Romains 12
12
Gôndé wene mônongo amonvo gôéyanzéa Nzambé
1Ana aTétee nanôduka mbe: Itsani anyene na gôndé Nzambé. Mbe yôtô yanyô dibaké ga digondoku didôngani dideekedu na gôndé Nzambé asakina yangô. Gô éne émayanzéa Nzambé wa n’anyô gô ngeba yedi, tônikédé éneegeda angô na yôtôye yasô n’anyô. 2Nômbiagésangana mônongo ôvo na ésima évo n’asi tsengene. Ivô tsikéani Nzambé anôkoa matasame mbe mapengana na mane mamabaka n’anye mbeego. Vane nôngamenya éne ényôngéô Nzambé gôndé anye. Te éne éamisôba, na mane meetsimama na masapengana na matasa medi.
3Me Paul nanôongo ndongi yedi gô ngudi yamôgôô ômeetsô me na Nzambé gô ngeba yedi. Nômbiaba na nyemo gôéba n’etasa mbe: Me te môma môvôni. Môma na môma abangôé mbe ôkanee wedi te ngudiye dimeetsô angô na Nzambé gôémôétsa môtémee wetso gémôtsumé paga. 4G’ôtô amôma gôndéké éeme éyekani. Géeme na géeme na sedi gébana. 5Endé te nane. Wa n’anyô tôndé ôtô ôvo na Christ. Tôndéké éeme éyekani tômagésangana gôéduga ôtô ôvo. Na tôndé gôéyanza ngudi dipo. 6Nzambé amatôétsa môma na môma wedi môgôô te ôbiia, mbe ayanzé na angô. Okô môvo va gatse awa n’anyô andé na môgôô gôépandôéda ndongi diviga gôndé Nzambé, buedi mbe apandôédéké te gamatômu angô na Nzambé na gandé angô gébé na paga gôndé Nzambé. 7Na ône andé na môgôô gôéwedéa môkedi, awedéké. One andé na môgôô gôéékéda, eekédéké. 8One andé na môgôô gôéongô akedi ndongi, oongéké. One andé na môgôô gôékaba ôkitie wedi, akabéké na môtémedi wetso gébé na ninga. One andé na môgôô gôétôma akedi, atôméké na gétabé. Na ône andé na môgôô gôémogeda na gôéwedéa ane andé gô maguga, eendéké na gényônga.
9Etondo éndé n’anyô ébaké éagébé na buembe. Kékôani ébévee éetso. Nômbiaagana na mane mamisôba. 10Bakani n’etondo gôndé anyene gandé ana aTétee ahndé n’enyônganéô évôni. Gobedanani anyene n’anyene na gényônga. 11Yanzani na ngudi gébé na gésima sadakadaka. Yanzéani Kumu Nzambé na môtéma amôkasa. 12Tsôkéakani môténdédee ôndé n’anyô. Bibédani maguga gôéenéa éne éngayanza Kumu. Vovoni na Nzambé gédundé. 13Wedéani asi mbumu éaNzambé gô panda yaô. Keneani agenda na géneega.
14Dukani Nzambé mbe eetsa mate gôndé ane akuana anye. Nômbiaduka Nzambé môkokou, nôduka te mate matévo. 15Tsôkéakani n’ane atsôkéani. Déakani n’ane adéani. 16Bakani n’evamba anyene n’anyene. Nômbiaba na nyemo gôéabatéda anyene ivô bandani buéyé na mayanza moma abobo. Nômbianyemôga gô éodoe éanyene.
17Nômbiavénda môma ébévani gô éne ééndi angô anye ébévani. Indakani te mane mamisôba matévo gômbe oma angeena mônongoe wanyô. 18Gô gésa sanyô, ôkô mbe nôngoongôa, digaani n’oma muetso na gétabé. 19Wee yami, nômbianikéa événda ébégô édagani. Ivô nôtsika ébégôe g’ôpisa aNzambé amuene angayanza ganyôngéô angô. Matendeo MaNzambé matônigôa mbe: MeNzambé, te ône anganikéa événda ébégô édagani. Te me Kumu éanyô navéndéa anye. 20Matendeo MaNzambé moomba mbe: Okô môdudeone woo ookô nzaa, itsa angô môyakô. Okô ookô sôé, itsa angô meba. Na vane angooba na tsoyi gô mane mabévani meendi angô éwe.#12:20 Paul amagunya tsavane éamagaa mayôani. 21Nômbiasinga mbe nôtsedu n’ebéva, ivô buedi mbe anye nôtseda ébéva gô ngudi yamane mamisôba mayanzanye.
ទើបបានជ្រើសរើសហើយ៖
Romains 12: TSV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alliance Biblique du Gabon (Bible Society in Gabon) 1983
