གཉིད་པ་ཀོ་རིན་ཐི། 2
2
1ཇི་གི་མི་ཝ་ཆོ་ཝ་ ན་ཧ་བ་ ཁོ་དང་ཆཱད་པེ་མ་བི་ལེ་དེན་གེ་ ཇང་ཨོམ་ཆང་ཤེབ་ཐུར་ ན་ཧ་བཱརང་ཀ་མ་དི་ལ་དག༌ཉི། 2ཧང་ཡ་དག་ནེ་ལ་ ཇི་གི་ན་ཧ་བ་ ཁོ་དང་ཆཱད་པེ་བི་ནེ་ལ་ ཇང་ཨི་བི་གི་ ཤོ་ནང་ཕེ་ཝ་ཅོད་པེ་ཡ། དག་པ་ཀབ་ཉི་ ཇི་གི་ཁོ་དང་ཆཱད་པེ་ བི་ཁཱན་བ་ཀི་ཏ་ ཇང་ཤོ་ནང་ཕེ་ཝ་ མ་ཅོད༌པ། 3ཇང་ཨོ་ཕ་ཀབ་ཉི་ ཇང་ཤོ་ནང་ཕེ་ལེ་རིག་ཁཱན་ སོ་ངོ་བ་ཀི་ ཇང་ཤོ་ནང་མ་ཕེ་ཝ་ མ་ཅོད་ཅེན་དག་པ་གི་ ཇི་གི་ཨ་ཝ་པུརུས་ཀིན་ཨ་ཉི་རང་ འབྲི་བ་གི༌ལ། ན་ཧ་བ་ ཤོ་ནང་ཕེ་ནེ་ལ་ ཇང་བུ་ ཤོ་ནང་ཕེན་ཅ་གི་ལ་དག་ཉི་ ན་ཤི་སེན་ཅ་གི་ལ་དག་ཉི་ ཇི་གི་ཏེན་ཏེན་ཨ་ཉི་རང་ ལོ་དི་ཝ༌ཅ། 4ཨོ་ཐ་ཡི་གུ་འབྲི་ཅ་ཨ་ཉི་ ཇང་གནམ་མེད་ས་མེད་ སེམས་ཤི་ཉི་ ནང་དོག་པ་ཆོ༌ཝ། ཇ་ག་སེམས་ངམ་ཉི་ མིང་གེ་མིང་རི་བུ་ཤོ༌ཝ། ཧང་ཡ་དག་ནེ་ལ་ ཇ་ག་མིག་པ་ཤོ་ ན་ཧ་བ་ སེམས་ཤི་ལེ་བི་ལེ་མང་གི་ཝ་ ཇི་གི་ན་ཧ་བ་ ཕང་ཅ་དག་ཉི་ གེན་མེ་དེན་གེ་ གི་ཝ་ཆོ༌ཝ༎
སྡིག་ཅན་ག་བཀའ་དྲིན་བསྐྱང༌ཤོ།
5གནམ་མེད་ས་མེད་ ཏབ་མ་ཉམ་པ་ཅོད་ཁཱན་ སོ་ངོ་གི་ ཇང་ཤོ་ནང་མ་ཕེ་ཝ་ ཅོད་པ་གེ་ལག་ཉི་ ན་ཧ་བ་ གནམ་མེད་ས་མེད་ ཤོ་ནང་མ་ཕེ་ཝ་ཅོད་པ་དག་ཉི་ ཡེག་པ་ཀབ་ཉི་ ཇི་གི་ཆཱས་ཐེབ་ཡེག་ཅ་མང་གི། 6ནའི་མང་པུ་ཐུར་གི་ ཁྲིམས་ཀེ་ཁཱན་ཁེ་པ་ རོ་ཀ་དེན་གེ་ ཇོབ་ཇོབ་གི༌ལ། 7ཉི་ཨོམ་ཤོ་ ན་ཤི་རོག་ བཀའ་དྲིན་བསྐྱང་ཐཱན་ རོ་ཀ་སེམས་གསོ་ ཨ་ལེ་ཁེ༌ལེ། ཨུ་ཉུ་མ་ནེ་ལ་ རོག་སེམས་ཤི་དང་ཟག་ཉི་ དད་པ་ག་ནོད་ཏུ། 8ཨོ་ཉི་ཨ་དེན་གེ་ ན་ཤི་རོག་ ཨོ་མ་བུ་ ཕང་ཅ་གི་ལ་ཨ་ཉི་ ན་ཤི་རོ་ཀ་གེན་ཤོ་དག་ཉི་ ཇི་གི་ན་ཧ་ཞུན༌ཅ།
9ཇི་གི་ན་ཧ་འབྲི་བེ་དེན་ཐ་ཤོ་ ཇི་གི་ན་ཧ་རྒྱུགས་ལ་ཉི་ ན་ཤི་ཆཱས་ཐམས་ཅན་ག་ ཇ་ག་ཆ་གནས་ཐ་ན་སྨོ་ གོད་པེ་དེན་གེ་ འབྲི་བ་གི༌ལ། 10ན་ཤི་ ཨི་བི་བཀའ་དྲིན་བསྐྱང་མ་ཐུར་ ཇི་གི་བུ་ ཨོ་ཉ་སོ་ངོ་ག་ བཀའ་དྲིན་བསྐྱང༌མེ། ཉི་ཇི་གི་ བཀའ་དྲིན་བསྐྱང་མ་ཀབ་ཉི་ ཧང་ཐུར་བཀའ་དྲིན་བསྐྱང་མེ་ཆོ་ནེ་ལ་ ཁིརིས་ག་དབང་ཚད་ག་ཐུང་ཀེ་ཨ་ཉི་ ན་ཧ་ཕཱན་མེ་དེན་གེ་ ཇི་གི་བཀའ་དྲིན་བསྐྱང་མ་གི༌ལ། 11ཨོ་ཐེན་ཨ་ཉི་ སེ་ཏཱན་གི་ ཨ་ཧ་མགུ་སྐོར་ཕི་ལེ་ མ་ཉོང་ཅེན་དག་པ་གི་གི༌ལ། ཧང་ཡ་དག་ནེ་ལ་ རོ་ཀ་འཆར་གཞི་ག་ཀོར་གེ་ ཨ་ཤི་མ་སེ་ཝ་མཱན༌ཅ༎
འགན་རྒྱ་སིང་མ་ག་ཕྱག་ཞུ་ཁཱན༌བ།
12ཉི་ཨོམ་ ཇང་ཁིརིས་ག་ འཐེན་ལེག་པུ་བཤད་པེ་དེན་གེ་ ཏྲོ་ཨཱས་ག་དི་ལ་ཀབ་ཉི་ གཙོ་བོ་གི་ ཇ་ག་དེན་གེ་ ཀོ་ཕེག་ཉི་གནང་མ་ལ་དག་ཉི་ ཇི་གི་སེ་ཝ་ཆོ༌ཝ། 13ཨོ་ཉེ་རང་གི་ནེ་བུ་ ཇ་ག་ཀོ་ཏ་ཏི་ཏཱས་ ཉ་ག་མ་ཝ་ཨ་དེན་གེ་ ཇང་ད་སུར་རང་ མ་སྐྱིད་པ་ཆོ༌ཝ། ཨོ་ཉི་ཨ་དེན་གེ་ ཇི་གི་རོག་ཏེ་བ་ཀ་ དིན་ཅ་ན་དག་ཉི་ཡེག་ཐཱན་ ཇང་མ་ཀེ་དོ་ནི་ཡ་ག་ཏཱན་དི༌ཝ།
14དག་པ་ཀབ་ཉི་ དཀོན་མཆོག་ག་ བཀའ་དྲིན་བསམ༌ཅ། ཧང་ཡ་དག་ནེ་ལ་ རོ་ཀི་ཨ་ཧ་བ་ ཧ་ལ་ཨ་ནེ་བུ་ ཁིརིས་ག་ཐུང་ཀེ་ཨ་ཉི་ རྒྱལ་ཁ་ཉོང་ཁཱན་ག་ལམ་གེ་ དང་མེ་རིག༌ཅ། ཉི་ཨོ་ག་རང་གི་ནེ་བུ་ ཤེར་སུང་སུང་ནམ་ཁཱན་ དྲི་བཟང་གི་ ཆ་པ་པུརུས་ཀིན་ཨ་ཉི་ འཐེན་ལེག་པུ་ཁེ་པ་ ཨ་ཧ་ཐུང་ཀེ་ཨ་ཉི་ ཆ་པེ་ག་གནང་མ༌ཅ། 15ཧང་ཡ་དག་ནེ་ལ་ ཨ་ཧ་བ་ཤོ་ ཐར་པ་ཉོང་པེ་གང་ཆོ་ཁཱན་དང་ ཐར་པ་མ་ཉོང་པེ་གང་ཆོ་ཁཱན་ སོ་ངོ་བ་ཀ་པོང་ཀ་ ཁིརིས་གི་ དཀོན་མཆོག་ག་ཕུལ་ཁཱན་ པོས་ད་བུ་ཐུར་གི༌ལ། 16ཐར་པ་མ་ཉོང་ཁཱན་བ་ཀི་ཤོ་ ཤི་སྲོག་ག་ཤེར་ནམ༌ཅ། ཉི་ཐར་པ་ཉོང་ཁཱན་བ་ཀི་ ཚེ་ག་ཤེར་སུང་སུང་ནམ༌ཅ། ཉི་ཨུ་ཐུ་ད་བུ་ག་ལའི་ ཨ་ལེ་ག་ལྕོགས་གྲུབ་ ཨི་བི་ག་ཅ་ཡ།
17ཨའི་ཤོ་ བཱརའ་སོ་ངོ་བ་ད་བུ་ཨ་ཉི་ དཀོན་མཆོག་ག་གསུང་ཁེ་པ་ ཨ་ཧ་འབབ་ཁུངས་ག་དེན་གེ་ ཚོང་ཕི་ཁཱན་ སོ་ངོ་མང་གི། དག་པ་ཀབ་ཉི་ ཨའི་ཤོ་ དཀོན་མཆོག་གི་ ཀུན་ཏི་ཁཱན་ ཁིརིས་ག་གཡོག་པ་གི་ཝ་ཨ་དེན་གེ་ ཨ་ཤི་གསུང་བཤད་པ་ཀབ་ཉི་ སེམས་ནང་ཀེ་ཨ་ཉི་རང་བཤད༌ཅ། རོ་ཀི་གཟིགས་ཅ་གི་ལ་དག་ཉི་ ཨ་ཤི་སེན༌ཅ།
ទើបបានជ្រើសរើសហើយ៖
གཉིད་པ་ཀོ་རིན་ཐི། 2: TNTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tshangla New Testament
© 2023, The Bible Society of India
all rights reserved