Utumbuli 1
1
Sapanga jubomba nndema
1Pakwatumbuliya Sapanga jabomba kunani nu nndema. 2Nndema ngasewabii ni liumbu na wabii nntopu. Lwii lwabiya luyekali masi na Mbomu waka Sapanga jabiya jujobatii panani ja masi. 3Sapanga jalagalakiya, “Unang`anu gubiya.” Unang`anu gwatenda kupiti. 4Sapanga jugubona unang`anu kuba ndi wa sapi. Ndienu Sapanga jugubaganisa unang`anu na lwii. 5Jugukema unang`anu, “Muhi” na lwii julukema “Ikilu” pakamii patenda kupeta, kwahika pulukela, lisoba lu utumbuli.
6Sapanga jalagalakiya, “Pabiya pandu panga na sindu, papabaganisa masi pandu pabeli.” 7Sapanga jalenganakia pandu panga na sindu, kugabaganisa masi gangi gabia kunani na gangi gabia pai ndi kwabiya ahelahela. 8Sapanga japakema pandu panga na sindu pala, “Anga.” Ndienu pakamii kwatenda kupeta kwahika pulukela lisoba la pili.
9Sapanga jalagalakiya, “Masi gagabii pai ja pandu pajomu pabongika pandu pamu, ili nndema wanga na sindu gupitila.” Ndi kwabiya ahelahela. 10Sapanga japakema pandu pajomu, “Nndema,” nu kubongeka kwa masi kola jugukema, “Nnhanga.” Sapanga jaabona kubii kwaamboni.
11Ndienu Sapanga jalagalakiya, “Nndema gumela mimea jejipapa imbeju, ni mikongu jejipapa matunda gagabii ni imbeju.” Kwabiya ahelahela. 12Ndienu nndema wamela mimea jejipapa imbeju kulengana na aina ju mmea, ni mikongu jejipapa matunda gagabii ni imbeju kulengana na aina ju nkongu. Sapanga jabona ndi kubi kwaamboni. 13Pakamii patenda kupeta, kwahika pulukela, lisoba la tatu.
14Sapanga jalagalakiya, “Minang`anu jibiya ku lianga jibaganisa muhi ni ikilu, jilangia ipindi, masoba na yaka, 15jinang`ana kunani nu kumulaki mu nndema.” Ndi kwabiya ahelahela. 16Henu, Sapanga jahenga minang`anu mibeli mikolongu, nkolongu gola gunang`ana muhi nu nsoku gola gunang`ana ikilu, kabee jwalaenganakia na ndondu. 17Sapanga jijibeka minang`anu heji pi lianga ili jinang`anakiya nndema, 18jiwesa kunang`ana muhi ni ikilu, nu kubaganisa unang`anu na lwii. Sapanga jabona kubi kwaamboni. 19Pakamii kwatenda kupeta, kwahika pulukela, lisoba lu nnsesi.
20Sapanga jalagalakiya, “Kubiya ni iumbi ya aina hingi yomi mmasi ni ijuni igoluka pi lianga.” 21Ndienu, Sapanga jabomba iumbi ikolongu nakanopi yu mu nhanga nkolongu na aina yoti yi iumbi yomi yeitweli mu nhanga, jabomba na aina yoti yi ijuni. Sapanga jukubona kubii kwaamboni. 22Sapanga japwaaga, “Henu kubii kwa amboni kwinu nnzenda mwakapapa nu kujonzukeka mwakatwelila mu nhanga nkolongu, nayombi ijuni ijonzukika panani ju nndema.” 23Pakamii patenda kupeta, lukela lwatenda kuhika, lisoba lu nhwanu.
24Sapanga jalagalakiya, “Nndema gupia aina yoti ji iumbi yomi, inyama yukupugwa, iumbi yeikwaba ni inyama yu mukiholi ya kila aina.” Kwabiya ahelahela. 25Ndienu, Sapanga jalenganakiya aina yoti yi inyama imwikioli, inyama yukupuga, ni iumbi yeikwaba. Sapanga jabona kubii kwaamboni.
26Ndipala, Sapanga japwaaga, “Tunndenganakiya mundu jojulengana na twepani, jojubii na sula ngati jitu, jakabiya nu uwesu panani ja homba yu mu nhanga nkolongu, ijuni yuku nani, inyama yu kupugwa, nndema joti ni iumbi yoti yeikwaba panani ju nndema.” 27Ndienu, Sapanga jaabomba bandu baalengana na mweni, ku kulengana na sula jaki jatenda kaabomba. Ku kulengana na sula jaki ammbomba mwanalomi nu mmbomba, 28Sapanga jwaapengila na kwaapwagi, “Mpapana mukajonzukika, mwakatwelila mu nndema woti, mwakalong`osa hindu yoti yu punndema. Mwakabiya na makili panani ja homba yu mu nhanga nkolongu, ijuni yu kunani ni iumbi yoti yeibii panani ju nndema.”
29Ndipala, Sapanga japwaaga, “Nnzoannya numpeki kila mmea gogupapa imbeju gogubii punndema, na kila nkongu gogupapa matunda gagabii ni imbeju, imbeju yaki au matunda gabu giibiya posu jino. 30Nayombi inyama yoti mu nndema, ijuni yoti yu kunani, iumbi yoti yeikwaba na kila kiumbi sekibii somi, posu jabu jibia manyoi na mahamba goti gi mikongu.” Kwabiya ahelahela. 31Sapanga jabona kila sindu sejukihengiki kuba ndii saamboni nakanopi. Pakamii patenda kupeta lukela lwatenda kuhika lisoba la sita.
ទើបបានជ្រើសរើសហើយ៖
Utumbuli 1: MaBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Matengo Language ©The Word for the World International and Matengo Language Translation, 2020. All rights reserved.