Marcu 12
12
Aralji Ayinjeari
1Sh-deapoea apãrnji s-lã greascã cu parabolã: “Un om siminã unã ayinji, u anvãrligã cu gardu, adrã un loc di zdruminari aua, adrã un pirĝu trã vigljeari sh-lã-u pistipsi a niscãntsã ayinjeari sh-deapoea s-dusi diparti. 2Sh-tu chirolu a cutseariljei pitricu un sclav la ayinjearlji di loari di nãshi unã parti di auã a-ayinjiljei. 3Ma elji lu-acãtsarã, lu bãturã sh-lu turnarã cu manjili goali. 4Elu pitricu nãpoi un altu sclav, ma elji dupã tsi lu-agudirã cu chetri, lu pliguirã la cap sh-lu turnarã arushinat. 5Nãpoi pitricu ninga un altu, ma elji lu vãtãmarã. Ma nãpoi pitricu multsã altsã sh-di aeshti multsã lji-bãturã, shi alantsãlji lji-vãtãmarã. 6Lj-armasi ninga un di pitritseari: hiljilu a lui vrut. Tu soni lu pitricu sh-atsel dzãcãnda: ‘Ti hiljilu a meu va s-aibã rispect.’ 7Ma ayinjearlji dzãsirã cu un-alantu: ‘Aestu easti mushtinitorlu, s-lu vãtãmãm shi s-nã armãnã a noauã mushtinirea.’ 8Sh-lu acãtsarã, lu-vãtãmarã, sh-lu-arcarã nafoarã di ayinji. 9Tsi va s-facã domnul a-ayinjiljei? Elu va yinã sh-va s-lji chearã ayinjearlji shi ayinjea va u-da a alantsãlor. 10Ma nu u-avets cãntatã aestã scriturã: ‘Cheatra tsi masturlji u-arcarã, s-featsi cheatra a cohiljei?#12:10 Easti unã cheatrã di sus tsi u tsãni ngãrcarea a casãljei. 11Atsea easti faptã di la Domnul sh-easti unã thavmã tu ocljilji a noastri.’” 12Sh-elji cãftarã s-lu acatsã, cã achicãsirã cã elu lã avea dzãsã atsea parabolã contra a lor, ma avea fricã di multsãmea, sh-lu-alãsarã sh-fudzirã.
Plãtirea a Tãxilor
13Dupã atsea lji-pitricurã niscãntsã Farisei sh-Ierodianji tsi s-lu acãtsa tu zboari. 14Aeshti vinirã sh-lji dzãsirã: “Nvitsãtore, noi shtim cã tini eshti dealihea sh-nu ntreghi di vãrã, cã nu badzã oarã fãnirusirea a-oaminjilor, ma lã nvets calea a Dumnidzãlui dupã ndriptatea. Easti ndreptu s-plãteshti taxa a Cezarlui ama nu? Prindi s-u plãtim ama nu?” 15Ma elu, cunuscãnda ipucrizia-a lor, lã-dzãsi: “Cãtse mi bãgats tu provã? Adutsets-nji un denar tra s-lu ved!” 16Elji lji-adusirã. Shi elu lã dzãsi a lor: “A cui easti aestã fatsã sh-inscriptsea aestã?” Elji lji-dzãsirã: “A Cesarului.” 17Atumtsea Isusul apãndisi sh-lã dzãsi a lor: “Dats-lji a Cesarului atsea tsi easti a Cesarului, sh-a Dumnidzãlui atsea tsi easti a Dumnidzãlui.” Sh-elji s-ciudisirã cu nãsu.
Sadutseilji sh-Nyearea
18Deapoea vinirã niscãntsã Sadutsei tsi dzãc cã nu ari nyjeari, sh-lu ntribarã dzãcãnda: 19“Nvitsãtore, Moisul nã-alãsã scris tsi cãndu moari fratili a vãrui sh-alasi muljearea ni-fãrã cilimenji, fratili a lui prindi si-nsoarã cu veduva tra s-lji facã dupãyinitori a fratilui. 20Tora eara shapti frats, protlu si-nsurã sh-muri sh-nu alãsã cilimenji. 21U lo a doilu, ma sh-elu muri sh-nu alãsã cilimenji, tutashã sh-a treilu. 22Di shaptilji u loarã di muljeari sh-murirã, sh-nu alãsarã mushtinitori (dupãyinitori). Sh-dupã tuts muri sh-muljearea. 23La nyeari, cãndu va-s nyeadzã, muljearea a cui di nãshi va hibã ea? Cã di shapti u-avurã muljeari.” 24Isusul apãndisinda lã dsãsi a lor: “Trã atsea voi hits tu cãbati cã nu -shtits nitsi scriturili nitsi putearea a Dumnidzãlui. 25Cãndu oaminjilji va s-nyeadzã dit mortsã, nitsi va si-nsoarã, nitsi va si s-mãritã, ma va hibã ca anghilji dit tser. 26Cãt di nyearea a mortsãlor, nu avets cãntat tu cartea a Moisiului cã cum grãi Dumnidzãlu dit rudz dzãcãnda: ‘Mini escu Dumnidzãlu al Abraham, Dumnidzãlu al Isac, sh-Dumnidzãlu al Iacov.’ 27Elu nu easti Dumnidzãlu a mortsãlor, ma Dumnidzãlu a yiilor. Ashã cã voi hits tu cãbati.”
Ursirea Atsea Marea
28Sh-un di scriblji tsi avea avdzãtã zburarea a lor, achicãsinda cã elu lã avea apãndisitã ghini, s-apruche sh-lu-ntribã: “Cai easti protlu ordin di tuti?” 29Sh-Isusul apãndisi: “Protlu ordin a tutulor easti: ‘Ascultã Izrael! Domnul, Dumnidzãlu a nostru easti singur Domnu.’ 30Shi ‘S-vrei Domnul, Dumnidzãlu a tãu, cu tutã inima a ta, cu tutã suflitlu a tãu, cu tutã mintea a ta, sh-cu tutã putearea a ta!’ Aestã easti protlu ordin. 31Shi a doilu lji-undzeashti aishtui: ‘S-vrei aproapilu a tãu ca cum ti vrei tini.’ Nu ari altu ordin ma mari di aestu.” 32Shi scriblu lji dzãsi: “Ghini, nvitsãtore. Ai dzãsã dupã alihea, cã ari singur un Dumnidzã sh-nu ari vãrã altu dicãt elu. 33Shi s-vrei cu tutã inima, cu tutã mintea, cu tutã suflitlu sh-cu tutã putearea, shi s-lu vrei aproapilu ca cum ti vrei tini, ma multu di cãt scrumbatslji sh-curbãnjilji.” 34Isusul vidzãnda cã atsel eara apãndisitã cu minti, lji dsãsi: “Tini nu eshti diparti di amirãriljea a Dumnidzãlui.” Sh-vãrã altã nu cutidzea s-lu ntriba.
Hristolu, Hiljilu al David
35Sh-Isusul nvitsãnda tu templu, dsãsi: “Cum pot s-dzãc scriblji cã Hristolu easti Hiljilu al David? 36Cã mash Davidul, prit Suflitlu Sãmtu dsãsi:
‘Domnul lji-dsãsi a Domnului a meu:
“Shedz tu nandreapta a mea,
pãn-cãndu s-lji facã neamitsilji a tãlji scamnu
di cicioarili a tali.”’
37Idyiul David lu acljeami Domnu, cum poati elu s-hibã hiljilu a lui?” Sh-multsãmea lu avdza cu harauã.
Ipucrizia a Scribilor
38Sh-elu lã dsãtsea a lor tu nvitsãtura a lui: “Afirits-vã di scriblji, tsi arsescu s-imnã cu stranji lundzi shi s-lji saluteadzã prit pãdzi, 39shi s-aibã protili locuri tu sinagogã sh-protili locuri prit uspetsi. 40Elji mãcã cãsili a veduvilor shi tra si s-veadã, s-roagã multu. Elji va ljea unã giudicatã ma greauã.”
Oferta a Veduvãljei
41Isusul s-apunã nãinti di cutia a aishteariljei sh-mutrea oaminjili tsi bãga nãuntru denar, avutslji bãga nãuntru ma multu. 42Vini unã veduvã niavutã sh-bãgã doi pãradz njitsi, tsi fac un cuadrant.#12:42 Easti pãradz nicu dip, un monetu. 43Sh-Isusul lji-acljimã ucenjitsili a lui ningã nãsu sh-lã dsãsi: “Vã dzãc dealihea cã aestã veduvã niavutã ari bãgat tu cutii ma multu di tuts alantsãlji. 44Cã tuts bãgarã nãuntru dit artirizma a lor, ma ea cu ni-avearea a ljei bãgã tutã tsi avea ti bãnari.”
ទើបបានជ្រើសរើសហើយ៖
Marcu 12: BLRR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល