Markos 6
6
Yeesus Naazretille xinnitima
(Maatiyos 13:53-58; Luukas 4:16-30)
1Amakkeeko yedeeh lel ishi dik hi daafolle yemeete, kaa katattaynit lel adde katayen. 2Sambatah lel sunagoogedde yaydaraso erherhishe, kaa yoobbe mango mari lel tahe arhxuk cibrah raben: “Ta xiyawti tayim awlaako geye? Kayyah yomxoye kas ayim kinni? Ta gina le xayla-le abittot kaa gabadde aaginah takke? 3Tati tamaa Maryam barha kin oreena, kee Yacqoob, Yoosees, Yahuuda kee Simcoon sacal makiho? Kaa saculte talle nottaalih yanin makiho?” Amaymih usun lel kaa xineenih aaminekkah raaceenih yanin. 4Yeesus lel: “Nabii ishi dik hi daafo, ishi zamad kee ishi careeko beexinille xishma-le” akko yerhxe. 5Gaba alle hayeyaako laxuute dago mara uruseyaako bextih, amalle mangum naba abitto maabinna. 6Ten imaan waytoh lel cibrah rabe.
Aydurusuk lel diikakalle yuzuure.
Yeesus lamman kee taman fartottittiya fara
(Maatiyos 10:5-15; Luukas 9:1-6)
7Amaa lamman kee tamanah akah deecimeyaako lallammaah ten dhirhiyeh najaasa-le ufayit yayyaacoona reeza akah yoxoye. 8Ilooko bextih lel kallaaxeh: folo, lakoota, hido solaadi sinni gamaradde beyaanamko kee, 9kabel sariteenih malammit qamish hashshiite wayoona ten yeemere. 10“Akkinnan caredde orobtan gedda, tadiinindah amalle suganta. 11Akkinnan makaano sin kabbaate waytemko kee sin aabbe waynimko, tadiin gedda, tenalle shaahid takko ciloh sin ibak tane dorona alle urgufa” akko yerhxe. 12Amaymih yewcinyaako xiyaw tataabo alle tanem warroyshen. 13Mango junuun yeyyeecin, mango laxuute mara zeetih yuskutiinih lel ten urusen.
Yaythimmiqhe Yohannis raba
(Maatiyos 14:1-12; Luukas 9:7-9)
14Yeesus wari umman tiyah yimidhdhigeh yinemhi sabbatah nugus Heerodes yoobbe. Gari: “Yaythimmiqhe Yohannis rabaako uguteh yane. Amayimhi sabbatah kinni ta xayla-le abittot kayyadde akkuk yanem” yerhxin. 15Aki mari laakin: “Usuk Eliyaas kinni” yerhxin. Aki mari lel: “Usuk kalxit nobowa balih, nabii kinni” yerhxin. 16Heerodes tayim yoobbe gedda laakin: “Yohannis, anu amo akko igriceya, uguteh yane” yerhxe. 17Heerodes caskar dhirhiyeyaako, Heerodiyasah arhxuk Yohannis yibbirheh yixbishe. Ishi kaa sacal kin Filibboos numa kuuk tine hanuk tee marcishite. 18Amayim lel Yohannis Heerodesik: “Ishi sacalhi numa marcishitto koh meedda” akko arhxuk yinemhi sabbatah kinni. 19Heerodiyas nacabo aalih luuk tinemhi sabbatah, kaa tasgadafo fadhdhe. Laakin mirhiicinna. 20Amayim lel Yohannis xaqqi-wanna kee quddus kin xiyawto kinam aarhuguk yinemhi sabbatah, Heerodes akko mashshiitah kaa dhawrhak yine. Kaa waani yaabbe gedda mangum amxeesebuk yine, yakko kibah kixinuk kaa aabbuk yine.
21Heerodes ishi ubkat lellec simbilisho, ishi makaabun, caskar manabottit kee Galiilaati dikti naba marah deecime gedda caashir yemeete. 22Heerodiyasti barhä orobteh akah tirgide gedda lel Heerodes kee kaa gerha xedenishshe. Amaa nugus lel amaa barhäk: “Atu farhinnannim yi esser, anu koh axawo kiyo” akko yerhxe. 23“Yi nigsinnat abrha fanah walaa yakko, yi esserinnannim koh axawo kiyo” yerhxeh akah dhiiwite. 24Ishi lel tewceh ishi inak: “Aymih kaa essero?” akko terhxe. Ishi lel: “Yaythimmiqhe Yohannis amo” akko terhxe. 25Akkanih afitteyaako orobteh lel amaa nugusuk: “Yaythimmiqhe Yohannis amo biyattille hayteyaako inki geddalle yoh taxawo kok farha” arhxuk kaa esserte. 26Amaa nugusudde mangum adde tossoobbe, yakko kibah ishi dhiiwa kee ishi gerhahi sabbatah lel ishi miimar yathlamo mifarho. 27Akkanih lel amaa nugus wuli caskarto Yohannis amo baaho amreelih kaa fare. Usuk lel yedeeh amaa xabshedde amo akko yigriceyaako, 28kaa amo biyattille baaheh amaa barhäh yoxoye, amaa barhä lel ishi inah toxoye. 29Yohannis katattaynit tayim yoobbin gedda, yemeetinyaako kaa rashsha beyeenih qabredde hayen.
Yeesus koona shiix bettiisha
(Maatiyos 14:13-21; Luukas 9:10-17; Yohannis 6:1-14)
30 Fartottit Yeesusulle gaxeenih, inkoh abeenim kee yuydurusiinim akah warishen. 31Tamiitem kee tadiyem mangum kuuk yininyaako, beetoona gantah waqhte luuk miyiniinimhi sabbatah, usuk: “Sinni ulah dagum tacrafoonak, kata zibo kin cara fanah nedee” akko yerhxe. 32Usun lel sinni ulah jalbadde gaxeenih zibo kin cara fanah yedeyin. 33Usun aduuk ten yubleh ten yeysherheerhege mango mari, amakke fanah ibah yerdiinih umbuka daafofko tenko yookomiinih amakke gufen. 34Usuk jalbaako oobe gedda mangum mango xiyaw yuble. Loyna hin ciido balih kuuk yiniinimhi sabbatah lel mangum raxmah uluc akko xarhen. Mango xaajuj lel ten yaydaraso erherhishe. 35Baarho dhumte gedda lel kaa katattaynit alle yemeetiinih: “Ta makaano zibo kinni, baarho lel dhumteh tane. 36Ta wakalih barrit kee diikakalle yedeynih beetaanam sinneh dhaamitoonaaki ten dhirhii” akko yerhxin. 37Usuk laakin: “Beetaanam atin akah uxuwa” yerhxeh alle yedebbe. Usun lel: “Nedeeh lamma bool diinaar hi folo akah dhamneh beetoona akah naxawo?” akko yerhxin. 38Usuk lel: “Ayidhdhale kinnas litiini? Tedeynih ubula” akko yerhxe. Usun yublin gedda lel: “Koona kinnas kee lamma caasatto” yerhxin. 39Sarrah usuk inkoh filco-filcoh andharh cashsholle defeyoona ten yeemere. 40Amaymih usun bobbool kee kokkontomuh filco-filcoh defeyen. 41Koona kinnas kee lamma caasatto beyeh, agana carshedde kulux-yerhxeh dhaaco alle abeyaako amaa kinnos yigdileh amaa xiyawah yasqarraboona katattaynitille yoxoye. Amaa lamma caasatto lel umbuka tenah xazizziile. 42Usun lel inkoh beeteenih xayten. 43Amaa raace butur kee caasaako lel yemmeege lamman kee taman jambiiliya yooqhocin. 44Amaa kinnos bettem lel koona shiix labhattiya kuuk yinin.
Yeesus layet bukalle gerha
(Maatiyos 14:22-23; Yohannis 6:15-21)
45Akkanih lel amaa katattaynit jalbadde koreenih, usuk amaa mango xiyaw dhirhiyandah, yookomiinih amaa carha Beet-saydalle tabeenih akah sugoona ten yeemere. 46Amaa xiyaw sukuukuwek sarrah lel yassallaw ishi ulah koomalle yewce. 47Baarho dhumte gedda lel, amaa jalba igil fanalle tine, usuk lel ishi ulah baarholle yine. 48Xaaxatti ten nifko yinemhi sabbatah, umammaatih aduuk ten yuble. Maaxalle #6:48 Maaxalle Barti saaca 3 ko 6 fanah yane waqhte. lel igil bukalle ibah gerhak alle yemeete. Tenko tillaabo gantah farhe. 49Igil bukalle ibah gerhak kaa yublin gedda laakin, xiyawti jinnetta kaa yekkeliinih zeeren. 50Inkoh kaa yubliinih lel mangum mashshiiten. Usuk laakin akkanih aalih waanisheh: “Aydukum-erhexa, yotta kinni. Mimashshiitina” akko yerhxe. 51Usuk tenlih jalbadde koreh lel amaa xaaxatti daw-yerhxe. Usun lel mangum cibrah raben. 52Ten afcaado titrireh tinemhi sabbatah amaa kinnosti zacabah tekkem adde moobinna.
Yeesus Gennesaaretille laxuuteenit urusa
(Maatiyos 14:34-36)
53Tabeenimko sarrah lel wuli Gennesaaret baarholle yemeetiinih jalba gimamalle yicishshigin. 54Usun amaa jalbaako ooben gedda, amaa xiyaw akkanih kaa yeysherheerhegin. 55Umbuka amaa zoobälle arduk lel usuk yanem alle aabbinnanille laxutte xiyaw ten barellalalle alle baahoona erherhishen. 56Usuk alle amiitinnan dik, daafof hido barritille, laxuttem cadaagalle carhah hayenih, walaa kaa sareenah erherha dhagoona kaa dhaacimen. Dhaginnan mari lel inkoh uren.
ទើបបានជ្រើសរើសហើយ៖
Markos 6: SCC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2024 Wycliffe Ethiopia