II Corinthiens 13
13
Ndongine na mabégôme mamôyusumédu
1Odôô te môtôôe amôtatô ôviga me na gôndé anye. Matendeo MaNzambé matônigôa mbe: Emoni ébaé, étatô ésoongôa épata ébégô. 2Nanôkeneda, anye nômakuba mbeego gô mabégô mabévani, na gôndé anye nôsikubéni muetso. Namanôkeneda gô môtôôe wami amôbaé ômabaka me n’anye. Tsabéyee n’anye, nanôomba énôkeneda mbe vangoomba me éviga na gôndé anye, tsangadô éena môma ngeba gô mane mabévani meendangô. 3Anye nôndé na paga mbe mane mavovo me kaka ôgi aJésus‐Christ, ivô nôngeena mbe na gô pie te ôgie wedi. ?Anye nômenya mbe Christ asaba na ngudi gôndé anye‐a? Christ kaka vipôpéa gôndé anye. Amani énôtubéda ngudiye yedi. 4Na gô pie amakoga vipôpéa gôékomedu va gésumu sowa. Ivô deo noo andé na monyo gô ngudi yaNzambé. Gô évambevo éndé wa n’anyô na Christ, na wa n’anyô dôta te tôpôpéa. Ivô deo tôndé na monyo ovo n’edi gô ngudi yaNzambé. Te gô ngudiye yedi we eekédi tôtôma anye.
5Vasani gô mitémamie na kanégani anyene ôkô mbe nôndé kuanakue gô mane manyôngéô Nzambé gô nzéane éedi émeetsanye mitémamie. ?Anye nôôkô mbe Jésus andéké gô mitéma mianyô‐a? ?Na ngudi yedi dindé wangô‐a? Vakanéga anye mitémamie mianyô? ?nôéna mbe nôndé na gô pie oma aChrist‐a? 6Naténdéda mbe nôsabômu mbe me Paul nandé môma aChrist asanika ngima. 7We eekédi tôvovo na Nzambé gôndé anye mbe nôsangeenda ébégô ébévani ta n’evo. Kaka mbe nasénga we eekédie ôséngu, ivô gôétubéda mbe anye oma aChrist nôndé na ngudi yaNzambé gô mane mamisôba, buéyé mbe we eekédi tôenanôkô mbe oma asaba na ngudi. 8Tôsangoongôa ékékôa mane mapie maviga gôndé Nzambé. Tôsinga mangô te singaga gôébégô mangô meebakanéda mabégô madiboe kabaga madiia ngudi gôndé we. 9We eekédi tôtsôkéa ôpôpée wasô gômbe anye nôngaba na ngudi. Na we tôduka Nzambé mbe anye nôngatsimamédu na ngudi yedi. 10Oôdôni éne étendea me anye nagébaka gôdagôda n’anyô. Vangatsiga me na gôndé anye tsanyôngéô éyanza n’enyangee éami gôénôtsundéda na gôénôbévéda. Ivô ényangee émeetsô me na Kumu Jésus te gôénônyepeda na gôénôweseda gô nzéa éaNzambé étôkeani.
11Te nane ana aTétee n’ami, gésoo navovi. Nakôdéyi te vane. Butani édiia étsimama. Kasôgédanani anyene n’anyene. Bakani na vitoo. Digaakani gô gétabé. Na vane, étondo éaNzambé na gétabé sedi géngaba gôndé anye.
12Sambanéani anyene n’anyene na kômbô étsimama éambumu éaNzambé.
Asi mbumu éaNzambé muetso anôkômbôa.
13Te mbe mate maKumu Jésus‐Christ, na étondo éaNzambé, n’evamba éaGédidi sedi, ébaké gôndé anye muetso.
ទើបបានជ្រើសរើសហើយ៖
II Corinthiens 13: TSV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alliance Biblique du Gabon (Bible Society in Gabon) 1983