Romanos 3
3
1Bey túuno', ¿ba'ax cu núumyatic jun túul Judío? ¿Wa ba'ax u ma'alobil le súutkuptajo'? 2Ya'ab, yéetel ya'ab xan u ba'ax o'olalil. yáax táanile' Jajal Diose' tu kubentaj u ma'alob péectzil ti' le judío'obo'. 3¿Ba'ale' ba'ax cu yúuchul wa dze'edzec ti'o'ob ma' tu yocsaj óolo'ob? ¿Le o'olal ma' túun dzo'ocpajal ba'ax u ya'almaj Jajal Dios? 4¡Tu jaajile' ma' beyi'! Jajal Diose' cu beetic tuláacal ba'al jaaj, quex tuláacal máac cu tuus; le Quili'ich Dzíibo' cu ya'alic: Yaan a ka'amal je'el bix jun túul máac toj ti' ba'ax ca wa'alique', yéetel yaan a jóokol tu beel le quéen p'is óolta'aquech. 5Ba'ale' wa c kasa'anil cu meyaj u ti'al u ye'esic u tojil Jajal Diose' ¿ba'ax je'el c a'alique'? ¿Ma' toj Jajal Dios tumen cu jadzico'oni'? (Táan in t'aan je'el bix u t'aan máaco'obe'.) 6¡Tu jaajile' ma' beyi'! Tumen wa ma' toj Jajal Diose', ¿bix je'el u páajtal u toj p'is óoltic yóokolcaabe'? 7Ba'ale' wa in tuus cu meyaj u ti'al u nojbe'encunta'al mas u jaajil Jajal Diose', ¿ba'axten quin p'is óolta'alo bey jun túul j kebane'? 8Wa beyo' ¿ba'axten ma' táan c beetic le kaaso' u ti'al ca taalac le utzo'? Lela' leti' cu ya'alico'ob dze'edzec máaco'ob yéetel kaakas tuucule', táan c ca'ansic to'on; ba'ale' le máaco'obo' cu najmatico'ob xot kinaj.
Tuláacalo'on yaan c si'ipil
9¿Ba'ax túun? ¿To'on judíone' asab ma'alobo'on wa ti'ob? ¡Tu jaajile' ma'! Tumen dzo'oc c e'esic ma'alobe' le judío'ob je'el bix xan le ma' judío'obo' ti' yano'ob tu yáanal u páajtalil le kebano'. 10Le Quili'ich Dzíibo' cu ya'alic: Mina'an mix máac utz, mix chéen jun túul; 11mina'an mix máac u káat na'ataj, mina'an mix máac caxantic Jajal Dios. 12tuláacal saatal u máano'ob, tuláacal dzo'oc u bino'ob ti' kastalil. Mina'an mix máac ca u beet le utzo', mina'an mix jun túuli'. 13U jool u caalo'obe' bey jun p'éel mucnal je'ekabe'; cu tuuso'ob yéetel u yaako'ob. U kaab u chi' caano'ob yaan tu chi'o'ob; 14chéen kaakas t'aano'ob yéetel ba'alo'ob káajtac cu ya'alico'ob. 15Séeba'an u yáalcab u yooco'ob u ti'al quiimsaj; 16xu'ulsaj yéetel óotzilil cu yantal je'el tu'uxac ca xi'ico'obe', 17yéetel ma' u kaj óolo'ob u bejil jéedzel óolali'. 18Mina'an u sajquilil Jajal Dios tu tuuculo'ob.
19C ojel tuláacal ba'ax cu ya'alic le úuchben a'almaj t'aano', cu ya'alic ti' le yano'ob tu yáanal le a'almaj t'aano', u ti'al ca u mac u chi' tuláacal máac, yéetel u ti'al ca yanac tuláacal u yóokolcaab tu yáanal u p'is óolal Jajal Dios: 20tumen mix máac cun dzaabil ma'alob tu táan Jajal Dios tu yo'olal tu beetilac ba'ax tu ya'alaj le a'almaj t'aano', tumen le a'almaj t'aano' cu meyaj chéen u ti'al u beetic c kaj óoltique' to'one' j kebano'on.
Le tocsajilo' cu taal tu yo'olal le ocsaj óolalo'
21Ba'ale' bejela'e', p'atbil jun tzéelil le a'almaj t'aano', Jajal Diose' dzo'oc u dzáic ojéeltbil u dzáico'on ma'alob tu táan. Lela' cu yila'al iquil u xo'ocol u dzíibilo'ob le a'almaj t'aano' yéetel le aj bóobato'obo'. 22Jajal Diose' cu dzáico'on ma'alob tu táane' tu yo'olal u ocsaj óolil Jesucristo; lela' cu beetic yéetel tuláacal le máaxo'ob cu ocsaj óolo'obo', tumen mina'an u jela'anil máac tu táan, 23tumen tuláacalo'ob dzo'oc u kebantalo'ob yéetel náach yanilo'ob ti' u nojbe'enil Jajal Dios. 24Ba'ale' Jajal Dios tu yo'olal u siibal utzile' cu dzáico'on ma'alob tu táan x ma' bo'olil, tumen dzo'oc u toquico'on tu yo'olal Cristo Jesús. 25Cristoe', tu yo'olal u quíimile', j beeta'ab u nu'uculil sa'atsaj tumen Jajal Dios. Tumen dzo'oc u tu'ubsic le úuchben kebano'obo' tu yo'olal u chowac óolal. 26J úuch xane' u ti'al u ye'esic u tojil Jajal Dios ti' le kiino'oba', u káat u ya'ale', láili' toj Jajal Diose', bey xan leti' máax dzáic ma'alob tu táane' le máaxo'ob cu yocsaj óoltico'ob Jesuso'.
27¿Ba'ax úuch túun yéetel u ca'anal ichil máac? J p'áat jun tzéelil. ¿Ba'ax o'olal? Tumen u dzo'ocbesa'al le a'almaj t'aano' je'el u taasic ca'anal ichile', ba'ale' le ocsaj óolalo' ma'. 28Dzo'oc c e'esic túune' Jajal Diose' cu dzáic ma'alob tu táane' le máax yaan ocsaj óolal ti'o', ma' tu yilic wa u mentmaj wa ma' u mentmaj le ba'ax cu ya'alic le a'almaj t'aano'.
29¿Jajal Diose' chéen wa u Jajal Dios le judío'obo'? ¿Ma' wa u Jajal Dios xan le ma' judío'obo'? Tu jaajile' u ti'al leti'ob xan, 30tumen yaan chéen jun túulili' Jajal Dios; leti' le Junab Jajal Dios cu dzáic utzil tu táano' le máaxo'ob yaan ocsaj óol ti'o'obo', ma' tu yilic wa súutkupta'ano'ob wa ma'. 31Bey túuno', ¿táan c beetic u meyaj le ocsaj óolalo' u ti'al c luksic páajtalil ti' le a'almaj t'aano'? ¡Tu jaajile' ma'! U jaajile' táan c dzáic páajtalil ti' le a'almaj t'aano'.
ទើបបានជ្រើសរើសហើយ៖
Romanos 3: YUA04
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Maya de YucatánTumben Nupt'an NT © Sociedad Bíblica de Mexico, 2004.
