Galatie 1
1
Ditimôgi
1Oô te me Paul nanôtendeani. One amasevoa me na amatôma me gô éyanzee édué te Jésus‐Christ na Tétedi Nzambé, ône amakundua angô g’ôwa. Gôndé oma, kaka ahngô amatôma me. 2Ana aTéta muetso ahndé éva agésangana n’ami gôétendea anye gésangô gegé, anye asi mbumu éaNzambé gô tsenge éaGalatie. Tônôtendea 3te mbe Tétasô n’anyô Nzambé na Kumu asô n’anyô Jésus‐Christ anôétsa mate medi na gétabé sedi. 4Christ amaadeekeda amuene ngu na g’ôwa gô ébévee éasô n’anyô. Te gôétôoboo na gôétôkuséda g’ôvéga ômatômuku we na tsinane éadeo noo édué éndé émayôa na mabégô mabévani. Te éne émanyôngéô Tetasô n’anyô Nzambé. 5Ondômbee wetso ôbaké gôndé Nzambé môbô na môbô, Amen.
Gôndéké te Tsangô épo éamôsôba
6Natsapéô gayavôganye égéngôgéa, na nônôtôga gôndé ône amabambéa anye gô ngeba yaChrist. Anye nôtsika Tsangône éamapanga gôéaanda nyene tsangô éamôsôba. 7Kaka mbe na gô pie gôndéké nyene Tsangô Eamôsôba. Ivô navovo nane gôébégô gôndéké oma anôyungédani gôébévéda Tsangô Eamôsôba éaChrist. 8Menyani édué. Okô muene, buéyé mbe môma buéyé mbe môsi g’ôba avigédu na Nzambé, anônigôa nyene tsangô éamôsôba épangana na éne émapanga we éékéda anye, ahngô mbe ahngadoku na gô mungu asoto. 9We tômani énôbeenda na me nanôomba énôbeenda n’atsatsee mbe, ôkô môma anônigôa nyene tsangô éamôsôba épengana n’ene émeekédu anye, angadoku na gô mungu asoto.
10?Vavovo me nane nômenya mbe me nabuta ékumédu n’oma‐a? Aé. Navovo nane te mbe nangakumédu na Nzambé. ?Nômenya mbe nabuta ényônganéô n’ôma‐a? Aé. Okô nabuti ényônganéô n’oma tambô tsaba môyanzi aChrist.
Paul amasevou na amatômu na Christ
11Ana aTéta agô mbumu éaNzambé nanôbeenda na gô pie mbe Tsangône Eamôsôba énigôa me anye édué kaka tsangô émavaka môma. 12Me tsimitsikéô na môma. Me tsimiikédu na môma. Te Jésus‐Christ amatsutsuéda me yangô.
13Anye nômookô gamabaka me gô gésôga sAjuif. Nôsabômu gamakuanaka me na génôngô asi mbumu éaNzambé. Namagényôga gôébunza ahngô. 14Me namootéa pepe akasô Ajuif, asi éongo évo n’ami gô mane magô ésôga éAjuif. Namabaka gétômbiatômbia gô mane mamatsikéô we na tétee yasô.
15Ivô Nzambé gô ngeba yedi, amasevoa me nagébaka gô ébuyi éeya. Amabambéa me gôéyanzéa angô. 16Gô étondo éedi, Nzambé amanyôngéô étsutsuéda me Muanedi Jésus te mbe nanganigôa Tsangô éedi Eamôsôba gôndé ane ahsaba gô éongo éAjuif. Gô ndéô nene me tsikeadô ne gôndé môma gôéongu ndongi. 17Tsikee buéyé na gô Jérusalem gôéena ane ahmapanga ésevou na étômu na Christ. Ivô namasuméa te keaga na gô tsenge éArabie. Vane namanika na gô môsenge aDamas. 18Vamoota éma étatô vane namakea na gô Jérusalem gôéenana na Pierre. Namadigaa n’edi nzima apitsi na pitsi ditayi. 19Tsiene muene amatômuku na Jésus, buétsé te Jacques môdimine aKumu Jésus.
20Ene énôtendea me ti na gô pie, Nzambé eena me, tsapata.
21Vane namakea na gô tsengeye éaSyrie na éaCilicie. 22Gô ndéôye dine oma aChrist, te asi mbumu éaNzambé gô tsenge éaJudée, ahmabaka madeo asiene gédimôge sami. 23Amookô te ookôgô étévo gamavovoko akaô mbe: One amakuanaka we va mbeego andé gôéékéda oma mabégô manzéa éaJésus‐Christ, mane mamabaka angô gôébunza. 24N’ahngô ahmakumédaka Nzambé gôndé me.
ទើបបានជ្រើសរើសហើយ៖
Galatie 1: TSV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alliance Biblique du Gabon (Bible Society in Gabon) 1983