Lukas 4
4
Ya pagtandaꞌ ni Satanas kan Jisus
1Na, nyatmuꞌ si Jisus na Ispiritu Santo aw pig-indegan nan ya tubig na Jordan, aw pigpa-agad sakanan na Ispiritu adti kaligbinan. 2Seled na kapatan (40) ya allaw walaꞌ sakanan kan aw gayed pigtandaꞌ ni Satanas. Aw pagkatigkas na pagpuwasa ni Jisus, to-o sakanan nyagetem.
3Aw miglong kanan si Satanas, “Kun Iseꞌ kaw na Tyumanem, na, paglonga ya manga batu ini na ma-imoꞌ pan.” 4Manang tyumubag si Jisus kanan, “Yeiy saba ya pigpasulat na Tyumanem: ‘Bekeꞌ oloꞌ na kakan ya makamataw sa utaw.’ ” #4:4 Mabasa adti Déutéronomiyo 8:3.
5Pagkatigkas yan, pigpa-agad ni Satanas si Jisus adti matas na buntud aw pigpatandaw kanan dagawdagaw ya kadég na kasakupan asini tas na lupaꞌ. 6Aw piglongan nan si Jisus, “Ikaw ya un ku atagan na katundanan magdumala sa kadég yeiy aw ya kanenggeya nilan. Kay pigtumbay da kanak ya kadég, aw mabatug ku atag adti pangkay singalan ya kaliman ku atagan. 7Yanagaw, kun magsimba kaw kanak, atag ku kanmu ya katundanan sa pagdumala sa kadég yeiy.” 8Aw tyumubag si Jisus kanan, “Pigpasulat da saba: ‘Yan ya kanmu simba͡en ya Tyumanem na kanmu Matas na Pangulu. Aw yan oloꞌ ya ka͡agadan mu.’ ” #4:8 Mabasa adti Déutéronomiyo 6:13.
9Pagkatigkas yan, pigpa-agad nan si Jisus adti syudad na Jérusalim aw pigpa-indeg nan adti katasan na Témplo aw law nan, “Kun ikaw ya Iseꞌ na Tyumanem, kawas kaw adti dalem, 10kay yeiy ya pigpasulat asini muna: ‘Sugu-un na Tyumanem adti kanmu ya kanan manga anghil na un magtameng kanmu, 11aw salu-un kaw nilan aw pangkay ya manga siki mu diliꞌ kapali-an na manga batu.’ ”#4:10-11 Mabasa adti Salmo 91:11-12. 12Aw tyumubag si Jisus, “Yeiy uman ya pigpasulat na Tyumanem: ‘Diliꞌ mu pagtanda-en ya Tyumanem na yan ya kanmu Matas na Pangulu.’ ”#4:12 Mabasa adti Déutéronomiyo 6:16.
13Pagkatigkas da na kadég na pagtandaꞌ ni Satanas kan Jisus, pig-indegan pa nan dun aw migtagad na makaselat salut magtandaꞌ kanan.
Ya pagpalekat ni Jisus migpalna-u
14Na, nyuliꞌ si Jisus adti banwa na Galiliya. Aw awun ni kanan ya katulus na Ispiritu Santo, aw nyabekkal ya dengeg nan dun ni kadakulaꞌ na palibed na banwa yan. 15Aw migpalna-u sakanan adti manga sinagoga nilan aw pigdeyen sakanan na manga utaw.
Ya pag-uliꞌ ni Jisus adti Nazarit
16Aw pagkatigkas yan, nyuliꞌ si Jisus adti lunsud na Nazarit na yan ya pigtulinan nan. Aw dun ni Allaw na Paglagdeng, nyadtu sakanan ni sinagoga, kay yan ya kanan kyanalaman. Aw nyindeg si Jisus na un magbasa sa pigpasulat na Tyumanem, 17aw pigdimil kanan ya pigsulat ni Propita Isayas. Pig-ulad ni Jisus aw kyinitaꞌ nan ya un nan basa͡en, aw pigpalekat nan ya pagbasa, law nan:
18 “Ini kanaken ya Ispiritu na Tyumanem,
kay pig-atag nan kanak ya katundanan na un magpa-edeꞌ sa Madyaw na Ubat-ubat adti manga utaw na tagituꞌ.
Pigpadala aku nan na un mag-ubat-ubat adti manga pig-allang na mabatug da silan paluwa-en.
Aw ya manga utaw na buta, kumitaꞌ da silan.
Aw ya manga utaw na pyamulayaman, paluwa-en silan.
19 Aw piglongan aku nan na pa-ede-en ya manga utaw na dyumateng da ya allaw na pakitaꞌ na Tyumanem ya kanan kallat adti manga utaw nan.”#4:18-19 Mabasa adti Isayas 61:1-2.
20Pagkatigkas ni Jisus magbasa, piglulun nan ya pigsulatan aw pig-uliꞌ nan adti magdadumala͡ay sa sinagoga, aw nyingkud sakanan. Aw ya kadég na utaw dun nyinunu kanan. 21Aw dun da si Jisus paglong kanilan, “Ya pigpasulat ini na Tyumanem asini muna, nyatuman da adun na allaw, aw pigpakanyegan da mayu.” 22Ya kadég na utaw dun migsayaꞌ kanan sa mangkadyaw na piglong nan, manang nyabelengbeleng uman silan aw mig-usip-usipay, “Endaꞌ, oloꞌ saba sakanan iseꞌ ni José?” 23Yanagaw miglong si Jisus kanilan, “Nya-edeꞌ aku na maynini ya pundinganan na un mayu paglongun kanak: ‘Kay Doktor, bulunga una ya kanmu pagka-utawun.’ Aw maglong kamu uman kanak, ‘Kay Magpalna-uway, dyengeg nami ya kadég na pigpan-imoꞌ mu adti lunsud na Kapirna-um. Na, imo-a la uman asini kanaten banwa.’ ” 24Pagkatigkas yan, miglong pa uman si Jisus kanilan, “Matinaw saba ya un ku paglongun kamayu: Walaꞌ ya propita na pagdawaten dun ni kanan banwa. 25Anenganenga mayu ya nya-imoꞌ dun ni manga allaw ni Propita Éliyas. Seled na tulungka͡umay aw tengaꞌ na walaꞌ ya ulan, awun dakulaꞌ na getem asini banwa ini. Aw awun madég na ka͡ubayan na balu dun ni manga allaw yan. 26Manang walaꞌ padala͡an na Tyumanem si Éliyas adti pangkay sambuk kanilan. Adtu baling sakanan sugu-a adti sambuk na ka͡ubayan na nyabalu na nyeyaꞌ adti Zarépta, sakup na Sidon. 27Aw awun uman madég na ibungun asini Isra-él dengan na manga allaw ni Propita Élisiyo. Manang walaꞌ ya sambuk kanilan na kyaguli-an sa ibung nilan. Si Na-aman oloꞌ na taga Sirya ya kyaguli-an.”
28Pagpakadengeg na kadég na awun ni seled na sinagoga sa piglong ni Jisus, to-o silan nyangkadaman. 29Aw nyan-indeg silan aw pigdulus nilan si Jisus aw piggakgak adti luwaꞌ na lunsud, adti ligad na pangpang na kyabetangan na lunsud nilan, kay un galu nilan tulud. 30Manang nyagi baling si Jisus dun ni tengaꞌ na kadég na manga utaw aw nyanaw da sakanan.
Ya pag-alilin ni Jisus sa busaw na syumeled adti utaw
31Aw tyumubang si Jisus adti lunsud na Kapirna-um, sakup na Galiliya. Pagdateng na Allaw na Paglagdeng, syumeled sakanan adti sinagoga aw migpalna-u sa manga utaw dun. 32Aw ya manga utaw na nyakadengeg, nya-enneng-enneng silan kay awun katulus na kanan pagpalna-u. 33Na, dun ni sinagoga awun sambuk na eseg na pigseledan na busaw. Aw miglong sakanan sa mabagseg na tingeg, 34law nan, “Kay Jisus na taga Nazarit, unu ya tud mu kanami? Unu, nyadi kaw na un pa-emel-emelen ya kadég nami? Pigkilala ta kaw! Ikaw saba ya pigpadala na Tyumanem!” 35Manang pigsagda ni Jisus ya busaw, law nan, “Katinep kaw aw luwaꞌ kaw adti kanan!” Aw pigdakdak na busaw ya utaw dun ni asdangan na kadég nilan, aw lyumuwaꞌ ya busaw adti kanan na walaꞌ ka-unu ya utaw yan. 36Ya kadég na manga utaw dun, alag silan nya-enneng-enneng. Aw migpan-usip-usipay silan, law nilan, “Unu ya palabet seiy? Kay awun katulus nan magsuguꞌ sa manga busaw aw lyumuwaꞌ silan!” 37Aw nyabekkal ya dengeg ni Jisus dun ni kadakulaꞌ na palibed na banwa yan.
Ya pagpangguliꞌ ni Jisus sa madég na utaw
38Pagkatigkas yan, nyindeg si Jisus lekat adti sinagoga, aw nyadtu sakanan ni balay ni Simon. Na, ya ugangan ni Simon na ka͡ubayan to-o migkapasuꞌ. Yanagaw nyanginayuꞌ silan kan Jisus na guli-en nan. 39Aw nyindeg si Jisus adti tampid nan, aw pigsagda nan ya kapasuꞌ, aw dayaw pig-uwasan ya ugangan ni Simon, aw maksay migbangun aw migsanggilaꞌ kanilan.
40Pagsallep da na sega, pigpandala na manga utaw adti kan Jisus ya kadég na eped nilan na kyedelan. Pangkay unu ya magkedel nilan, pigpandungan ni Jisus na kanan palad ya tagsambuksambuk kanilan aw pyangkaguli-an silan. 41Pig-alilinan nan ya manga busaw lekat adti madég na manga utaw, aw lyumuwaꞌ silan na miglong sa mabagseg na tingeg, “Ikaw ya Iseꞌ na Tyumanem!” Manang pigsagda silan ni Jisus aw walaꞌ nan tumbayan na maglong silan kay kya-ede-an nilan na si Jisus yan ya Misiyas.
Ya pag-ubat-ubat ni Jisus adti Judiya
42Sa pagkamaselem da, pig-indegan ni Jisus ya lunsud yan aw nyadtu sakanan ni kaligbinan. Manang pigpaninaw sakanan na madég na manga utaw, aw sa pagkitaꞌ nilan kanan, nyanginayuꞌ silan na diliꞌ nan silan indegan. 43Manang miglong si Jisus kanilan, “Ka-ilangan na pa-edeꞌ ku uman adti eped na manga lunsud ya Madyaw na Ubat-ubat sa Kasakupan na Pighari-an na Tyumanem, kay yan ya du-an na pigpadala aku asini.” 44Aw migpadeleg si Jisus mig-ubat-ubat adti manga sinagoga dun ni Judiya.
ទើបបានជ្រើសរើសហើយ៖
Lukas 4: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
