Johani 11
11
Kufa kwa Lazaro
1Mukwerume o dithzina dyo Lazaro shime a korire. Shime a tungire mu Betania nandumbuthzenthzi a Madiya na Mareta. 2Oyu yodiyo oya Madiya wa wethsire thsende edyato ya Fumu no ku i porora no huki thzenthzi. Lazaro oyu wa korire po nedi ndumbuthzenthzi. 3Andumbuthzenthzi ngou a tumithsireko diywi ku ka mu tongwera ci: “Fumu, mbushoe oyu wa shima aa kora.” 4Unone Yesu ou a i yuvire wa ambire ci: “Eyi ekora ka i twarire ku kufa. Uno honi yaa tendahara ci i monithse kutethzima kwa Nyambi, ci Mwana Nyambi nga a piwe kutethzima.”
5Shaanga ci Yesu wa shimine Mareta na Madiya na Lazaro, 6munyima thzo ku yuva ci Lazaro aa kora, wekarire mayuwa edi oku ekarire. 7Munyima thzeyo, wa amberire erongwa yenthzi ci: “Tu hukenu ku Judea.”
8Unone erongwa yenthzi ya mu tawire ci: “Murongithsi, ñanyiñanyi kuya na foto ku ku povaura no mawe Majuda, karo waa hukako?”
9Yesu wa tawire ci: “Diyuwa dyofoci mutenya di di netunde dikumi naidi, nji kadi kengeyo? Ngeci munu aa enda mutenya, tumba a kuñuka, inene aa mona mukaci ko mwethzi o kano kaye. 10Unone ngeci munu aa enda othsiku, aa kuñuka, inene kwithsa mwethzi mu mwenthzi.” 11Ou a manine ku amba eyo wa i amberire ci: “Mbushetu Lazaro na rara, uno honi, naa thza ni ka mu pindure.”
12Erongwa ya ambire ci: “Fumu, ngeci na rara kenge ekara nawa.” 13Yesu shime a ambire yo kufa kwa Lazaro, unone ayo shime ya anekerire ci shime a ambire yo turo shemwa.
14Yesu ngou a i tuywerire ci: “Lazaro na fu. 15Uno honi mukaci kenu ni na roera pa ku kana kwikarako, inene pano honi kenge mu ka tawa shemwa. Tu thzenu tu ka mu mone.”
16Tomasi oyu wethsiwire ci o Marambi#11.16 Mu Thsigerike po “Didimasi” ku amba ci “Marambi.” ngou a amberire aenthzenthzi erongwa ci: “Tu thzenu natwe tu ka fe nenthzi.”
Yesu yodiyo kupinduka no mwoyo
17Yesu ou a ka kumineko wa ka wanine Lazaro o ku na mana mayuwa ane mu thsidi. 18Ku tunda mu Yerusalema ku thza mu Betania nedi muendo o ku twethsa ku kwana tunano tuhatu.#11.18 Mu Thsigerike: Masitadia o dikumi na mutanu (tunano tuhatu). 19Majuda owangi a keyire kwa Mareta na Madiya ku kufa kwa ndumbuthzo ku na wa hengawethza. 20Mareta ou a yuvire ci Yesu aa keya, wa mu shambawerire, unone Madiya aye wa thsiarire mu nthzio. 21Mareta wa amberire Yesu ci: “Fumu, nga ko nokara, ndumbuthzange nga ka naa fu. 22Uno honi shaanga pano ni na dimuka ci Nyambi kenge a ku pa yoihe eyi o romba.”
23Yesu wa mu amberire ci: “Ndumbuthzoe kenge a pinduka.” 24Mareta wa mu tawire ci: “Ii, ni na dimuka ci kenge a ku pinduka mu kupinduka kwafu mu diyuwa dyo mahurerero.”
25Yesu wa mu amberire ci: “Yame no kupinduka no mwoyo. Yomuhe o ku tawa ku kwange kenge a ku yoya shaanga yoyu fa. 26Munu yomuhe oyu yoya no ku tawa ku kwange mbera ka a fu. Ene waa tawa eyi Mareta?”
27Wa mu tawire ci: “Ii, Fumu, naa tawa ci yowe o Mesiya Mwana Nyambi, oyu na roera ku keya mu kaye.”
Yesu aa dira
28Mareta ou a manine ku amba eyi, wa hukire no ku kethsera minenthzi Madiya ku mukunda. Wa mu ambera ci: “Murongithsi na kumu aa fota ku ku mona.” 29Ou a i yuvire eyo, wa katukire wanguwangu no ku thza kwa Yesu.
30Yesu apo o ku shime kwingena mu diumbo, o ku shimbi ekarera apa a ciwanenine na Mareta. 31Majuda awa ekarire na Madiya mu nthzio o kwa mu hengawethza ou a mu monine o ku katuka wanguwangu no ku puna pora, a mu shupwerire pa ku anekera ci ngwa aa thza ku thsidi ku ka dira.
32Madiya ou a ka kumine kwa Yesu no ku mu mona, wa tongamine ku manwi ku mauru a Yesu no ku amba ci: “Fumu, nga ko nokara, ndumbuthzange nga ka naa fu.”
33Yesu ou a mu monine o ku dira, no Majuda awa mu thsindekethzire nawo o kwa dira, wa yuvire nene ku kora ku mucima no kwikara mu mathsiwa oakuru. 34Wepurire ci: “Kupi oku na mu mu paka?”
A mu amberire ci: “Fumu, keye no mone.” 35Yesu wa dirire. 36Majuda a ambire ci: “Mu mone edi naa mu shimi!” 37Unone amweya a ambire ci: “Oyu naa thsikura meho o kapuputwa, ene nga ka naa mu kwathsa ci a fa?”
Yesu aa pindura Lazaro kwafu
38Ko mathsiwa oakuru karo, Yesu wa keyire ku thsidi. Ethso thsidi po nedi dihorongo, ku mengeneno adyo shime kwa arumweniwire diwe. 39Yesu wa ambire ci: “Mu arumuneko diwe.”
Unone Mareta ndumbuthza mufu wa mu amberire ci: “Fumu, ku na piti mayuwa ane ku tunda apa naa fera. Kenge ku tunda muwe oumango.”
40Yesu wa mu tawire ci: “Ene ka ni ku amberire ci ngeci o tawe kenge o mona kutethzima kwa Nyambi?” 41Ngou a arumunineko diwe. Yesu wa kengererire ku wiru no ku amba ci: “Tata naa kanderera ku koe pakuninga ci o na ni yuvu. 42Ni na dimuka ci waa ni yuvanga thsikati thsothsihe, uno honi eyi ni na ambera kengeyo po ci wahe awa nemana pano nga a tawe ci yowe no ni tumu.” 43Yesu ou a manine ku amba eyi, wa kumbire ko diywi dyodikuru ci: “Lazaro, o pune omo!” 44Mufu wa puninemo moko enthzi no mauru enthzi o ku i na thzingiwa mwito, mutwi ao ku u na thzingiwa mu thsito thsathso. Yesu wa wa amberire ci: “Mu mu thzingunune, wangu mu mu thsie a thze!”
Kayongo ko kwipaa Yesu
(Mat 26.1-5; Mar 14.1-2; Luk 22.1-2)
45Mweyo, ongi o Majuda awa keyire kwa Madiya no ku mona eyi a kwamine Yesu a tawire ku kwenthzi. 46Uno honi amweya kukwo a thzire kwAfarithsi no ku ka wa tongwera eyi a kwamine Yesu. 47Akuru o mapurisita nAfarithsi ngou a wanekire Nthzango no ku cipura ci: “Ngepi tu tenda? Inene oyu munu aa kwama emonithso yoingi. 48Ngeci o tu mu thsierere ci a citwaratware, anu wahe kenge a ku tawa ku kwenthzi. Apo honi Maroma kenge a ku keya ku na umburura ndau thzetu no ditunga dyetu.”
49Unone yumweya kukwo, Kayafa, oyu wekarire mupurisita shokuru oo mwaka, wa wa amberire ci: “Kwithsa nethsi mu na dimuka! 50Ene ka mu monine ci ku di nawa ku kwenu ci munu yofoci a fere anu kupita ci ditunga dyodihe di fe.”
51Eyo ka a i ciamberire yothsinda, unone pa kwikara mupurisita shokuru uya mwaka, shime okethzire ci Yesu kenge a ku fera ditunga dyodihe. 52Karo kadi cingwa ditunga pohuma, unone no ku reta pofoci ana Nyambi awa a na ciyamba kaye kokahe.
53Ku tatekera edyo diyuwa aendithsi o Majuda a tatekire ku ceka dyo kwipaa Yesu. 54Mukaci keyo, Yesu wa thsiire ku enda ko ku cimonaharithsa mu kaci ko Majuda. Wa tundire omo mu ndau no ku thza mu ndau thzathzo pepi no dikunguthsitu mu mbongi ethzi thzi nethsiwa Eferaimi oku a kekarire nerongwa yenthzi.
55Thsidika thso Majuda thso Paseka thsekarire po pepi. Anu owangi mu mandau oahe a kambamine ku thza ku Yerusalema thsidika o ku thsi shime ku tateka ci nga a twethse ku ka cikenithsa. 56A fotafotire Yesu no ku ciambithsana o kwa nemana mu ndau thzo mu Tembere ci: “Mwaa mona ngepi? Ci ka a ku keya ku Paseka nji?” 57Akuru o mapurisita nAfarithsi shime a raererire ci ngeci kwaa di oyu na dimuka oku a di Yesu, a ka mu tongore ci nga a mwange.
ទើបបានជ្រើសរើសហើយ៖
Johani 11: mho
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2023 The Seed Company
