लुका 2
2
येशु ठुङवा
(मेथा १:१८-२५)
1होदी घाङला, ग्यावु केसार उगास्तोगी रोमा ग्याखाप घीरीगी मीमाङक्याला, मीङ थो ग्याप्येला का तेरपालाक। 2दे नी सीरीया युगी पो़न्पो कुरेनु हो़ती घाङला, मीबोर चुक्कीन गोमागो लाक। 3धेनी मी घीरी मीङ थो ग्याप्येला, मीरी-मीरी ग्याजाला सोवालाक।
4होझ्येरी योसेफ गालीलगी नाजारेत युने युदेयागी बेथलेहेम ॱनागीन, दावीद ग्यावुगी ग्याजाला सोवालाक घीझ्येरी ॱनाना खो दावीदगी नाङ धाङ ग्युपाने लाक। 5मीङ थो ग्याप्येला, खो खोरी ॱनामाला ॱला सासा मीरीयामला ठीक्ती सोवालाक। होदी घाङला मी़ फोवाला टु हो़तालाक। 6खुङक्या होदुरु हो़ती घाङलाराङ, मीरीयामगी टु केगीन धी़चो़ झ्युवालाक। 7धेनी मी़ भीजा धाङपोगो केवालाक। भीजागोला रे च्यीक टीरी सो़घोक नाङदु श्याक्पालाक घीझ्येरी ॱनाना खुङक्याला ॱनेचाङ ॱयारकीन माजोरपालाक।
झीउक्या धाङ नाम्खे भाङछेनक्या
8होदे युगी थाकोरला छेन्मु थाङगारु, राङगी लुक ख्युक्या ॱरुरी धेगीन झीउक्या हो़तालाक। 9धेनी चोवोगी भाङछेन च्यीक, होदेरु खुङक्याचारु ज्यावालाक धेनी को़न्क्षोकगी शीजेगी हो़क, खुङक्याई छोक श्यीला ख्याप्ती, खुङक्या ॱमीच्यीकी जीक्पालाक। 10धेनी नाम्खे भाङछेनगी खुङक्याला सुवालाक, “खेक्या माजीक घीझ्येरी ॱनाना ङा खेक्याला मी घीरीगी क्षीदु ङ्यामो घारु च्युक्कीन, ताम्शाङ च्यीक खेरती होवाहीन। 11धीरीङ दावीद ग्यावुगी ग्याजाला, खेराङक्याई क्षीदु क्याम्गो़न च्यीक ठुङदुक। खोङबा नी चोवो मास्यीकागो लाक। 12खेक्याला खोङगी ताकगो दे लाक, खेक्याई टु च्यीकला रेगी टीरी सो़घोक नाङदु ॱङ्यारी श्याकश्या ज्यागुलाक।” 13धेनी ॱहाताक्पाला होदे नाम्खे भाङछेनगो चारु, श्येम्मा ॱमीच्यीकी माङा नाम्खे भाङछेनक्या फेप्पालाक धेनी को़न्क्षोकला तो़टा तारी तो़लु दे पुवालाक,
14“थोस्योकला श्युक्कीन को़न्क्षोकला तो़टा,
धेनी जाम्बुलीङदु खोङबा थुक्ङेउ जेगीन मीक्याला श्यीदे हुङास्योक।”
15नाम्खे भाङछेनक्या नाम्खे श्यीङखामदु फेप्ती, झीउक्याई खोराङक्या घुङदु ॱनेवालाक, “होराङला चोवोगी सुङगीन लाब दे तारु धाङ होदुरु झ्युजागो तारु होराङ बेथलेहेमदु डो।” 16धेनी खुङक्या छाटाक झ्येरी सोवालाक धेनी मीरीयाम धाङ योसेफ धाङ सो़घोक नाङदु ॱङ्यारी श्याकश्या, टु भीजागोला ज्यावालाक। 17धेनी झीउक्याई टु भीजागी़ कोरला, नाम्खे भाङछेनगी सुङगीन लाबक्या घीरी खुङक्याला स्येपालाक। 18झीउक्याई ॱनेना लाब घोरकीन घीरी ॱहाङसावालाक। 19हीना मीरीयामगी होदे लाब घीरी, साम्लो तीङने तारी सेम नाङदु श्याक्पालाक। 20धेनी नाम्खे भाङछेनगी सुङगीन च्योक्रे, झीउक्याई घोर धेनी थोङ झ्येरी, खुङक्या को़न्क्षोकला शीजे धाङ तो़टा पुली-पुली लोक्पालाक।
येशु येरुसालेमदु
21टु केगीनगी श्याक्मो ग्येगोला, पाउ चेगीन ॱरोगो डुप्ती टुगी छेनला येशु ॱनेरी ताक्पालाक। दे छेनगो नाम्खे भाङछेनगी एन्दुरु मीरीयामगी फोवाला टु क्षाई घाङला ॱनावालाक।
22मोशेगी क्षो़ठीमला हो़गीन च्योक्रे, खुङक्या चाङमा झ्युङये धी़चो़ झ्युवालाक। होझ्येरी येशुगी फामाक्याई खोङबाला को़न्क्षोक चारु पुयेला, येरुसालेमदु खेरती सोवालाक। 23देगी कोरला को़न्क्षोकगी क्षो़ठीमला देरे ढीक हो़तालाक, “धाङपो केगीन टु भीजागो चोवोगी क्षीला धाम्पा चीगीलाक।” 24धेनी चोवोगी क्षो़ठीमला ढीक्टा च्योक्रे, “थीवा क्षा च्यीक याङमेना पुङमु च्यीमे ॱङी, चोवो को़न्क्षोकला पु घो़लालाक।” होझ्येरी खुङक्या होदे पुरु सोवालाक।
सीमेयोनगी येशुला ज्यावा
25धा सीमेयोन ॱनागीन मी ढाङपो धाङ को़न्क्षोकला चीगीन च्यीक येरुसालेमदु हो़तालाक। खो नी ईस्राएल्पाक्याला सेम्सो ॱनाङगीनगो फेप्ये धी़ला, घुक्ती धे हो़तालाक। धेनी धाम्पे थुक्ङी खी़मुला हो़तालाक। 26“चोवोगी मास्यीकाला ॱमाज्यागीन थुक्पे, ख्यो़ स्यीगुमालाक।” ॱनेरी, धाम्पे थुक्ङीगी खोला एन्दुरु ॱङो़न जे हो़तालाक। 27धा धाम्पे थुक्ङीने सेमस्युक जोरती, सीमेयोन क्षो़खाङ नाङदु सोवालाक। धेनी क्षो़ठीमला तेन्ती झ्यीघोये ॱरोगो झ्यीयेला, मीरीयाम धाङ योसेफगी येशुला खेरती होदुरु हो हो़तालाक। 28धेनी सीमेयोनगी टुगोला पाङदु लेन्दी को़न्क्षोकला देरे तो़पा पुवालाक,
29“धा चोवो खेराङगी का ॱनाङना च्योक्रे,
खेराङगी ॱयोक्पोला श्यीदेगी थोक्ने डोरु च्युक्रोनाङ।
30-31घीझ्येरी ॱनाना मीरीक घीरीगी दोङदु को़ जेजा,
खेराङगी थारपागोला ङी ॱमीकगी थोजुङ।
32खोङ नी याहुदापा मेन्गीनक्याई क्षीला खेराङगी थुकोङ ॱङो़न्ये धाङ,
खेराङगी मीरीक ईस्राएल्पाक्याई क्षीदु शीजे झ्युङये हो़गो लाक।”
33धेनी टुगी फामाक्या खोङगी कोरला सुङगीन, लाब दे घोरती ॱहाङसावालाक। 34धेनी सीमेयोनगी खोङ ॱङीउला झ्यीलाप ॱनाङदी, भीजी आमा मीरीयामला ॱनेवालाक, “दे भीजा दे ईस्राएलदु मी माङाला जोक्तु च्युक्ये धाङ मी माङाला क्योप्येला, को़न्क्षोकगी दामा जेपालाक। धेनी ङोलोक झ्यीगीनगी ताकगी क्षीला दामा जेपालाक। 35होझ्येरी मी माङक्षेगी सेमगी साम्लोक्या ॱङो़न्सुमदु थोङगीलाक। धेनी ख्यी़ सेम राडीगी चुक्कीन च्योक्रे दुक्कीलाक।”
हान्नागी येशुला ज्यावा
36धा आशेर ग्युपागी फानुएलगी भोमो हान्ना ॱनागीन, ॱङो़नस्येखेन ईबी ग्येमो च्यीक होदुरु हो़तालाक। मो ॱनामाला सोरी, लो धी़न थुक्पे मोरी ख्योवामुला धेबालाक। 37धेनी मो लो ग्याच्यु ग्येवी ॱलेप्कीन थुक्पे, युक्जामा झ्युवालाक। मो क्षो़खाङ भोरती ॱनामाला ॱमासोवालाक हीना ॱङ्युङनेला श्युक्ती, सोवा ग्याप्ती ङीन्घाङ-छेन्घाङ को़न्क्षोकला क्षाक्क्षो़पा पुरी धेतालाक। 38धेनी होदे घाङला हान्ना, मीरीयाम धाङ योसेफगी भोलोक्तु होरी, को़न्क्षोकला थुक्जेक्षे पुवालाक। धेनी येरुसालेमगी थारपा ॱनाङगीनगोला घुक्ती धेदा घीरीला, मी़ टुगी़ कोरला स्येपालाक।
39धेनी चोवोगी क्षो़ठीमला तेन्ती झ्यीघो़गीन ॱरो घीरी डुप्सारती, मीरीयाम धाङ योसेफ येशुला खेरती गालीलगी खोरी यु नाजारेतला लोक्ती सोवालाक। 40धेनी टुगो छारती स्युक्क्षे झ्युवालाक। खोङबा नी, स्येरापगी खावालाक धेनी को़न्क्षोकगी थुक्जे खोङबागी थोकला हो़तालाक।
टु येशु क्षो़खाङदु
41लो ढाङी, येशुगी फामाक्या येरुसालेमदु याहुदापाक्याई पेसाकगी#२:४१ को़न्क्षोकगी ईस्राएल्पाक्याला एजेपदु ढेन्योकने थारपा ॱनाङगीन धी़छेन लाक। धी़छेनला डोवालाक। 42धेनी येशु घुङलो च्युङङी ॱलेवी घाङला, होदे ॱरोला तेन्ती, खोङबाक्या धी़छेनगोला सोवालाक। 43होदे धी़छेनगो जोक्ती येशुगी फामाक्या, खोरी खीमला लोक्ती डी़ घाङला, येशु येरुसालेमदुराङ धेपालाक। हीना खोङबागी फामाक्याई होदे ॱमाछोरपालाक। 44खोङबा श्येम्मा रोवाक्याई मुलाराङ हो़टु साम्दी, खुङक्या ङीमा च्यीकगी डुगो ग्याप्पालाक। धेनी खोङबागी फामागी, खोङबाला पी़न्दा धाङ रोवाक्याई खोकला चावालाक। 45हीना खोङबाला घारुवा ॱमाङेबा, खुङक्या येशुला चारु येरुसालेमला लोक्पालाक। 46श्याक्मो सुम स्याम्ने, खुङक्याई येशुला क्षो़खाङ नाङदु याहुदापा क्षो़पो़नक्यामुला श्युक्ती, खुङक्याई लाब ङेन्दी खुङक्याला ढीवा ढीरी श्युक्कीनगो थुक्पालाक। 47ङेन्गीन घीरी, खोङबागी स्येराप धाङ खोङबागी लेनक्याला ॱहाङसावालाक। 48खोङबाला होदुरु थोरी, खोङबागी फामाक्या ॱहालेवालाक। धेनी खोङबागी युम मीरीयामगी ॱनेवालाक, “भीजाओ, ख्यो़ हेला देरे घी झ्यीदाले? तो़दाङ ख्यी़ आकी धाङ ङा ॱमीच्यीकी ॱङाङडा केरी ख्यो़ला चारी धेबी।”
49येशुगी फामाला सुवालाक, “खेक्या ङाला घीझ्येरी चालाले? ङा ङारी यापगी फोडाङदु धे घो़गीनगो, खेक्याला स्येये मेताले?” 50हीना खोङबागी लाबगी दो़न्दाकगो, खोङबागी फामागी ॱहामाघोपालाक। 51धेनी येशु फामाक्यामुला नाजारेतला लोक्ती फेप्पालाक। धेनी फामाक्याई खाला ङेन्दी श्युक्पालाक। हीना खोङबागी युमगी, दे लाब घीरी मोरी सेम नाङदु धी़री श्याक्पालाक। 52येशु को़न्क्षोकगी थुक्जे धाङ मीक्याई चीदोङ थोप्ती, स्येराप धाङ कुशुकला छारती सोवालाक।
ទើបបានជ្រើសរើសហើយ៖
लुका 2: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
