Lukas 9
9
Ya pagsuguꞌ ni Jisus sa sampuluꞌ tag duwa (12) ya apostolés
1Pagkatigkas yan, pigpatawag ni Jisus dun ni sayid nan ya sampuluꞌ tag duwa (12) ya manga umagakan na pigpamalliꞌ da nan, aw pig-atagan nan silan na katulus na un mag-alilin sa kadég na manga busaw aw magguliꞌ sa manga utaw na awun magkedel. 2Aw pigsuguꞌ silan ni Jisus pada mag-ubat-ubat sa Kasakupan na Pighari-an na Tyumanem aw mangguliꞌ sa manga utaw na kyedelan. 3Aw piglongan nan silan, “Diliꞌ kamu magdala sa pangkay unu na manga pametang mayu. Diliꞌ kamu magdala sa bangkaꞌ, aw kabil, aw makan, aw kuwalta, aw manga ilisan. 4Aw kun ayin ya balay na datengan mayu, dun da kamu pag-eyaꞌ mendaꞌ na indegan mayu ya lunsud yan. 5Aw pangkay ayin na banwa ya kadtuwan mayu, kun diliꞌ kamu dawaten na manga utaw dun, sa pag-indeg mayu dun ni lunsud yan, taptapa ya alikabuk na manga siki mayu. Kay yan ya pangilala na ukuman silan na Tyumanem adti kamoliyan na allaw.” 6Aw nyindeg silan, aw pigkadtuwan nilan ya manga baranggay, aw gayed nilan pigpa-edeꞌ ya Madyaw na Ubat-ubat. Aw pangkay ayin silan kadtu, awun pigpangguliꞌ nilan na manga utaw na kyedelan.
Ya pagkabelengbeleng ni Hérodés
7Na, si Hérodés Antipas ya migdumala sa banwa na Galiliya. Dyengeg nan ya kadég na pigpan-imoꞌ ni Jisus, aw nyabelengbeleng sakanan kay awun manga utaw na miglong na yan kunu si Juan na Magba͡utismuway na nyataw lekat adti pagkamatay. 8Aw awun uman manga eped na miglong na lyumikuꞌ da si Éliyas.#9:8 Pigbasa na manga Judiyu adti Malakiyas 4:5-6 na un lumikuꞌ ya propita na si Éliyas. Aw miglong pa uman ya eped na nyataw da lekat adti nyangkamatay ya sambuk na propita na Tyumanem asini muna. 9Manang miglong si Hérodés, “Pigpa-utudan da ku saba si Juan sa ulu nan! Singalan utawa yeiy na gayed ku pigdengeg na migpan-imoꞌ sa maynan?” Yanagaw pigtibagsegan ni Hérodés na kita-en nan si Jisus.
Ya pagpakan ni Jisus sa limammalalan (5,000)
10Na, lyumikuꞌ ya manga apostolés adti tampid ni Jisus aw pigdandan nilan kanan ya manga nyangka-imoꞌ nilan. Aw pigpa-agad nan silan adti lunsud na Bétsayda aw walaꞌ ya eped na utaw na pigpa-agad nilan. 11Manang pagka-edeꞌ da na madég na manga utaw na nyindeg da silan, dyumalug silan kan Jisus. Pagdateng nilan dun, alag nan silan pigdawat aw piglongan sa Kasakupan na Pighari-an na Tyumanem, aw pigpangguliꞌ nan ya manga awun magkedel.
12Pagka͡ambung da, dyumulud kan Jisus ya sampuluꞌ tag duwa (12) ya umagakan nan aw miglong kanan, “Ayin ya madyaw kun papanawun da ya manga utaw adti manga baranggay na malapit asini, pada makabayad silan sa un nilan makan aw makapaninaw silan sa balay na kabantukan nilan. Kay kaligbinan ya banwa ini.” 13Manang tyumubag si Jisus kanilan, “Kamu baling ya matag sa un nilan makan.” Aw miglong silan kanan, “Ya asini kanami oloꞌ da limallapid ya pan aw duwambulus ya isdaꞌ na yan ya diliꞌ pa maka-umbaꞌ. Unu, kaliman mu na mayad pa kami sa kakan na maka-umbaꞌ sa kadég nilan?” 14Na, ya kadég na manga eseg dun, manga limammalalan (5,000) silan.#9:14 Mabasa adti Matiyo 14:21 na awun uman manga ka͡ubayan aw manga mangayseꞌ dun. Manang yan oloꞌ ya pig-iyap nilan ya manga eseg. Aw piglongan ni Jisus ya kanan manga umagakan, “Pa-ingkuda mayu ya manga utaw na tag kalima͡an (50).” 15Aw pigtuman nilan ya piglong ni Jisus aw pigpa-ingkud nilan ya manga utaw. 16Pagkatigkas yan, pigkamang ni Jisus ya limallapid ya pan aw duwambulus ya isdaꞌ, aw lyumangad sakanan adti langit aw pigpasalamatan nan adti Tyumanem. Aw tigkas yan, pigtenga-tengaꞌ ni Jisus aw pig-atag nan adti kanan manga umagakan aw pig-atped-atped uman nilan adti kadég na manga utaw. 17Kyuman ya kadég nilan aw alag silan nyangkabiyag. Aw pigpan-imun na manga umagakan nan ya nyangkasamaꞌ, aw nyatmuꞌ ya sampuluꞌ tag duwa (12) ya be-en.
Ya tubag ni Pédro na si Jisus ya Misiyas
18Sambuk na allaw, nyanawagtawag si Jisus na oloꞌ nan sayda, aw malapit dun ni tampid nan ya kanan manga umagakan. Aw pig-usip nan silan, “Dun ni pagbalawbalaw na manga utaw, singalan kunu aku?” 19Aw tyumubag silan, “Ya eped miglong na ikaw kunu si Juan na Magba͡utismuway. Aw awun eped na miglong na ikaw kunu si Éliyas, aw awun pa uman eped na miglong na ikaw ya sambuk na propita asini muna na nyataw da.” 20Aw pig-usip pa silan ni Jisus, “Manang adti kamayu, singalan aku?” Aw tyumubag si Pédro, “Ikaw saba ya Misiyas na pigpadala na Tyumanem.”
21Aw miglong si Jisus kanilan na diliꞌ nilan yeiy pagpa-edeꞌ adti pangkay singalan utawa. 22Aw piglongan pa nan uman silan, “Aku na Iseꞌ na Utaw ka-ilangan magti-is aw kele͡an na manga magdadumala͡ay sa manga Judiyu aw manga mangkatas na magdadugsu-ay aw manga magpalna-uway sa Uldin. Aw papatay aku nilan, manang pagkatlu na allaw mataw aku.”
Ya madawat na utaw na dumalug sa palna-u ni Jisus
23Aw miglong si Jisus adti kadég nilan, “Pangkay singalan ya malim ma-imoꞌ kanak umagakan, ka-ilangan ayawan nan ya kanan pagkaliman aw pisanen nan ya kanan krus kada allaw aw dumalug kanak. 24Pangkay singalan ya gyuminawa sa pag-eyaꞌ nan asini tas na lupaꞌ, kalagakan baling sa ginawa na walaꞌ ya katigkasan. Manang kun singalan ya magtibulluk dumalug kanak pangkay pa adti pagkamatay, yan ya un makatagtun sa ginawa na walaꞌ ya katigkasan. 25Unu kaꞌ ya un ma-untung na utaw kun matagtun nan ya kadakulaꞌ na banwa manang kalagakan baling sa ginawa na walaꞌ ya katigkasan? 26Pangkay singalan ya mamulamula asuntu kanak na Iseꞌ na Utaw aw sa palna-u ku, kamulamula ku uman ya utaw yan dun ni allaw na paglikuꞌ ku asini tas na lupaꞌ. Aw dun ni paglikuꞌ ku, kita-en ya kanak kalalamdag aw ya kalalamdag uman na kanak Ama aw manga anghil na lekat adti tas na langit. 27Matinaw saba ya un ku paglongun kamayu: Awun eped asini kamayu na diliꞌ nilan apeten ya pagkamatay mendaꞌ na kita-en nilan ya paghariꞌ na Tyumanem.”
Ya pagka-uman na gya ni Jisus
28Na, paglabay da na walungallaw lekat na paglong ni Jisus sa kadég yeiy, tyumukud sakanan adti sambuk na buntud na un manawagtawag adti Tyumanem. Aw pigpa-agad nan si Pédro, si Juan, aw si Santiago. 29Talana ni Jisus nyanawagtawag, nya-uman ya gya nan, aw ya kadégkadég nan to-o migkaputiꞌ aw masilang. 30Aw tigkan migpakitaꞌ ya duwa ya utaw na si Moysis aw si Éliyas, aw migbalawbalaw silan si Jisus. 31Kya-ilawan uman silan na kalalamdag. Aw yan ya pigbalawbalawan nilan ya pagkamatay ni Jisus na agpet da matuman adti Jérusalim. 32Na, si Pédro aw manga eped nan to-o silan nyakatulug. Manang sa pagmata nilan, kyinitaꞌ nilan ya dakulaꞌ na kalalamdag na pagka Tyumanem ni Jisus, aw kyinitaꞌ nilan uman ya duwa ya eped nan na nyindeg dun ni sayid nan. 33Aw sa un da manaw ya duwa ya utaw yeiy, miglong si Pédro kan Jisus, “Kay Magpalna-uway, madyaw kay ini kami. Magtulluk kami sa tulu ya layag, sambuk ya kanmu, sambuk ya kan Moysis aw sambuk uman ya kan Éliyas.” Manang walaꞌ ni Pédro ka-ede-i kun unu ya piglong nan. 34Sa talana pa nan miglong, awun labun na tyumakleb kanilan, aw to-o silan nyallek. 35Aw awun tingeg na lekat adti labun na miglong, “Yeiy ya kanak Iseꞌ na pigpadala ku. Pakanyegi mayu sakanan!” 36Aw sa pagteneng da na tingeg, pigkitaꞌ nilan na dakman oloꞌ si Jisus ya nyasamaꞌ. Aw ya kadég na pigkitaꞌ nilan dun ni allaw yan, walaꞌ nilan ubatan adti pangkay singalan.
Ya pag-alilin ni Jisus sa busaw na syumeled adti iseꞌ
37Na, salut na allaw, sa pagtubang nilan lekat adti buntud, madég ya manga utaw na syumungun kan Jisus. 38Aw dun ni kadég nilan, awun sambuk na eseg na miglong sa mabagseg na tingeg, law nan, “Kay Magpalna-uway, tanawa beg ya iseꞌ ku na eseg, kay yeiy ya iseꞌ ku na tamisa. 39Malikit sakanan pagseledan na busaw aw tigkan sakanan mag-ulangag aw pagtakigan mendaꞌ na magsulaꞌ ya bakaꞌ nan. Gayed sakanan pagpati-isen na busaw na syumeled kanan aw diliꞌ da malim lumuwaꞌ ya busaw lekat adti kanan. 40Nyanginayuꞌ da aku sa manga umagakan mu na alilinan nilan ya busaw adti kanan, manang walaꞌ nilan kabatug.” 41Aw miglong si Jisus, “Tay sa manga utaw adun na manga allaw yeiy na baluk ya anenganeng aw walaꞌ ya pagpangintu-u! Sangunu kaꞌ ya kadugay na mati-is ku ya pag-iyagad kamayu?” Aw piglongan ni Jisus ya ama na iseꞌ, “Pa-agadan adi sayid ku ya iseꞌ mu.” 42Aw sa pagpa-agad da sa iseꞌ adti kanan, piglagpes na busaw ya iseꞌ dun ni lupaꞌ aw to-o pigtakigan. Manang pigsagda ni Jisus ya busaw aw dayaw migkadyaw ya iseꞌ, aw piglikuꞌ ni Jisus adti ama nan. 43Aw ya kadég na kyumitaꞌ sa nya-imoꞌ yan, nya-enneng-enneng silan sa kadakulaꞌ na katulus na Tyumanem.
Ya kadwa na pagpa-edeꞌ ni Jisus sa pagkamatay nan
Aw sa talana pa nya-enneng-enneng ya manga utaw sa kadég na nya-imoꞌ ni Jisus, miglong sakanan adti manga umagakan nan, 44“Pakanyegi mayu to-o ya un ku paglongun kamayu: Aku na Iseꞌ na Utaw agpet da lubidan aw tumbay adti manga utaw na un magpatay kanak.” 45Manang walaꞌ nilan kalabeti ya kakawasan na piglong ni Jisus kay pigtaguꞌ pa adti kanilan pada diliꞌ nilan ka-ede-an. Aw migduwaduwa silan nyusip kanan.
Ya utaw na to-o matas dun ni Kasakupan na Tyumanem
46Aw migpan-ayil ya manga umagakan ni Jisus kun singalan kanilan ya to-o matas. 47Manang kya-ede-an ni Jisus ya kanilan anenganeng. Yanagaw kyumamang sakanan sa tagbiꞌ na iseꞌ aw pigpa-indeg nan dun ni tampid nan. 48Aw miglong si Jisus kanilan, “Pangkay singalan kamayu ya dumawat sa utaw na madalem kasiling na iseꞌ ini asuntu sa pagdalug mayu kanak, dun da aku nan uman dawata. Aw pangkay singalan ya dumawat kanak, dun da nan uman dawata ya Ama na migpadala kanak. Kay kun singalan ya magpadalem, yan baling ya to-o matas.”
49Aw miglong si Juan kan Jisus, “Kay Magpalna-uway, kyinitaꞌ nami ya sambuk na utaw na mig-alilin sa manga busaw dun ni kanmu ngalan, aw miglong kami kanan na botonan nan ya pigpan-imoꞌ nan kay bekeꞌ saba sakanan na eped tadun!” 50Manang miglong si Jisus kanilan, “Ya-i mayu sakanan pagtageni! Kay kun singalan ya walaꞌ kele sa kanaten palna-u, yan ya syumambuk kanaten.”
Ya pagkele kan Jisus adti sambuk na baranggay na sakup na Samariya
51Na, sa malapit da dumateng ya allaw na ma-engat si Jisus adti tas na langit, pigbetang nan adti kanan ginawa ya pagkadtu adti Jérusalim. 52Aw awun manga utaw na pigpa-una nan adtu ni sambuk na baranggay sakup na Samariya pada tagilanen nilan ya kanan kabantukan. 53Manang ya manga utaw na nyeyaꞌ dun ni baranggay yan, diliꞌ silan malim dumawat kan Jisus kay kya-ede-an nilan na un sakanan madtu ni Jérusalim. 54Aw sa pagkitaꞌ na manga umagakan nan na walaꞌ sakanan dawata, miglong si Santiago aw si Juan kan Jisus, “Kay Magpalna-uway, unu, kaliman mu magsekat kami adti Tyumanem na pa-ulanan nan ya kadég nilan na atulun pada mabus silan masangab?” 55Manang piglingiꞌ silan ni Jisus aw pigsagda nan silan. 56Aw migpadeleg silan nyanaw pasinan adti eped na baranggay.
Ya manga utaw na malim galu magad kan Jisus
57Talana nilan nyanaw, awun sambuk na utaw na miglong kan Jisus, “Kay Magpalna-uway, magad aku kanmu pangkay ayin kaw pasinan.” 58Aw miglong si Jisus kanan, “Ya manga mileꞌ awun pugalaꞌ na kanilan pagka-eya-an, aw ya manga langgam awun kanilan pugad. Manang aku na Iseꞌ na Utaw, walaꞌ ya balay na un ku kabantukan.” 59Aw miglong pa uman si Jisus adti eped na utaw, “Agad kaw kanak!” Manang tyumubag kanan ya utaw, “Kay Magpalna-uway, tumbayan pa una kanak na muliꞌ aku adti kanami pada maglebeng sa ama ku.” 60Manang tyumubag si Jisus kanan, “Pabaya-an da sa manga utaw na walaꞌ pangintu-u ya paglebeng sa nyatay. Manang ikaw, panaw da kaw aw ubat-ubatan ya Kasakupan na Pighari-an na Tyumanem.” 61Aw awun pa uman eped na utaw na miglong kan Jisus, “Kay Magpalna-uway, dumalug aku kanmu, manang tumbayan pa una kanak na muliꞌ aku adti kanami kay un pa aku manabi sa pamilya ku.” 62Manang tyumubag si Jisus kanan, “Ya utaw na migdaru na gayed maglingi-lingiꞌ, makasuway ya agi na daru nan. Maynan uman ya utaw na walaꞌ katibulluk ya kanan anenganeng adti pagdalug kanak. Diliꞌ sakanan umbaꞌ maka-akup adti Kasakupan na Pighari-an na Tyumanem.”
ទើបបានជ្រើសរើសហើយ៖
Lukas 9: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
