Lukas 8
8
Ya manga ka͡ubayan na gayed tyumabang kan Jisus
1Lyumabay da ya pilangallaw aw nyanaw da uman si Jisus aw nyapit adti madég na manga lunsud aw manga baranggay. Aw pigpa-edeꞌ nan ya Madyaw na Ubat-ubat sa Kasakupan na Pighari-an na Tyumanem. Aw nyagad kanan ya sampuluꞌ tag duwa (12) ya umagakan nan. 2Aw awun uman nyagad kanilan na manga ka͡ubayan. Ya eped kanilan pigguliꞌ da dadan ni Jisus ya magkedel nilan aw ya eped uman pig-alilinan da nan sa manga busaw. Ya sambuk kanilan yan si Maria na taga lunsud na Magdala, aw idtu muna pig-alilinan ni Jisus ya pitu ya busaw lekat adti kanan. 3Aw nyagad uman si Susana aw si Jo-ana aw eped pa na manga ka͡ubayan. Ya manga ka͡ubayan yeiy kyumamang silan lekat adti kanilan pagkamangan aw pigtabang nilan kan Jisus aw kanan manga umagakan. Na, ya eseg ni Jo-ana na si Kusa, yan ya sambuk na pagsaligan ni Hérodés Antipas.
Ya pundinganan sa utaw na migsabug sa biniꞌ
4Aw sa migkatipun da adti tampid ni Jisus ya madég to-o na manga utaw na lyumekat adti madég na lunsud, piglongan nan silan magi sa pundinganan, 5law nan: “Awun sambuk na utaw na nyadtu ni pawaꞌ nan na un magsabug sa manga biniꞌ. Sa pagsabug nan sa manga biniꞌ, ya eped nyakasabug adti kilid na dalan aw kyataguna-an, aw pyanubug na manga langgam na tyumugpaꞌ dun. 6Ya eped na manga biniꞌ nyakasabug adti kabatuwan aw maksay gyumitiꞌ. Manang nyalanes ya manga tanem kay to-o magdang ya lupaꞌ. 7Ya eped na manga biniꞌ nyakasabug adti magalet na suksukun. Gyumitiꞌ ya manga biniꞌ, manang asuntu na tyumulin uman ya magalet, nyalemes baling ya manga tanem. 8Aw ya eped na manga biniꞌ nyakasabug adti matabaꞌ na lupaꞌ, tyumulin aw nyamunga na tag sanggatus (100).” Aw miglong pa si Jisus kanilan, “Kamu na migpakanyeg, ka-ilangan kalabetan mayu ya kamayu pigdengeg.”
Ya kakawasan na pundinganan
9Aw nyusip kan Jisus ya kanan manga umagakan kun unu ya kakawasan na pundinganan yeiy. 10Aw tyumubag sakanan kanilan, “Kamu ya pig-atagan na Tyumanem na maka-edeꞌ sa manga pigtaguꞌ idtu muna sa Kasakupan na Pighari-an nan. Manang awun manga eped na utaw na piglongan ku magi sa pundinganan, pada yan ya sampetan na pangkay inunuwun pa nilan manang diliꞌ nilan kita-en. Aw pangkay dengegen pa nilan manang diliꞌ nilan kalabetan ya kakawasan. #8:10 Mabasa adti Isayas 6:9-10 ya piglong ni Jisus sa bet na manga Parisiyo aw manga eped na gayed kyumele sa palna-u nan.
11“Na, yeiy ya kakawasan na pundinganan: Ya tingeg na Tyumanem, yan ya kasiling na manga biniꞌ na pigsabug. 12Ya kilid na dalan na kyasabugan sa manga biniꞌ, yan ya manga utaw na dyumengeg da sa tingeg na Tyumanem manang dumateng si Satanas aw pigdampas nan adti kanilan ya pigdengeg da nilan pada diliꞌ silan mangintu-u aw diliꞌ silan paluwa-en na Tyumanem.
13“Aw ya kabatuwan na kyasabugan sa manga biniꞌ, yan ya manga utaw na dyumengeg sa tingeg na Tyumanem aw pigdawat nilan na awun pagleya manang walaꞌ to-o pakadalid ya pagpangintu-u nilan. Pagdateng na manga kalugan aw manga pagpamulayam asuntu sa pagpangintu-u nilan, ayawan nilan ya kanilan pagpangintu-u.
14“Aw ya magalet na suksukun na kyasabugan uman sa manga biniꞌ, yan ya manga utaw na dyumengeg sa tingeg na Tyumanem aw nyangintu-u silan manang ya kanilan anenganeng nyatmuꞌ na kakaypengan sa pagpakabetang nilan, aw sa pag-anenganeng na ma-imoꞌ mayaman, aw sa manga pagkaliman nilan asini tas na lupaꞌ. Aw ya sampetan yan, diliꞌ makabunga ya kanilan pagpangintu-u.
15“Manang ya matabaꞌ na lupaꞌ na kyasabugan sa manga biniꞌ, yan ya manga utaw na migpakanyeg sa tingeg na Tyumanem aw gayed nilan pigbetang adti kanilan anenganeng, aw pigpadeleg nilan ya pagdalug, aw magi sa pagpadeleg nilan, nyamunga na to-o madég.”
Ya pundinganan sa saleng
16Miglong pa si Jisus kanilan, “Walaꞌ ya utaw na magsuluꞌ sa salengan pada sangkuban nan, aw maynan uman, diliꞌ betang adti dalem na katri. Manang betang nan baling adti bantawanan pada ka-ilawan ya kadég na awun ni seled na balay. 17Maynan uman, walaꞌ ya pigtaguꞌ adun na diliꞌ kagaya ka-ede-an. Ya kadég alag bukasan aw mabangal.
18“Yanagaw to-o mayu pakanyegi ya piglong ku kamayu. Kay ya utaw na gayed migbetang sa ginawa sa dyengeg nan, dugangan pa ya kyalabetan nan. Manang ya utaw na walaꞌ pagbetang sa ginawa, pangkay ya tagbiꞌ na iman nan aw kyalabetan nan, kamangen baling adti kanan.”
Ya ina ni Jisus aw manga inulug nan
19Na, dyumateng ya ina ni Jisus aw manga inulug nan, manang walaꞌ silan pakapalapit asuntu sa kadég na manga utaw na nyakapalibed kanan. 20Aw awun miglong kan Jisus, “Awun ni luwaꞌ ya ina mu aw manga inulug mu. Kaliman nilan magbalawbalaw kanmu.” 21Tyumubag si Jisus kanilan, “Pangkay singalan ya dyumengeg sa tingeg na Tyumanem aw dyumalug sa pigdengeg nilan, silan uman ya pigsiling ku na kanak manga inulug aw manga bubay aw ina ku.”
Ya pagpatangkeꞌ ni Jisus sa samet aw baled
22Na, sambuk na allaw, miglong si Jisus adti kanan manga umagakan, “Naten tumalipag sa danaw.”#8:22 Ya kalawig na Danaw na Galiliya 23 ka kilomitro, aw ya kalakbang nan 11 ka kilomitro, aw ya kalalem nan 48 ka mitro. Yanagaw syumakay silan adti balangay aw syuminan adti dipag. 23Talana nilan syumakay, nyakatulug si Jisus. Aw biglaꞌ dyumateng ya to-o mabandes na samet, aw syalampawan na manga baled ya balangay nilan aw un da matmuꞌ na tubig. Aw agpet da galu silan malened. 24Yanagaw, maksay dyumulud kan Jisus ya manga umagakan nan aw pigpukaw nilan na miglong, “Kay Magpalna-uway! Un da kitadun mangkamatay!” Aw migbangun si Jisus aw pigsagda nan ya samet aw baled, law nan, “Tangkeꞌ kamu!” Aw tyumangkeꞌ ya samet aw migkalinaw da ya danaw. 25Miglong si Jisus sa manga umagakan nan, “Ayin da saba ya pagsalig mayu kanak?” To-o silan nyallek aw nya-enneng-enneng aw mig-usip-usipay silan, “Singalan kaꞌ ya utaw yeiy? Pangkay ya samet aw ya manga baled magka͡agad kanan!”
Ya pag-alilin ni Jisus sa manga busaw na syumeled adti utaw
26Aw migpadeleg si Jisus aw manga umagakan nan syumakay sa balangay aw tyumalipag sa danaw, aw dyumateng silan adti banwa na pig-eya-an na manga taga Girasa dun ni dipag na Galiliya. 27Sa pagpanog ni Jisus lekat adti balangay, awun eseg na syumungun kanan. Na, ya eseg yeiy nyeyaꞌ idtu muna adti lunsud, manang pigseledan sakanan na madég na busaw, yanagaw madugay na walaꞌ da sut sa kadégkadég aw walaꞌ uman sakanan pag-eyaꞌ adti balay, manang adtu baling pag-eyaꞌ ni ilib na paglebengan sa nyangkamatay. 28Sa pagkitaꞌ nan kan Jisus, mig-ulangag sakanan aw nyangillupung adti asdangan nan aw miglong sa mabagseg na tingeg, “Kay Jisus na Iseꞌ na Tyumanem na To-o Matas, pabaya-i la aku! Nyanginayuꞌ aku kanmu na diliꞌ aku mu pamulayaman!” 29Yan ya piglong nan kay tolobo pa ni Jisus pigsuguꞌ ya busaw na lumuwaꞌ dun ni utaw yan. Ya utaw yeiy madugay da sakanan pigseledan na manga busaw. Aw pangkay pigtunggu-an aw pigsangkali-an ya manga siki aw ya taklayan nan, manang diliꞌ sakanan pagkatagenan. Pagpamugtu-un nan baling ya sangkaliꞌ aw pagbalukun nan ya putaw. Aw paggagaden sakanan na busaw adti kaligbinan. 30Tigkas yan, pig-usip sakanan ni Jisus, “Singalan ya ngalan mu?” Aw law nan, “Si Légion.” Kay madég saba ya manga busaw na syumeled kanan. 31Aw nyanginayuꞌ pa silan kan Jisus na diliꞌ nan silan pakawasen dun ni gawang na walaꞌ ya katantanan na yan ya banwa na adtu silan kagaya pa-emel-emela.
32Na, awun madég to-o na manga takuꞌ na nyampangaliwad adti kakayaban na malapit dun. Yanagaw nyanginayuꞌ kan Jisus ya manga busaw na tumbay galu kanilan na sumeled adti manga takuꞌ. Aw pigtumbay silan ni Jisus. 33Aw ya kadég nilan lyumuwaꞌ lekat adti eseg aw syumeled silan adti manga takuꞌ. Tigkas yan, nyampamalaguy ya kadég na manga takuꞌ dun ni kakayaban aw pyangkawasan nilan ya pangpang adti ligad na danaw aw ya kadég nilan nyabus nyangkalemes.
34Na, ya manga magdadiyaga͡ay sa manga takuꞌ, sa pagkitaꞌ nilan sa nya-imoꞌ, nyalaguy silan adti lunsud aw pig-ubat-ubatan nilan ya manga utaw dun ni lunsud aw ya nyakapalibed dun. 35Yanagaw nyangkadtu ya manga utaw na un nilan tanawun ya nya-imoꞌ. Aw sa pagdateng da nilan adti kan Jisus, kyinitaꞌ nilan ya eseg na abus da ka-alilini sa madég na manga busaw, aw nyingkud da sakanan adti asdangan ni Jisus na awun da kadégkadég aw migkadyaw da ya kanan anenganeng, aw nyangkallek silan. 36Aw ya manga kyumitaꞌ sa kadég na nyangka-imoꞌ, pig-ubat-ubatan nilan ya manga utaw kun pig-unu ya pagpaguliꞌ sa utaw na pigseledan na manga busaw. 37Pagkatigkas yan, ya kadég na nyeyaꞌ adti palibed na lunsud na Girasa, nyanginayuꞌ silan kan Jisus na indegan nan ya banwa nilan, kay alag silan to-o nyangkallek. Aw sa pagsakay da ni Jisus adti balangay na un da galu mindeg, 38nyanginayuꞌ kanan ya eseg na kya-alilinan da sa manga busaw, law nan, “Magad aku galu kanmu!” Manang pigpapanaw sakanan ni Jisus, aw piglongan nan, 39“Uliꞌ da kaw adti kamayu aw ubati ya manga utaw sa kadakulaꞌ na pig-imoꞌ kanmu na Tyumanem.” Aw nyindeg ya eseg aw pig-ubat-ubatan nan ya kadég na awun ni lunsud sa kadakulaꞌ na pig-imoꞌ kanan ni Jisus.
Ya pagmataw sa iseꞌ ni Jairus aw ya pagpaguliꞌ sa ka͡ubayan
40Sa paglikuꞌ ni Jisus adti dipag na danaw, migleya to-o ya manga utaw dyumawat kanan kay ya kadég nilan tyumagad kanan. 41Aw ya sambuk kanilan yan si Jairus na magdadumala͡ay sa sinagoga. Dyumulud sakanan adti kan Jisus aw lyumuhud adti asdangan nan, aw nyanginayuꞌ na madtu ni balay nan 42kay kamatayenen da ya iseꞌ nan na tamisa. Ya iseꞌ nan yeiy manga sampuluꞌ pa tag duwa ya umay nan. Yanagaw nyagad si Jisus kanan. Sa pagpanaw da nilan, migpan-insek ya madég na manga utaw na nyakapalibed kan Jisus. 43Na, dun ni tengaꞌ na kadég na manga utaw, awun sambuk na ka͡ubayan na gayed pigdugu-duguꞌ seled da na sampuluꞌ tag duwa (12) ya umay.#8:43 Adti Uldin na manga Judiyu kun maynan ya bati-enen na ka͡ubayan, malipaꞌ sakanan aw diliꞌ tumbay na makasambuk sa madég na utaw. Mabasa adti Libitiko 15:19-31. Nyabus da ya kuwalta nan migpabulung aw walaꞌ sakanan kaguli-i. 44Yanagaw dyumulud ya ka͡ubayan yan apit adti bagakwang ni Jisus aw pig-awidan nan ya pangaway na pigsut nan, aw dayaw tyumeneng ya kanan duguꞌ. 45Aw nyusip si Jisus kanilan, “Singalan ya nyawid kanak?” Aw ya kadég na manga utaw alag migmatinaw na walaꞌ silan awid kanan. Aw miglong si Pédro, “Kay Magpalna-uway, kyinitaꞌ da mu saba ya kadég na manga utaw na mig-insek kanmu.” 46Manang miglong si Jisus, “Awun nyawid kanak kay pigbatiꞌ ku na awun katulus na lyumuwaꞌ lekat adi kanak.” 47Pagka-edeꞌ na ka͡ubayan na diliꞌ da nan mataguꞌ, lyumikuꞌ sakanan adti kan Jisus na pigtakigan. Aw nyangillupung adti asdangan ni Jisus aw pig-ubat nan adti kadég na manga utaw kun unu ya du-an na pig-awidan nan ya pigsut ni Jisus aw ya pagpakaguliꞌ kanan. 48Aw miglong si Jisus kanan, “Kay Déꞌ, asuntu sa pagpangintu-u mu kanak, yan ya nyakaguliꞌ kanmu. Uliꞌ kaw na awun da kalinaw na kanmu anenganeng.”
49Sa walaꞌ pa si Jisus katigkas paglong adti ka͡ubayan yan, awun utaw na dyumateng lekat adti balay ni Jairus, aw law nan, “Nyapalus da beg ya ginawa na iseꞌ mu kay Sir! Diliꞌ da mu pagpagudun ya Magpalna-uway.” 50Pagdengeg ni Jisus sa piglong na utaw yan, miglong sakanan kan Jairus, “Diliꞌ kaw magkallek. Pangintu-u kaw oloꞌ aw kaguli-an ya iseꞌ mu.” 51Sa pagdateng da ni Jisus adti balay ni Jairus, walaꞌ sakanan kalim agadi na manga utaw adti seled. Yan oloꞌ ya pigpa-agad nan si Pédro, si Juan, si Santiago, aw ya ama aw ina na iseꞌ. 52Ya manga utaw adti luwaꞌ, alag silan migpansugaw aw migpanmatay. Manang miglong si Jisus kanilan, “Diliꞌ kamu magsugaw kay walaꞌ saba kamatay ya iseꞌ. Nyakatulug oloꞌ sakanan!” 53Aw nyaka-ikel baling silan sa piglong nan kay kya-ede-an nilan na nyatay da ya iseꞌ. 54Manang pig-awidan ni Jisus ya bekten na iseꞌ aw law nan, “Kay Déꞌ, pagbangun kaw!” 55Aw lyumikuꞌ ya ginawa nan aw dayaw sakanan migbangun aw nyindeg. Aw migsuguꞌ si Jisus na atagan nilan na kakan ya iseꞌ. 56To-o nya-enneng-enneng ya manga mangkatikadeng nan sa kyinitaꞌ nilan. Manang piglongan silan ni Jisus, “Ya-i mayu pag-ubat-ubatan adti eped na manga utaw ya nya-imoꞌ.”
ទើបបានជ្រើសរើសហើយ៖
Lukas 8: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
