kurinṯuuz aṯ ṯaani 10
10
aza 10
buuluz muŋw aruŋw, zulṯa kwuŋwun kweṯila nani gwu Allah
1nyi kweni buuluz kwuturecaŋazi lu tur, ṯejilina ṯi na ŋiɽena ŋi ŋeḏi Kwruztu, laruŋwa: kweṯejilini ki rɔgwɽɔ mer iziḏizi kiyeyna ŋaŋa li, lakin kweṯi ŋazi andaci kandiza kifirli ma ŋazi gwu ere nani-na mac! 2nyi kwutureci ŋaŋwuzi lu tur, mindaŋ menyi nani nani ŋa gwu, ŋazi ere andaci ŋiɽaŋali ŋifirli mac, kaka kitaḏa nyi gwu eḏi zi andaci kla leṯaruŋw, ŋeṯinyji erri nyiŋa kaka eṯir zi gwu leḏi ṯurmun erri. 3na nani nyi kinna ki ṯurmun-na, eṯi nyi ere ṯugwuḏi mac kaka eṯir gwu ṯugwuḏi leḏi ṯurmun, 4kaka eṯi gwu kwɔmne kweri kweḏi ṯuwən, kweṯi nyi gi ṯugwuḏi, ere orɔ kweḏi ṯurmun mac, lakin kweḏi ŋuma ŋeḏi Allah eḏi kiyazi ŋwufeɽera lu. 5eṯi nyi kiyazi ṯupupaḏa lu, na kwɔmne kwete nyiḏak kweṯir piŋi eḏi ṯinyini ṯilŋiiḏina ṯeḏi Allah; eṯi nyi ummumi ṯireca yey lu tatap eḏi inyizi Kwruztuŋw nana. 6nyiŋa linanalu cugwɔ-cugwɔp eḏi hakwumi ŋudurlaḏu tatap, ma eḏi ŋaŋa ṯinyiza nana ṯir minmin.
7izarzi ṯi ŋinani ki yey-na yalu. muŋw eḏi kwere ṯugwor-na eḏaruŋw, nyi kweḏi Kwruztu kwiri, eḏuŋw elŋece ŋwu ki rɔgwɽɔ ruŋwun eḏaruŋw, urŋw gwu kweḏi Kwruztu, na nyiŋa tɔk leḏi Kwruztu liri. 8eŋgi nyi kinna ellini ṯellina ṯi ṯiṯemḏelu zulṯa gi kweri, kwinḏeḏanyi Kweleny eḏi kikindezi ŋaŋwuzi, kwiti kwiri eḏi kirazi ŋaŋwuzi lu mac, eŋgi nyi ṯurony ere miḏa mac. 9nenyi ere orɔ kaka eṯi nyi gwu naŋni eḏi ketize ŋaŋwuzi ŋiḏenya mac juwab gi. 10kaka arir gwu ŋwu: kweṯuza juwaba kwufirli ŋiɽaŋali, lakin kwir aŋna nuŋw eni kwajila cige-cigep, na kandiza kuŋwun ere eḏi fayḏa mac. 11eḏi lizi lir ṯa ŋwu elŋece eḏaruŋw, ŋa ŋeṯinyji andazi juwab gi, iti nani nyi gwu mac, ŋinderṯa ŋeṯinyji erri nani nyi gwu ŋaŋa li. 12nyiŋa lende linḏi eḏi ṯeci eḏi biɽḏi rɔgwɽɔ-na reri lizi li, kla lɔkwɔ leṯiɽi rɔgwɽɔ-na reŋen, lakin mer ṯeciḏizi rɔgwɽɔ-na reŋen wuɽe-wuɽeny, mer izazi ki rɔgwɽɔ reŋen ter ter, ner zi ere elŋe ŋere mac.
13lakin nyiŋa liti linḏi eḏellini ṯellina ṯi ṯiṯemḏelu mac, lakin nyiŋa limiḏi amra weḏi ŋɔḏɽor ŋimenyji Allah inḏeḏa mindaŋ menyi upaḏa daŋgal-na tɔk. 14nyiŋa liti klu liṯemize rɔgwɽɔ lu reri mac kaka iti menyi gwu upaḏa daŋgal-na mac; nyiŋa liri liŋna eḏupaḏa daŋgal-na ki ṯay ṯolana ŋiɽaŋal ŋi ŋizaw ŋeḏi Kwruztu. 15nyiŋa liti leṯellini ṯellina ṯi ṯiṯemḏelu mac, ki ŋɔḏɽor-na ŋeḏi lizi lir ter; lakin ṯəkiza ṯeri kizen ṯiri kḏu, ṯenuŋw, ma ṯəmna ṯalu kindeḏi enyi eḏi ŋuma eḏi kwe ŋwola kezir wolana, 16mindaŋ menyi andazi ŋiɽaŋali ŋizaw ŋir injiil kezir wunanizaŋazi ṯoɽu ṯi la. nyiŋa liti lellineḏi ŋɔḏɽor nana mac ŋimerzi ratazi ki ṯuruny-na ṯeḏi kwir ter. 17efrinjer ŋgwa kweṯellini, eḏuŋw ellini ŋiɽaŋal ŋi ŋeḏi Kweleny. 18kaka eṯir ere emnizi kwizi mac kweṯi iɽi rɔgwɽɔ-na ruŋwun, lakin ŋgwa kweṯi Kweleny iɽi-na.
ទើបបានជ្រើសរើសហើយ៖
kurinṯuuz aṯ ṯaani 10: KIB1967
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuba, Koalib Ngirere New Testament © First published by the British and Foreign Bible Society in Khartoum in 1967.