o dakulaꞌ na utaw, ka-ilangan sakanan una magpadalem aw ma-imoꞌ sugu-anen na kadég.” 36Aw pagkatigkas yan, kyumamang si Jisus sa tagbiꞌ na iseꞌ aw pigpa-indeg nan dun ni tengaꞌ nilan. Tigkas yan, pigsipit nan ya iseꞌ, aw miglong si Jisus, 37“Pangkay singalan kamayu ya dumawat sa utaw na madalem kasiling na iseꞌ ini asuntu sa pagdalug mayu kanak, dun da aku nan uman dawata. Aw pangkay singalan ya dumawat kanak, dun da nan uman dawata ya Ama na migpadala kanak.”
Ya walaꞌ pagbalabag kanaten yan ya tengteng eped tadun
38Aw miglong si Juan kan Jisus, “Kay Magpalna-uway, kyinitaꞌ nami ya sambuk na utaw na mig-alilin sa manga busaw dun ni ngalan mu, aw piglongan nami sakanan na botonan nan ya pigpan-imoꞌ nan kay bekeꞌ saba sakanan na eped tadun.” 39Manang miglong si Jisus kanilan, “Ya-i mayu sakanan pagtageni! Kay ya utaw na maka-imoꞌ sa milagru magi dun ni kanak ngalan, diliꞌ uman sakanan maksay makapaglong sa malatay adi kanak. 40Kun singalan ya walaꞌ kele sa kanaten palna-u, yan ya syumambuk uman kanaten. 41Matinaw saba ya un ku paglongun kamayu: Pangkay singalan utawa na mallat kamayu aw matag sa pangkay sangkatabuꞌ ya tubig asuntu na kya-ede-an nan na aku si Kristu ya pigdalug mayu, na, yan ya utaw na awun madawat nan kagaya.
42“Manang kun awun utaw na migpadalem na nyangintu-u kanak, aw kun buyuwun sakanan adti pagpakasalaꞌ, ya utaw na magbuyu madyaw pa baling kanan kun tati-an ya liyeg nan na dakulaꞌ na gilingan na batu aw ulugun sakanan adti dagat. 43Aw kun ya pig-imoꞌ na kanmu tulluꞌ ya du-an na makasalaꞌ kaw, madyaw pa baling na magpakawat kaw dun ni pangkay unu ya makapabuyu kanmu adti pag-imoꞌ sa salaꞌ. Pangkay pa kun utudun ya kanmu tulluꞌ, madyaw pa na awun malagak dun ni kanmu lawas aw matagtun mu ya ginawa na walaꞌ ya katigkasan, kay sa awun duwa ya tulluꞌ mu manang agbel kaw baling adti atulun na diliꞌ pagkapatayan. 44[Dun ni banwa yan, ya mangkayantek na lala na magkan sa unud na utaw diliꞌ magkamatay, aw ya atulun diliꞌ uman pagkapatayan.] 45Aw kun ya pig-imoꞌ na kanmu siki ya du-an na makasalaꞌ kaw, madyaw pa baling na magpakawat kaw dun ni pangkay unu ya makapabuyu kanmu adti pag-imoꞌ sa salaꞌ. Pangkay pa kun utudun ya kanmu siki, madyaw pa na awun malagak dun ni kanmu lawas aw matagtun mu ya ginawa na walaꞌ ya katigkasan, kay sa awun duwa ya siki mu manang agbel kaw baling adti atulun na diliꞌ pagkapatayan. 46[Dun ni banwa yan, ya mangkayantek na lala na magkan sa unud na utaw diliꞌ magkamatay, aw ya atulun diliꞌ uman pagkapatayan.] 47Aw kun ya pag-inunu mu ya du-an na maka-imoꞌ kaw sa salaꞌ, madyaw pa baling na magpakawat kaw sa pangkay unu ya makapabuyu kanmu adti pag-imoꞌ sa salaꞌ. Pangkay pa kun lugiten ya kanmu mata, madyaw pa baling na mabuta ya sangkilid na mata mu aw sumeled kaw adti Kasakupan na Tyumanem kay sa awun duwa ya mata mu manang agbel kaw baling adti atulun na diliꞌ pagkapatayan. 48Dun ni banwa yan, ya mangkayantek na lala na magkan sa unud na utaw diliꞌ magkamatay, aw ya atulun diliꞌ uman pagkapatayan.
49“Ya kadég na utaw, un nilan ka-agiyan ya manga kalugan pada ya pagpangintu-u nilan to-o magkasalig. Kasiling na gulay na pag-asinan pada magkadyaw ya nanam. 50Madyaw ya asin, manang kun kalagakan sa nanam, diliꞌ da makalikuꞌ ya ka͡asin nan. Maynan uman, ka-ilangan na masiling kamu na asin adti kamayu eped, aw pagsambuka ya kamayu ginawa.”
ទើបបានជ្រើសរើសហើយ៖
Markos 9: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.