Utumbuli 40
40
Josepu jutapusili ndotu yaapungwa
1Masoba masokopi egapeta majambu haga, akaatumisi abeli baka bambu nkolongu juku Misili bunkosii bambu nkolongu. Akaatumisi behaba babii jojutunza inywaji nkolongu na jojujosa mabumunda nkolongu jwa akabambu nkolongu. 2Falau jayomila aka atumisi baki abeli, 3jaapungila nkati ja ngomi juku nkolongu jwikikikosi su ulonda, mu ligelesa pandu paangongiki Josepu. 4Nkolongu jwi kikosi su ulonda anhagula Josepu jaatumakiya. Nabombi babiya mu kipungu kwa masoba gingi.
5Ndienu, Ikilu jimu jojutunza inywaji nkolongu jola jojujosa mabumunda nkolongu jaka bambu akolongu juku Misili, balota ndotu mu ligelesa mola, kila ndotu jabii na mana jaki. 6Josepu pajajenda pulukela kwaabona, boa abeli babiya baabii ni usungu. 7Ndienu Josepu jalalukiya akaatumisi baka bambu nkolongu juku Misili Falau baabii mu kipungu pamu najombi nnyumba jaka bambu waki, “Mbona lelenu mbii nu usungu ngamaa?”
8Bunzibua, “Tubii nu usungu ndaba tulotiki ndotu lakini piligelesa pani ngasejubii jojuwesa kutapusili ndotu itu.” Josepu jaapwaagila, “Boo, kutapusili ndotu le nga lihengu laka Sapanga? Nala, mbwagila ndotu inu.”
9Jojutunza inywaji ansimuliya Josepu ndotu jaki, kupwaaga, “Mundotu jangu nugubona mzabibu palongi jangu, 10nagwombii wakabii ma mambandi matatu. Papapa pe etumbuli kutundulii manyoi, maua gaki gatenda kubondule na ndongutongu yaki yabiya Zabibu yeibewiki. 11Mumaboku gangu nakabii ni kikombi saka Falau, ndienu najukua zabibu, minyika mwikikombi sehesi nukumpeke Falau.”
12Josepu ampwagila ntumisi jola, “Tapusili ja ndotu jaku ndi jenze, mambandi matatu haga ndi masoba matatu. 13Egipeta masoba matatu Falau jagujua nu kugukelabuu kabee mu seu saku. Wiwesa kabee kumpeke Falau kikombi mu kuboku ngati eguhengika pamwandi pala. 14Lakini wiinyegwa majambu gaku egibiya gajenda sapi, wihengila uamboni nukunogo palongi jaka Falau, ili nhwesa kupita mu ligelesa moni. 15Ndaba nepani bandilisa kuhuma mu nndema uku Ebulania na pani pa Misili ngasendei sindu sokapi sekipalika kunyege mu ligelesa.”
16Jojujosa mabumunda jola ejabona jutapusili sapi, ampwagila Josepu, “Hata nepani nalotiki ndotu! Mu ndotu jangu natotwi itonga itatu ya mabumunda ga sapi. 17Mu kitonga sa panani, kwabii na yakula ndalindali yeajosiki kwa ndaba jaka Falau. Lakini ijuni yabiya ikula kuhuma mu kitonga se sela pamutu jangu.”
18Josepu ampwagila, “Tapusili ja ndotu jaku ndi jenze. Itonga itatu yela ndi masoba matatu. 19Egapeta masoba matatu, Falau jagujukua kuhuma mu ligelesa jiisekula mmutu waku nu kuntonga mu mpengu, nayombi ijuni ikula yega jaku.”
20Elahika lisoba la tatu lelule jabiya lisoba lukusaliwa kwaki, Falau jaandaliya tipati atumisi baki boa. Jaapia mu ligelesa jojutunza inywaji nkolonguna jojujosa mabumunda nkolongu, jaabeka palongi jaka atumisi baki. 21Ndipala ankelabukiya seu saki jojutunza inywaji nkolongu, ili ampekiya Falau kikombi kabee. 22Lakini jojujosa mabumbunda nkolongu jola antonga mu mpengu, ngati Josepu ejabiya jwaatapusili ndotu yabu. 23Lakini jojutunza inywaji nkolongu jola ngaseankombwiki Josepu.
ទើបបានជ្រើសរើសហើយ៖
Utumbuli 40: MaBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Matengo Language ©The Word for the World International and Matengo Language Translation, 2020. All rights reserved.