Johani 10
10
Yesu yo mudithsani o muwa
1Yesu wa ambire ci: “Naa mi tongwera yoshemwa ci yomuhe o kukana kwingenena ku thsero thzo muraka o mangu, unone a engenena pa nyonga ko ku thzinamo, oyopo mwithzi karo dipuku. 2Uno honi o kwingenena ku thsero yodiyo mudithsani o mangu. 3Mukwakunyunga ku thsero aa mu yanthzurwera, karo no mangu aa yuva diywi dyenthzi. Aethsa mangu enthzi pa mathzina, karo a a tangerera ku tunda mu muraka. 4O ku na punithsa mangu enthzi oahe, a a tangerera, no mangu aa mu shupwera, inene a na dimuka diywi dyenthzi. 5Tumba a shupwera munu wao, unone aa mu yapa no ku mu cira, inene ka a dimuka diywi dyenthzi.”
6Yesu shime a wa tongwerire aka kathsimo, unone awo ka yuvithsithsire eyi a wa amberire. 7Yesu ngou a wa amberire karo ci: “Naa mi tongwera yoshemwa ci yame no thsero thzo mangu. 8Wahe awa keyire ame o ku ni shime ku keya ethzi no mapuku, unone mangu ka a wa teererire. 9Yame no thsero. Yomuhe o kwingenena ku kwange kenge a ku yoyithsiwa, karo kenge a kwingena no ku puna pora no ku ka wana madyero. 10Mwithzi aa keyeranga pohuma ku nethza, kwipaa no ku thzirithsa. Ame naa keyera ci ekare no mwoyo, karo a u wane kongi.
11“Yame no mudithsani o muwa. Mudithsani o muwa aa shuvera mwoyo wenthzi mangu enthzi. 12Munu o ku kumuna kadi cingwa mudithsani karo mangu kadi enthzi. Yoihe a mona mbinthzi o ku keya, aa thsia mangu no ku cira. Mweyo, mbinthzi aa na humbura mangu no ku a panthzaanithsa. 13Aa cira, inene wa ku kumuna karo tumba a pakera maano mangu.
14“Yame no mudithsani o muwa. Ni na dimuka mangu ange shemwa karo nao a na ni dimuka, 15eci dyodi a na ni dimuka Tata karo name ni na mu dimuka. Mweyo, naa shuvera mwoyo wange mangu ange. 16Ni di no mangu amweya, aa ninga ci kadi omu mu muraka. Nao naa roera ku a retamo. Kenge a ku teerera diywi dyange, karo kenge kwa kwikara mutanga ofoci no mudithsani yofoci.
17“Tata aa ni shima, inene naa shuva mwoyo wange ci na ku u wane karo. 18Kwithsa o ku twethsa ku ni nyanga mwoyo wange, naa u shuva keshima yange. Ni di nokoro o ku u shuva karo ni di nokoro o ku u huthsa karo. Inene eyi po yodiyo naa ni raerera Tata.”
19Yesu ou a ambire eyi kwekarire karo kucitepa mu kaci ko Majuda. 20Ongi wo a ambire ci: “O di no mupepo oumango karo aa thzaruka. Ine yo ku mu teererera?” 21Amweya a ambire ci: “Aa po kadi maywi o munu oyu di no mupepo oumango. Ene mupepo oumango ne kenge nga u thsikura meho o kapuputwa?”
Yesu aa amba ci yodiyo Mwana Nyambi
22Kethsiya thsikati Thsidika thso Kuyareka thsa tendaharire mu Yerusalema. Nedi pa kufu, 23Yesu wa endaurire mu Tembere mu ndau ethzi thzi nethsiwa ci Makeke a Solomoni. 24Majuda ngou a mu thzingwerire no ku mwipura ci: “Thsikati thso ku kuma kupi wa ku twikarithsa o ku tu tamangera? O tu tongwere shemwa ngeci yowe o Mesiya!”
25Yesu wa wa tawire ci: “Na ni mi tongwera kare, unone kadi mwakwakutawa ku kwange. Ekwama eyi ni kwama mu dithzina dya Tata yaa pa ombangi keyi yange, 26uno honi kadi mwakwa ku tawa pakuninga ci ka mu di pa mangu ange. 27Mangu ange aa yuva diywi dyange, ni na a dimuka karo aa ni shupwera. 28Na aa pa mwoyo o diyere, mbera ka a fu. Karo kwithsa oyu nga a ni nyanga mu dyoko dyange, 29inene Tata naa a ni pa, karo aye mukuru kupita yoihe. Kwithsa o ku twethsa ku a nyanga mu dyoko dya Tata. 30Ame na Tata po thsofoci.”
31Napo karo Majuda a shimbire mawe ci a mu povaure. 32Yesu ngou a wa tawire ci: “Na ni mi monithsa ekwama yoingi yoiwa yo ku tunda kwa Tata. Ipipo eyi mu fota ku ni povawera?”
33Majuda a mu tawire ci: “Ka tu ku povawerire ekwama yoiwa, unone pa ku yengwa! Inene owe po o munu pohuma, unone waa ninga ci o Nyambi.”
34Yesu wa tawire ci: “Ku na ñoriwa mu Murao wenu ci Nyambi wa ambire ci: ‘Naa amba ci mwanyambi!’#Mem 82.6. 35Ngeci wethsire anu awa piwire diywi dya Nyambi ci ‘anyambi,’ karo mu na dimuka ci Mañoro tumba a piruriwa, 36aye honi ne, oyu a hangurire Tata no ku mu tuma mu kaye? Ine eyi mu ni shangethzera ci naa yengwa pa ku amba ci: ‘No Mwana Nyambi’? 37Mwa ni tawa ngeci ka ni kwamine ekwama ya Tata. 38Uno honi ngeci naa kwama ekwama ya Tata, shaanga ci kadi mwakwa ku tawa ku kwange, mu tawe eyo ekwama, ci nga mu dimuke no ku yuvithsithsa ci Tata mu mwange a di karo name mwa Tata ni di.”
39Napo karo a fotire kwanga Yesu, unone wa wa thsevukire no ku cithzera. 40Ngou a yavukire karo Rware rwa Jorodani ku thza muya mu ndau a korovethzerire anu Johani pa kutanga. Wa kekariremo, 41karo anu owangi a keyire ku kwenthzi. A ambire ci: “Johani ka a kwamine emonithso, unone yoihe eyi a ambire keyi yoyu mukwerume ya shemwa.” 42Karo ongi owa ekarire omo mu ndau a tawire kwa Yesu.
ទើបបានជ្រើសរើសហើយ៖
Johani 10: mho
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2023 The Seed Company
