जेपा 5
5
आनानीया धाङ साब्फीरा
1हीना आनानीया ॱनागीन मी च्यीक धाङ खी़ केमी साब्फीरागी, खोरी साक्याने दुबु च्यीक चोवालाक। 2होदेने होवा आलेगोने खोराङ ॱङीउ ढो़ झ्येरी, तीते च्यीक खोराङमुला श्याक्ती ल्हाक्मागो कुछापक्याला पुवालाक। 3धेनी पेटोगी ॱनेवालाक, “आनानीया, ख्यो़री सेम धी़कगी आङजाला तेरती, धाम्पे थुक्ङीमुला घीझ्येरी शोक स्येदा? सा चोचाने आले तीते च्यीक ख्यो़रीमुला घीझ्येरी बो़री श्याकआ? 4होदे सा ॱमाचो घाङला, होदे खेरीराङ लाक धेनी चोरी होदेने होवा आलेगोवाः खीकीराङ लाक। होदेने खेरी थेगीनगो तेरना, ढीक्ये हो़तालाक। घाङगी झ्येरी राङगी सेमला हुरे शोक स्येयेगी साम्लो खोरजो? खेक्याई मीमुला मालाक हीना को़न्क्षोकमुला शोक स्येवालाक।” 5होदे लाब ङेन्लुङ मेताला, आनानीया साला गेरी धेनी खी़ उप छेपालाक। दे लाब ङेन्गीन घीरी ॱमीच्यीकी जीक्पालाक। 6धेनी ख्योक्तोङक्या होरी रोगो रेगी टीवालाक धेनी फीदाला खेरती सोरी सायी होकला कुङबालाक।
7छुची सुमगी स्याम्ला, आनानीयागी केमी होदुरु होवालाक हीना मोला मोरी ख्योवा स्यीसासा लाबगो क्षा माझ्युवालाक। 8पेटोगी मोला ढीवालाक, “सा दे हो़जे घोङला राङ चोवाले? ङाला ॱनो़दाङ।”
धेनी मी़ “हो़जेला राङ चोवी” ॱनेरी ॱनेवालाक।
9पेटोगी मोला ॱनेवालाक, “चोवो को़न्क्षोकगी धाम्पे थुक्ङीला छो़ता झ्यीयेला, ख्ये ॱङीउगी घाङ झ्येरी ढो़ झ्येवा? तो़दाङ, ख्यी़ ख्योवाला बेरी हुङगीन मीक्या धान्दाराङ घोई फीला ॱलेप्दुक। खुङक्याई ख्यो़ला होझ्येरीराङ खेरती डुगीलाक।” 10धेनी लाम्साङ मो खी़ काङबा बोलोक्तु गेरी, मी़ उप क्षेपालाक। धेनी ख्योक्तोङक्या नाङला होरी मो स्यीगीन थोरी, फीला खेरपालाक धेनी मी़ ख्योवा बोलोक्तु कुङबालाक। 11धेनी क्षो़छोकगी मी घीरी धाङ दे लाब ॱहाघोरकीन घीरीला ॱमीच्यीकी जीक्टा झ्युवालाक।
कुछापक्याने नाजा चो़गा
12धा मीक्याई खोक्दु ॱमीच्यीकी ॱहाङसागीन लेगाक्या धाङ ताकक्या, कुछापक्याने झ्युङी हो़तालाक। धेनी धेपा-झ्यीगीन घीरी सोलोमोनगी ॱयाक्कुरु जोमालाक। 13धेपा-मीझ्यीगीनक्या, खुङक्यामुला थुक्येला जीक्टा झ्यीदालाक घीहीन्ना खुङक्याई धेपा-झ्यीगीनक्याला घुस्याप झ्यीदालाक। 14धेनी चोवोला धेपा-झ्यीगीन केवे-भु धाङ भोमो ॱङीगारा ॱयोल्ले माङदु सोवालाक। 15धेनी पेटो डी़ घाङला, खी़ ढीम्जाक च्यीगा फोक्ना डाक्हु ॱनेरी, खुङक्याई रेवा झ्येरी मीक्याई नेपाक्याला ङ्याजेमुलाराङ, खेरती होरी ॱराङगाकला ॱङ्यारी श्यालाक। 16धेनी येरुसालेमगी ॱये-ॱयो़नगी ग्याजाक्यानेः मी ॱमीच्यीकी माङागी नेपाक्या धाङ ॱनो़पा जुजा मीक्या घीरी, ठीक्ती होवालाक धेनी होदे घीरी चो़गा झ्युवालाक।
कुछापक्याला दुक्पु तावा
17धेनी चो क्षो़पो़न धाङ खी़मुला हो़गीन सादुकीपा घीरीगी, कुछापक्याला ठादोक झ्येवालाक। 18धेनी खुङक्याला शीम्दी आटाला धाक्पालाक। 19हीना चोवोगी भाङछेन च्यीक छेन्मो फेप्ती, आटागी घोगो पेवालाक धेनी कुछापक्याला फीला तो़न्दी सुवालाक, 20“क्षो़खाङक्याला सोरी मीक्याला दे मीछे साबागी लाब घीरी स्ये।” 21कुछापक्याई होदे लाब ङेन्दी, ॱङारोक ॱङात्ती क्षो़खाङ नाङदु सोरी क्षो़ स्येपालाक।
धेनी चो क्षो़पो़न धाङ खी़ रोवा ईस्राएल्पाक्याई, गोठी घीरीला छोक्पा क्षेरु भो़वालाक। धेनी खुङक्याई कुछापक्याला आटाने ठीक्ती हुङयेला मीक्या झावालाक। 22हीना होदे मीक्याई, खुङक्याला आटा नाङदु ॱमाङेबालाक धेनी लोक्ती होरी ॱनेवालाक, 23“हेक्याई आटागी घोला घोजा ग्यापक्या धाङ घोरेक्या होदुरु लारी धेदा थोजुङ हीना घो पेरी ती घाङला नाङदु सुवा ॱमाङेजुङ।” 24लाब दे घोरती, क्षो़खाङगी घोरेक्याई चो धाङ क्षो़पो़न क्षेक्या गो थोम्बालाक धेनी घी झ्युवा हीन्ढु ॱनेरी ॱहालेवालाक।
25हीना मी च्यीक होरी खुङक्याला ॱनेवालाक, “तो़दाङ, खेराङक्याई आटाला धाक्ता मीक्या नी, क्षो़खाङदु लारी मीक्याला क्षो़ स्येदी धेदुक।” 26धेनी ॱमाक्मीक्यामुला ग्यापो़नक्या सोरी, खुङक्याला घीन्दा माझ्येवा ठीक्ती होवालाक घीझ्येरी ॱनाना मीक्याई खुङक्याला धोगोङ श्युरटु ॱनेरी खुङक्या जीक्पालाक।
27खुङक्याई कुछापक्याला छोक्पा क्षेगी दोङदु ॱलारी, चो क्षो़पो़नगी खुङक्याला ढीवालाक, 28“हेक्याई खेक्याला येशुगी मीङने क्षो़ ॱमास्ये ॱनेरी, का तेरपा माले? हीना खेक्याई खेरी क्षो़क्या येरुसालेम घीरीला टाम्सादुक। धेनी होदे मीगी ठाकगी क्यो़नगो हेला चुक्ये झ्यीदीक।”
29धेनी पेटो धाङ कुछापक्याई ॱनेवालाक, “हेक्या मीक्याई मालाक हीना को़न्क्षोकगी का चीलालाक। 30खेराङक्याई ग्याङस्यीङ खाला शेर ग्याप्ती सेसा येशुला, हीकी धाङबी फामाक्याई चीगीन को़न्क्षोकगी याङ सो़न्पो श्याङ जेपालाक। 31ईस्राएलगी मीरीकक्याई राङगी धीक्पा पारी सेम ग्युरवा ताङये धाङ खुङक्याई धीक्पाक्याला घोयाङ ॱनाङयेगी क्षीला, को़न्क्षोकगी खोङला गोठी धाङ क्योप्खेन को़वा जेदी राङगी क्षाक ये स्योकला श्याक जेपालाक। 32हेक्या दे लाबक्याई पाङपो हीन धेनी को़न्क्षोकगी राङगी काला ङेन्गीनक्याला ॱनाङना, धाम्पे थुक्ङीगीयाः दे लाबक्याई पाङपो तो़न्दा जेदुक।”
33धेनी दे लाबगो ङेन्दी होदुरु जोम्जा गोठीक्या ॱमीच्यीकी श्येताङ लारी, कुछापक्याला सेङी दो़पालाक। 34हीना गामालीएल ॱनागीन फारुसीपा मी च्यीक छोक्पा घुङदु लारी, कुछापक्याला तीते च्यीक फीला झावालाक। खो मी घीरीगी चीगीन क्षो़ठीमगी ॱलोपो़न लाक। 35धेनी खी़ होदुरु हो़गीनक्याला ॱनेवालाक, “ईस्राएल्पाक्याओ, खेराङक्याई खुङक्याला घी झ्यीना होदेला च्याङजे झ्यी। 36धी़ च्यीकला थेहुदा ॱनागीन मी च्यीक राङ-राङला मी खाक्क्षे च्यीक हीन ॱनेरी होवालाक। धेनी मी श्यीपग्या चो़ खी़ स्याबाला डावालाक। हीना खोला सेपालाक धेनी खी़ स्याम्ला डागीन घीरी ठेथोरी सोरी, खी़ लेगा घीरी मेताला सोवालाक। 37होदे श्युकला मीबोर थो ग्याई घाङला, गालीलगी युदा ॱनागीन मी च्यीक होवालाक। खी़ स्याबाला मी ॱमीच्यीकी माङा डावालाक हीना खोवा सेजुङ धेनी खी़ स्याबाला डागीनक्या ठेथोरे लाजुङ। 38होझ्येरी धान्दा ङा खेराङक्याला ॱनाहीन, दे मीक्याई झ्यी़दोक मीझ्यीदा, खोराङक्याई क्षो़ला भोरस्योक। देक्याई लेगा दे मीने हीन्ना, होदे लेगा डुप्कीमालाक। 39हीना दे लेगा दे को़न्क्षोकने होवा हीन्ना, खेराङक्याई खुङक्याला काक थुक्कीमालाक। याङमेना खेराङक्याराङ को़न्क्षोकला ङोलोक झ्यीघो़ थुक्कुलाक।”
40धेनी खुङ घीरी खी़ ॱनागीनला ङेन्बालाक। खुङक्याई कुछापक्याला नाङदु केक तारी ताजाक श्युरती, येशुगी छेनने धाब्ले लाबक्या ॱमास्ये ॱनेरी झावालाक। 41येशुगी छेनगी क्षीला दुक्पु ङ्याङरीन खाये हो़गीन, को़न्क्षोकगी खुङक्याला ॱनाङजुङ ॱनेरी ङ्यामो घी-घी, खुङक्या होदे छोक्पा क्षेने लोक्ती सोवालाक। 42होदे स्याम्ने खुङक्या श्याक्मो डाङी, क्षो़खाङक्या धाङ नाङ-नाङला सोरी येशुराङ मास्यीका हीन ॱनागीन ताम्शाङगो, ॱलाप्ये धाङ स्येयेला नामा छाम माश्याक्पालाक।
ទើបបានជ្រើសរើសហើយ៖
जेपा 5: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
