Johani 12
12
Yesu aa wethsiwa thsende mu Betania
(Mat 26.6-13; Mar 14.3-9)
1Shime kwa thsiarire pohuma mayuwa o mutanu na dyofoci ci thsidika thso Paseka thsi tateke. Yesu wa thzire ku Betania, omu a tungire Lazaro oya a pindurire kwafu. 2Oko Yesu a ka mu kwamenineko edya. Mareta yo wa taperire edya, Lazaro aye nedi yumweya owa ekarire ku tafure na Yesu. 3Madiya ngou a shimbire kakeka ko thsende o ku nuka nawa no ku tura nene, wa mu wethsire pedyato ya Yesu no ku i porora ko huki thzenthzi. Nthzio thzothzihe thza yarire muwe oyo thsende.
4Unone thsimweya kwirongwa yenthzi thso dithzina dyo Judasi Isikariota, ethsi thsa mu ombire, thsa ambire ci: 5“Ine eyi a na kana ku urithsiwera oyu thsende no ku shimba ao madi ku pa ahepwe? Aa twethsa ku uriwa madi o ku hora mu mwaka?” 6Ka a ambire kengeyo mukaci ko ku fera ñeke ahepwe, unone mukaci ko ku ninga ci nedi mwithzi. Karo ko kwikara mukwakunyunga thsipaupau thso madi, shime aethzangamo.
7Yesu wa ambire ci: “Mu mu thsie a turekere ethsi a di nathso diyuwa dyo ku vumbekiwa kwange. 8Ahepwe kenge mwikarangano thsikati thsothsihe, uno honi ame ka mwa kwikarerera nange.”
Kayongo ko kwipaa Lazaro
9Mbunga thzothzikuru thzo Majuda ou a yuvire ci Yesu na kumu mu Betania, a thzireko. Ka thzire kwa Yesu pohuma, unone no ku ka mona Lazaro oya a pindurire Yesu kwafu. 10Mweyo, akuru o mapurisita a cekire kwipaa no Lazaro kengeyo, 11pakuninga ci yodiyo wa retithsire ci Majuda owangi a wa thsie no ku tawa kwa Yesu.
Yesu aengena mu Yerusalema
(Mat 21.1-11; Mar 11.1-11; Luk 19.28-40)
12Diyuwa edi dya randireko, mbunga thzothzikuru ethzi thza keyire ku thsidika thso Paseka thza yuvire ci Yesu aa keya ku Yerusalema. 13Ngou a shimbire mite thzo makaka no ku mu shambawera o kwa ka thza o kumba ci: “Hosana!#12.13 Ku shangariwe Nyambi. Wa thsiyauthzi oyu keya mu dithzina dya Fumu! Wa thsiyauthzi Fumu o Maisiraele.#Mem 118.25,26.” 14Yesu wa wanine thsindongiana no ku pahamapo, eci dyodi ku na ñoriwa ci: 15“Mwa yapa amwe mwanu o mu Sione. Nga mu mone, Fumu wenu oyo keya o ku na pahama pa thsindongiana.#Zak 9.9.”
16Mwethso thsikati erongwa ya Yesu ka ya yuvithsithsire eyo pa kutanga, unone Yesu ou engenine mu kutethzima, a vurukire ci eyo enu ya ñoriwire keyi yenthzi, karo na i tendiwa ku kwenthzi.
17Anu owangi awa a monine Yesu o kwithsa Lazaro ci a tunde mu thsidi, ku mu pindura kwafu, a twarire ku rupara ku pa ombangi wayo. 18Eyo ngeyi ya retire ci anu owangi a mu shambawere, inene shime a yuvire ethsi thsimonithso. 19Afarithsi ngou a i ciyongorire ci: “Mu na mono, kwithsa neyi tu kwama! Kaye kokahe kaa mu shupwera.”
Yesu a okethza yo kufa kwenthzi
20Amweya kowa a thzire ku Yerusalema ku ka rombera pa thsidika nedi Magerike. 21A thzire kwa Filipu o mu Betisaida mu Galilea no ku ka romba ci: “Ñathsire wetu, twaa fota ku mona Yesu.” 22Filipu wa thzire ku ka tongwera Andereasi. Ngou a thzire momu widi wo kwa Yesu ku ka mu tongwera.
23Yesu wa tawire ci: “Thsikati thsa Mwana Munu thsi na kumu thso kwingena mu kutethzima kwenthzi. 24Naa mi tongwera yoshemwa ci shime ci dinona dyo vuroto di were pashi no ku fa, kenge dya kwikarerera kengeyo dyofoci. Uno honi ngeci dyaa fa, dyaa reta oheke oungi. 25Munu yomuhe o ku shima mwoyo wenthzi muno mu kaye kenge a ku u yawa. Unone yomuhe o ku thzimba mwoyo wenthzi muno mu kaye kenge a ku u turekera mwoyo o diyere. 26Munu yomuhe o ku ni kwamena, aa roera ku ni shupwera, karo oku ni di, no ngamba wange kodiyo a kwikara. Munu yomuhe o ku ni kwamena, Tata kenge a ku mu pa direma.
27“Pano ni di mucima wange waa cithzekera. Ni ambe ngepi? Ene ni ambe ci: ‘Tata, o ni amwene ko thsino thsikati’? Uno honi thsino thsikati thsodiyo na ni keyera. 28Tata, o yemekere dithzina dyoe!” Ngou kwa yuvaharire diywi ku wiru edi dya ambire ci: “Na ni di remeka, karo kenge na ku di remeka karo.” 29Anu awa ekarirepo ou a yuvire diywi a ambire ci: “Mvura oya vuma!” Awa amweya a ningire ci: “Kangeru ka na amba nenthzi!”
30Unone Yesu wa wa amberire ci: “Diya diywi mu yuva ka di keyerire mukaci kange, unone mukaci kenu. 31Thsino thsodiyo thsikati thso ku ratura kano kaye, pano honi muendithsi o kano kaye kenge a ku konthzeriwa pora. 32Ou na ku kurekiwa pano pa pashi, mbeci na ku kokere anu wahe ku kwange.” 33Shime a ambire eyi ku dimukithsa mufero ou a fire.
34Mbunga thza ambire ci: “Twaa yuva mu Murao ci Mesiya kenge a ku yoya diyere. Owe ne ngepi edi o amba ci Mwana Munu aa roera ku kurekiwa? Edye honi oyu Mwana Munu?”
35Yesu wa tawire ci: “Mwethzi kenge wikara nenu mu thsikati thsothsipu pohuma. Mu ende mu mwethzi pano u diko ci mirema katere thzi mi thsike. Munu o ku enda mu mirema ka a dimukire oku a thza. 36Mu tawe ku mwethzi pano mu di nao ci nga mu piruke ana mwethzi.” Yesu ou a manine ku amba eyi, wa thzire no ku ka cihoreka.
Kukana kutawa ko Majuda
37Shaanga ci Yesu wa tendire emonithso yoingi pa meho o, anu ka tawire ku kwenthzi. 38Eyi ya tendaharire ci i citombore eyi a ambire mukwakukethza Isaya ci:
“Fumu, edye oyu naa tawa muthzimbu wetu?
Karo kwadye oku na u hokweriwa okoro wa Fumu?”#Isa 53.1.
39Mweyo, ka twethsire ku tawa, inene Isaya wa ambire karo ci:
40“Nyambi naa thzimanithsa meho o,
no ku karupithsa micima thzo,
ci meho o a twethsa ku mona,
no micima thzo ci thza twethsa ku yuvithsithsa,
ci katere a huke ku kwange no ku na wa porithsa.”#Isa 6.10.
41Isaya wa ambire eyi, inene wa monine kutethzima kwa Yesu, ngou a ambire yenthzi. 42Shaanga kengeyo, owangi kwaendithsi o Majuda a tawire ku kwenthzi. Uno honi mukaci ko ku yapa Afarithsi, Majuda ka pire ombangi ci a tawire kwa Yesu ci katere a cithziwe mu sinagoge, 43inene shime a shimine ku shangariwa kwanu kupita ku shangariwa kwa Nyambi.
44Yesu wa kumbire ku amba ci: “Yomuhe o ku tawa ku kwange ka a tawire ku kwange pohuma, unone aa tawa noku koyu naa ni tumu. 45Karo yomuhe o ku ni mona, aa mona oyu naa ni tumu. 46Ame shime na ni keya muno mu kaye eci mwethzi, ku na munekera munu yomuhe o ku tawa ku kwange ci ekarerera mu mirema. 47Ngeci munu aa yuva maywi ange unone kadi wa ku a hengeka, tumba ni mu ratura. Inene ka na ni keyera ku na ratura kaye, unone naa keyera ku na ka yoyithsa. 48Unone yomuhe o ku ni kana no ku kana maywi ange, o a maywi ni amba odiyo a ku mu ratura mu diyuwa dyo mahurerero. 49Inene ka ni ambire kokoro wange, unone Tata oyu naa ni tumu yo na ni raerera ku amba eyi ni na roera ku tongora. 50Karo ni na dimuka ci thsiraerera thsenthzi thsaa reta mwoyo o diyere. Mweyo, thsothsihe ethsi ni amba naa thsi amba kokuthza komu naa thsi ni tongwerera Tata.”
ទើបបានជ្រើសរើសហើយ៖
Johani 12: mho
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2023 The Seed Company
