kurinṯuuz aṯ ṯaani 11
11
aza 11
1nyi kwunaŋna ŋaŋwuzi eḏefrinji nyuŋwu eḏi zi andaci ŋɔkwɔ ŋir ŋiḏyaki. aḏri, niŋnacenyi ṯi! 2nyi kweḏi ṯiroca daŋgal-na, kaka kitaḏi ŋazi gwu eḏi Kwruztu eḏorɔ luŋwun, eḏi ketize ŋaŋwuzi kaka kiŋaɽu kete kizuɽu nana cucuɽic, keṯir inḏeḏa kwulen kwutuput dak. 3lakin nyi ŋgwu kwuṯinya, kaka keɽinje gwu kumow hawaŋw lu array yi wuŋwun, a ṯireca ṯalu yey lu ilaḏaluŋw, mindaŋ ma ṯuzi ṯamɽa ṯalu ṯir rerem ṯutuput ṯinḏi ŋa ṯi eḏamɽi Kwruztuŋw. 4kaka muŋw ila kwete, muŋw zi andaci ŋeḏi Yecu kwir ter eḏi ŋgwu la ṯafa ŋa, ya ma afi ṯigɽima ṯiṯimḏina eḏi kḏa la ṯafa ŋa, ya ma emni ŋiɽaŋali ŋizaw ŋiṯimḏina eḏi ŋa la ŋemnicaŋazi, nezi ta emni kwucuṯ. 5nyi kwaruŋw, nyi kwende kwiri kwɔkwɽeny eḏi yafur la kyu yiṯemḏelu. 6menyi kinna eni kwiti kwizaw kandiza mac, lakin nyi ṯa eni kwizaw ṯilŋiiḏina ṯi; na kwɔmne-na tatap ner ŋazi gi ruwenizelu ŋu, ŋiɽaŋal ŋi ndendeṯ.
7ŋimenyjerri ŋiki a, menyi ejilini ki rɔgwɽɔ mindaŋ eḏi ma eni ŋaŋa limerzi iŋni, kaka ma ŋazi gwu andaci ŋiɽaŋali ŋizaw ŋir injiil weḏi Allah ŋiira ujra-na ḏuṯ? 8nenyi ketize yaniiza yiḏaḏu ṯibir, nenyji uṯaḏa kwuruuza kweŋen eḏorɔ kweḏi ŋɔḏɽor ŋalu. 9na menyi nani ŋaŋa li, menyi kwɔmne iiraci, nenyi ere allaci kwizi kwere ṯofi mac, kaka kwɔmne kwunaŋna nyi, nenyi lieŋgeri inḏeḏa limila makḏunya. ṯaŋwu nenyi derne eḏallaci ŋaŋwuzi ṯofi tay ṯi tere, enyi derne keni tɔk. 10kaka nani gwu ŋirlalu ŋeḏi Kwruztu duŋgwinyi-na, er ere nəni tugwup mac ṯellina tinyi kḏu, kezir nana weḏi akayaŋw. 11na aḏri pa? kaka iti amɽa ŋazi gwu manya? Allah wilŋiicanyi rac, nyi kweṯi ŋazi amɽi! 12na ŋa ŋeṯinyjerri enyji errizeza dɔk, mindaŋ eḏi eɽineḏa ŋiɽaŋali lu kiṯay ŋeḏi kla linaŋna eḏi zi andaci, ki ṯellineḏa nana ṯeḏi ŋafur ŋeŋen, eḏaruŋw, leṯaki ŋɔḏɽor kaka ŋeri. 13lor lir kaka ṯa klu liri yafur yir ləluŋ, liri lɔḏɽor leṯi zi kekeɽinjelu, leṯi ṯecini eḏorɔ kaka yafur yeḏi Kwruztu ŋidiny. 14eṯi liŋɽu mac ŋiɽaŋal ŋi ŋu, kaka eṯi gwu zeyṯaan ṯecini keni ŋundu ŋidiny eḏorɔ kaka maleyka kweḏi fori. 15ṯaŋwu, ŋende ŋiri ŋiliŋɽaza ma yaḏaam yuŋwun tɔk ṯecini eḏorɔ kaka yaḏaam yeḏi ṯofḏana ŋidiny. er afi kwɔmne kwowḏizi nana.
buuluz-ŋa lizi li leṯi upupaḏa lu
16nyi kwaruŋw kwokwony, eṯuŋw ari kwere mac, nyi kwiḏiki; lakin ma kinna aruŋw, er nyi ṯa emni ŋwu kwiḏiki, mindaŋ enyi ma ellini nyi tɔk kwɔkwɔ. 17(ŋu ŋandizanyji, ŋiti ŋandizanyji zulṯa gi kweḏi Kweleny mac, lakin kaka kwete kwiḏiki, ki ṯellineḏa-na kḏu; 18kaka eṯi gwu lizi luru ellilini ki rɔgwɽɔ kwɔmne gi kweḏi ṯurmun, e ta enyi ellini nyi tɔk.) 19kaka eṯi gwu amina eḏi zi indinyana nana leni liḏiki, ur ŋa gwu lifirli ki! 20kaka eṯi zi gwu indinyana nana ma ŋazi kwizi ruzi luway, ya muŋw ye ŋaŋwuzi, ya muŋw ajilazi ŋaŋwuzi, ya muŋw piŋi rɔgwɽɔ, ya muŋw ipii ŋaŋwuzi kiyeyna. 21ṯurony ṯimenyi miḏa, nenyaruŋw, nyiŋa lajila beṯen eḏi zi erri ŋu!
buuluz muŋw nani kezir wir ŋiɽany
lakin kwɔmne kwere kweṯi gi kwizi bonye eḏi gi ellini—nyi ŋgwu kwandiza kaka kwete kwiḏiki—nenyi, enyi bonye eḏi gi ellini tɔk, ṯa ŋwu. 22liri yahuuḏ leni libraani? nenyi orɔ nyi tɔk. liri lizrayiil? nenyi orɔ nyi tɔk. liri ŋelŋe ŋeḏi ibrahiim? nenyi orɔ nyi tɔk. 23liri yaḏaam yeḏi Kwruztu? nenyi orɔ kete kiṯemḏelu—nyi ŋgwu kwandiza kaka kwor kwumorle ṯugwori—ŋɔḏɽor ŋi ŋiṯemḏelu ŋitezir ŋeni ŋinyi, ki zijin-na nyamin-na nyiṯemḏelu, ner ipii nyuŋwu zɔṯ gi nyamin-na caw caw, nenyi nanje ŋiɽany ketok nyamin-na nyuru. 24nyamin-na ṯuḏni nenyafi ki rii-na reḏi yahuuḏ jelḏa ruɽi-riɽen nuŋw balalu kwete. 25nyamin-na tɔɽɔl ner nyipii nyimor nyi; lamin lete ner nyaci yal yi. nyamin-na tɔɽɔl nenyi faluuka kiyaḏa ŋaw-na; nenyi nani kuluŋa kete na aŋwun wete ŋaw-na ŋir tujul; 26nenyi ireri nyamin-na nyuru, kezir wir ŋiɽany kiiru-na, kezir wir ŋiɽany ki loɽam-na, kezir wir ŋiɽany ki lizi-na linyi, kezir wir ŋiɽany ki lizi-na lir umam, kezir wir ŋiɽany ki meḏiina-na, kezir wir ŋiɽany kwuḏer-na, kezir wir ŋiɽany ki tujul-na, kezir wir ŋiɽany ki lumat-na lir ŋidiny; 27ki ŋɔḏɽor-na ŋifirli teter, na ki ŋiɽaŋal-na ŋirara ṯeṯec; yuluŋa yitezir nyi kwunani yey yi lu, yaŋwu yi na owḏa yi, kwiira eḏneya-na nyamin nyuru; kwunani kurun gi na kwiira yireṯ-na tɔk. 28na, ŋimenyji kiɽeziza kwɔmne nana ŋgwu tatap nenyeḏi ṯofi duŋgwinyi la ŋwamin tatap ṯeḏi taŋrica ṯeḏi yaniiza tatap. 29kwere kwajila ta, enyere ajili nyi tɔk manya? kwere kwumer ṯugwudazi eḏizerri ŋiki ta, enyere eḏizi ŋarriny manya?
30mer orɔ ŋeḏi ṯellina, enyi ellini kwɔmne gi kweṯi ruwezi ṯajila lu tinyi. 31Allah, wir Papa kweḏi Kweleny kweni Yecu, wunde wiri weṯortani dɔk dɔk, wilŋiiḏi eḏaruŋw, nyi kwiti kweṯi kəki ŋəluŋi mac. 32nani nyi dimizga, na muḏiir, kwunanu ŋeleny-na ŋeḏi aarṯuz, kete laŋɽa eḏi karni meḏiina kweni dimizga teter mindaŋ eŋgir nyi miḏa, 33lakin ner nyi oɽazalu ki ŋiɽamu-na ner nyi dəpa lufɽu li leḏi ṯilaŋgwu, nenyi kilaḏa ki rii-na ruŋwun.
ទើបបានជ្រើសរើសហើយ៖
kurinṯuuz aṯ ṯaani 11: KIB1967
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuba, Koalib Ngirere New Testament © First published by the British and Foreign Bible Society in Khartoum in 1967.