1 Korintus 12
12
Sinundu di Nitaak di Tatod di Kinoringan
1Oou kosusuladanku, itipo kavagu pasal do sinundu nitaak di Tatod di Kinoringan, aandaian oku do kopingiilo kou marong inombo iri oinomod do pasal kosunduvo diri. 2Oilaan mujui mantad di kaapir koupo om pinalid kou sampai do nagajat kou sumamba di patung iri auso kovijaan. 3Om irino kopoilaanku dikovu, do tulun nopo diri tinudukan di Tatod do Kinoringan om auno mitangar do pokovusung di Yisus. Om mangakun i tulun do irad diti, “I Yisus nopo nga i Tuhanku,” kadisido, sabap do tinudukan isido di Tatod do Kinoringan.
4Moisosondiang i sinundu nitaak di Tatod di Kinoringan, nga isoi i Tatod di Kinoringan do manaak diri sinundu. 5Om moisosondiang i karaja nga isoi i Tuhan Yisus do pakarajaan tokou. 6Om moisosondiang nogi i kopintaro do tulun do kumaraja, nga isoi i Kinoringan manaak do kasangkat diri kopintaro do pointikid-tikid do tulun, supaya kumaraja do onuu nopo karaja disido.
7Om pinopointalang i karaja di Tatod di Kinoringan si pointikid-tikid ginavo tokou supaya om osiliu do kountungan tokou kasangkat. 8Do kivaro tulun di onuan di Tatod di Kinoringan do kopintaro monuduk do tulun, om isoi iri Tatod di Kinoringan do manaak di tulun vokon di sinundu supaya koilo papatarang di tongotoilaan di ongoralom. 9Om Isido nogi nga manaak di tulun vokon do ginavo do aparsaya marong; om isoi i Tatod di Kinoringan do manaak di tulun vokon di sinundu supaya mongolingos do toruol. 10Om iri tulun vokon nogi nga onuan di Tatod di Kinoringan di sinundu do mimvavaal di kosunduvan; om i tulun vokon nga onuani Disido di sinundu do koilo popolombus di nituduk do Kinoringan si ginavojo; om i tulun vokon nogi nga onuan Disido di sinundu do mongintutun nong sinombo iri sinundu nitaak di Tatod di Kinoringan om sinombo iri okon; om i tulun vokon nogi nga onuan Disido di sinundu do koilo mitangar do moisosondiang tinangaran; om i tulun vokon nogi nga onuan Disido di sinundu do papaarati di komoion diri moisosondiang tinangaran. 11Om kasangkat dino nga iso iri Tatod di Kinoringan do minangaraja siri di tongotulun maja di kouvangan Disido do mamaagi di sinundu kangaam diri pointikid-tikid do tulun.
Isoi i Kojuvan nga Oguu i Boogian
12I Koristus nopo nga irad do iso kojuvan do isoi i kojuvan tokou nga oguu i boogian, om insan oguupo i boogian nga isoi i kojuvan tokou. 13Om irad tokou nogi dii, do isoi i Tatod di Kinoringan do nibatis#12:13 nibatis: nibaptais do posiliu daton#12:13 daton: ditokou do iso kojuvan, insan tulun do Joudi, ko i tulun di okonko bansa Joudi, ko i tulun di inuripon ko iipo tulun di obojou, nga isoi i Tatod di Kinoringan do niasu do Kinoringan si ginavo tokou.
14Kojuvan tokou nopo nga okonko isoi boogian, nga oguu i boogianjo. 15Do nong mitangar i takod do, “Au okui dogo koompot do kojuvan do okoni longon oku,” kadisido, nga oinomod naku do au koompot i takod do kojuvan? 16Om nong mitangar i tolingo irad om irad diri do, “Au okui koompot do kojuvan do okoni mato oku,” ka, nga oinomod dii naku iri? 17Do nong mato kasangkat i kojuvan nga auso dii pangarangaan diri. Om nong tolingo nopo kasangkat i kojuvan nga auso dii poningudan diri. 18Nga naaturno marong do Kinoringan i pasangan di tikid-tikid boogian do kojuvan maja di kogunaanjo mivaja di kouvanganJo. 19Do nong kasangkat nopo diri do isoi boogian om ausono dii kojuvan. 20Nga oinomod marong do tongoboogian nopo om oguu nga isoi kojuvan.
21Jadi nong irad dino, au buli i mato mitangar di palad do, “Auso gunaku dikau!” ka, om i tulu mitangar di takod do, “Auso gunaku dikau!” ka. 22Nga iri nopo iri boogian di au sumongkuro ogirot nga oporlu marong di kojuvan. 23Om iri nopo boogian di kojuvan tokou di osoromo tokou do au sumongkuro oporlu nga makin nogi dii do kapamakajan tokou iri supaya aandai iri. Om iri nopo i koikum-ikum nga makin nogi do jajagawon om tirungan tokou. 24Nga boogian nopo di kojuvan tokou di aandaino nga auno oporlu do taandaian tokoupo iri. Nga naaturno do Kinoringan laaid i kojuvan tokou supaya taandaian tokou marong i boogian tokou di au sumongkuro aandai, 25om aui kopoiririjang i kojuvan do iri moisosondiang tongoboogian nga moiuup-uup do kumaraja. 26Om nong orualan nopo iri iso boogian nga kopuriman nogi orualani i kinasangkatan; om nong rojoon#12:26 rojoon: ompodon nopo iri iso boogian nga aandaiani i kinasangkatan.
27Irad nopo diri nga itokou nopo diti nga kojuvan di Koristus, om pointikid-tikid tokou nga nosiliu do iso boogian di kojuvan Disido. 28Om natantuno di Kinoringan i karaja kinasangkatan do tulun saralom do poiuuntunan Disido: koiso nopo nga i tongosusuuon, koduvo nopo nga i tongonabi, i popolombus di tinangaran do Kinoringan, om kotolu nopo nga i monunuduk do tinangaran do Kinoringan. Om kavagu nopo nga i mimvavaal do kosunduvan, om iri nogi dii i noonuan do kuasa mongolingos do toruol do tulun, ko i monunulung di tulun vokon, ko i momimimpin ko i koilo mitangar do moisosondiang tinangaran. 29Om mimang okonko kasangkat tokou kumaraja do susuuon, ko nabi ko monunuduk do tinangaran do Kinoringan. Om okonko kasangkat tokou do onuan di kuasa supaya mimvavaal do kosunduvan; 30om okonko kasangkat tokou kikuasa mongolingos do toruol; om okonko kasangkat tokou koilo mitangar do moisosondiang tinangaran; om okonko kasangkat tokou koilo papaarati di komoion diri moisosondiang tinangaran. 31Sabap diri do logos kouno mokianu di sinundu diri aandai marong, iri nitaak di Tatod di Kinoringan.
Gaagaya do Au Kojuu do Vokon
Om tudukanku ikovu do iso gaagaya do aandai marong mantad di vokon.
ទើបបានជ្រើសរើសហើយ៖
1 Korintus 12: LabukPKV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1995, Wycliffe Bible Translators, Inc. All rights reserved.