1 Korintus 15
15
Kinovijaan Kavagu di Koristus
1Oou kosusuladanku, maino aandaian oku do popoondom dikovu diri Abar do Aandai i nitudukku dikovu do rinamit muju, om ogirot i ginavo muju do aparsaya diri. 2Nong ogiat kou maja diri tinangaran i nitudukku dikovu nga kaanu kovi do kovijaan mantad diri Abar do Aandai, nong aui sia-siawon iri ginavo muju do aparsaya.
3-4Do iri nopo oponting marong do pinolombusku dikovu i nituduk si dogo nga irino do napatai i Koristus sabap do duso tokou, om nolobongno Isido, om vinijau nogi dii Isido di kotolu tadau, do irad di nokotulis siri Kitab. 5Nga intalangpo Isido om siri di Koipas.#15:5 Koipas: ngaran koduvo di Pitrus. Om intalangno Isido om siri opulu om iso susuuonJo. 6Om intalangno Isido om siri lobi limo naatus tulun do insan-insani nokoontong, om kinoguuan nopo diri tongotulun diri nga poimvijaupo, om kivaro nogi diolo diri piipiro do napataino do maino. 7Om katalib mantad diri om intalangno Isido siri di Yakub. Om intalangno kavagu Isido om siri kasangkat di tongosusuuon Disido vokon.
8Om pongovianno dii om nintalang nogi dii i Koristus siri dogo, do au okupo daa aparsaya Disido nga pinaparsaya okui, irad di tanak do aupo norikot iri kosusuvanjo om nosusuno. 9Do au okui dogo songkuro oponting nga iolo nono i tongosusuuon di Yisus vokon, om auno apatut daa do roiton oku do susuuon di Yisus sabap iokuno iri pinopokoruol di poiuuntunan diri tongotulun di aparsaya do Kinoringan. 10Nga sabap do opuavang i Kinoringan dogo, nokosiliu oku do susuuon di Yisus do irad diti maino, om okoniko osia-sia i gaagayaJo do opuavang dogo. Nga ioku nogi dii kinumaraja marong mantad di tongosusuuon di Yisus vokon. Nga okoniko bubugol oku diri, nga i Kinoringan nono do opuavang minonguup dogo kumaraja. 11Sabap diri, iokuno om i tongosusuuon di Yisus vokon nga iri om iri i paabaronja dikovu, om irino kinaparsayaan muju.
Kovijaan Tokou Kavagu mantad Kapatajan
12Om ponudukanja nopo nga vinijau i Koristus do mantad siri kapatajon. Nga nokuro do kivaro piipiro tulun sino dikovu do mitangar do au vijauon i tulun do napatai? 13Nga nong oinomod do au vijauon i tulun do napatai nga aui daa vinijau i Koristus. 14Om nong oinomod do au vinijau i Koristus, osia-siano iti pangabaranja om kaparsayaan muju nogi nga osia-sia. 15-16Om sondiangko iri, ovudutno dii daa i ponudukanja pasal di Kinoringan do pinovijau Disido i Koristus mantad kapatajan, do nong oinomodno do au vijauon i tulun napatai nga aui daa vinijau do Kinoringan i Koristus mantad kapatajan. 17Om nong au vinijau i Koristus, osia-siano dii iri kaparsayaan muju om siri koupo dii saralom duso muju. 18Om irad nogi dino kasangkat diri tulun, iri napatai, iri aparsaya di Koristus, nga obinasano daa. 19Do nong itino do maino noopo do poimvijau tokoupo do mangaarap tokou di Koristus, nga tokouno dii iri lobi marong osianan mantad diri kasangkat di tongotulun vokon.
20Nga sabanarno marong, vinijauno di Kinoringan i Koristus mantad di kapatajon, om pinopogulu Isido vinijau, om irino dii pongilaan tokou do vijauon kasangkat i tongotulun di napatai saralom Disido. 21-22Do kapatajan nopo nga mantad di iso tulun, irino iAdam. Om irad nogi dino iri kovijaan diri tulun di napatai nga mantadi di iso tulun, irino i Koristus. Do iradno di tongotulun kopiiso diAdam nga apatai kasangkat, om irad nogi dino i tongotulun kopiisoi di Koristus nga vijauon kavagu kasangkat Disido. 23Nga naaturno iri kovijaan kavagu di pointikid-tikid do tulun, do gulupo i Koristus, om iri nogi i tongotulun songonuvon Disido ontok do korikatan Disido kavagu. 24Om ampa nogi dino do korikot i kiamat do opingkala di Koristus pointikid-tikid di silo savat vinavang#15:24 vinavang: vanavang, irino silo savat lombus do tavan, ko langit monguasa, om iri kikuasa om iri osundu. Om katalibpo mantad diri kosusaan om pataakon nogi dino di Koristus do Kinoringan Tama iri kuasa Disido iri sumiliu do Raja. 25Do i Koristus nopo nga misti do osiliu do Raja gosob do ulakanJo kasangkat iri tongomusu Disido i nakalaJo. 26Om iri musuJo pongovian do kalawonJo, nga irino kapatajan. 27Do nokotulisno siri Kitab do irad diti, “Kasangkat do onuu nopo nga pinosuribak do Kinoringan do nipoulok di Koristus,” ka. Om atalangno dii marong komoion diri tangar do, “Kasangkat do nunuu nopo,” ka, nga aui nakavaja i Kinoringan do pinoinsuribak nunuu nopo diri.#Antangai Buuk Sinding 8:6. 28Om kopinsuribak nopo dino kasangkat i onuu nopo siri di Koristus, om mongoi nogi dino i Koristus minsuribak si di Kinoringan i popoinsuribak kasangkat do nunuu nopo siri Disido, do i Koristus nopo nga i Tanak di Kinoringan. Om i Kinoringan nogi dino nga momorinta kasangkat do onuu nopo.
29Om kavagupo, nong vijauon i tulun di napataino, baru kivaro arati nong mokibatis#15:29 mokibatis: mokibaptais i tulun gumanti do tulun napatai iri au nobotisan.#15:29 nobotisan: noboptoisan Nong oinomodno marong do vijauon i tulun di napatai om baru nogi dii do kivaro sabap do mokibatis iolo gumanti diri tulun napatai. 30Nong au vijauon tokou kavagu, obudu ikoino do soumur kogotuvang ikoi di kororosi do kapatai sabap maja di Koristus. 31Oou kosusuladanku, ioku nopo diti om pointikid-tikid tadau do kogotuvang do kapatajan. Nga sabap do aandaian okui dikovu do aparsaya kou di Koristus Yisus i Tuhan tokou, irino dii do poiloonku ikovu do irad dino kosusaanku. 32Nong mantad di ginavoku kondiri, auso kountunganku do lumavan oku tulun di orongit irad do dupot korongit siti Bandar Ipisus. Nong auno oinomod do vijauon kavagu i tulun do napatai, gaam nogi do,
“Kayo tokou misimbobos laaid,
do apatai tokou suvab,” kangku daa.#Antangai Yasaya 22:13.
33Nga ada do otoro kou di tulun do mitangar do irad dino, do oinomodno iti tinangaran do ka, “Adako kumigavul diolo do kosugutko di gaagaya diolo do araat,” ka. 34Aandai do purimonon mujuno marong om ada kouno pamaal kavagu do duso. Mitangar oku dikovu do apatut kopuriman kou do oikuman, do kivaropo tulun sino dikovu di aupo kotutun do Kinoringan.
Gaagaya di Kojuvan do Ovijau Kavagu Mantad di Kapatajon
35Nga kivaro kama tulun mongoduat do ka, “Potingkukuro i Kinoringan povijau kavagu di tulun di napatai? Om kovijau nopo iolo potingkukuropo dino kojuvan diolo?” kadisido kama. 36Nga songkuro binudu di tulun do mongoduat irad dino, do pongilaan nopo diri nga ondomon i linsou di pasasadon. Mananom tokou nopo do linsou, nga apasapo iri kulupakjo ampa nogi do sumobul iri linsou. 37Om i pasasadon tokou nga linsoui toomod, naku do parai ko sondiangpo i tonomon tokou. Nga okoniko miirad di gaagaya laaid i kososobulo diri, 38nga nitaak di Kinoringan i guvas maja diri kouvangan Disido. Om pointikid-tikid do bansa diri linsou nga nataakan do Kinoringan do guvas kokondiri.
39Om okoniko miirad i kojuvan do tikid-tikid bansa diri kitibo, do sondiang i kojuvan do tulun, om sondiang i kojuvan do dupot, om sondiang i kojuvan do tombolog om sondiang i kojuvan do sada.
40Om irad nogi dino do kivaro vinorun silo suruga om kivaro vinorun siti tana. Nga i kolunduso nopo diri tongovinorun silo suruga nga moisosondiangi, om i kolunduso diri tongovinorun siti tana nga moisosondiangi. 41Om ilo tadau nga sondiang i kolunduso mantad dilo vulan, om ilo korombituon nga sondiangi. Om i tongokorombituon kondiri nga moisosondiang i kolundusojo.
42Om irad nogi dino kovijauon kavagu do kojuvan di tulun di apataino. Do iri nopo kojuvan diri lobongon nga moilo do masa. Nga iri nopo kojuvan di vijauon kavagu nga irino au moilo masa. 43Iri nopo kojuvan di lobongon nga araat aantangan, nga vijauon nopo dino kavagu om iri nogi dino kojuvan do olundus. Iri nopo kojuvan di lobongonno nga oluoi, nga vijauon nopo dino kavagu om iri nogi dino kojuvan do ogirot. 44Kojuvan nopo diri lobongonno nga masipo ponongkojuvan do siti vonuvo, nga vijauon nopo dino kavagu om iri nogi dino ponongkojuvan mantad di Tatod do Kinoringan. Do kivaroi kojuvan mantad siti vonuvo om kivaro nogi kojuvan mantad di Tatod do Kinoringan.
45Do nokotulisno si Kitab do ka, “IAdam nopo di gulu nga irino siniliu do Kinoringan di kitibo,” ka. Nga i Koristus nopo nga i roitan do iAdam di touri,#15:45 touri: toudi om irino Tatod, om Isidono nontodon do kovijaan tokou di auso koovion.#Antangai Kinovorunan 2:7. 46Nga okonko iri kovijaan mantad di Tatod do Kinoringan do nokopogulu, nga irino i kovijaan tokou siti vonuvo, ampa nogi dino iri kovijaan tokou mantad di Tatod do Kinoringan. 47Do ii nopo iAdam di gulu nga vinaal mantad do tana. Nga ii nopo iAdam touri nga mantad si suruga. 48I tongotulun nopo siti vonuvo nga vinaal mantad do tana irad diAdam di pogulu. Nga i tongotulun nopo diri songonuvon di Koristus nga irad di Koristus do tuluni soi suruga. 49Itokou nopo nga pinosugut irad diAdam, i tulun vinaal mantad do tana. Om irad tokou nogi dii do posuguton i kojuvan tokou irad di Koristus, i tulun mantad soi suruga.
50Oou kosusuladanku, komoionku nopo nga iti nopo kojuvan tokou maino nga au kadapat masu siri Kopomorintaan do Kinoringan, do kojuvan nopo diri moilo masa nga au kadapat sumiliu do kojuvan diri au moilo masa.
51Nga rongoono marong iti auponivantang si di tongotulun pogulu do ipoiloku dikovu, do itokou nopo diti nga okoniko kasangkat do apatai, nga imbanon kasangkat i kojuvan tokou. 52Om osikap marong iri do aui oungkirapan, om oimban tokouno ontok do kouni i toburi#15:52 toburi: torumpit di pongovian. Do kouni nopo i toburi diri om i tongotulun iri napataino nga vijauon kavagu om onuan do kojuvan do au moilo matai. Om itokou nopo kasangkat i aparsaya di Koristus nga imbanon, 53sabap iti nopo kojuvan do moilo masa nga misti do gontian iri au moilo masa, om iti nopo moilo matai nga misti do gontian iri au moilo matai. 54Om ogontian nopo dii iti kojuvan di moilo masa diri au moilo masa, om iti kojuvan di moilo matai nga ogontian dino diri au moilo matai, om orikot nogi dino i tinangaran do Kinoringan i nokotulis do ka, “Ausono dii kapatajan do maino kivarono kamanangan,” ka.#Antangai Yasaya 25:8.
55Om, “Ou kapatajan,
ausono kamanangannu.
Ou kapatajan,
ausono dii i kuasanu do pokoruol,” ka.#Antangai Usia 13:14.
56Kuasa nopo do kapatajan di pokoruol nga irino duso, om nontodon nopo do koilaan di duso nga irino Undang-undang Ugama do Joudi. 57Nga monorimakasi tokou marong do Kinoringan do pinamanang tokovi Disido do mantad di Yisus Koristus, i Tuhan tokou.
58Oou kosusuladanku i au kojuuanku, sabap do atantu do kamanang tokou om tatap kouno marong, om ada kouno piimban-imban. Om giatono marong kumaraja di pakarajaan do Tuhan, sabap oilaan mujui do okoniko osia-sia ino tumos muju do muup di karaja do Tuhan.
ទើបបានជ្រើសរើសហើយ៖
1 Korintus 15: LabukPKV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1995, Wycliffe Bible Translators, Inc. All rights reserved.