Marcu 10
10
Dispãrtsãrea
1Dupã tsi fudzi di aclo, Isusul s-dusi tu locurili a Iudeiljei ningã Iordan, sh-nãpoi s-adunarã anvãrliga di nãsu multsãmea. Elu nãpoi ahurhi s-lã nveatsã ashã cum eara adetea. 2Sh-Fariseilji lu bãgarã tu provã sh-lu ntribarã: “Macã ari volje bãrbatlu, s-lu alasã muljearea?” 3Sh-elu, apãndisinda, lã dzãsi a lor: “Tsi vã ari ordinatã Moisiu?” 4Elji dzãsirã: “Moisiu ari datã volji si-scrii cartea a dispãrtsãriljei shi s-alasã muljearea.” 5Sh-Isusul apãndisinda lã-dzãsi a lor: “Trã itia a nchitririljei a ininjilor a voastri elu u scrie aestu ordin. 6Ma tu apãrnjita a adãrarãljei, Dumnidzãlu adrã mascru sh-theamina. 7Trã aestã bãrbatul va alasã tatãl sh-muma sh-va si mpriuneadzã cu muljearea a lui. 8Ashã doilji va hibã un trup singur. Ashã elji nu suntu ma doi, ma un trup singur. 9Trã atsea omlu s-nu dispartã atsea tsi Dumnidzãlu ari mpriunatã!” 10Sh-la casã ucenitsilji a lui lu-ntribarã nãpoi trã aestu lucru. 11Atumtsea elu lã-dzãsi a lor: “Atsel tsi alasi muljearea a lui shi si nsoari cu unã altã, ncalcã curuna. 12Tutashã macã muljearea alasã bãrbatlu shi s-mãriti cu un altu, ncalcã curuna.”
Isusul shi Cilimenjilji
13Atumtsea lji-adusirã niscãntsã cilimenji njitsi tsi elu s-bãga mãna pri nãshi. Ma ucenitsilji lji-vãrghirã atselji tsi lji adusirã. 14Cãndu Isusul lu vidzu aestã, si nvirinã sh-lã dzãsi: “Alãsats-lji njitslji cilimenji s-yinã la mini sh-nu lji chidicats, cã a lor easti amirãriljea al Dumnidzãu. 15Dealihea ma vã dzãc cã caitsido tsi nu aproachi amirãriljea al Dumnidzãu ca un cilimean njicã, nu va intrã la nãsã.” 16Shi cum lji lo mbratsã, lji ghinicuvãntã bãgãnda mãnjili pi nãshi.
Tinirlu Avut
17Tora cãndu ma s-fãtsea etimu ti cali, ishi nãinti trãoarã un om, s-dzinuclje nãintea a lui, sh-lu-ntribã: “Nvitsãtore bun, tsi prindi s-facã tsi s-mushtinitescu bana di totãna?” 18Sh-Isusul lji-dzãsi: “Cãtse nji-dzãts bun? Vãrã nu easti bun, dicãt mash un singur, Dumnidzãlu. 19Tini li cunoshti ordinli: ‘Nu calcã curuna. Nu vatãmã. Nu fur. Nu fã mãrtirii arãdioasã. Nu arãd. Tinjisea tatãl a tãu shi muma a ta.’” 20Sh-elu apãndisinda, lji-dzãsi: “Nvitsãtore, tuti atseali mini li-am faptã di cu njic.” 21Sh-Isusul lu vidzu cu vreari sh-lji dzãsi: “Un lucru tsã lipseashti: vindã tuti tsi ai shi dã-li a niavutslor shi va s-ai unã ayishteari tu tser. Deapoea haidi, ljea crutsea sh-mi urmeadzã.” 22Sh-elu si nvirinã trã aesti zboari sh-fudzi amãros cã avea multi averi.
23Sh-Isusul dupã tsi arcã mutrita anvãrliga, lã dzãsi a ucenitsilor a lui: “Cãt greu easti trã atselji tsi au aveari s-intrã tu amirãriljea al Dumnidzãu!” 24Ucenitsilji s-ciudisirã di zboarili a lui. Iarã Isusul grãi nãpoi sh-lã dzãsi a lor: “Hilji, cãt greu easti tsi s-intrã tu amirãriljea al Dumnizdãlu [atselji tsi s-andoapirã la avearea]#10:24 Aestu stih nu s-aflã tu alti manuscrisi.. 25Easti ma lishor s-treacã pri guva a-aclui unã cãmilã dicãt s-intrã un avut tu amirãriljea al Dumnidzãu.” 26Sh-elji s-ciudisirã sh-ma multu sh-dzãtsea cu un-alantu: “Atumtsea cai poati si-ascapã?” 27Ma Isusul lã vidzu sh-dzãsi: “Aestã trã oaminjilji easti nipututã, ma nu ti Dumnidzãlu. Cã itsido easti pututã ti Dumnidzãlu.” 28Atumtsea Petru lo zborlu sh-dzãsi: “Noi alãsãm itsido sh-ti urmãm tini.” 29Isusul apãndisinda, lã-dzãsi: “Dealihea ma vã dzãc cã nu ari vãrã om tsi ari alãsat casa, fratslji, surãrli, tatãl, muma, hiljilji icã agrili trã mini sh-trã evanghelu, 30shi s-nu-ljea tora, tu aestu chiro unã sutã di ori ma multi cãsi, frats, surãri, mumi, hilji sh-agri, deadun cu avinãrili sh-tu eta alantã, tu bana eternã. 31Sh-multsã di protslji va s-hibã atselji di ma napoi, shi atselji di ma nãpoi va s-hibã protslji.”
Hiljilji al Zevedeu
32Elji eara pri cali cãtrã Ieruzalem, sh-Isusul imna nãintea a lor. Sh-elji eara trumuxits sh-lu urma cu fricã. Sh-elu lji adunã di doisprãdzatsilji nãpoi dinãparti sh-ahurhi s lã dzãcã tsi va s-lji undzeascã: 33“Noi ma nidzem cãtrã Ieruzalem shi Hiljilu a omlui va s-prida a arhipreftsilor sh-a scribilor, sh-elji va lu giudica cu moarti sh-va lu prida tu mãna a pãngãnjilor. 34Aeshti va lu pizueascã, va lu ascuchi, va lu zãpãleascã sh-va lu vatãmã, ma elu a treia dzuã va s-nyeadzã.” 35Atumtsea Iacovul sh-Ioanul, hiljilji al Zevedeu s-apruchearã la Isusul sh-lji dzãsirã: “Nvitsãtore, noi vrem tsi tini s-fats trã noi atsea tsi va-s-tsã-cãftãm.” 36Shi elu lã-dzãsi a lor: “Tsi vrets s-fac trã voi?” 37Elji lji-dsãsirã: “Alas-nã tra s-nã apunãm un di nandreapta a ta shi alantu di nastãnga a ta tu mãrirea a ta.” 38Sh-Isusul lã dzãsi a lor: “Voi nu-shtits tsi cãftats! Putets voi s-bets cupa a munduirilor tsi mini va s-beu shi s-vã pãtidzats cu atsel pãtigiuni tsi mini escu pãtidzat?” 39Elji dzãsirã: “Ie, putem.” Sh-Isusul lã dzãsi a lor: “Dealihea va s-bets atsea cupã tsi va su beu mini, sh-va-s-vã pãtidzats cu atsea pãtigiuni tsi mini escu pãtidzat, 40ma nu easti ndreptul a meu tsi s-apunã di nandreapta a mea icã di nastãnga a mea, ma easti trã atselji tsi easti adratã.” 41Sh-cãndu li avdzãra aesti, alantsã dzatsi ahurhirã s-nãrãeascã cãtrã Iacov sh-cãtrã Ioan. 42Ma Isus lã acljimã ningã nãsu sh-lã dzãsi: “Voi shtits cã atselji tsi s-acljeamã domnitor a lumiljei lji chivernisescu atselji, sh-mãrilji a lor foloseascã pristi nãshi puterea a lor, 43ma atsea nu prindi s-undzeascã namisa di voi, meti vãrã di voi tsi va s-facã mari, va s-hibã huzmichearlu a vostru. 44Sh-caitsido di voi tsi va s-hibã protlu, va s-hibã huzmichearlu a tutulor. 45Cã sh-Hiljilu a omlui nu-vini s-lji huzmitipseascã, ma s-huzmitipseascã shi s-da bana a lui ca tinjii ti arãscumpãrarea a multsãlor.”
Orbul al Ierico
46Ashãtsi agiumsirã tu Ierico. Cãndu elu ma isha di Ierico cu ucenitsilji a lui sh-cu unã multsãmi mari, hiljilu al Timaeu, Bartimeul orbu, eara apunat mardzina di cali sh-cãfta. 47Cãndu elu avdzã cã atsel tsi ma tritsea eara Isusul Nazareas, apãrnji s-aurlã shi s-dzãcã: “Isuse, Hiljilu al David, njiliua-mi!” 48Multsã lji-aurla s-pãpsea, ma elu aurla sh-ma multã: “Hiljlu al David, njiliua-mi!” 49Sh-Isusul dãnãsi sh-ordinã tra s-lu acljeamã. Elji lu acljimarã orbul, dzãcãnda: “Curaiu, scoalã-ti, elu ma ti acljeami!” 50Atumtsea elu lu-arcã nclo mantolu a lui, si-sculã sh-vini la Isus. 51Sh-Isusul lji-dzãsi: “Tsi vrei s-tsã fac mini!” Orbul lji-dzãsi: “Rabboni, s-nji-si toarnã videarea!” 52Sh-Isusus lji-dzãsi: “Imnã, pistea a ta ti vindicã!” Sh-trãoara atsilui lji si-turnã videarea shi s-nchisi pri cali dupã Isusul.
ទើបបានជ្រើសរើសហើយ៖
Marcu 10: BLRR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល