Utumbuli 41
41
Josepu jutapusili ndotu yaka Falau
1Eyapeta yaka ibeli, Falau jalota ndotu. Jilikolila jujemiki mulutengu ja losi lwa Naili, 2jiibona ng`ombi saba yeinyambiki na yeikendiki ihuma kulosi kula manyai. 3Kabee baada jikibona hei jiibona yengi kabee saba yeikombii nakanopi ihuma ku losi luku Naili, yahika nukujema pambipi na ng`ombi yeinyambiki yela pulutengu ja losi. 4Ng`ombi yeikombi nakanopi yela yaakula ng`ombi yengi saba yeinyambiki nu kukenda yela. Hapa Falau jajumuka mulugonu. 5Pajagonila kabee jalota mala ja pili. Jagabona mapongoo saba makolongu na gaganyambiki gatundulii mu lipei limu. 6Kabee egapeta haga, mapongoo saba gangi gagakombi na gagajomiki nu nhwai nkali gogubii na lyotu upulukoba gatenda kupiti. 7Mapongoo gagakombi saba gala gagamila mapongoo saba gaganyambiki na makolongu gala gagatweli ilebi. Ndienu, Falau pajajumuka ndi jamanya jabiya nndotu. 8Ekwahika pulukela, Falau moju waki waangajiki ngamaa, jaakema ahabi boti buku Misili na bana malangu, jaapwagila ndotu yaki, lakini nga hata jumu jojawesa kuntapusili ndotu yeheyi.
9Ndipala, jojutunza inywaji jola ampwagila Falau, “Lelenu ngomboka makosa gangu. 10Kipindi sewabiya gutei kutuyome twaatumisi baku twepani, nepani na jojujosa mabumunda nkolongu, utupungii mu ngomi ngolongu jikikundi su ulonda. 11Ikilu jimu twalota ndotu, kila jumu ndotu jaki ndalindali n maana jqaki. 12Ndienu nkombu jumu juku Ebulania ntumisi nkolongu jwiki kikundi su ulonda, jabii pamu na twepani mu ligelesa. Etunsimuliya ndotu itu, jombi jawesa kutapusili kila mundu kulengana na ndotu jaki. 13Ejatapusilia ndi ekwapitila, nepani nakelubukiya mu lihengu langu na jojujosa mabumunda nkolongu buntondika mu mpengu.”
14Ndienu, Falau jalagalakiya ankema Josepu, najombi ampia mu ligelesa nyata. Ejabiya jujomwili kumoga nu kung`anambu ingobu yaki, Josepu jahika palongi jaka Falau. 15Falau ampwagila Josepu, “Nepani notiki ndotu, lakini nga mundu jojuwesiki kundapusilia. Nyoini ulumbi waku anabugupwagi ndotu guwesa kundapusilia.”
16Josepu anzibua Falau, “Ngasemii nu uwesu hogo lakini Sapanga ngiti jugupekiya lijibu lelipalika.”
17Hapa Falau ampwagila Josepu, “Nalota ana, najemiki pulutengu ja Losi luku Naili, 18niibona ng`ombi saba yeinyambiki na yeikendiki ihuma kula manyoi nndosi. 19Hei yapwatwa na ng`ombi yengi saba yeikombi kwa namuna jejeje mu musi uku Misili. 20Ndienu, ng`ombi yeikombi ngani yela yiikula ng`ombi saba yeikendiki yeyatumbuli kupiti. 21Lakini hata eyabiya yaakuliki yeikendiki, mundu jokapi nga kuwesa kumanya iikuliki ijaki, ndaba yabiya yakona eyakombale ngati pa mwandi. Hapa najumuka mu lugonu. 22Kabee nalota ndotu jengi, nagabona mapongoo saba gaganyambiki gagatweli ilebi mu lipei limu. 23Kabee gakagula na mapongoo gangi saba matopu, gagakombii na gagajomiswi nu nhwai nkali uku lukoba. 24Mapongoo gagakombi saba gala gagamila mapongoo saba gagnyambiki. Ndienu, nepani naapwagi ahabi boti ndotu ye hei lakini nga mundu jojuwesiki kundapusilila.”
25Ndipala Josepu ampwagila Falau, “Ndotu yaku yoti tapusili jaki je jimu. Sapanga juguyekuli majambu gajihenga pambipi. 26Ng`ombi saba yeinyambiki yela ndi ipindi ya yaka saba, na mapongoo saba gala ndi kabee yaka saba, ndotu je heji tapusili jaki ndi jimu. 27Ng`ombi saba yeikombi ngamaa, yeyuye biipwata yeikendiki yela, na mapongoo saba gagakombi ngani na matopu gala na gagajomisi nu nhwai nkali uku lukoba, mana jaki je ndi yaka saba iling`ai li inzala. 28Ngati enugulandi mwa Falau, Sapanga juguyekuli majambu gajihenga kipindi sa pambipi. 29Kwibiya na yaka saba yu kuusa ilebi ingi mu nndema gwoti guku Misili. 30Lakini mwenikatai kwibiya kabee na yaka saba ili ling`ai li inzala, hata hela kutupi kola kwitenda kujeweka ngani. Ling`ai li inzala jeheji jikoma nndema goni. 31Kutupi je hoku kwiitenda kujweka ngani kwa ndaba inzala jejipwata jiibiya ingali nakanopi. 32Ndotu yaku yakelabukiya mala pabeli kwa malenganu gagalengana kugulangi ana Sapanga jutei kuamuu, najombi jwihenga lijambu heli masoba ga pambipi.”
33“Henu kupalika mwaa Falau gunhagula mundu jojubii nu umanyi na malangu, gumpekiya lihengu lukulingalii nndema gwoti guku Misili. 34Kabee, mwaa Falau, wahagula babijemaliya asokopi pani punndema, waalagalakiya akusanya pandu pu nhwanu pi ilebi yoti yuku Misili mu masoba ga yaka saba gukutupi. 35Walagalakiya bajemale behaba akusanya posu ja yaka saba yeihika kwi ilebi hingi. Ilebi heyi nu kubekwa pai ju ulongosi waku, mwaa Falau, jibiya akiba ja posu kwa misi yoti, nabombi baitunza ilebi ye heyi. 36Posu jeheji jibiya jaangatii Amisili pa liika ling'ai li inzala ja yaka saba jejihika ili bandu bupunndema biikomeka ni inzala.”
Josepu jupata seu ku Misili
37Lijambu lende lejapia Josepu labonikana kuba laamboni palongi jaka Falau na atumisi baki boa. 38Henu Falau jaalalukiya atumisi baki, “Mundu hajo jubii na mbomu jaka Sapanga. Boo, tuwesa lee kumpata jongi ngati ajojo?” 39Ndipala ampwagila Josepu, “Kwa ndaba Sapanga juguyekulii haga goti, nga mundu jongi jwana malangu na umanyi ngati wehapa. 40Wehapa ndi wewijemaliya wa nyumba jangu na bandu bangu boti bibiya pai ja amuli jaku. Nepani pena ndi nu nkolongu kupeta wehapa kwa ndaba nepani bambu nkolongu. 41Ndienu, sajenu nuguhagu kuba gunkolongu jwa nndema woti uku Misili.” 42Ndipala Falau jahula peti jaki jejibii na nembu pu lukonzi lwaki nukunhwatika Josepu, anhwatika ni ingobu yaki yeibii sapi nu ukupu wa zahabu nhingu. 43Falau ankweika mu ligali laki la pili leliutwa na palasi na alonda balonguliya palongi jaka Josepu bajamaliya nukupwaaga, “Mpega magoti!” Hela ndi Falau eampeki Josepu ulongosi nkolongu musi woti uku Misili. 44Egapeta haga, Falau ampwagila Josepu, “Nepani na Falau! Mbwaga ana, mundu jokapi mu musi gwoti guku Misili jiitondabe kuboku wala kugolu kwaki sanga kujetake wehapa.” 45Falau ampekiya Josepu liina liki Misili, Sapenati Panea. Antoguliya Asenati kamwali waka Potipela, nngolu jwa musi uku Oni. Ndienu Josepu jatumbuliya kugutembale musi woti uku Misili. 46Josepu jabii na yaka selasini pajatumbuliya kuntumaki Falau, bambu nkolongu juku Misili. Jahuma kunyumba jaka Falau nukugutembale musi woti uku Misili. 47Kwabiya mu yaka saba yukutupi yela, matui guku Misili gapia ilei ngayeyo. 48Josepu jakusanya posu yoti kipindi sa yaka saba yukutupi nu kuibeka akiba mu musi uku Misili. Kila musi jabeka akiba ja posu kuhuma mwa matui gabu gagabii pambipi na musi we hogu. 49Josepu jabeka akiba ji ilebi hingi ngani yabiya ngati nsangi gu munhanga nkolongu, wanga kupemeka.
50Kabula ja yaka saba ji inzala, Josepu jabiya jupatiki bana abeli kukunhwana mundu Asenati, kamwali waka Potipela, nngolu jwa musi uku Oni. 51Josepu ankema mwana waki ju utumbulii Manasi, japwaaga, “Sapanga junhengiki nyewaa mang`aliku gangu goti na akalongu bangu ba atati bango.” 52Mwana waki jwa pili ankema Epulaimu jaapwaaga, “Sapanga jumbeki bana mu nndema wa mang`aliku gangu.”
53Yaka saba yela nndema uku Misili yaka kupeta. 54Yatumbuliya yaka saba yi inzala yela ngati ejabiya jupwagiki Josepu pamwandi. Misi yengi yoti yabiya ni inzala, lakini musi gwoti uku Misili wabii na posu. 55Kipindi bandu buku Misili pabatumbuliya kujibona inzala, bundelila Falau jaapekiya posu. Najombi Falau jaapwagila Amisili boa, “Nnzendaninya kwaka Josepu, lejukumpwagila mwakahenga.” 56Inzala jajonzukika kuba ingali pandu poti nukuene nndema uku Misili woti. Henu Josepu jahogula ikoku yoti kila pandu, kwaalombase Amisili boti posu. 57Egapeta haga, bandu boti bupunndema kila pandu bahika ku Misili kwaka Josepu kulomba posu, ndaba inzala jabii ingali nndema gwoti.
ទើបបានជ្រើសរើសហើយ៖
Utumbuli 41: MaBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Matengo Language ©The Word for the World International and Matengo Language Translation, 2020. All rights reserved.