MATHE 24
24
Noku Yhoem: Moo" Byo, Loo" Wa Khyoo: Yesu Tid
(Mar 13:1-2; Luk 21:5-6)
1Yesu gi yhoem: moo" mo doem so" thu' lo" da uri Nya: cangzoo: yi gi nya: jhang tain" re" boem wigi yhoem: joem zheing: toin" shid' boem. 2Nyang: tid «nghoid bye: zigi He: yhoem: dangain" ziri nanu" myang wa nanu" ri ngoo tid ba"- he: lug yhoem: zeing gi lug daloem: tho' moo daloem: ake" too" loo sho'- phyo' sain" khyo pyam zi shug wa nghoid.»
Yau Khe" zi Yo" Shen" Yhen Khyoo:
(Mar 13:3-13; Luk 21:7-19)
3Yesu gi zhainlun boem tho' moo zhoung: jo, da" uri cangzoo: yi gi nya: jang" moo nyangnu" kyeing" re" lho: nyangnu" myid: da" zigi «Hau: khyoo: gi kha: yo, kha u" moo bue" loo wa lha". Aseing doem gyoo" loo wa da" bidnyid yo' he: da" thang lo" da" jang" moo ce: ja: alhoo: again myang thu' loo wa lha". ngoonu" ri tid kyoo" we'» ga: zheung: myid: boem.
4Yesu phoug gi «Nanu" ri hang" we' ayo" jhu, phyo' loo" baja" zid" nyid ge'. 5Byu myoo" sho' mo, ‹Ngoo gi Meshia nghoid› ga: nga" myeing voin lho: khyoo shu" vhang: lo boem wa. 6Nanu" gi vi: mo jang" mo, Gyipui" lu dang: ri shau" gyo: lo boem wa. Nghoidloug we' agyug adain goo. He: da" khyoo: gi bui" nyang bue" loo wa zi nghoid. Nghoidloug we' mougmyid thang lo" da" ayo, gi anghoid shi. 7Damoug: yo' damoug:- mungdain: daloem: yo" daloem:- gyipui" bue" lo boem wa joyoo khyi, khang" moo" moo phang" khoug myid leig leig loo wa. 8He: da" khyoo: dangain" gi Zoo: khu: wa su:- bidnyid ju" wigi no shid" re" ziyo' dadu nyid.
9«Hau: thang: rigi nanu" ri myheig: lho: yooboo foin: dam kaid wigi said pyam wa shid re" byu yi da" lo, moo ab pyam boem wa. Nga" myeing yoomo byu dangain" mo, gi nanu" ri ngheing" loo goo" wa. 10Hau: uri byu myoo" sho' mo gi nyangnu" loem" jeung" khyoo: mo thoem: tho: leung lo" lho: dayoug vhuloem ri dayug ung" zoo: go" wigi anoug angei go" da" zi bue" loo wa nghoid. 11Hau: tho' moo gootu: mhau da" lapi: we' myoo" sho' thu' lo wigi byu myoo" sho' ri khyoo: shu" vhang: lo" boem wa. 12Akhyeing" ashoeb da" moozoo" myo: loo yoomo byu yi da" jheddab nheigloem: gi shoem: lo" byug boem wa. 13Nghoidloug we' lo" thang bidnyid ju" sho' zeung: kham: nyid su: gi khyoid yu zi shau" wa nghoid. 14He: mungdain: da" ngei bu: lu dang: ri byu bain sho' shid moo sagsi: bui" wa shid re" Mougmyid gyab' goin" kho" kyo" loo" wa zi nghoid. Hau: thang: ri mougmyid thang da" ayo, ju" loo wa zi nghoid.
Gyoug Dain' Ca" Da" Aco' Ajhoid Zi
(Mar 13:14-23; Luk 21:20-24)
15«Lapi: Daniela kho" kyoo" khare" da" ‹gyoug dain' ca" da" aco' ajhoid da"› zigi gyeungshang: da" joyoo moo yab jo, ziri nanu" myang wa.» (Mougsoug" nghab' su: se' gyoo: baja") 16«Houg: su" shau" myang da" uri Yuda mung" mo mo, gi boug gung tho' khyoo phang: lo" boem baja". 17Yhoemkhung: tho' moo nyid su: gi ziyo' yu wa shid re" yhoem: khoug: khyoo avang loo" baja". 18Khyam: yoo moo nyid su: we' nya: byisheing: yu wa ga: yhoem: khyoo aloo" loo: baja". 19Hau: da" bidnyid moo zoonu" gung ci: da" myhi' zeing yi yo"- noug" nu" shu" bang: gi soo" soo" yau: khe" da zi shau" wa nghoid. 20Nanu" cae: thu' lo" da" ayo, gi xung" thu' yo, yo"- Dougno: Bidnyid ri aeung: loo wa shid re" Mangsoo jhang akyu" mho' nyid ge'. 21Khasu" wim gari hau: da" bidnyid moo gye" gyi: da" sho" jhen yau: khe" da" bidnyid ju" loo wa. Houg: yhi' gyeing" da" koug shu: yau khe" da" bidnyid gi Moug thu' xang: poin: mo he: gu: moo byu xangsu: yi khanham we' athoung" shau" yu shi" da" jam joug nghoid. Thang: phyang" khanham we' shau" yu" lo: boem wa anghoid. 22Nghoidloug we' Mangsoo: gi hau: ayo, bidnyid ri ashoung" kaid nghoid rigi xangsu: byu yi hang" kangso' we yo" loid wa zi anghoid. Nghoidloug we' Mangsoo gi nyang: khyen: yu too" mo, shid re" hau: ayo, bidnyid ri shoung" kaid byid: wa nghoid.
23«Hau: da" ayo, moo byu dayug yug gi ‹Yu" ge' he: joyoo moo Meshia nyid› ga: wigi we' Thei: joyoo moo Meshia nyid ga: wigi we' tid lo boem ri nyang ri aloem" goo. 24Khasu" wim gari mhau' da" Meshia yo" mhau' da" Lapi: po" thu' lo lho: ge bue" rigi Mangsoo khyen: yu too" bye: mo, ri lang" khyoo yo" shu" vhang: sho'- alhoo: again mau" pho" moozoo" zeing yo"- zei: shug lo boem wa zi nghoid. 25Tam" gyoo: ge' he: da" khyoo: abue" loo shi" ri nanu" ri ngoo tid kyoo" bye.
26«Houg: yoomo gyeing" nyang: nyangnu" gi ‹Yu" ge' Meshia gi dain" pyoid yoo moo re" nyid› ga: tid boem nghoid ri nanu" athu' yhi: goo. He joyoo moo gau" nyid bye: ga tid nghoid loug we' hau: dang: ri agyo: loem" goo. 27Bid thu' shoid mo bidvang shoid ju" sho'- mougkhung: ri we dangain" bang yi loo" nhang: da:- lhab' myeig lo" yhangti"- byu da" nya: zoo: doem gyoo" lo ri we' houg: su" wim loo" wa zi nghoid.
28«Mang leung jo, da" khyi' khang" moo" moo Langda joem we' zheung: foem: boem wa nghoid.
Byu Da" Nya: Zoo: Gyoo" Loo Wa Khyoo:
(Mar 13:24-27; Luk 21:25-28)
29«Houg: te" da" gyoug dain' jam joug khyoo: bain thoug" shau" da" hau: nyid" ri Bid gi moug: coid bue" loo" khari" wa. Lham" moo" we bang loo: wa zi anghoid. Kyi" joem gi mougtho' mo byid gyoo" lo boem wa. Mougkhung: moo jo, da" yoem: so' dangain" we' nyangnu" da" khyoo" mo nain" yu: phang: lo" boem wa. 30Houg: thang: byu da" nya: zoo: gyoo" loo wa da" alhoo: again gi mougtho moo myang thu' loo: wa. Jhoem: moug" ju: lho: gyi: thang da" myo nhoo: phung" yoeb zeing yo"- Byu da" nya: zoo: gyoo" lo da" ziri mougmyid byu yi bain sho' mo lhoem: myang da" uri ngau nyid boem wa. 31Byu da" nya: zoo: gi laboo" zeing myeing: lo da" uri nya: da" moug: lagyoo: joem ri mougmyid myonhoo: myid: shoid khyoo nhang: kaid wigi Mougmyid dashoid mo zi dashoid khyoo thang sho' moo nyid da" Aseing khyen: too" mo, ri nyangnu" zeung: foem: nyid wa.
Lafoem Gam Mo Jhau" Yu Khyoo:
(Mar 13:28-31; Luk 21:29-33)
32«Lafoem gam mo he: akhyoo" daja: ri jhau" yu ge'. Hau: seig gam mo akung: ako'' nu" lo lho: afu' toid loo lang" gi zain vang khoem" ju" loo bye: ziri nanu" se' ago". 33Hau: ziyo' dakhyoo" ti"- tid kyo" lid lo da" khyoo: joem bue" lo ziri myang lang" gi nanu" da" anam, mo vang" khoem" duang moo nyang: ju" ri" bye: ziri si loo ge'. 34Ngoo nanu" ri deung" deung tid ba"- he: da moo" bain sho' gi akhid" dei nyid mo abain shid: shi" ri boin: nyid ge'. 35Mougkhung yo" myidjang: led: loo" nghoid loug we' nga" Mungdang: gi aled: loo" wa.
Hau: Ayo, Yo' Bidnyid Ri: Hang" We Asi
(Mar 13:32-37; Luk 17:26-30,34-36)
36«Houg: su" nghoid loug we' He: da" moozoo" bue" loo wa da" ayo, bidnyid rigi nga" phoo mo lid' lho: hang" we' asi- mougkhung moo nyid da" lagyoo: yi we' asi- nya: zoo: we asi. 37Noa da" bidnyid moo bue" lo ziyo' dakhyoo ti"- Byu da" nya: zoo: bidnyid moo we bue" loo wa. 38Hau: da" bidnyid moo ti: gyid ashi shi" uri Noa gyid sang phoo yhoem: moo vang lo" da" bidnyid ju" sho'- Byu yi gi zo: lho: shug lho: myi: yu loxo' lho: koid: nyid boem ago". 39Nyangnu" gi ti gyid shi, jang" moo myu: shid: doem lo" da" bidnyid ju" sho' asi aboin: loo: nyid boem ago". Byu da" nya: zoo: doem gyoo" loo wa da" bidnyid moo we' houg: yo' dakhyoo" ti"- bue" loo wa zi nghoid. 40Hau: da" ayo, ri khyam: yoomoo byu eig yug moo" zei nyid da" jang" mo- dayug ri shu" do, lo" byug lho: dayug gi deung gyo" nyid khari" wa zi nghoid. 41Lug lheing: gyeig nyid da" myiyi: zoo: eig yug mo we' dayug rigi shu" do, lo" byug lho: dayug gi deung nyid khari" wa. 42Houg: su" nghoid yoomo zed" lhid zoore" lang" nyid ge'. Nanu" da" Aseing: gi kha: yo, khakhyeing: moo gyoo" loo wa zi nanu" asi. 43Yhoem: seing: gi nya: yhoem: moo khoug" vang wa da" ayo, akhyeing: ri gyeing" gyeing" nyang: se' nghoid rigi nya: yhoem: ayo" re" khau" baid phoid loo" sho' zung" nyid wa zi anghoid la". 44Byu da" nya: zoo: gi nanu" amyid to" da" ayo, akhyeing: moo ju" ri" wa nghoid yoomo nanu" khanham we' jen" jen" koid nyid ge'.
Loem Loug Da" Deizoo Yo" Loem Aloug Da" Deizoo
(Luk 12:42-48)
45«Loem loug ziyo' phajhi" bo da" deizoo: gi hang" nghoid la". hau: yug gi nya: yhoem: seing: da" deizoo: gootu: ri vhoeb' khang" lho: ayo, ju" lang" zoo: shug thug byid: wa shid re" yhoem: seing: wigi khyen: nhang: too" su: nghoid. 46Yhoem: seing: doem ju" lo da" ayo, moo moo" loem loug zei: nyid lang" zi lo shau" myang da" deizoo: koem gi ngilho' nyid. 47Nanu" ri ngoo deung" deing tid da" zigi yhoem: seing: gi hau: da" deizoo: ri nya: zi jo, moo jo, ri yu" goin coung: vhoeb' khang" nyid wa shid re" hau: da" deizoo: ri nyheing too" zi nghoid. 48Nghoidloug we' hau: da" deizoo: gang: dayug gi nya: yhoem: seing: gi myab doem loo wa zi anghoid- myang" shi wa ga: myid nyid. 49Nya deizoo: byen cang" yi ri we' youg baid lho: yhid: shug foo" zo: mo, yo"- zo: yed' shug yed nyid uri 50Hau: thang mo hau: yug alang" nyid aboin: aso" da" da nyid moo nya: yhoem: seing: doem ju" lo wigi 51Nyang: ri eig du khyo lho: ayid void mo kham: zo: wa da:- amyen, akhyoid da" dam kham: nhang: wa nghoid. Hau: jang" moo ngoug byid' ngoug nhab' yo"- zei yang: kyeig ga: ngau nyid wa.
ទើបបានជ្រើសរើសហើយ៖
MATHE 24: LCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lacid Bible © Bible Society of Myanmar, 2009.
