जेपा 6
6
गोठी धी़न दाम्पा
1धा होदे ङीमाक्याला, येशुला धेपा-झ्यीगीन मी माङदु-माङदु सोवालाक। हीना होदे घाङलाराङ गीरीक केक ग्याप्कीन, याहुदापाक्याई ईब्रीपा केक ग्याप्कीन याहुदापाक्याला ॱङ्योक्टा स्येबालाक घीझ्येरी ॱनाना खुङक्याई युक्जामाक्याला, ङीन्रेगी शामागी कादागो घामोमा माराक हो़तालाक। 2धा होरे झ्युरी कुछाप च्युङङीक्याई ङेने घीरीला केक तारी ॱनेवालाक, “को़न्क्षोकगी का स्येयेगो भोरती शामागी क्षीला गो यारी धेना, हीकी क्षीला घा हुङगुमालाक। 3होझ्येरी पी़न्दाक्याओ, खेराङक्या नाङने धाम्पे थुक्ङीगी खाङखा ॱनेरी स्येगीन धाङ स्येरापगी खाङखा मी धी़न दोम। धेनी हेक्या दे शामागी ची खुङक्याला ग्याप्येहीन। 4धेनी हेक्या हेरी धी़चो़ घीरी ॱमो़लाम ग्याप्ये धाङ को़न्क्षोकगी का स्येयेला तेरयेहीन।”
5कुछापक्याई ढो़ दे घीरीला घा स्येवालाक। धेनी खुङक्याई धाम्पे थुक्ङी धाङ धेपागी खाङखा, सेतेफेन धाङ फीलीप धाङ पोरोखोरु धाङ नीकानोर धाङ तीमोन धाङ पारमेना धाङ आन्तीयोक ग्याजागी नीकोला दाम्बालाक। नीकोला नी, याहुदापा क्षो़ला ग्युरग्युवा मी च्यीक लाक। 6धेनी खुङक्याई होदे मीक्याला, कुछापक्याई दोङला खेरती होवालाक। धेनी कुछापक्याई खुङक्याला ॱमो़लाम ग्याप्ती, राङगी लाक्पा खुङक्या खाला श्याक्पालाक।
7को़न्क्षोकगी का छोक घीरीला ख्याप्पालाक। धेनी चोवो येशुगी ङेनेक्या येरुसालेमदु ॱयोल्ले माङदु सोवालाक धेनी क्षो़पो़न ॱमीच्यीकी माङागीयाः, चोवो येशुला धेपा झ्येवालाक।
सेतेफेन शीम्पा
8को़न्क्षोकगी सेतेफेनला मीक्याई घुङदु यामसागीन लेगा झ्यीये धाङ ताकक्या तो़न्येला, थुक्जे धाङ नी़थु ॱनाङवालाक। 9हीना कुरेने धाङ आलेक्जेन्डीया ग्याजा धाङ कीलीकीया धाङ एशीयाने होवा, याहुदापा मी रीङगा रुप्ती सेतेफेनमुला ॱङ्योक्टा स्येवालाक। होदे याहुदापाक्या “राङवे मी” ॱनागीन छोक्खाङगी मीक्या लाक। 10हीना धाम्पे थुक्ङीगी सेतेफेनला देरे रीक्पा ॱनाङालाक। धेनी खो लाब ताङी घाङला, मीक्या खी़ खाप्टा ॱमाथोप्पालाक। 11धेनी खुङक्याई मी रीङगाला खाबा खोक्पा ग्याङदी ॱनारु च्युक्पालाक, “दे मी देगी मोशे धाङ को़न्क्षोकगी कोरला कुरवा धेप्कीन हीकी ॱहाघोरजुङ।” 12देरे झ्येरी खुङक्याई मीमाङक्या धाङ गोठीक्या धाङ क्षो़ठीमगी ॱलोपो़नक्याला लाब टुक्पालाक। धेनी खुङक्या सोरी, सेतेफेनला शीम्दी, छोक्पा क्षेरु ठीक्ती होवालाक। 13धेनी खुङक्याई शोक्चेनक्याला दोङदु ठीक्ती, हो ॱनारु च्युक्पालाक, “दे मी दे च्योई धाम्पे क्षो़खाङ धाङ मोशेगी ॱनाङना क्षो़ठीमगी ग्याप्लोकला लाब ताङी। 14घीझ्येरी ॱनाना खी़ हो ॱनागीन हीकी घोरजुङ, ‘नाजारेतगी येशुगी दे क्षो़खाङ मेताला ताङगीलाक धेनी मोशेगी ॱनाङना लुक्सो़क्यालाः ज्येगीलाक।’” 15छोक्पारु जोम्जा मी घीरी सेतेफेनला श्यीप्ता झ्येरी, तेरी धे हो़तालाक। धेनी खुङक्याई खी़ ङोदोङगो, नाम्खे भाङछेनगी श्याल च्योक्रे हो़क ग्याप्कीन थोवालाक।
ទើបបានជ្រើសរើសហើយ៖
जेपा 6: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
