1 Korintus 11
11
1Sugut kouno dogo irad dogo do sumugut di Koristus.
Monontugun do Sumambayang
2Karajou okui dikovu do au koolingan oku dikovu, om koduvo dino atatap kouno monguut di ponudukan diri pinolombusku si dikovu. 3Nga aandaian oku do kopingiilo kou do i Kinoringanno i kotua di Koristus, om i Koristusno i kotua di pointikid-tikid di kusai om i kusaino i kotua di tongondu. 4Pointikid-tikid di kusai do monontupi do sumambayang ko popolombus di nituduk do Kinoringan si ginavojo om irino popoikum di Koristus, i kotua disido. 5Om pointikid-tikid do tongondu di au monontugun do sumambayang ko popolombus di nituduk di Kinoringan si ginavojo om iri nogi popoikum di kusai, i kotua disido. Do tongondu nopo do irad diri nga miiradi di tongondu di binurugalan. 6Do kivaro nopo tongondu do au monontugun nga gaam nogi do guntingon disido i tobukjo. Nga nong oikuman nopo iri do nogunting ko noburugalpo nga gaam nogi do monontugun. 7Nga kusai nopo om aui apatut do monontupi do sumambayang sabap kusaino i popointalang do gaagaya om kagajaan do Kinoringan. Nga tongondu nopo om popointalang di kagajaan do kusai. 8Do okoniko i tongondu nontodon do kusai nga i kusai nontodon di tongondu. 9Om kinovorunan nopo do kusai nga okoniko monulung di tongondu, nga i tongondu nono diri do vinorun do ponulung di kusai. 10Irino sabap do apatut marong do monontugun i tongondu do pongintutunan do tumunduk isido di kusai, i kotua disido, supaya asanang i ginavo di tongomoloikat do koontong do irad dino. 11Nga insan pun irad dino, itokou nopo iri aparsaya di Tuhan nga oporlu do moiuup-uup, do okonko kivaro kusai nong ausoi tongondu, om okonko kivaro tongondu nong ausoi kusai. 12Do insan pun kusai nontodon daa di tongondu, nga kusai pun tongondui minaganak om kasangkat do onuu nopo nga Kinoringani nontodon.
13Timbango mujuno pogi om oilaan mujui do aui apatut i tongondu sumambayang do Kinoringan do auso tugun. 14Nokoilo kouno do mantad di koubasanan do tulun do iri nopo kusai di alanggau tobuk nga popoikum disido kondiri. 15Nga tongondu nopo do alanggau tobuk nga irino kasanangan do tongondu sabap irino nitaak mantad do Kinoringan do ponopuk di tulu disido. 16Nga kivaro nopo tulun do sumival diti komoionku om itino tangaronku disido, do itokou nopo nga kasaangkat poiuuntunan di tulun do Kinoringan nga ausono koubasan do sondiang mantad dino.
Pangakanan do Pangandaman di Kinapatajan di Tuhan Yisus
17Iti nopo ponudukanku om okoniko pangarajouku#11:17 pangarajou: pongompod dikovu, do poiuuntunan muju nopo sino nga okoniko popoimbulai di aandai nga i araat. 18Do koiso, nokorongou oku pasal dikovu do ontok do kumumpul kou do sumambayang, moititimbai kou sooro, om aparsaya okui saparu tinangaran dino. 19Do mimang kivaro poisisivalan sino dikovu supaya kointalangi nong isai iri tulun di oinomod om isai iri au. 20Om ontok do kumumpul kou, om kinountunan muju nopo diri nga okoniko mangakan do mongondom kou di kinapatajan di Tuhan. 21Do ountun kou nopo, mirimpogulu kou om sompori-ori kou nopo mangakan di taakanon kondiri sampai do kivaro vitilon om kivaro nogi do aavuk. 22Kivaroi gia valai muju kondiri do pangakanan om pongiupan. Nokuro do au podulionon muju i poiuuntunan do tulun do Kinoringan, om nogi popoikum kou di tulun di omiskin? Onupo tangaronku dikovu, do rojoonku naku ikovu? Nga au okui mangarajou dikovu do irad dino.
23Do nombo nopo iri nituduk dogo do Tuhan pasal do pangandaman tokou di kinapatajanJo nga irino polombusonku potuduk sino dikovu. Ontok di sodop di pinojual i Tuhan Yisus siri tulun om paganuno dii Isido di kuui, 24om ponorimakasino dii Isido di Kinoringan om poikokib-kokibo nogi dii iri kuui, om kaDisido, “Itino kojuvanKu do pataakonKu gumanti dikovu. Vojoo mujuno do irad diti do pangandaman muju Dogo,” kadi Yisus. 25Om kaakanpo dii iolo diri kuui om ongoiono dii di Yisus iri sangkir diri pongiupan, irad nogi diri kuui, om ponorimakasino dii Isido di Kinoringan, om pataako nogi dii Disido di tongotulunJo, om kaDisido, “Iti nopo iupon muju siti sangkir nga i raaKu do pomogirot di pongojonjian di kavavagu mantad di Kinoringan. Sombibia nopo do mongiup kou siti sangkir om vojoo mujuno do irad diti do pangandaman muju Dogo,” kadi Yisus. 26Do sombibia nopo do kapangakan kou diri kuui om kopongiup kou siri sangkir, irino do papaabar kou diri kinapatajan do Tuhan gosob do korikatan Disido kavagu.
27Sabap diri do isaai nopo i mangakan diri kuui om mongiup diri siri sangkir di au kangaam do mangakan, om kasalano isido di kojuvan om i raa di Tuhan, irino do irad do mamatai isido kavagu di Tuhan. 28Nga misti do purimononpo di tulun nong kivaro dusojo. Nong kivaro nopo om mokiampunpo isido, om ampa nogi do mangakan di kuui om mongiup siri sangkir. 29Do tulun nopo di mangakan di kuui om mongiup di vaig do anggur do au nokoilo do komoion diri do irino kinapatajan di Tuhan, nga misingkondiri isido do porikot di ukuman siri kojuvanjo kondiri. 30Irino sabap do oguu dikovu oluoi kojuvan om monontoruol om kivaro nogi piipiro dikovu do napatai. 31Nga nong misingkondiri tokou momurimon do kivaro duso si ginavo tokou om au tokovi oukuman do Kinoringan. 32Nga ontok do oukuman tokou di Tuhan, nga pokorualan tokou Disido do mangajar noopo supaya au tokovi kavaja di tongotulun siti vonuvo do oukuman sabap do au aparsaya.
33Oou kosusuladanku, irad nopo diri sombia do muntun kou do mangakan diri kuui do mongondom di kinapatajan di Tuhan, nga aandai do mangandadpo di vokon do ountun om mangakan kou nogi. 34Om nong kivaro nopo vitilon om aandai do mangakanpo mogulu si valai kondiri supaya au kovi oukuman do Kinoringan di maso do muntun kou do sumambayang.
Nga ii nopo sondiang mantad diri om oturonku nogi dino do korikot oku sino.
ទើបបានជ្រើសរើសហើយ៖
1 Korintus 11: LabukPKV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1995, Wycliffe Bible Translators, Inc. All rights reserved.