གཉིད་པ་ཀོ་རིན་ཐི། 11

པ་ཝལ་དང་ སྐུ་ཚབ་རྫུས་མ༌བ།

1ཇི་གི་ཡོང་བ་ད་བུ་ཨ་ཉི་ ཆཱས་ཨན་ཐཱན་རང་གི་ནེ་བུ་ ན་ཤི་ཇང་ཀབ་ཉི་ ཐེས་པེ་དག་ཉི་ ཇི་གི་རེ་ཆ་ཨན༌ཅ། ན་ཤི་ཇང་ཀབ་ཉི་ ཐེས་ཉི་གནང་ཤོ་ན། 2དཀོན་མཆོག་གི་ སེར་སྣ་ཨ་ཝ་པུརུས་ཀིན་ཨ་ཉི་ ཇི་གི་ན་ཧ་ཀོར་གེ་ སེར་སྣ་ཨན༌ཅ། ན་ཧ་བ་ཤོ་ ངེ་ཅོན་མ་ཁཱན་ཟ་མིན་ད་བུ་ཨ་ཉི་ ཇི་གི་ཕེ་ཝག་ཙ་ཐུར་ཀབ་ཉི་ གཉེན་ཏག་ཉི་བི་ལེ་དག་ཉི་ ན་ཟ་ཝ༌ཅ། ཉི་ཨུ་ཉུ་ཕེ་ཝག་ཙ་ཤོ་ ཁིརིས་གི༌ལ། 3དག་པ་ཀབ་ཉི་ རུ་གེ་ནང་གི་ ཧ་ཝ་ག་ མགུ་སྐོར་ཕི་ཝ་པུརུས་ཀིན་ཨ་ཉི་#11:3 ཇུན་པ་ག་དཔེ་ཆ་ 3:1–24 ཐུར་ཕང་གི་ ན་ཧ་མགུ་སྐོར་ཕི་ཉི་ ཁིརིས་ག་དེན་གེ་ཆོ་ཁཱན་ ན་ཧ་སེམས་མ་ཙང་མ་དང་ དམ་པ་མ་ཝ་རི་དུ་དག་ཉི་ ཇང་ཡོང་ཁེ་ཝ༌ཅ། 4ཧང་ཡ་དག་ནེ་ལ་ ཨི་བི་གི་ནེ་བུ་ ན་ཧ་བཱརང་ཀ་ཨུན་ཐཱན་ ཨ་ཤི་བཤད་ཁཱན་ ཡི་ཤུ་ག་ཀོར་གེ་མང་གི་ཝ་ ཡི་ཤུ་སོ་སུ་ག་ཀོར་གེ་བཤད་ནེ་བུ་ ན་ཤི་ལོ་དི་ན། ཉི་ཐུགས་ཉིད་དང་ འཐེན་ལེག་པུ་བུ་ ན་ཤི་ ཨ་ཧ་ཐུང་ཀེ་ཨ་ཉི་ཞུ་ཁཱན་གེ་ སོ་སུ་ཆོ་ནེ་བུ་ ན་ཤི་ཡ་ལུ་ཨ་ཉི་ཆ་ཐ་ན།

5དག་པ་ཀབ་ཉི་ ཨོ་ཐ་སྐུ་ཚབ་ཆི་ལུ་བ་དག་ཉི་ ཆིན་ཁཱན་བ་ཀེ་ ཇང་ཟེ་མུ་གི་ལ་དག་ཉི་ ཇི་གི་མི་ལུ་མཱན༌ཅ། 6ཇི་གི་ཆཱས་ཕི་ལེ་ག་ གནམ་མེད་ས་མེད་ གོ་མ་ཆོད་ནེ་བུ་ ཇི་གི་ཧང་ག་ཀོར་གེ་ ཆཱས་ཨན་ཅ་གི་ལ་སྨོ་ ཇི་གི་སེན༌ཅ། ཉི་ཨོམ་ ན་ཤི་བུ་ ཧ་གོ་ཝ་ཅ་དག་ཉི་ ཇི་གི་མིན༌ཅ། ཧང་ཡ་དག་ནེ་ལ་ ཨ་ཤི་ལོག་ཉི་ལོག་ཉི་རང་ ཨོ་ཉ་ཀོར་གེ་ ཁུངས་ཀེ་བ༌ཅ།

7ན་ཧ་བ་ ཆི་ལུ་རིན་ཆེན་དག་པ་གི་ ཇང་ཤོ་ གནམ་མེད་ས་མེད་ ཉམ་ཆུང་རི༌ཝ། ཉི་ཇི་གི་ ན་ཧ་དཀོན་མཆོག་ག་ འཐེན་ལེག་པུ་ཁེ་པ་ ཏོང་པ་གེ་བཤད༌པ། ཧང་ ཨུ་ཉུ་ཤོ་ སྡིག་པ་ཨ་ཝ་གི་ལ་སྨོ། 8ན་ཧ་ཏཱན་ ཏོང་པ་གེ་ ཇ་རོ་ཨ་ལེ་རེ་ཆེན་དག་པ་གི་ བཱརའ་ཆོས་ཚོགས་བ་ཀི་ སྙན་དར་ཕུལ་ཁཱན་བ་དོག་ཉི་ ཇི་གི་རོག་ཏེ་བ་ཅོམ༌པ། 9ཇང་ན་ཧ་བ་ཀབ་ཉི་ ཆོ་ལེ་གང་ཀ་ ཇང་ལང་པ་མཱན་ཐཱན་རང་གི་ནེ་བུ་ ཇི་གི་ན་ཧ་སྡུག་བསྔལ་མ་ཀེ་ཤི། ཧང་ཡ་དག་ནེ་ལ་ མ་ཀེ་དོ་ནི་ཡ་གེ་ཨུ་ཁཱན་ ཀོ་ཏ་བ་ཀི་ ཇང་ཚཱས་ཁཱན་བ་ ཐམས་ཅན་རང་ ཕ་ཉི་ག༌ཝ། གོ་མ་བུ་ ཇི་གི་ན་ཧ་སྡུག་བསྔལ་ ཀེ་བ་མཱན༌ཅ། ཉི་མ་འོངས་པ་ག་བུ་ ཇི་གི་ན་ཧ་སྡུག་བསྔལ་ ཧ་ལ་རང་མ་ཀེ༌བ། 10ཁིརིས་ག་དེན་པ་ ཇ་ག་ནང་ཀ༌ཅ། ཉི་ཨ་ཁའི་ཡ་ག་ས་ཆ་ཁོན་ ཇི་གི་ཨོ་ཐ་ཀོར་གེ་ ཁམ་ཙོང་མེ་ག་ ཏི་ངེ་རང་མ་ནོར༌བ། 11ཇི་གི་ན་ཧ་བ་ མ་ཕང་པ་ཨ་དེན་གེ་ ཇི་གི་ཨོ་ཐ་ཆཱས་ཡེག་ཅ་སྨོ། མང་གི་ ཇི་གི་ན་ཧ་བ་ ཕང་ཅ་དག་ཉི་ དཀོན་མཆོག་གི་མཁྱེན༌ཅ།

12སོ་ངོ་བ་ཀི་ རོག་ཏེ་བ་ཀ་ལའི་བུ་ ཨ་ཧ་ལའི་ཀབ་ཉི་ དོ་ལུ་གི་ལ་དག་ཉི་ ཡེག་ནེ་བུ་ ཁུངས་ཀེ་བེ་མར་བེ་དེན་གེ་ ཇི་གི་ཨོ་ཐེན་ ཨ་ལུ་ཨ་ས་རང་ཆོ༌ལེ། 13ཧང་ཡ་དག་ནེ་ལ་ ཨོ་ཉ་སོ་ངོ་བ་ཤོ་ སྐུ་ཚབ་རྫུས་མ་བ་གི༌ལ། ཉི་མགུ་སྐོར་ཕི་ཉི་ ལའི་ཨ་ཁཱན་བ་གི༌ལ། རོག་ཏེ་བ་ཀི་ ཁིརིས་ག་སྐུ་ཚབ་ ངོ་མ་གི་ཝ་པུརུས་ཀིན་ ཅོད་ཉི་ཆོན༌ཅ། 14ཡིད་ཆི་ལེ་མ་ཁེ༌ལ། ཧང་ཡ་དག་ནེ་ལ་ སེ་ཏཱན་གི་བུ་ འོད་ཟེར་ཤོ་ཁཱན་ ཞིང་ཁམས་ག་འཐེན་པ་ད་བུ་ ཅོད་ཉི་ཆོན༌ཅ། 15ཨོ་ཉི་ཨ་དེན་གེ་ སེ་ཏཱན་ག་གཡོག་པ་བ་ཀི་ དྲང་པུ་ག་གཡོག་པ་བ་ད་བུ་ ཅོད་ཉི་ཆོ་ནེ་ལ་ ཨུ་ཉུ་ཤོ་ ཆཱས་ཆི་ལུ་མང་གི། ཇུ་ཀ་དག་པ་ཀབ་ཉི་ལ་ རོག་ཏེ་བ་ཀ་ ཐོབ་ཐང་ཤོ་ རོག་ཏེ་བ་ཀི་ ཨ་ཝ་དང་ཏུ་ཉི་རང་ཉོང༌པེ༎

པ་ཝལ་མང༌པུ་ཐུར་ དཀའ༌ཝ་ཅཱད༌པ༌ལ།

16ཇི་གི་ ཨོམ་ཆང་རང་ཡེག་ཅ་ ཇང་ཤོ་ ཡོང་བ་གི་ཝ་ལ་དག་ཉི་ ཨི་བི་གི་རང་མ་མི། ཉི་ན་ཤི་ ཇང་ཡོང་བ་གི་ལ་དག་ཉི་ མི་ནེ་ལ་ ན་ཤི་ཇ་ག་ ཇང་ཡོང་བ་ གི་ཝ་པུརུས་ཀིན་ཨ་ཉི་ཨའི། ཉི་ཇི་གི་ཡོང་བ་ད་བུ་ཨ་ཉི་ ཁམ་ད་ཟེ་རེ་ཤ་ཙོང༌མེ། 17ཇི་གི་ཨོ་མ་ ཇང་ཏེན་ག་ཐུང་ཀ་ ལོ་དེ་ཏོག་ཏོ་ཨ་ཉི་ ཁམ་ཙོང་ཁཱན་ཤོ་ གཙོ་བོ་ག་ ཐུགས་བཞེད་དང་ཏུ་ཉི་ མང་གི་ཝ་ ཡོང་བ་ད་བུ་ཨ་ཉི་ ཨན་ཅ་གི༌ལ། 18བཱརའ་སོ་ངོ་བ་ཀི་བུ་ འཇིག་རྟེན་པ་པུརུས་ཀིན་ཨ་ཉི་ ཁམ་ཙོང་མ་ཨ་དེན་གེ་ ཇི་གི་བུ་ ཨོ་ཉེན་རང་ཁམ་ཙོང༌མེ། 19ཧང་ཡ་དག་ནེ་ལ་ ན་ཧ་བ་ཤོ་ མཁས་ཏྲ་ཆོ་ཁཱན་ སོ་ངོ་བ་གི་ཝ་ཨ་དེན་གེ་ ན་ཤི་ཡོང་བ་བ་ཀ་ཆཱས་ ཉཱན་པེ་ག་ཤོ་ནང་ཕེ་ན། 20རོག་ཏེ་བ་ཀི་ ན་ཧ་བ་ ཟ་པ་ཅོད་ནེ་བུ་ ན་ཧ་ཆོ་ཁཱན་ ཐམས་ཅན་རང་བུ་ནེ་བུ་ ཉི་ན་ཧ་བ་ཀེ་ འབབ་ཁུངས་ཤོ་ལེ་གོད་ནེ་བུ་ ཁམ་ཙོང་ཉི་ཨ་ནེ་བུ་ ཉི་ན་ཧ་ནེ་ཟ་ག་ དེན་ཇ་ཀི་ཕི་ནེ་བུ་ ན་ཤི་ རོག་ཏེ་བ་ཀབ་ཉི་ཐེས༌ལ།

21ཇང་ངི་ནང་ཁུ་ཉི་ ཡེག་པེ་ཁེ་ན་ ཨ་ཤི་ཨུ་ཉུ་ད་བུ་ ཨ་ལེ་ག་གོ་མ་ཆོད་ཅི། ཇི་གི་ ཨོམ་ཆང་རང་ ཡོང་བ་ད་བུ་ཨ་ཉི་ ཆཱས་ཨན༌ཅ། རོག་ཏེ་བ་ཀི་ ཧང་ག་ཀོར་གེ་ ཁམ་ཙོང་མེ་རེ་བ་ཐུར་ ཇི་གི་བུ་ ཨོ་ཉ་ཀོར་གེ་ ཁམ་ཙོང་མེ་རེ༌བེ། 22རོག་ཏེ་བ་ ཧི་བུརུ་གི་ལ་སྨོ། ཇང་བུ་ ཧི་བུརུ་གི༌ལ། རོག་ཏེ་བ་ ཨིས་རེལ་ག་སོ་ངོ་གི་ལ་སྨོ། ཇང་བུ་ ཨིས་རེལ་ག་སོ་ངོ་གི༌ལ། རོག་ཏེ་བ་ ཨ་བཱརའ་ཧམ་ག་ མི་རྒྱུད་གི་ལ་སྨོ། ཇང་བུ་ ཨ་བཱརའ་ཧམ་ག་ མི་རྒྱུད་རང་གི༌ལ། 23རོག་ཏེ་བ་ ཁིརིས་ག་ གཡོག་པ་བ་གི་ལ་སྨོ། ཇི་གི་སོ་ངོ་ཉོས་པ་ད་བུ་ཨ་ཉི་ ཆཱས་ཨན༌ཅ། རོག་ཏེ་བ་ཀེ་དྲག་ཁཱན་ ཁིརིས་ག་གཡོག་པ་ཤོ་ ཇང་གི༌ལ། རོག་ཏེ་བ་ཀེ་མང་པུ་ ཇི་གི་དཀའ་ཝ་ཅཱད་ཉི་ ལའི་ཨ་ཝ༌ཅ། བར་བར་ཀེ་རང་ བཙོན་ག་ཙུག༌པ། གྱངས་ཁ་མ་ཝ་ ཏེ་ཐ་ཉོང༌པ། ཉི་ལོག་ཉི་ལོག་ཉི་རང་ ཤི་ལེ་ཅམ༌པ། 24ཏེ་ཐ་ 39 ཨ་ཉི་ ཡ་ཧུ་དི་པ་བ་ཀ་ ག་དང་གེ་ཤེབ་ལྔ་ཉོང༌པ། 25ཏོ་ཀང་ཀ་ཏང་གི་ ཇང་ཤེབ་སམ་རེག་པ༌ཅ། ལུ་ཤི་ཤེབ་ཐུར་དྲོ་མ༌ཅ། མཚོ་བར་ཀ་བུ་ ཤེབ་སམ་ཐེན་ གྲུ་ཆེན་ཕོད་པ༌ཅ། ཉི་ཤེབ་ཐུར་ཏ་ ངམ་བི་ནང་ཐུར་ རི་ནང་ཀ་ཆོ་ལེ་ཁེ༌ཝ། 26ཇང་དང་ཅ་ཨ་ཉི་ རོད་པ་གི་ ཀ་ལུ་ཏཱད༌པ། ཅོམ་ཁཱན་བ་ཀི་ ཀ་ལུ་ཏཱད༌པ། ཇང་ཏེན་ག་སོ་ངོ་བ་དང་ ཡ་ཧུ་དི་པ་མང་གི་ཁཱན་བ་ཀི་ ཀ་ལུ་ཏཱད༌པ། ཁྲོམ་ཆེན་ཁོན་ ཀ་ལུ་ཏཱད༌པ། ས་ཏོང་པ་ནང་ཀ་ ཀ་ལུ་ཏཱད༌པ། མཚོ་ནང་ཀ་རི་དི་ཨུ་ཉི་ ཀ་ལུ་ཏཱད༌པ། ཉི་དད་པ་ཨ་ཁཱན་རྫུས་མ་བ་ཀི་ ཀ་ལུ་ཏཱད༌པ། 27གནམ་མེད་ས་མེད་ ལའི་ཨ་ཉི་ནང་དོག༌པ། མ་ཡི་ཕཱན་བུ་ བི་ནང་མང་པུ་ཐུར་ཆོ༌ཝ། བི་ནང་ཁུ་ཉི་ རི་ནང་སོབ་ཉི་ཆོ༌ཝ། ཤེབ་མང་པུ་ཐུར་ ཟ་ལེ་ག་ལྟོ་ ཆོ་ལེ་ག་བཱརང་མ་ཝ་ ཉི་ཡེ་ལེ་ག་ཁ་མུང་ མ་ཝ་ཨ་ཉི་ཆོ༌ཝ།

28ཨུ་ཉུ་མ་ཚཱད་པ་ ཆོས་ཚོགས་བ་ཀ་དེན་གེ་ ཚ་གྱང་བང་མ་ཨ་དེན་གེ་ ནོང་དྲང་རང་ ཇང་སྡུག་བསྔལ་ཨ་ཉི་ཆོན༌ཅ། 29བཱརའ་སོ་ངོ་ཐུར་ དོ་རི་རི་མ་ཝ་རི་ལ་ཀབ་ཉི་ ཇང་བུ་ དོ་རི་རི་མ་ཝ་རིན༌ཅ། ཉི་བཱརའ་སོ་ངོ་ཐུར་ རོ་ཁེ་དི་ལེ་བི་ལ་ཀབ་ཉི་ ཇང་རོ་ཙིག་པེ་ཨུ་ན།

30ཇི་གི་ཁམ་ཙོང་ནེ་བུ་ ཇང་དོ་རི་རི་མ་ཝ་ལ་དག་ཉི་ གེན་ཁཱན་ག་ཀོར་གེ་ཤ་ ཇི་གི་ཁམ་ཙོང༌མེ། 31ཇི་གི་དེན་པ་ཡེག་ཅ་གི་ལ་དག་ཉི་ དུས་ཏ་བུ་རང་ བསྟོད་པ་ཕུལ་བེ་ཁེ་ཁཱན་ ཨ་ཧ་གཙོ་བོ་ཡི་ཤུ་ག་ཡབ་དང་ དཀོན་མཆོག་གི་ མཁྱེན༌ཅ། 32ཇང་ད་མཱས་ཀཱས་ག་ཆོ་ལེ་གང་ཀ་ དཔོན་ཨ་རི་ཏཱས་ག་ ཕརའ་ཁེ་ཆོ་ཁཱན་ དཔོན་སློབ་གི་ ཁྲོམ་ཆེན་ག་མ་ཀོ་ཁོན་ ཇང་ཙུང་མེ་དེན་གེ་ དམག་མི་བ་ཙུག་པ་ཆོ༌ཝ། 33དག་པ་ཀབ་ཉི་ ཤོ་མ་ནང་ཀ་ཙུག་ཉི་ ཁྲོམ་ཆེན་ག་དེང་ཙི་སྒོ་སྒྲིག་གེ་ ཇང་དོང་ཕ་པ་གི༌ལ། ཉི་ཨོ་ཐེན་ཨ་ཉི་ ཇང་རོ་ཀ་ ག་དང་ག་མ་ཚུད་ཅི༎

ទើបបានជ្រើសរើសហើយ៖

གཉིད་པ་ཀོ་རིན་ཐི། 11: TNTB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

Tshangla New Testament

ស្វែងយល់បន្ថែមទៀតអំពី Tshangla New Testament (BSI)