1 Korintus 16
16
Ponudukan Potingkuro Mongorukut Siin Ponulung do Vokon
1Om atipo ijawapku maino dikovu diri pongoduatan muju dogo pasal potingkuro mongorukut do siin ponulung di tulun vokon di songonuvon di Kinoringan. Nga irad diti bo ino: mongorukut nopo diri siin do ponulung diri tulun vokon di aparsaya nga maja kou nopo diri nokopintudukku di tongopoiuuntunan do tulun di aparsaya silo Vonuvo Golotia. 2Irino do pointikid-tikid do tadau koiso saralom sominggu, irino Tadau Minggu, aandai do sompori-ori kouno potoo do siin kondiri do maja diri pandapatan muju do ponulung muju do vokon. Om rukutonno laaid supaya aui apagon kou mongorukut ontok do korikot oku. 3Korikot oku nopo sino om isaai nopo iri pilion muju nga suuonku do paatod diri siin soi Bandar Yorusalim do ponulung diolo soi, om onuanku nogi iolo do surat kopongintutunan di tongotulun soi. 4Nga nong kivaroi oporlu do ongoionku soi Yorusalim om povojoonku nopo iolo dogo.
Kopoilaan di Poulus do Kaangaian Disido
5Nga mongoi oku nopo sino dikovu om mapit okupo silo Vonuvo Mokodunia, do siloi Mokodunia vajaanku do mongoi sino dikovu. 6Om lumaid-laid okupo kama sino dikovu, ko gosob do katalib i musim tosogit supaya otulung okui dikovu polombus dogo do mongoi siri pakaayanku. 7Nong kouvangani di Tuhan, aarap oku do alaid-laid sino dikovu maino. Aui uvang oku mapit do oruuai.
8Nga siti okupo Bandar Ipisus do maino gosob orikot iri tadau tagajo iri roitan do Pintokusta. 9Do oguu marong kosivatanku kumaraja di karaja tagajo di Tuhan siti nga oguu i lumavan.
10Om korikot nopo i Tomotius sino dikovu nga tandaian mujuno supaya aui rumosi isido, do isoi karajaja si di Tuhan i karaja disido irad diti karajaku. 11Sabap diri, mangaarap oku supaya ausoi tulun do posuribak disido. Om tulungon mujuno polombus isido kaandai-andai, supaya koguli kavagu isido siti dogo; do indad-indadonku isido om i tongokosuladan vokon do korikot.
12Nga kuro nong i sulod tokou iOpulus, nga soumuri do pokionuonku isido supaya maja di tongokosuladan vokon do mongoi sino dikovu, nga aupo dii atantu do mongoi isido maino. Nga mongoi kama isido nong kivaropo kosivatan.
Pongovion Tangar di Poulus
13Pipupurimanai mujuno, om patatapo mujuno ino kaparsayaan muju. Opusu kouno om pogiroto mujuno ino kaparsayaan muju. 14Onuu nopo i karaja muju nga pivojoon mujuno do ginavo di au kojuu di tulun vokon.
15Oou kosusuladanku, kavagupo, nokoilo kovi kama di Sotipanas moisanganganak do iolono nokopogulu naparsaya di Koristus sino Vonuvo Akaya, om gosob do naavi-avi ginavo diolo monulung di tongotulun do songonuvon di Kinoringan. 16Sabap diri tunduk kouno maamarong di tulun irad dino om nogi pointikid-tikid do tulun diri koruang diolo kumaraja gosob do noujan monulung diolo. 17Om aandaian okuno marong di kinorikatan di Sotipanas om i Portunatus om iAkaikus mantad sino dikovu, do iolo nga irad dikovu siti dogo. 18Do iolono nakapanggor do ginavoku om nogi i ginavo muju. Sabap diri do urumato mujuno i tulun do irad dino.
19Kasangkat do poiuuntunan di tulun aparsaya siti Vonuvo Osia nga pokirim salam sino dikovu. Om iOukil duvo di savojo i Porikila om kasangkat di tulun i muntun si valai diolo nogi nga aavi-avi ginavo diolo do pokirim salam dikovu. 20Om kasangkat do kosusuladan vokon siti Bandar Ipisus nga pokirim salam sino dikovu.
Om poisalam-salam kouno inong di pananalam di poisusuladan saralom di Koristus.
21Ioku nogi i Poulus do pokirim salam dikovu om tunturukuno kondiri monulis diti salamku.
22Isaai nopo obonsi di Tuhan om ovusungno iri. Maranata, irino, “Ou Tuhanja, rikotno!” ka.
23Mokianu oku di Tuhan Yisus supaya soumur opuavang mamarakat dikovu.
24Au kojuuanku ikovu kasangkat saralom di Koristus Yisus. Amin.
Mantad dogo,
Poulus
ទើបបានជ្រើសរើសហើយ៖
1 Korintus 16: LabukPKV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1995, Wycliffe Bible Translators, Inc. All rights reserved.